បើតាមរយៈសារព័ត៌មាន Dailymail ដែលបានចេញផ្សាយនៅថ្ងៃទី12 ខែធ្នូ មុននេះបន្ដិចបានឱ្យដឹងថា នេះពិតជាវិនាទីដ៏គួរឱ្យស្រៀវឆ្អឹងខ្នង និងរន្ធត់ព្រលឹងខ្លាំងណាស់ ដែលបុរសម្នាក់មានឈ្មោះថា Wu Yong Ning ជាតារាសម្ដែង និងមានឈ្មោះល្បីខាងផ្នែកថតសែលហ្វ៊ីបែបប្លែកៗពីលើអគារខ្ពស់ៗ មានវ័យ26 ឆ្នាំ បានភ្លាត់ស្នៀតធ្លាក់ពីលើអគារកម្ពស់ 62 ជាន់ស្លាប់ភា្លមៗ ខណៈដែលលោកកំពុងព្យាយាមថតសែលហ្វ៊ីជារូបភាពវីដេអូ ដើម្បីបង្ហោះរកលុយរៀបមង្គលការជាមួយមិត្តស្រី។
គួរបញ្ជាក់ផងដែរថា មិត្តស្រីរបស់បុរសម្នាក់នេះឈ្មោះ JinJin បានបង្ហើបឱ្យដឹងថា លោក Wu Yong Ning បានព្យាយាមតាំងចិត្តសន្សំប្រាក់ឱ្យគ្រប់ 8 ម៉ឺនយ័ន ដែលបានពីការសម្ដែងនៅក្នុងឃ្លីបវីដេអូដែលលោកថត ដើម្បីយកមកសុំនាងរៀបការ ក៏ប៉ុន្ដែជាអកុសលលោកត្រូវបានបញ្ចប់ជីវិតយ៉ាងគួរឱ្យរន្ធត់ និងតក់ស្លុតបែបនេះទៅវិញ។ គួររំឭកផងដែរថា បុរសខាងលើនេះមុនពេលបាត់បង់ជីវិត លោកធ្លាប់បានថត និងបង្ហោះវីដេអូចំនួន 300 ឃ្លីប នៅក្នុងបណ្ដាញទំនាក់ទំនងសង្គម ដែលអាចធ្វើការ Live Stream ( ផ្សាយផ្ទាល់) និងរកប្រាក់បានចំនួន 55,000 យ័នរួចមកហើយ៕
