ភ្នំពេញៈ គម្រោងអគារពាណិជ្ជកម្ម Exchange Square ដែលអភិវឌ្ឍដោយក្រុមហ៊ុន Hongkong Land បានបើកសម្ពោធជាផ្លូវការហើយ ដោយបាននាំយកមកនូវគំរូស្តង់ដារអគារពាណិជ្ជកម្មដែលមានការិយាល័យ និងហាងលក់ទំនិញល្បីកម្រិត A ថ្មីមួយនៅទីក្រុងភ្នំពេញ។
តំណាងក្រុមហ៊ុន Hongkong Land លោកស្រី ដន ស៊ូ បានមានប្រសាសន៍ក្នុងពិធីសម្ពោធអគារពាណិជ្ជកម្មនេះ នៅព្រឹកថ្ងៃទី16 ខែសីហានេះថា អ៊ិចឆេង សឃ្វែរ (EXCHANGE SQUARE)គឺជាគម្រោងអភិវឌ្ឍន៍ពេញដោយកិត្យានុភាពថ្មីចុងក្រោយបំផុតរបស់ Hongkong Land នៅក្នុងតំបន់ដែលមានពាណិជ្ជកម្មរីកលូតលាស់របស់អាស៊ាន ហើយយើងជឿជាក់ថា គម្រោងនេះនឹងនាំមកនូវមុខមាត់ថ្មីដល់រាជធានីភ្នំពេញ។ លោកស្រីបន្តថា ផលប្រយោជន៍ និងការប្ដេជ្ញាចិត្ត ដែលយើងបានមើលឃើញពីការជួលអគារ គឺជាសញ្ញាមួយដែលបង្ហាញថា EXCHANGE SQUARE កំពុងប្រែក្លាយជាមជ្ឈមណ្ឌលពាណិជ្ជកម្ម និងហាងលក់ទំនិញនៅក្នុងរាជធានីយ៉ាងឆាប់រហ័ស ហើយយើងសម្លឹងទៅរកភាពរីកចម្រើនរួមគ្នា ជាមួយទីក្រុងដ៏ស៊ីវិល័យប្រកបដោយភាពសប្បាយរីករាយនាពេលអនាគត។
លោកស្រីបន្តថា Hongkong Land ត្រូវបានទទួលស្គាល់ដោយសារគុណភាពសំណង់ ការគ្រប់គ្រងអចលនទ្រព្យ និងសេវាបម្រើអតិថិជននៅទូទាំងតំបន់ ហើយគេរំពឹងថា EXCHANGE SQUARE នឹងក្លាយជាគំរូស្ដង់ដារនៃការអភិវឌ្ឍពាណិជ្ជកម្មនៅភ្នំពេញ និងកម្ពុជា។ ក្រុមហ៊ុនក៏មានការិយាល័យកម្រិត A អចលនទ្រព្យសម្រាប់ការប្រើប្រាស់ចម្រុះ និងហាងលក់ដូរទំនិញនៅហុងកុង ចិន សិង្ហបុរី ឥណ្ឌូនេស៊ី ថៃ និងវៀតណាមផងដែរ។ Hongkong Land គឺជាក្រុមសម្ព័ន្ធវិនិយោគ គ្រប់គ្រង និងអភិវឌ្ឍអចលនទ្រព្យមានចុះបញ្ជិកាដែលត្រូវបានបង្កើតឡើងក្នុងឆ្នាំ1889។ ធុរកិច្ចរបស់ Hong kong Land ត្រូវបានកសាងឡើងដោយឈរលើឧត្តមភាព សុចរិតភាព និងភាពជាដៃគូ។
អគារពាណិជ្ជកម្មនេះបានទាក់ទាញចំណាប់អារម្មណ៍អាជីវកម្មធំៗដែលមានតម្រូវការជួលអគារដូចជា Hard Rock Café, Legend Premium Cinema, Lucky Premium Supermarket និង Nham Central ដែលជាបណ្ដុំអាហារដ្ឋានទំនើបក្នុងរយៈពេលត្រឹមតែ2ខែ បន្ទាប់ពីបានបើកដំណើរការកាលពីខែមិថុនា។ អគារនេះមានការិយាល័យកម្រិត A ចំនួន16ជាន់ដែលមានផ្ទៃក្រឡា 39,700 ម៉ែត្រការ៉េ ផ្នែកខាងក្រោមចំនួន4ជាន់សម្រាប់ហាងលក់ទំនិញ និងអាហារដ្ឋានដែលបានដំណើរការ70ភាគរយហើយ៕
