ក្នុងគោលដៅការពារឧក្រិដ្ឋកម្មហិរញ្ញវត្ថុ (Cyber Security)គណៈកម្មការកសាងសមត្ថភាពអាស៊ាន(SCCB) បានជំរុញឱ្យធនាគារនៃប្រទេសជាសមាជិកអាស៊ានទាំងអស់ពង្រឹងសុវត្ថិភាពបច្ចេកវិទ្យាឱ្យកាន់តែប្រសើរឡើង។
ការអំពាវនាវនេះបានធ្វើឡើងក្នុងកិច្ចប្រជុំគណៈកម្មាធិការជាន់ខ្ពស់ (Senior Level Committee)នៃក្របខ័ណ្ឌសមាហរណកម្មហិរញ្ញវត្ថុអាស៊ាន និងគណៈកម្មការកសាងសមត្ថភាពអាស៊ាន (SCCB) នៅប្រទេសប្រ៊ុយណេ កាលពីដើមសប្តាហ៏នេះ ដោយមានតំណាងកម្ពុជាចូលរួមផងដែរ។
លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា បានឱ្យដឹងនៅក្រោយកិច្ចប្រជុំនោះថា គណៈកម្មាធិការជាន់ខ្ពស់ខាងលើមានតួនាទីតាមដាន និងផ្តល់ការណែនាំដល់ក្រុមការងារសមាហរណកម្មហិរញ្ញវត្ថុអាស៊ាន (ក្រុមការងារក្របខ័ណ្ឌសមាហរណកម្មធនាគារអាស៊ាន ក្រុមការងារសេរីភាវូបនីយកម្មគណនីមូលធន ក្រុមការងារអភិវឌ្ឍន៍ទីផ្សារមូលធន ក្រុមការងារសេរីភាវូបនីយកម្មសេវាកម្មហិរញ្ញវត្ថុ ក្រុមការងារបរិយាប័ន្នហិរញ្ញវត្ថុ ក្រុមការងារប្រព័ន្ធទូទាត់ និងគណៈកម្មការកសាងសមត្ថភាព) ដើម្បីសម្រេចបានគោលដៅរួមទាំងបីគឺ សមាហរណកម្មហិរញ្ញវត្ថុ បរិយាប័ន្នហិរញ្ញវត្ថុ និងស្ថិរភាពហិរញ្ញវត្ថុ ក្រោមផែនការសកម្មភាពយុទ្ធសាស្ត្រនៃសហគមន៍សេដ្ឋកិច្ចអាស៊ានឆ្នាំ2025។
អង្គប្រជុំគណៈកម្មាធិការជាន់ខ្ពស់បានអបអរសាទរចំពោះវឌ្ឍនភាពដែលសម្រេចបាន និងបានផ្តល់អនុសាសន៍ឱ្យក្រុមការងារយកចិត្តទុកដាក់លើបញ្ហាប្រឈមនានាដែលអាចរាំងស្ទះដល់ដំណើរការនៃការធ្វើសមាហរណកម្មហិរញ្ញវត្ថុអាស៊ាន រួមមានដូចជា ការគ្រប់គ្រងលំហូរមូលធន និងការជំរុញសេរីភាវូបនីយកម្មលំហូរមូលធនក្នុងតំបន់ និងបច្ចេកវិទ្យាហិរញ្ញវត្ថុ (Fintech)។
អង្គប្រជុំបានលើកទឹកចិត្តឱ្យប្រទេសជាសមាជិកពង្រឹងសុវត្ថិភាពបច្ចេកវិទ្យាចំពោះឧក្រិដ្ឋកម្មហិរញ្ញវត្ថុ (Cyber Security) និងបានស្នើឱ្យក្រុមការងារអាស៊ានពីរគឺ ក្រុមការងារបរិយាប័ន្នហិរញ្ញវត្ថុ និងក្រុមការងារប្រព័ន្ធទូទាត់ សិក្សាពីផលប៉ះពាល់នៃការប្រើប្រាស់បច្ចេកវិទ្យាហិរញ្ញវត្ថុចំពោះកំណើន និងស្ថិរភាពហិរញ្ញវត្ថុតំបន់។ ម្យ៉ាងទៀតកិច្ចប្រជុំគណៈកម្មការកសាងសមត្ថភាពអាស៊ានបានបង្ហាញពីលទ្ធផលនៃការលើកកម្ពស់សមត្ថភាពធនធានមនុស្សសម្រាប់ប្រទេសប្រ៊ុយណេ កម្ពុជា ឡាវ ម៉យ៉ាន់ម៉ា និងវៀតណាម (BCLMV) នាឆ្នាំ2017កន្លងទៅ និងបានប្តេជ្ញាបន្តការងារនេះថែមទៀតសំដៅកាត់បន្ថយគម្លាតជាមួយបណ្តាប្រទេសអាស៊ាន 5 ទៀត ដែលមានកម្រិតនៃការអភិវឌ្ឍធនធានមនុស្សខ្ពស់ជាង។
គូរបញ្ជាក់ថា មុននឹងបញ្ចប់ អង្គប្រជុំបានបោះឆ្នោតសម្រេចផ្តល់សេចក្តីទុកចិត្តជូនធនាគារជាតិនៃកម្ពុជា និងធនាគារកណ្តាលម៉ាឡេស៊ី ធ្វើជាសហប្រធានគណៈកម្មាធិការជាន់ខ្ពស់នៃក្របខ័ណ្ឌសមាហរណកម្មហិរញ្ញវត្ថុអាស៊ាន សម្រាប់អាណត្តិបន្ទាប់ដែលមានរយៈពេល 2ឆ្នាំ (2018-2020)៕
