ការងារស្ម័គ្រចិត្ត ជាការងារដែលសិស្សនិស្សិតមួយចំនួនធំមិនសូវចូលចិត្តធ្វើ ព្រោះមិនទទួលបានផលច្រើនភ្លាមៗតាមរយៈការទទួលបានចំណូល ឬទទួលបាននូវកិត្តិយសសម្រាប់ខ្លួនឯងភ្លាមៗនោះទេ។
លោកស្រី សាយ៉ា លីនដា មន្ត្រីនៃក្រសួងមុខងារសាធារណៈបានលើកឡើងថា ការងារស្ម័គ្រចិត្ត គ្រាន់តែជាចំណុចចាប់ផ្តើមនៃជីវិតការងារតែប៉ុណ្ណោះ។ ថ្វីត្បិតតែការងារស្ម័គ្រចិត្តមិនផ្តល់ផល ឬមិនផ្តល់លុយកាក់ច្រើនភ្លាមៗដល់សិស្ស និស្សិតក៏ពិតមែន តែវាជាកាងារដែលអាចទាញយកប្រយោជន៍ច្រើនសម្រាប់ការងារនាថ្ងៃអនាគត។
លោកស្រីបាននិយាយថា៖ «ធ្វើការងារស្ម័គ្រចិត្តមួយចំនួនអាចមិនសូវត្រូវនឹងជំនាញដែលយើងចង់ធ្វើនៅថ្ងៃអនាគត តែគុណប្រយោជន៍របស់វាផ្នែកខ្លះ អាចជាចំណុចអភិវឌ្ឍជំនាញរបស់យើងបានយ៉ាងល្អដោយមិនដឹងខ្លួន»។
ស្រដៀងគ្នានេះដែរ និស្សិតដែលធ្លាប់ជាប់អាហារូបករណ៍ទៅសិក្សានៅបរទេស លោក ឌុច ឡាលីន បានលើកឡើងថា ការងារស្ម័គ្រចិត្តក៏មានទំនាក់ទំនងជិតស្និតជាមួយនឹងអាហារូបករណ៍នៅបរទេសផងដែរ ព្រោះថាការងារស្ម័គ្រចិត្តអាចធ្វើឱ្យយើងមានបទពិសោធន៍នៅក្នុងសង្គមជាក់ស្តែង ហើយអ្នកជ្រើសរើសអាហារូបករណ៍ក៏ត្រូវការមនុស្សដែលមានបទពិសោធន៍ការងារនេះខ្លះដែរ។
លោក ឌុច ឡាលីន បាននិយាយថា៖ «ប្រសិនបើចង់ជាប់អាហរូបករណ៍ទៅសិក្សានៅបរទេស សូមកុំគិតថាធ្វើការងារស្ម័គ្រចិត្តដើម្បីតែបង្ហាញគេជ្រើសរើស តែអ្វីដែលសំខាន់គឺ ការចេះទាញយកបទពិសោធន៍ជីវិតជាក់ស្តែងពីពិភពការងារដែលធ្លាប់ធ្វើ ដើម្បីចំណេះដឹងជាក់ស្តែងសម្រាប់ជីវិត ព្រោះអាហារូបករណ៍គឺគេជ្រើសរើសមនុស្សណាដែលមានចិត្តចង់ជួយសង្គមពិតប្រាកដ»៕
