នាពេលបច្ចុប្បន្ននេះ យុវជនជាច្រើនបានចាប់អារម្មណ៍លើការសរសេរ និងបង្កើតស្នាដៃផ្ទាល់ខ្លួនដើម្បីបង្ហាញទៅកាន់សាធារណជនថ្មីៗ ដែលវាជាប្រភេទឯកសារសំខាន់ៗសម្រាប់សង្គម តែយុវជនមួយចំនួនមិនទាន់យល់ដឹងពីវិធីសាស្ត្រក្នុងការបង្កើតនូវស្នាដៃទាំងអស់នោះនៅឡើយ។
ខាងក្រោមនេះជាវិធីសាស្ត្រ និងគំនិតមួយចំនួនសម្រាប់អ្នកដែលចង់បង្កើតស្នាដៃថ្មីៗ ឬសម្រាប់អ្នកដែលមិនទាន់ដឹងថា ត្រូវបង្កើនស្នាដៃអ្វីដើម្បីឆ្លើយតបជាមួយនឹងភាពខ្លាំងរបស់ខ្លួន ហើយមានប្រយោជន៍តាមវិធីណា?
- អានច្រើន និងព្យាយាមដើរឱ្យច្រើន
អ្នកបង្កើតស្នាដៃថ្មី គឺចាំបាច់ត្រូវតែជាអ្នកដែលសំខាន់ ហើយឆ្លើយតបនឹងអ្វីដែលជាតម្រូវការរបស់មនុស្សទូទៅ ហេតុនេះអ្នកដែលជួបរឿងច្រើនស្គាល់បញ្ហាច្រើន ឬជាអ្នកដឹងពីប្រភពដែលកើតមានបញ្ហាទូទៅសម្រាប់មនុស្ស។ ដើម្បីដឹងពីបញ្ហាទាំងអស់នោះ លុះត្រាតែ ខ្លួនគេជាអ្នកដែលទទួលបានព័ត៌មានច្រើន តាមរយៈការអាន ការស្តាប់ ឬការចូលរួមក្នុងកិច្ចការសង្គមនានា។
បន្ទាប់ពីបានដឹងពីប្រភពព័ត៌មានច្រើនហើយយើងអាចសាកល្បងចងក្រងនូវបញ្ហាទាំងអស់នោះទុក ហើយបែងចែកឱ្យបានច្បាស់លាស់ សម្រាប់កំណត់ពីមុខសញ្ញាដើម្បីដោះស្រាយ។ យើងអាចសាកល្បងមើលលើបញ្ហាទាំងអស់ ហើយសង្កេតមើលពីចំណូលចិត្តរបស់ខ្លួនក្នុងការដោះស្រាយបញ្ហាថា តើយើងស្រឡាញ់ការងារមួយណា ហើយចង់ដោះស្រាយការងារណាដែលមិនធុញទ្រាន់។ ក្រោយពីទទួលបានប្រភពបញ្ហាហើយ យើងអាចធ្វើការស្រាវជ្រាវតាមគ្រប់លទ្ធភាពដើម្បីស្វែងរកដំណោះស្រាយដោយភ្ជាប់នឹងចំណេះដឹងដែលយើងមាន។
- ស្វែងរកមូលដ្ឋាននៃដំណោះស្រាយចាស់ៗ
ដើម្បីបង្កើតដំណោះស្រាយថ្មី អ្នកដែលអាចបង្កើតស្នាដៃថ្មី មិនប្រាកដថាជាមនុស្សដែលត្រូវតែធ្វើអ្វីៗថ្មីទាំងអស់នោះទេតែពេលខ្លះគាត់ក៏អាចជាអ្នកពូកែយកដំណោះស្រាយចាស់ៗមកធ្វើបច្ចុប្បន្នភាពឱ្យត្រូវនឹងស្ថានភាពបច្ចុប្បន្នដែរ។ ពេលខ្លះ ការព្យាយាមស្រាវជ្រាវអានឯកសារចាស់ៗដែលស្រដៀងគ្នាទៅនឹងស្ថានភាពបច្ចុប្បន្នអាចជាពន្លឺយ៉ាងល្អដើម្បីឱ្យយើងបន្តស្រាវជ្រាវលើគំហើញថ្មីៗទៀតដោយគ្រាន់តែកាត់ចំណុចមិនសំខាន់ចេញ ហើយបន្ថែមនូវអ្វីដែលស្របទៅនឹងស្ថានការណ៍បច្ចុប្បន្ននេះ ជាការស្រេច។ ដើម្បីធានាថា ការធ្វើបច្ចុប្បន្នភាពនៃដំណោះស្រាយអាចធ្វើទៅបានដោយមានភាពច្បាស់លាស់ និងត្រឹមត្រូវ យើងអាចស្វែងរកទីប្រឹក្សាដើម្បីផ្តល់យោបល់បន្ថែម និងស្វែងរកអ្នកជំនាញដើម្បីធ្វើសម្ភាសបន្ថែមជាការស្រេច។
- ប្រមូលឯកសារទាំងអស់ចងក្រងបញ្ចូលគ្នាទៅតាមអាយុកាល
ពេលខ្លះអ្នកដែលអាចបង្កើតស្នាដៃថ្មី គឺជាអ្នកដែលបានធ្វើនូវអ្វីដែលអ្នកដទៃមិនទាន់ធ្វើ ហើយស្នាដៃដែលត្រូវបានបង្កើតឡើងថ្មីនោះអាចក្លាយជាប្រភពនៃព័ត៌មានដែលមនុស្សត្រូវការបំផុត។ មនុស្សជាច្រើនមានការលំបាកបំផុតក្នុងការចងក្រងឯកសារច្រើនប្រភេទលើប្រធានបទតែមួយបញ្ចូលគ្នា ហើយចំណុចទាំងអស់នោះនឹងក្លាយជាអាហារឆ្ងាញ់សម្រាប់អ្នកស្រាវជ្រាវដទៃទៀត ព្រោះថាមានមនុស្សជាច្រើនអាចមិនមានអ្វីដែលយើងមាននៅក្នុងដៃ ហើយអ្វីដែលយើងធ្វើក៏អាចបង្កើនភាពងាយស្រួលដល់អ្នកស្រាវជ្រាវ និងខ្លួនឯងផ្ទាល់ថែមទៀតផង៕
