ការសិក្សា 2 ឬ3 មហាវិទ្យាល័យក្នុងពេលតែមួយ ជារឿងដែលនិស្សិតនៅកម្ពុជា ពេញនិយមណាស់នៅពេលបច្ចុប្បន្ននេះ ដោយអ្នកខ្លះជ្រើសរើសយកមហាវិទ្យាល័យជំនាញមួយ និងភាសារ ឬជំនាញណាដែលគេគិតថាមានគេរៀនច្រើនជាជម្រើសបន្ទាប់បន្សំ។
ពាក់ព័ន្ធនឹងបញ្ហានេះ ស្ថាបនិកនៃសាលា AIS និង AII លោកឧកញ៉ា គួច ម៉េងលី បានលើកឡើងថា និស្សិតកម្ពុជាគួរជ្រើសរើសសិក្សាតែមួយមហាវិទ្យាល័យបានហើយបើចង់អភិវឌ្ឍខ្លួនបានលឿន ព្រោះការសិក្សាមហាវិទ្យាល័យច្រើនអាចធ្វើឱ្យយើងរវល់ខ្លាំង ហើយមិនមានពេលគ្រប់គ្រាន់ដើម្បីស្រាវជ្រាវពីមេរៀនដែលស៊ីជម្រៅ និងស្ថានភាពជាក់ស្តែងនៃការអនុវត្តនៅក្នុងពិភពការងារ។
លោកឧកញ៉ា គួច ម៉េងលី បានិយាយថា៖ «ក្មួយៗគួរមុជឱ្យជ្រៅ បុកគ្រឹះឱ្យមាំ ហើយខិតខំប្រឹងប្រែងរៀនអ្វីមួយឱ្យច្បាស់ បន្ទាប់មកប្រឡូកជាមួយនឹងការងារជាក់ស្តែងដើម្បីទទួលបានបទពិសោធន៍ និងរៀនពីការងារឱ្យបានច្បាស់លាស់»។
លោក សោម សុធា ប្រធានផ្នែកបណ្តុះបណ្តាលនៃក្រុមហ៊ុន Forvel Camodia បានលើកឡើងថា ការសិក្សានៅក្នុងមហាវិទ្យាល័យច្រើនក្នុងពេលតែមួយអាចធ្វើឱ្យយើងមិនមានពេលគ្រប់គ្រាន់ក្នុងការចូលប្រឡូកក្នុងការងារ ព្រោះថាបើយើងរៀនច្រើនមហាវិទ្យាល័យ យើងនឹងចំណាយថាមពលច្រើនខ្លាំងទៅលើការសិក្សាតែទ្រឹះស្តី តែស្ថានភាពជាក់ស្តែងយើងអាចនៅឆ្ងាយពីចំណុច ហើយតាមមិនសូវទាន់។ ផ្ទុយទៅវិញ ប្រសិនបើយើងសិក្សាលើជំនាញណាមួយដែលច្បាស់លាស់ និស្សិត និងអាចមានពេលវេលាច្រើនធ្វើការងារទាំងឡាយណាដែលខ្លួនពេញចិត្ត ដូចជាធ្វើការងារស្ម័គ្រចិត្ត ឬចូលបម្រើការងារក្នុងស្ថាប័នណាមួយដែលត្រូវនឹងជំនាញ បើទោះបីជាការងារដំបូងនោះមិនមែនជាការងារសំខាន់ភ្លាមៗក៏ដោយ៕
