របាយការណ៍របស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា កម្ពុជាទទួលបានការចុះបញ្ជីទុនវិនិយោគរបស់ជប៉ុនប្រមាណ 1,600លានដុល្លារនៅឆ្នាំ2017 ដែលទើបកន្លងផុតទៅនេះ ដោយភាគច្រើនផ្តោតលើការវិនិយោគបង្កើតរោងចក្រនៅតំបន់សេដ្ឋកិច្ចពិសេស ដែលគ្រប់គ្រងដោយក្រុមហ៊ុនតំបន់សេដ្ឋកិច្ចពិសេសភ្នំពេញ។
របាយការណ៍របស់ CDC ក៏បានបង្ហាញដែរថា ការចុះបញ្ជីគម្រោងវិនិយោគសរុបរបស់ជប៉ុនចំនួន 130គម្រោងដែលគ្រោងទឹកប្រាក់វិនិយោគប្រមាណ1,600លានដុល្លារអាមេរិកក្នុងវិស័យមួយចំនួនរួមមាន៖ ធនាគារ ឧស្សាហកម្ម កសិ-ឧស្សាហកម្ម សេវាកម្ម និងហេដ្ឋារចនាសម្ព័ន្ធ ជាដើម។
តាមរបាយការណ៍ដដែលនោះបានបង្ហាញថា ក្នុងចំណោមគម្រោងវិនិយោគនានា មានគម្រោងវិនិយោគជប៉ុនចំនួន9 ដែលមានទឹកប្រាក់ប្រមាណ 63លានដុល្លារអាមេរិក ហើយក្នុងចំណោមនោះមានគម្រោងវិនិយោគចំនួន8 ដែលមានទឹកប្រាក់ 59លានដុល្លារអាមេរិក បានជ្រើសរើសទីតាំងក្នុងតំបន់សេដ្ឋកិច្ចពិសេសសម្រាប់ប្រតិបត្តិការអាជីវកម្មនៅកម្ពុជា។
កម្ពុជារំពឹងថា នៅក្នុងឆ្នាំ2018នេះ គម្រោងវិនិយោគជប៉ុននឹងកើនឡើងបន្ថែមទៀត ខណៈដែលជប៉ុននឹងបើកឱ្យដំណើរការនូវផ្សារទំនើបអុីអន សាខាទី2 ដែលស្ថិតក្នុងដំណាក់កាលសាងសង់នៅឡើយ។ មានប្រសាសន៍កាលពីពេលកន្លងមក លោក ជំទាវ លឹម ឈីវហូ អគ្គនាយិកាក្រុមហ៊ុន LCH ដែលបានបង្កើតឡើងតាំងពីឆ្នាំ1990 ព្រមទាំងមានក្រុមហ៊ុនបុត្រសម្ព័ន្ធជាច្រើនទៀតក្នុងវិស័យជំនួញ អចលនទ្រព្យ អប់រំ និងតំបន់សេដ្ឋកិច្ចពិសេសភ្នំពេញជាដើម បានកោតសរសើរចំពោះគម្រោងវិនិយោគរបស់ជប៉ុនដែលមានភាពច្បាសលាស់ក្នុងការបណា្តក់ទុនប្រកបអាជីវកម្មដោយចាប់ដៃគូចូលហ៊ុនគ្នា។
លោកជំទាវ លឹម ឈីវហូ បានអះអាងថា ប្រទេសកម្ពុជានឹងក្លាយជាប្រទេសមានសំណាង ហើយអាចក្លាយជាប្រទេសដែលមានសេដ្ឋកិច្ចរីកចម្រើនលួតលាស់ ជីវភាពរបស់ប្រជាជនកម្ពុជានឹងផ្លាស់ប្តូរក្លាយជាអ្នកមាន បើកម្ពុជាទទួលបានវិនិយោគិនជប៉ុនត្រឹមតែបន្តិចបន្តួច ធៀបជាមួយការវិនិយោគរបស់ប៉ុននៅប្រទេសថៃនោះ។ លោកជំទាវ បានបញ្ជាក់ថា៖ “បើសិនជាក្រុមហ៊ុនជប៉ុនចំនួនតែ 2%នៃក្រុមហ៊ុនជប៉ុនដែលវិនិយោគនៅប្រទេសថៃមកវិនិយោគនៅស្រុកខ្មែរវិញនោះ ប្រជាជនខ្មែរអាចធ្វើជាអ្នកមានទាំងអស់គ្នាបាន ហើយពួកគាត់នឹងមានការងារធ្វើទាំងអស់គ្នា”។
តំបន់សេដ្ឋកិច្ចពិសេសភ្នំពេញ ទាក់ទាញក្រុមហ៊ុនជប៉ុនបានច្រើនសម្រាប់ធ្វើសកម្មភាពវិនិយោគនៅតំបន់នោះ ដោយមានក្រុមហ៊ុនជប៉ុនជាង 50%ក្នុងចំណោមក្រុមហ៊ុនជិត100 ដែលបានចូលមកបោះទីតាំងនៅតំបន់នោះ។ ជប៉ុនបានចូលមកវិនិយោគនៅកម្ពុជាក្នុងវិស័យជាច្រើនដូចជា វិស័យរោងចក្រឧស្សាហកម្មមិនមែនវាយនភណ្ឌ ដូចជា ការផ្គុំដំឡើងសម្ភារបរិក្ខារអេឡិចត្រូនិក និងអគ្គិសនី ការផលិតគ្រឿងបន្លាស់រថយន្ត និងការផ្គុំដំឡើងមធ្យោបាយដឹកជញ្ជូនជាដើម ដែលបាននិងកំពុងដើរតួនាទីយ៉ាងសំខាន់ក្នុងការចូលរួមចំណែកគាំទ្រដល់ការពង្រឹងរចនាសម្ព័ន្ធឧស្សាហកម្ម ការធ្វើពិពិធកម្មមូលដ្ឋានសេដ្ឋកិច្ចកម្ពុជា ការអភិវឌ្ឍធនធានមនុស្ស និងជាពិសេសការចូលរួមអនុវត្តឱ្យសម្រេចបានតាមគោលដៅនៃគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ2015-2025៕
