ភ្នំពេញ – ខណៈតម្រូវការលំនៅឋានក្នុងរាជធានីភ្នំពេញមានការកើនឡើងខ្លាំង អាជ្ញាធរនៃក្រសួងបានលើកឡើងថា ការបង្កើតគម្រោងលំនៅឋានតម្លៃសមរម្យនឹងជួយដល់ប្រជាជនកម្ពុជាដែលមានចំណូលទាប និងមធ្យមឱ្យមានលំនៅឋានរស់នៅសមរម្យដូចគេឯង។
ឯកឧត្ដម ជា សុផារ៉ា រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់បានលើកឡើងថា គម្រោងនេះពិតជាជួយដល់ប្រជាពលរដ្ឋ និងមន្ដ្រីរាជការដែលមានកម្រិតជីវភាពទាប និងមធ្យមអាចមានលទ្ធភាពរកទិញលំនៅឋាននៅបានមែន។ ដោយឯកឧត្ដមបន្ដថា ចំពោះអ្នកមានលទ្ធភាព ចង់ទៅរកទិញនៅកន្លែងណាក៏បាន តែចំពោះអ្នកមានលទ្ធភាពមធ្យម និងខ្វះលទ្ធភាពវិញ មិនងាយមានថវិកាសម្រាប់រកទិញលំនៅឋានបានទេ ព្រោះតម្លៃផ្ទះដែលលក់នៅក្នុងគម្រោងនីមួយៗសុទ្ធតែមានតម្លៃថ្លៃៗ មានខ្លះរហូតដល់15ម៉ឺនដុល្លារអាមេរិកក្នុងមួយល្វែងក៏មាន បើខុនដូវិញមានតម្លៃ1លានដុល្លារអាមេរិកចុះដល់ 70ម៉ឺនឯណោះ។ បើតម្លៃថ្លៃៗបែបនេះ តើពេលណាទើបគាត់មានថវិកាគ្រប់គ្រាន់អាចទិញលំនៅឋាននៅបាន?។
រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ បានសង្កត់ធ្ងន់ថា គម្រោងលំនៅឋានតម្លៃសមរម្យមានន័យពិតប្រាកដក្នុងការបំពេញទឹកចិត្ដរបស់ប្រជាពលរដ្ឋ និងមន្ដ្រីរាជការដែលមានចំណូលទាប និងមធ្យម ព្រោះបើពួកគាត់មានប្រាក់តិចតួចអាចមកសួរនាំពីគម្រោងនេះបាន។ ផ្ទុយទៅវិញបើគាត់មានប្រាក់តិចតួច គឺពួកគាត់ពិបាកនឹងទៅសួរនាំរកទិញលំនៅឋាននៅក្នុងគម្រោងធំៗបានណាស់។
ឯកឧត្ដម ជា សុផារ៉ា បានលើកឡើងទៀតថា៖«សួរថា បើគាត់មានលុយតិចតួចអាចទៅសួរនៅក្នុងគម្រោងធំៗបានទេ? ចម្លើយគឺ អត់ទេ គេមិននិយាយរកទេ គេដាក់ទូរស័ព្ទចុះដោយមិនបាច់ជម្រាបលាលោកពូអ្នកមីង លោកអ៊ុំ អីនោះទេ»។ អ្វីដែលឯកឧត្ដមលើកឡើង គឺជាបទពិសោធពិតផ្ទាល់ខ្លួន ដោយឯកឧត្ដមបន្ថែមថា៖«ខ្ញុំធ្លាប់ទទួលទូរស័ព្ទពីអ្នកលក់គម្រោងច្រើន ឱ្យតែមានលេខស្រួលចាំ គេចេះតែតេមក។ គេសួរថា លោកពូមានចាប់អារម្មណ៍ចង់ទិញខុនដូអីៗទេ? ខ្ញុំពិបាកឆ្លើយទៅវិញ បើនិយាយថា រវល់វាដូចមិនសម ខ្ញុំក៏ប្រាប់ថា រកតែលុយបង់ខែមុនអត់បានផងហ្នឹង រកទិញធ្វើអ្វីទៀត។ ពេលនោះគេក៏បានដាក់ទូរស័ព្ទចុះភ្លាម ដោយអត់មានជម្រាបលាអីនោះទេ»។ដូច្នេះហើយទើបឯកឧត្ដមចាត់ទុកថា ការអភិវឌ្ឍលំនៅឋានតម្លៃសមរម្យគឺជាការបំពេញបំណងប្រាថ្នាចំគោលដៅស្របតាមអ្វីដែលប្រជាពលរដ្ឋ មន្ដ្រីរាជការ មានចំណូលទាប និងមធ្យមចង់បាន។
គួរបញ្ជាក់ថា គម្រោងលំនៅឋានតម្លៃសមរម្យរបស់ក្រុមហ៊ុន Arakawa ជាគម្រោងទី3 ដែលធ្វើការអភិវឌ្ឍ ខណៈគម្រោងទី1 អភិវឌ្ឍដោយក្រុមហ៊ុនរបស់លោកឧកញ៉ា សៀ ឫទ្ធី នៅខាងត្បូងរាជធានី និងគម្រោងទី2 អភិវឌ្ឍដោយក្រុមហ៊ុនលោកឧកញ៉ាប៊ុន ចេស្ទ នៅភាគខាងជើងនៃរាជធានីភ្នំពេញ៕
