សាំងហ្គាពួរ អ៊ែរឡាញ បង្ហាញជើងហោះហើរកំពូលទំនើបនៅក្នុងយន្តហោះ A380 ដែលជាបន្ទប់ធ្វើដំណើរ First Classe ដែលបំពាក់ដោយឧបករណ៍ផ្ដល់ភាពងាយស្រួលទំនើបៗ និងគ្រឿងសង្ហារិមដ៏សម្បូរបែប ដូចជា ទូដាក់សម្លៀកបំពាក់ផ្ទាល់ខ្លួន ទូដាក់អីវ៉ាន់ផ្ទាល់ខ្លួន រួមទាំងទូរទស្សន៍ខ្នាតធំទំហំ 32 អ៊ិញទៀតផង។
ក្លាយជារឿងដ៏គួរចាប់អារម្មណ៍ខ្លាំងបំផុតមួយ ដែលក្នុងមួយរយៈក្រោយៗនេះ ធុរកិច្ចការហោះហើរចាប់ផ្ដើមមានការប្រែប្រួលយ៉ាងខ្លាំង ជាពិសេសការបន្ថែមសិទ្ធិពិសេសក្នុងអំឡុងពេលធ្វើដំណើរ ដែលមានក្រុមហ៊ុនអាកាសចរណ៍ជាច្រើនបានបំពាក់បន្ទប់ងូតទឹកផ្ទាល់ខ្លួននៅក្នុងយន្តហោះ រហូតដល់ការបម្រើសេវាកម្មម្ហូបអាហារទំនើបៗដើម្បីទាក់ទាញចិត្តអតិថិជនអ្នកធ្វើដំណើរទៀតផង។
តែភាពពិសេសរបស់យន្តហោះ A380 របស់ក្រុមហ៊ុនអាកាសចរណ៍ Singapore Airlines ដែលនឹងធ្វើដំណើរពីប្រទេសសិង្ហបុរីទៅទីក្រុងស៊ីដនី ប្រទេសអូស្ត្រាលីវិញនោះ នឹងចេញមកព្រមជាមួយគ្រឿងសង្ហារិមដ៏កំពូលទំនើប Poltrona Frau របស់អ៊ីតាលី គ្រែគេងដែលនាំចូលពីប្រទេស បារាំង ដោយនៅក្នុងយន្តហោះនេះនឹងមានបន្ទប់ធ្វើដំណើរត្រឹមតែ 6 បន្ទប់ប៉ុណ្ណោះ។ បើសិនជាប្រៀបធៀបទៅ វាប្រៀបដូចជាយន្តហោះឯកជនផ្ទាល់ខ្លួនហើយបន្ថែមភាពទំនើបដូចបន្ទប់ Sweet របស់សណ្ឋាគារទំនើបលំដាប់ផ្កាយ 5 ដូច្នោះដែរ។ ចំណែកតម្លៃសំបុត្រធ្វើដំណើរវិញ គឺស្ថិតក្នុងតម្លៃប្រមាណជា 9,500 ផោនដ៍(ជាង1ម៉ឺនដុល្លារអាមេរិក)សម្រាប់បន្ទប់ធ្វើដំណើរមួយ។
សម្រាប់ការលើកលំដាប់យន្តហោះ A380 ឱ្យក្លាយជាយន្តហោះពាណិជ្ជដឹកអ្នកដំណើរដែលទំនើបប្រៀបដូចជាបន្ទប់ Sweet នៅក្នុងសណ្ឋាគារទំនើបលំដាប់ផ្កាយ 5 នេះ មានការចំណាយថវិកាក្នុងការកែសម្រួលនេះខ្ពស់រហូតដល់ទៅ 850 លានដុល្លារសហរដ្ឋអាមេរិក ដោយរួមទាំងការកែសម្រួលកៅអីថ្នាក់ធុរកិច្ច (Business) និងថ្នាក់សន្សំសំចៃ (Economic)ផងដែរ។
ទាំងអស់នេះ លោក Goh Choon Phong នាយកប្រតិបត្តិរបស់ក្រុមហ៊ុនអាកាសចរណ៍ សាំងហ្គាពួរ អ៊ែរឡាញ បានរៀបរាប់អំពីការលើកលំដាប់យន្តហោះ A380 ក្នុងគ្រានេះថា ជាការបង្ហាញឱ្យឃើញពីភាពតាំងចិត្តក្នុងការផ្ដល់សេវាកម្មប្រភេទប្រណីត រួមទាំងការនាំមកជូននូវអ្វីដែលល្អបំផុតក្នុងអំឡុងពេលធ្វើដំណើរ ដើម្បីសាងនូវភាពជឿជាក់ និងរក្សាស្ថានភាពជាអ្នកនាំមុខគេក្នុងវិស័យមួយនេះផងដែរ៕
ប្រភព Independent
ប្រែសម្រួលដោយ តាវ៉ែនតា
