ហេតុអ្វីបានមនុស្សមួយចំនួនជួបនឹងភាពជោគជ័យយ៉ាងគួរឱ្យមោទនភាព? នោះដោយសារតែពួកគេមានជីវិតដែលល្អ មានឱកាស មានអ្នកនៅចាំចង្អុលបង្ហាញផ្លូវឱ្យយ៉ាងងាយស្រួល និងហេតុអ្វីអ្នកខ្លះទៀតទទួលបានភាពជោគជ័យមិនចាញ់គ្នា តែខុសគ្នានៅត្រង់គ្មានអ្វីជាឧបករណ៍បើកផ្លូវ ចាប់ផ្ដើមជីវិតពីសូន្យ ទ្រេតទ្រោតដួលងើបត្រឡប់ត្រលិនរហូតអាចទទួលបានភាពជោគជ័យមិនចាញ់អ្នកដែលមានឱកាសល្អទាំងនោះដែរ?
មហាសេដ្ឋីជាច្រើននាក់បានបង្ហាញឱ្យយើងឃើញថា ជីវិតមិនចាំបាច់ត្រូវមានមាសប្រាក់លុយកាក់មកគរទុកឱ្យតាំងពីដំបូងនោះឡើយ យើងអាចសាង និងរកវាមកបានដោយសមត្ថភាព។
មនុស្សជាច្រើនចាប់ផ្ដើមពីកន្ទេលមួយខ្នើយមួយ តែពេលវេលាកន្លងទៅ អ្វីដែលពួកគេមានគឺ ភូមិគ្រឹះដ៏ធំ និងរថយន្តទំនើប ព្រមទាំងកេរ្តិ៍ឈ្មោះល្បីល្បាញ។ ប្រៀបដូចជាផ្លាស់ជីវិតខ្លួនឯងជាថ្មី ពីមនុស្សធម្មតាដែលគ្មានអ្នកណាស្គាល់ ក្លាយជាបុគ្គលដែលមានឈ្មោះល្បី…
នោះដោយសារតែពួកគេហ៊ានក្នុងការប្រឈមនឹងក្ដីភ័យខ្លាច…
នោះដោយសារតែពួកគេមិនញញើតនឹងឧបសគ្គដែលនៅខាងមុខ…
នោះដោយសារតែពួកគេជឿថា អ្វីដែលគេកំពុងធ្វើនៅពេលនេះគឺសំខាន់បំផុត…
និងនោះដោយសារតែពួកគេព្យាយាមធ្វើនាពេលបច្ចុប្បន្នឱ្យល្អបំផុត ចំណែកលទ្ធផលនឹងទៅជាយ៉ាងណានោះ គ្មាននរណាទៅយកចិត្តទុកដាក់នឹងវាប៉ុន្មានឡើយ ព្រោះការចាប់ផ្ដើមធ្វើតាមផែនទីដែលបានរៀបចំទុកនៅនឹងមុខ ផ្ចង់ស្មារតីជាមួយវាឱ្យល្អបំផុត នោះយើងនឹងរកឃើញថា វាគឺជាចំណែកមួយរបស់ដុំជិក-ស (ក្រដាសតរូបភាព) ដែលនឹងតដំណើរជីវិតដ៏រុងរឿងឱ្យកើតឡើងបាន។
មនុស្សធម្មតាច្រើនតែមើលរំលងសមត្ថភាពខ្លួនឯង-តែអ្នកដែលជួបនឹងភាពជោគជ័យមើលឃើញថា សមត្ថភាពដែលទន់ខ្សោយ អាចបន្ថែមបានដោយការរៀនយល់ដឹង។
អ្នកជួបភាពជោគជ័យនឹងនឹកស្រមៃ ហើយចាប់ផ្ដើមធ្វើវាឡើងយ៉ាងតាំងចិត្ត ចំណែកមនុស្សធម្មតាគូសវាសក្ដីស្រមៃ និង…ស្រមើស្រមៃពីមួយថ្ងៃទៅមួយថ្ងៃដោយមិនបានចាប់ផ្ដើមធ្វើវាឡើងយ៉ាងពិតប្រាកដនោះទេ។
គ្មានអ្វីស្មុគស្មាញនៅក្នុងភាពជោគជ័យដែលពួកគេបានទទួលនោះទេ គ្មានអាថ៌កំបាំងអ្វីបង្កប់នៅក្នុងនោះទេ មានត្រឹមតែទស្សនៈ និងគំនិតដែលខុសប្លែកពីមនុស្សធម្មតាប៉ុណ្ណោះ។ មហាសេដ្ឋីដែលចាប់ផ្ដើមជីវិតពីសូន្យសុទ្ធតែធ្លាប់ជាមនុស្សធម្មតាពីមុនមកទាំងអស់ ប៉ុន្តែខួរក្បាលពួកគេបែរជាមានបែបផែនដែលខុសប្លែក មានភាពជឿជាក់ មានក្ដីព្យាយាម និងសម្លឹងមើលពិភពលោកយ៉ាងយល់ដឹង។ មិនថាជោគជ័យ ឬបរាជ័យនោះទេ មនុស្សទាំងនោះត្រៀមខ្លួនជាស្រេចក្នុងការឈានទៅខាងមុខបែបមិនញញើតញញើម នេះគឺផ្នត់គំនិតដែលមនុស្សជាច្រើនមើលរំលង។ មិនហ៊ានដើរចេញពីកន្លែងដែលខ្លួនឯងគិតថា សុខស្រួលបំផុតហើយនៅក្នុងចំណុចដែលខ្លួនឯងកំពុងឈរនេះ។ ខ្លាចការចេញទៅប្រឈមនឹងពិភពថ្មីមួយដែលមិនប្រាកដក្នុងចិត្តថា ជា Comfort zone ដូចមុនឬក៏អត់?។
បើមិនចង់ធ្វើជាមនុស្សធម្មតា – សាកល្បងប្រឈមមុខនឹងក្តីភ័យខ្លាច សាកល្បងធ្វើនូវអ្វីដែលមិនធ្លាប់ធ្វើ សាកល្បងចាប់យកក្ដីស្រមៃមក ហើយចាប់ផ្ដើមធ្វើសាក លមើលឱ្យបានម្ដងទៅមើល៍។ អ្វីដែលគិតថា ធ្វើមិនកើត អាចនឹងក្លាយជាចំណុចចាប់ផ្ដើមរបស់ជំហានដំបូង ហើយវាដឹកនាំយើងធ្វើដំណើរឆ្ពោះទៅរកចំណុចកំពូលនៃភាពជោគជ័យដូចដែលយើងត្រូវការក៏អាចថាបានដែរ…៕
រៀបរៀងដោយ តាវ៉ែនតា
