ភ្នំពេញៈ មន្ត្រីជាន់ខ្ពស់ក្រសួងទេសចរណ៍បានឱ្យដឹងថា ក្នុងរយៈពេល7ខែឆ្នាំនេះចំនួនប្រជាជនកម្ពុជាចេញទៅកម្សាន្តនៅក្រៅប្រទេសមានជិត1លាននាក់ កើនឡើង22ភាគរយធៀបរយៈពេលដូចគ្នាកាលពីឆ្នាំមុន។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងឲ្យដឹងតាមទូរស័ព្ទនាព្រឹកថ្ងៃទី12 កញ្ញានេះថា ក្នុងរយៈពេល7ខែឆ្នាំនេះ ប្រជាជនខ្មែរ 998,000នាក់បានចេញទៅកម្សាន្តនៅក្រៅប្រទេស។ ប្រទេសដែលពួកគេចេញទៅភាគច្រើនរួមមានប្រទេសថៃ វៀតណាម ម៉ាឡេស៊ី សាំងហ្កាពួរ និងទៅទស្សនានៅប្រទេស ជប៉ុនក៏មានការកើនឡើងខ្ពស់ផងដែរ។ លោកបន្តថា ការកើនឡើងនូវការចេញដើរកម្សាន្តនៅក្រៅប្រទេសរបស់ប្រជាជនខ្មែរនេះ គឺឆ្លុះបញ្ចាំងពីការកើនឡើងនូវប្រាក់ចំណូលរបស់ប្រជាពលរដ្ឋកម្ពុជាដែលកាន់តែប្រសើរឡើង។
លោកបន្តថា កាលពីឆ្នាំមុនភ្ញៀវទេសចរកម្ពុជាចេញទៅទស្សនានៅក្រៅប្រទេសមានចំនួនប្រមាណ1លាននាក់ និងរំពឹងកើនឡើងជាង1លាននាក់នៅឆ្នាំនេះ ដោយសារកំណើននៃជីវភាពរបស់ប្រជាពលរដ្ឋ ហើយប្រជាជនខ្មែរនិយមដើរកម្សាន្តច្រើននៅក្រៅប្រទេស។
ជាមួយនឹងការចេញទៅកម្សាន្តនៅប្រទេសក្នុងតំបន់កើនឡើង កម្ពុជាក៏ទទួលបានកំណើនភ្ញៀវទេសចរអន្តរជាតិផងដែរ ដោយក្រសួងទេសចរណ៍បានព្យាករថា កម្ពុជានឹងទទួលបានភ្ញៀវទេសចរអន្តរជាតិកើនឡើងដល់5.4លាននាក់ ក្នុងនោះមានភ្ញៀវទេសចរចិនចំនួន1លាននាក់។
លោក ធួន ស៊ីណាន ប្រធានសហព័ន្ធទេសចរណ៍កម្ពុជាបានថ្លែងថា លោកមិនហ៊ានបដិសេធអំពីការលើកឡើងនេះទេ ប៉ុន្តែស្ថានភាពជាក់ស្តែងមានក្រុមហ៊ុនធំៗជាច្រើនបានលុបចោលដំណើរកម្សាន្តនៅក្រៅប្រទេស ដោយសារស្ថានភាពសេដ្ឋកិច្ចមិនល្អ ប៉ុន្តែប្រសិនជាបូកចំនួនភ្ញៀវទេសចរនឹងចំនួនអ្នកចេញទៅព្យាបាលជំងឺនៅក្រៅប្រទេសផងឃើញចំនួនភ្ញៀវទំហំប៉ុណ្ណឹងលោកមានការយល់ស្រប ព្រោះចំនួនប្រជាពលរដ្ឋកម្ពុជាចេញទៅព្យាបាលជំងឺនៅប្រទេសវៀតណាម និងប្រទេសថៃបានកើនឡើងយ៉ាងគំហុក។
លោកបន្តថា ប្រជាពលរដ្ឋខ្មែរចេញទៅព្យាបាលជំងឺនៅវៀតណាមតាមច្រកបាវិត ច្រកត្រពាំងស្រែ និងច្រកត្រពាំងផ្លុង និងចេញតាមច្រកអូរស្មាច់ទៅព្យាបាលជំងឺនៅមន្ទីរពេទ្យសុរិន្ទ្រប្រទេសថៃមានមិនក្រោម500នាក់ទេក្នុងមួយថ្ងៃ។
លោក ធួន ស៊ីណាន បានបន្តថា ការចេញទៅកម្សាន្តនៅប្រទេសគេ គឺមានផលចំណេញពីរ ទី1 ប្រជាជនខ្មែរអាចមើលឃើញពីការអភិវឌ្ឍនៅប្រទេសរបស់គេ និងអាចយកគំនិតមកចូលរួមអភិវឌ្ឍប្រទេសរបស់ខ្លួនវិញ និងទី2 ជាការបង្ហាញថា កម្ពុជាមិនរង់ចាំតែទទួលភ្ញៀវទេសចរបរទេសនោះទេ តែវាបង្ហាញឱ្យឃើញថា ប្រជាជនខ្មែរក៏មានជីវភាពធូរធារអាចដើរកម្សាន្តនៅក្រៅប្រទេស បានស្មើមុខស្មើមាត់នឹងប្រជាជននៃប្រទេសក្នុងតំបន់ផងដែរ៕
