ស្ត្រីមានផ្ទៃពោះដែលមានប័ណ្ណសមធម៌ ឬប័ណ្ណអាទិភាព នឹងទទួលបានការឧបត្ថម្ភចំពោះខ្លួនគាត់ផ្ទាល់ និងកូនតូចអាយុក្រោម 2ឆ្នាំ ចាប់ពីថ្ងៃទី1 ខែមិថុនា ឆ្នាំ2019 នេះតទៅ។ នេះបើយោងតាមប្រកាសអន្តរក្រសួង ស្តីពីការអនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកូនក្រោមអាយុ 2ឆ្នាំ នៃគ្រួសារដែលមានប័ណ្ណសមធម៌ ឬប័ណ្ណអាទិភាព រវាងក្រសួងសេដ្ឋកិច្ច និងហិរញ្ញវត្ថុ និងក្រសួងសុខាភិបាល។
គោលបំណងសំខាន់នៃការបង្កើតកម្មវិធីឧបត្ថម្ភសាច់ប្រាក់នេះ គឺធ្វើឡើងក្នុងគោលបំណងលើកកម្ពស់សុខុមាលភាពមាតា និងទារក និងចូលរួមចំណែកដោះស្រាយបញ្ហាកង្វះអាហារូបត្ថម្ភរបស់កុមារតូចៗក្នុងគ្រួសារក្រីក្រ ចាប់តាំងពីនៅក្នុងផ្ទៃរហូតដល់អាយុ 2ឆ្នាំ ដើម្បីជំរុញការលូតលាស់ទាំងកាយសម្បទា និងបញ្ញាស្មារតី។
តាមការបញ្ជាក់នៅក្នុងប្រកាសអន្តរក្រសួងនេះបានបង្ហាញថា ប្រាក់ឧបត្ថម្ភដែលត្រូវផ្តល់ជូននៅពេលស្ត្រីមានផ្ទៃពោះ ដែលមកទទួលសេវានៅមូលដ្ឋានសុខាភិបាលសាធារណៈជាដំណាក់កាលមានដូចជា៖
ដំណាក់កាលទី1៖ ផ្តល់ប្រាក់ឧបត្ថម្ភចំណួន 40,000រៀល(បួនម៉ឺន)ក្នុង 1ដងសម្រាប់ការមកទទួលសេវាពិនិត្យផ្ទៃពោះដែលផ្តល់ជាអតិបរមាចំនួន 4ដង មុនពេលសម្រាលកូន។
ដំណាក់កាលទី2៖ ផ្តល់ការឧបត្ថម្ភចំនួន 200,000រៀល(ម្ភៃម៉ឺន) តែម្តងគត់នៅពេលសម្រាលកូន។
ដំណាក់កាលទី3៖ ផ្តល់ការឧបត្ថម្ភចំនួន 40,000រៀល(បួនម៉ឺន)ក្នុង 1ដង ហើយដែលនឹងផ្តល់ជូនអតិបរមាចំនួន 10ដង។ ក្នុងនោះ 3ដង នៅពេលមកទទួលសេវាពិនិត្យសុខភាព ក្រោយពេលសម្រាលកូន និង 7ដងនៅពេលយកកូនមកទទួលថ្នាំបង្ការរហូតដល់កូនអាយុ 2ឆ្នាំ។
ចំពោះករណីដែលកូននោះត្រូវរលូត ការផ្តល់ប្រាក់ឧបត្ថម្ភនឹងផ្តល់ជូនក្នុងលក្ខខណ្ឌដូចជា៖
ទី1៖ ផ្តល់ប្រាក់ 40,000រៀល(បួនម៉ឺន)តែ 1ដងគត់ ក្នុងករណីគភ៌អាយុក្រោម 12សប្តាហ៍។
ទី2៖ ផ្តល់ប្រាក់ 40,000រៀល(បួនម៉ឺន)ក្នុង 1ដង ដែលផ្តល់អតិបរមាចំនួន 2ដង ក្នុងករណីគភ៌អាយុចាប់ពី 12សប្តាហ៍ ដល់24សប្តាហ៍។
ក្នុងករណីកូនស្លាប់ក្នុងពេលសម្រាល ឬក្រោយពេលសម្រាល ប្រាក់ឧបត្ថម្ភនេះត្រូវបន្តផ្តល់ជូនដូចជា៖
ទី1៖ ចំនួន 200,000រៀល(ម្ភៃម៉ឺន) នៅពេលសម្រាល។
ទី2៖ ចំនួន 40,000រៀល(បួនម៉ឺន)ក្នុង 1ដង ដែលផ្តល់ជាអតិបរមាចំនួន 3ដង នៅពេលមកទទួលសេវាពិនិត្យសុខភាពក្រោយពេលសម្រាលកូន។
ក្នុងករណីម្តាយស្លាប់នៅពេលសម្រាល ប្រាក់ឧបត្ថម្ភនេះត្រូវផ្តល់ជូនអាណាព្យាបាលស្របច្បាប់ ឬអ្នកដែលមានសិទ្ធិស្របច្បាប់ ឬអ្នកដែលនាំកូនមកទទួលសេវា ដូចខាងក្រោម៖
ទី1៖ 200,000រៀល(ម្ភៃម៉ឺន)សម្រាប់ការសម្រាល។
ទី2៖ 40,000រៀល(បួនម៉ឺន)ក្នុង 1ដង ដែលផ្តល់ជូនជាអតិបរមា 10ដងនៅពេលយកកូនមកទទួលសេវាថែទាំសុខភាពរហូតដល់កូនអាយុ 2ឆ្នាំ៕
