គុណវិបត្តិ​របស់​កាហ្វេ និង​ផលប៉ះពាល់​ចំពោះ​សុខភាព

0

ជឿថានៅរៀងរាល់ព្រឹករបស់អ្នក​ដែលនិយមទទួលទានកាហ្វេច្បាស់ជាមិនខកខានឱកាសក្នុងការស្វែងរកកាហ្វេអ៊ី​ន​មក​បន្ថែម​ភាពស្រស់​ស្រាយ​ឱ្យ​រាងកាយ​នោះឡើយ។ ដោយ​ភាព​ក្រអូប​ឈ្ងុយ និង​រស់ជាតិ​ដែល​ធ្វើឱ្យមាន​អារម្មណ៍​ថា​ក្លៀវក្លា​ស្វាហាប់​នោះ ទើប​វា​មិនមែនជា​រឿង​ប្លែក​ឡើយ ដែល​កាហ្វេ​ក្លាយជា​ភេសជ្ជៈ​កំពូល​ពេញនិយម​ដែល​មនុស្ស​ជាច្រើន​មិនអាច​ខ្វះ​បាន។ តែ​ភេសជ្ជៈ​ដែល​មនុស្ស​មិនអាច​ខ្វះ​បាន ដូចជា “កាហ្វេ” នេះ ទោះជា​ផ្តល់​ប្រយោជន៍​ក្នុង​រឿង​ភាព​ស្រស់ស្រាយ​ស្វាហាប់​មែន តែបើ​ទទួលទាន​ច្រើន​ជ្រុល​ពេក ក៏​ផ្តល់នូវ​គុណវិបត្តិ​ចំពោះ​រាងកាយ​ក្នុង​រយៈពេល​វែង​បានដែរ ព្រោះ​ក្រៅពី​កាហ្វេ​មាន​ជាតិ “កាហ្វេ​អ៊ី​ន” ហើយ​នោះ លោកអ្នក​ដឹង​ឬទេ​ថា តើ​វា​នៅមាន​សារធាតុ​អ្វីដែល​ផ្តល់​ទោស​ដល់​រាងកាយ​ទៀត​ដែរឬទេ?

សារធាតុ​ដែល​ផ្តល់នូវ​គុណវិបត្តិ​នៅក្នុង​កាហ្វេ
1. សារធាតុ​ធី​អូ​ហ្វ៊ីល​លីន (Theophylline) ជា​សារធាតុ​នៅក្នុង​កាហ្វេ​អ៊ីន​ដែល​ធ្វើឱ្យ​បំពង់ខ្យល់​រីក និង​បញ្ចេញ​ឬ​ទ្ធិ​ជំរុញ​ប្រព័ន្ធ​ប្រសាទ។ នៅក្នុង​ផ្នែក​វេជ្ជសាស្ត្រ សារធាតុ​នេះ​គេ​ប្រើ​ជាមួយ​អ្នក​ជំងឺហឺត​ដង្ហក់ ដើម្បី​ជំរុញ​ការដកដង្ហើម បើ​បានទទួល​សារធាតុ​នេះ​ក្នុង​បរិមាណ​ច្រើន អាច​នឹង​ហុច​ផល​ឱ្យ​រាងកាយ​បាត់បង់​តុល្យការ ដោយសារតែ​វា​ទៅ​ជំរុញ​ប្រព័ន្ធ​ខួរក្បាល​ផងដែរ ទើប​មិន​ស័កិ្តសម​ជាមួយ​អ្នក​ដែល​កើត​ជំងឺ​បេះដូង​នោះទេ។

2. សារធាតុ ស៊ែ​ន​ធី​ន អាល់​ខា​លយ​ដ៍ (Xanthine Alkaloid) ជា​សារធាតុ​ដែល​បញ្ចេញ​ឬ​ទ្ធិ​ជំរុញ​ប្រព័ន្ធ​ប្រសាទ​ផ្នែក​កណ្តាល ដែល​ធ្វើឱ្យមាន​អារម្មណ៍​ក្លៀវក្លា រាងកាយ​ស្វាហាប់ បើសិន​បានទទួល​ក្នុង​បរិមាណ​ច្រើន អាចធ្វើឱ្យ​បេះដូង​ដើរ​លឿន​ខុស​ប្រក្រតី​បាន ទើប​សារធាតុ​នេះ​ត្រូវបាន​ប្រើ​ជា​ចំណែក​ផ្សំ​របស់​ភេសជ្ជៈ​ប៉ូវ​កម្លាំង និង​ទឹក​ភេសជ្ជៈ​កំប៉ុងផ្សេងៗ ជា​សារធាតុ​ដែលមាន​នៅក្នុង​កាហ្វេ​អ៊ីន មាន​របាយការណ៍​ខ្លះ​បាន​ប្រាប់ថា សារធាតុ​នេះ​ប្រើ​លាយ​ផ្សំ​នៅក្នុង​ថ្នាំ​សម្លាប់​សត្វល្អិត ព្រោះ​កាហ្វេ​អ៊ីន​អាចធ្វើឱ្យ​សត្វល្អិត​ស្លាប់​បាន។ សារធាតុ​នេះ​ធ្វើឱ្យ​ប្រព័ន្ធ​ប្រឆាំង​ជំងឺ​ក្នុង​រាងកាយ​ធ្លាក់​ចុះខ្សោយផងដែរ។

សភាវ​ពុល​កាហ្វេ​អ៊ីន
សភាវ​ពុល​កាហ្វេ​អ៊ី​ន​កើត​នៅលើ​អ្នក​ដែល​ញៀន​កាហ្វេ​អ៊ី​ន​ខ្លាំងមែនទែន ដែល​ហុច​ផល​ឱ្យ​កើត​ដំបៅ​នៅក្នុង​ក្រពះ ទើប​ធ្វើឱ្យ​អ្នក​ដែលមាន​ជំងឺ​ក្រពះ​ស្រាប់​ហើយ មាន​អាការ​ចុកពោះ​នៅពេល​ទទួល ទាន​កាហ្វេ​ពេល​ពោះ​ទំនេរ។ អ្នក​ដែល​កើត​សភាវ​ពុល​កាហ្វេ​អ៊ីន នឹង​វិលមុខ មាន​អារម្មណ៍​រសាប់រសល់ និង​ហុច​ផល​ដល់​សុខភាព​ផ្លូវចិត្ត ធ្វើឱ្យ​ងាយ​កើត​អាការ​ធុញថប់​តានតឹង។ អាការ​បន្ទាប់បន្សំ​ដែល​ជួបប្រទះ​ញឹកញាប់​គឺ ការ​បត់ជើងតូច​ញឹកញាប់​ខុស​ប្រក្រតី បេះដូង​លោត​ញាប់ខ្លាំងៗ និង​គេង​លក់​មិន​ស្រួល គ្រោះថ្នាក់​ម្យ៉ាងទៀត​ដែល​អាច​កើតឡើង​បាន​ចំពោះ​អ្នកញៀន​កាហ្វេ​អ៊ីន​នោះ​គឺ សភាវ​ពុល​កាហ្វេ​អ៊ីន​នៅក្នុង​ឈាម​ខ្ពស់​ដែល​ហុច​ផល​ឱ្យ​កើត​សម្ពាធ​ឈាម​ឡើង​ខ្ពស់ និង​ធ្វើឱ្យ​ខ្លាញ់​នៅក្នុង​ឈាម​កើនឡើង​ដែរ ដែលជា​លទ្ធផល​ធ្វើឱ្យ​ក្រពះ​ផលិត​អាស៊ីត​ចេញមក​បន្ថែម ធ្វើឱ្យ​ងាយ​កើត​ដំបៅ​ក្នុង​ក្រពះ​ខ្លាំង​ជាង​មនុស្ស​ប្រក្រតី។ ចំណែក​ផលប៉ះពាល់​ដែល​កើត​នៅលើ​មនុស្ស​ស្រី​វិញ កាហ្វេ​អ៊ី​ន​ក្នុង​បរិមាណ​ច្រើន​នឹងធ្វើ​ឱ្យ​ងាយ​កើត “ដុំ​គីស” ជាង​មនុស្ស​ប្រក្រតី និង​ប្រថុយប្រថាន​ក្នុង​ការកើត​មហារីក ឬ​ដុះ​សាច់​នៅក្នុង​សុដន់​ទៀតផង។

ញៀន​កាហ្វេ​អ៊ី​ន​ខ្លាំង​ប៉ុនណា… ក៏​អាច​ឈប់​បាន​ដោយ​វិធី​ខាងក្រោម​នេះដែរ
1. បន្ថយ​បរិមាណ
សម្រាប់​អ្នក​ដែល​ញៀន​កាហ្វេ ហើយ​ត្រូវ​ការចង់​ឈប់​ទទួលទាន​កាហ្វេ​យ៉ាង​ដាច់ខាត​តែ​ម្តងនោះ ដំបូងៗអាចមាន​អាការ​ឈឺ-ក្បាល និង​មាន​អារម្មណ៍​ឡេះឡះ​នៅពេល​មិនបាន​ទទួលទាន​កាហ្វេ។ ដំណាក់កាល​ដំបូង​សុំឱ្យ​សាកល្បង​ប្តូរ​ពី​កាហ្វេ​ខ្មៅសុទ្ធមកជា​កាហ្វេ​ទឹកដោះគោ​ប្រមាណ​ជាមួយ​អាទិត្យ រួចហើយ​សឹម​បញ្ចុះ​មក ជា​ការ​ទទួលទាន​ទឹកដោះគោឆៅ​ក្តៅឧណ្ហៗលាយ​កាហ្វេស្តើង។ ក្នុងអំឡុងពេល​ថ្ងៃ ចូរ​ប្តូរ​ពី​កាហ្វេ​មកជា​កូ​កូ​ក្តៅ​ជំនួស​វិញ ព្រោះ​កូ​កូ​ក៏មាន​កាហ្វេ​អ៊ីន​ដូចគ្នា​ដែរ តែ​តិចជាង​កាហ្វេ។

ការឈប់​ទទួលទាន​កាហ្វេ​បែប​ដាច់ខាតភ្លាមៗ នឹង​ហុច​ផល​អាក្រក់​ច្រើនជាង​ផល​ល្អ និង​អាចធ្វើឱ្យ​កាន់តែ​ពិបាក​បញ្ឈប់​ការ​ទទួលទាន​កាហ្វេ​ខ្លាំង​ឡើងទៅ​វិញ​ទេ ដូច្នេះ​ទើប​គួរប្រើ​វិធី​កាត់បន្ថយ​បរិមាណ ដែល​អាច​ហៅ​បាន​ថា ជាការ​ដកខ្លួន​ថយ​ឆ្ងាយ​ពី​គុណវិបត្តិ​របស់​កាហ្វេ​បន្តិចម្តងៗទើប​ជាការ​ប្រសើរ។

2. ទទួលទាន​ទឹកតែ​ ឱសថ​បុរាណ និង​ភេសជ្ជៈ​ក្លិន​ខា​រ៉ា​មេ​ល
តែ​ប្រភេទ​ខ្លះ​គ្មាន​កាហ្វេ​អ៊ីន​ឡើយ ហើយ​ថែមទាំង​ក្លិន​របស់​ទឹកតែ​ឆុងចាស់ៗ នឹង​ជួយ​ឱ្យមាន​អារម្មណ៍​ស្រស់ថ្លា អាច​ជំនួស​ឱ្យ​ការ​ញៀន​កាហ្វេ​បាន។ តែ​ឱសថ​បុរាណ ដូចជា តែ​យឹ​ន​ស៊ិ​ន តែ​ព្នៅ តែ​ខ្ញី តែ​បៃតង មាន​ក្លិនក្រអូប និង​ជួយ​បំប៉ន​សុខភាព ជួយ​សម្រួល​តុល្យ​ការឱ្យ​រាងកាយ។ ការរក​អ្វី​ផ្សេង​មក​ទទួលទាន​ជំនួស​កាហ្វេ​ក៏​អាចជួយ​បានដែរ បើ​លោកអ្នក​មិន​ចូលចិត្ត​ទឹកតែ ចូរ​ប្តូរ​មក​ទទួលទាន​ទឹកដោះ​ក្រឡុក​លាយ​ក្លិន​ខា​រ៉ា​មេ​ល ឬ​បាត់​ធើ​រ៍ ស្ក​ត់ ក៏​ជា​ភេសជ្ជៈ​មួយទៀត​ដែល​អាច​ជំនួស​កាហ្វេ​បានដែរ ព្រោះ​ទាំង​ខា​រ៉ា​មេ​ល និង​បាត់​ធើ​រ៍ ស្ក​ត់​នឹង​ផ្តល់នូវ​ក្លិន​ស្រដៀង​កាហ្វេ​ខ្លាំង​បំផុត។

នៅពេល​ដឹង​ពី​គុណវិបត្តិ​របស់​កាហ្វេ​ហើយ ក៏​គួរតែ​បន្ថយ​បរិមាណ​ការទទួល​ទាន​កាហ្វេ​ឱ្យមាន​តុល្យភាព​ជាមួយ​ការទទួល​ទាន​អាហារផ្សេងៗ គួបផ្សំ​ជាមួយ​ការទទួល​ទាន​បន្លែ​ផ្លែឈើ​ដែលមាន​ប្រយោជន៍​ដល់​រាងកាយ និង​ទទួលទាន​ទឹកស្អាត​ឱ្យបាន​ញឹកញាប់​ឡើង ដើម្បី​លាងជម្រះ​ឬ​ទ្ធិ​របស់​កាហ្វេ​អ៊ីន​ឱ្យ​ថយចុះ​ខ្លះ៕

ចែករំលែក