ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានថ្លែងថា កម្ពុជាជាប្រទេសតូចមួយក៏ពិតមែន ប៉ុន្តែកម្ពុជា ជាប្រទេសដែលមានការអភិវឌ្ឍយ៉ាងឆាប់រហ័ស គួរឱ្យកត់សម្គាល់មួយ នៅក្នុងតំបន់អាស៊ីអាគ្នេយ៍ ដោយសារវិស័យពាណិជ្ជកម្មកម្ពុជា បានរួមចំណែកយ៉ាងសំខាន់ក្នុងការអភិវឌ្ឍ និងជំរុញកំណើនសេដ្ឋកិច្ច។
ឯកឧត្តមបានថ្លែងក្នុងសន្និសីទព័ត៌មាន ដែលរៀបចំឡើង នៅក្នុងពិធីតាំងពិព័រណ៍សម្លៀកបំពាក់ “APPAREL SOURCING PARIS 2017” នៅក្រុងប៉ារីស ប្រទេសបារាំងថា ការនាំចេញរបស់កម្ពុជា មានការកើនឡើងជាលំដាប់ ជាពិសេសការនាំចេញក្រោមប្រព័ន្ធអនុគ្រោះ “Everything But Arms (EBA)” ដែលប្រព័ន្ធនេះបានអនុញ្ញាតឱ្យកម្ពុជា អាចនាំចេញទំនិញគ្រប់ប្រភេទ (លើកលែងតែអាវុធ) ទៅកាន់សហគមន៍អឺរ៉ុប ដោយគ្មានបង់ពន្ធនិងជាប់កាតព្វកិច្ចផ្សេងៗនោះទេ ។
ក្រោមប្រព័ន្ធអនុគ្រោះ GSP/MFN ផងដែរ ប្រទេសកម្ពុជាបាននាំចេញទៅទីផ្សារសហគមន៍អឺរ៉ុបធំជាងគេ បន្ទាប់មកគឺសហរដ្ឋអាមេរិក និងកាណាដា ហើយទំនិញដែលនាំចេញច្រើនជាងគេ គឺសម្លៀកបំពាក់ និងវាយនភ័ណ្ឌតែម្តង។ ក្រៅពីនោះ មានស្បែកជើង អង្ករ ស្ករត្នោត ម្រេច និងផលិតផលផ្សេងៗទៀត។
ឯកឧត្តមរដ្ឋមន្ត្រីបានបន្ថែមទៀតថា ពិព័រណ៍សម្លៀកបំពាក់ “APPAREL SOURCING PARIS 2017” នេះជាព្រឹត្តិការណ៍អន្តរជាតិដ៏ល្បីល្បាញ និងធំជាងគេបង្អស់នៅក្នុងតំបន់អឺរ៉ុប ដូច្នោះហើយការចូលរួមរបស់កម្ពុជាក្នុងពេលនេះ ពិតជាមានសារៈសំខាន់ខ្លាំងណាស់។
គណៈប្រតិភូពាណិជ្ជកម្មកម្ពុជា និងសមាគមរោងចក្រកាត់ដេរនៅកម្ពុជា (GMAC) បានដឹកនាំពាណិជ្ជករកម្ពុជាចំនួន09 ក្រុមហ៊ុនមកចូលរួមព្រឹត្តិការណ៍នេះ ដើម្បីបង្កើនទំនាក់ទំនងពាណិជ្ជកម្មរវាងកម្ពុជា-បារាំង ក៏ដូចជាដើម្បីស្វែងរកទីផ្សារអឺរ៉ុប និងជំរុញឱ្យមានការកើនឡើងបន្ថែមទៀតនូវការវិនិយោគនៅកម្ពុជា លើវិស័យកាត់ដេរសម្លៀកបំពាក់ និងវាយនភ័ណ្ឌ។
ជាមួយគ្នានេះ ឯកឧត្តមបានជំរុញឱ្យភ្ញៀវទាំងអស់ដែលមានវត្តមាននៅទីនោះ យកឱកាសដ៏សំខាន់នេះ ធ្វើការជជែកពិភាក្សាគ្នាជាមួយកម្ពុជា ដើម្បីបង្កើតទំនាក់ទំនងធ្វើពាណិជ្ជកម្មជាមួយគ្នា ព្រោះកម្ពុជាមានកម្លាំងការងារគ្រប់គ្រាន់ ហើយតម្លៃឈ្នួលពលកម្មក៏ទាបផងដែរ ហើយការដឹកជញ្ជូនក៏បានតែមានភាពប្រសើរឡើងដែរ ដោយសារកម្ពុជា កំពុងមានផ្លូវគមនាគមន៍ជាច្រើននឹងតភ្ជាប់ផ្លូវរថភ្លើងទៅកាន់ប្រទេសក្នុងតំបន់ទៀតផង៕
