រដ្ឋមន្ត្រី​ក្រសួងទេសចរណ៍​គ្រោង​រៀបចំ​អា​រ៉ែ​ង​ឱ្យ​កាន់តែ​ទាក់ទាញ​សម្រាប់​ទេសចរ​អន្តរជាតិ

0

សហគមន៍​ទេសចរណ​អា​រ៉ែ​ង ជា​តំបន់​ព្រៃ​ត្រូ​ពិ​ក​ធំជាងគេ​នៅ​អាស៊ីអាគ្នេយ៍ ដែលមាន​ទស្ស​និ​យ​ភាព​ទេសចរណ៍​ប្រកបដោយ​ភាពស្រស់​បំព្រង និង​ពោរពេញ​ទៅដោយ​ធនធានធម្មជាតិ​យ៉ាង​សំបូរបែប។

រដ្ឋមន្ត្រីក្រសួង​ទេសចរ ឯកឧត្តម ថោង ខុន បាន​លើកឡើងថា ក្រសួងទេសចរណ៍ និង​ទីភ្នាក់ងារ​ទេសចរណ៍​កម្ពុជា (CATA) នឹង​ជួយ​ជ្រោមជ្រែង​សហគមន៍​ទេសចរណ៍​អា​រ៉ែ​ង​ឱ្យមាន​ការរីកចម្រើន​កាន់តែខ្លាំង ដំ​ដៅ​ជំរុញ​ឱ្យ​ប្រជា​សហគមន៍​ចូលរួមចំណែក​ការពារ​ធនធានធម្មជាតិ​តាមរយៈ​ការទាក់ទាញ​ភ្ញៀវ​ជាតិ និង​អន្តរជាតិ​ឱ្យ​មកលេង​តំបន់​នេះ។

ឯកឧត្តម​ថ្លែងថា ក្រសួងទេសចរណ៍​បាន​បណ្តុះបណ្តាល​លើ​ជំនាញ​មគ្គុទេសក៍​ទេសចរណ៍​សហគមន៍ សុវត្ថិភាព​ចំណីអាហារ អនាម័យ និង​បរិស្ថាន​ដល់​ប្រជា​សហគមន៍​នៅ​តំបន់​នោះ។ ក្រៅពីនេះ​យើង​ក៏បាន និង​កំពុង​សាងសង់​ហេដ្ឋារចនាសម្ព័ន្ធ ផ្លូវថ្នល់ បណ្តាញ​អគ្គិសនី ប្រព័ន្ធ​ទូរគមនាគមន៍ ម​ណ្ឌ​សុខភាព មណ្ឌលរដ្ឋបាល និង​សកម្មភាព​ជាច្រើន​ទៀត​ដើម្បី​ជំរុញ​ឱ្យ​កាន់​តែមាន​ភាពងាយស្រួល​ដល់​ភ្ញៀវទេសចរ​ដែលមាន​បំណង​ទៅ​ទស្សនា​តំបន់​អា​រ៉ែ​ង រួមទាំង​ប្រជាជន​ដែល​រស់នៅ​តំបន់​នេះ​ផ្ទាល់។

បើតាម​ឯកឧត្តម ថោង ខុន ការអភិវឌ្ឍ​វិស័យ​ទេសចរណ៍​សហគមន៍​នៅ​តំបន់​នេះ​អាចនឹងទទួល​បាន​ផលប្រយោជន៍​ច្រើនជាង​ការ​បរបាញ់​សត្វ និង​កាប់​ព្រៃឈើ។ ជា​បទពិសោធន៍ ដូចជា​នៅ​សហគមន៍​អេកូ​ទេសចរណ៍​ជី​ផាត់ ប្រជាជន​បាន​ឈប់​បាញ់​សត្វ កាប់​ព្រៃឈើ ហើយ​ងាក​មក​ប្រកបមុខរបរ​ផ្តល់​សេវា​ទេសចរណ៍​ដូច​ជាម​គ្គុ​ទេស​ទេសចរ ចុងភៅ​ចល័ត ផ្ទះ​ស្នាក់នៅ​សហគមន៍ ផ្តល់​សេវា​ម្ហូបអាហារ និង​ដឹកជញ្ជូន​ជាដើម។

ជាមួយគ្នានេះដែរ ក្រសួងទេសចរណ៍​នឹង​ផ្តល់​កុំព្យូទ័រ​ចំនួន 4គ្រឿង​ដល់​សហគមន៍ បំពាក់​ឧបករណ៍​សំឡេង​ចល័ត2គ្រឿង ផ្តល់​ការបណ្តុះបណ្តាល​ម​ក្គ​ទេស​ទេសចរណ៍ ជំនាញ​ចំអិន​ម្ហូបអាហារ ផលិត​ចម្រៀង​អំពី​សក្តានុពល​អេកូ​ទេសចរណ៍ និង​ឧបត្ថម្ភ​អណ្តូងទឹក​មួយចំនួន​ថែម​ទៀតផង។

កញ្ញា Suwanna Gauntlett ប្រធាន​អង្គការ​សម្ព័ន្ធមិត្ត​សត្វព្រៃ ដែល​កំពុងធ្វើការ​ងារ​នៅ​តំបន់​អា​រ៉ែ​ង​បាន​លើកឡើងថា កញ្ញា​ចង់ឃើញ​ភ្ញៀវទេសចរ​មក​កម្សាន្ត​នៅ​តំបន់​អា​រ៉ែ​ង​នេះ ព្រោះថា​នៅពេលដែល​ពួកគេ​បង្កើត​តំបន់​នេះ​ទៅជា​តំបន់​ទេសចរណ៍ ប្រជាជន​នឹង​បាន​មើលឃើញ​ពី​អត្ថប្រយោជន៍​យ៉ាងសំខាន់​របស់​ធនធាន​ធម្មជាតិ ហើយ​ងាក​ពី​របរ​បរបាញ់​សត្វ និង​កាប់​ព្រៃ​មក​ធ្វើជា​មគ្គុទេសក៍ ឬ​ប្រកប​របរ​ដែល​បម្រើឱ្យ​ការងារ​ទេសចរណ៍​វិញ៕

ទេសភាពថតពីលើអាកាស នៅលើភ្នំ​ម្រេ​ច​ក​ង្កែ​ប​
ទេសភាពពេលព្រឹក នៅលើភ្នំ​ម្រេ​ច​ក​ង្កែ​ប​
ទេសភាពពេលព្រឹក នៅលើភ្នំ​ម្រេ​ច​ក​ង្កែ​ប​
ទេសភាពពេលព្រឹក នៅលើភ្នំ​ម្រេ​ច​ក​ង្កែ​ប​
ទេសភាពពេលព្រឹក នៅលើភ្នំ​ម្រេ​ច​ក​ង្កែ​ប​
ទេសភាពទឹកជ្រោះឆាយតាហ៊ីង
ទេសភាពទឹកជ្រោះឆាយតាហ៊ីង
ទឹកជ្រោះឆាយតាហ៊ីង
ចែករំលែក