ក្រុមបាល់ទាត់ជម្រើសជាតិសាធារណរដ្ឋអៀរឡង់ បានខកខានក្នុងការឈានទៅកាន់យុទ្ធនាការ World Cup ខណៈដែលការរកបានគ្រាប់បាល់បញ្ចូលទី3គ្រាប់របស់ខ្សែប្រយុទ្ធ Christian Eriksen បានជួយឲ្យក្រុមដាណឺម៉ាក កត់ត្រាជ័យជម្នះយ៉ាងកក់ក្តៅក្នុងលទ្ធផល 5-1 ក្នុងការប្រកួតវគ្គ Playoff ជើងទី2 ដើម្បីឈានទៅកាន់ប្រទេសរុស្ស៊ី ឆ្នាំ2018។
ក្រោយពីការបញ្ចប់ក្នុងលទ្ធផលស្មើ ០-០ ក្នុងជើងទី1 កាលពីថ្ងៃសៅរ៍ ក្រុមម្ចាស់ផ្ទះបានចាប់ផ្តើមយ៉ាងល្អតាមរយៈការរកបានគ្រាប់បាល់បញ្ចូលទីនៅនាទីទី6 ខណៈដែលខ្សែការពារ Shane Duffy បានតែតបាល់ដើម្បីរកគ្រាប់បាល់ជាអន្តរជាតិលើកទី2របស់គេ។ ប៉ុន្តែ ក្រុមជម្រើសជាតិដាណឺម៉ាក បានរកគ្រាប់បាល់បញ្ចូលទី2គ្រាប់វិញក្នុងចន្លោះពេលត្រឹមតែ3នាទីក្នុងតង់ទី1 តាមរយៈការធ្វើឲ្យបាល់ចូលទីខ្លួនឯងរបស់កីឡាករ Cyrus Christie និងគ្រាប់បាល់បញ្ចូលទីយ៉ាងល្អរបស់ Eriksen។ ក្រុមជម្រើសជាតិដាណឺម៉ាក រកបាន3គ្រាប់បន្ថែមទៀតក្នុងតង់ទី2 ក្នុងនោះ Eriksen រកបាន2គ្រាប់បន្ថែមទៀត ដើម្បីបំពេញការឈ្នះកៅអីរបស់ពួកគេទៅកាន់ប្រទេសរុស្ស៊ីតែម្តង។
Eriksen បានឲ្យដឹងថា៖ «វាគឺជាអារម្មណ៍ដ៏អស្ចារ្យមួយ។ យើងបានធ្វើការប្រយុទ្ធអស់រយៈពេលដ៏យូរអង្វែងដើម្បីឈានទៅកាន់ World Cup។ យើងពិតជាកំពុងតែសម្លឹងឆ្ពោះទៅមុខ។ វាមិនញឹកញាប់ឡើយដែលខ្ញុំរកបាន3គ្រាប់ ហេតុនេះវាពិតជាអស្ចារ្យណាស់»។ ក្រុមជម្រើសជាតិដាណឺម៉ាកនឹងត្រូវចូលរួមជាមួយនឹងក្រុមបែលហ្ស៊ិក អាល្លឺម៉ង់ អង់គ្លេស អេស្ប៉ាញ ប៉ូឡូញ អ៊ីស្លង់ ស៊ែប៊ី ព័រទុយហ្គាល់ បារាំង ស្វ៊ីស ក្រូអាស៊ី និងស៊ុយអែត ក្នុងនាមជាក្រុមតំណាងឲ្យអឺរ៉ុបទៅកាន់ World Cup៕
ប្រភពពី៖ BBC
