ភ្នំពេញៈ ក្រុមហ៊ុនជប៉ុនបានសម្រេចចិត្តបោះទុនវិនិយោគលើទឹកប្រាក់ប្រមាណ 1លានដុល្លារអាមេរិកដើម្បីបើកកសិដ្ឋានចិញ្ចឹមជ្រូក Kakegawa Yeat Pig ជាកសិដ្ឋានចិញ្ចឹមជ្រូកដ៏ល្បី និងជាប់ចំណាត់ថ្នាក់លេខ1 នៅប្រទេសជប៉ុន។
ម្ចាស់កសិដ្ឋានចិញ្ចឹមជ្រូក KakegawaYeat Pig លោក Matsumoto Hiroaki បានឲ្យដឹងក្នុងពិធីប្រគំតន្ត្រី និងផ្សព្វផ្សាយវប្បធម៌ជប៉ុនកាលពីថ្ងៃម្សិលមិញនេះថា ការរៀបចំកម្មវិធីប្រគំតន្ដ្រីនេះគឺដើម្បីផ្សព្វផ្សាយពីវប្បធម៌ និងឧបករណ៍ភ្លេងរបស់ជប៉ុនឲ្យប្រជាពលរដ្ឋខ្មែរបានស្គាល់ ក៏ដូចជាស្វែងយល់អំពីម្ហូបអាហាររបស់ជប៉ុនផងដែរ ពិសេសគឺផ្ដោតលើសាច់ជ្រូកដែលផលិតចេញពីកសិដ្ឋានរបស់ខ្លួន ស្របពេលលោកគ្រោងបោះទុនប្រមាណ១លានដុល្លារ ដើម្បីបើកកសិដ្ឋានចិញ្ចឹមជ្រូកស្ដង់ដាអន្ដរជាតិលើកដំបូងនៅកម្ពុជា ។
លោកបន្ដទៀតថា ក្រោយបញ្ចប់កម្មវិធីប្រគំតន្ដ្រីដ៏ធំខាងលើ លោកនឹងបន្ដសាកល្បងចិញ្ចឹមជ្រូកដោយប្រើចំណីធម្មជាតិនៅកម្ពុជាដើម្បីបញ្ច្រាបសាច់ជ្រូកដ៏មានគុណភាពរបស់ខ្លួនទៅក្នុងទីផ្សារកម្ពុជា ។ យ៉ាងណាមិញលោកត្រូវរង់ចាំការពិសោធទទួលបានជោគជ័យជាមុនសិន បន្ទាប់មកទើបលោកសុំអាជ្ញាប័ណ្ណពីក្រសួងកសិកម្ម ដើម្បីបើកកសិដ្ឋានស្របច្បាប់ត្រឹមត្រូវនាពេលអនាគត ៕
