ភ្នំពេញ៖ ស្របពេលដែលផលិតផលបរទេសត្រូវបាននាំចូលមកលក់នៅលើទីផ្សារកម្ពុជា យ៉ាងច្រើនពីមួយឆ្នាំទៅមួយឆ្នាំនោះ វាបានបង្កជាក្តីបារម្ភសម្រាប់សហគ្រាសខ្នាតតូច និងមធ្យមនៅកម្ពុជាអំពីការលក់ផលិតផលក្នុងស្រុករបស់ខ្លួនមិនសូវមានការគាំទ្រពីអតិថិជន។
លោកឧកញ៉ា តែ តាំងប៉ ប្រធានសហគ្រាសខ្នាតតូច និងមធ្យមនៅកម្ពុជាមានប្រសាសន៍នៅក្នុងសិក្ខាសាលាស្តីពីកិច្ចពិគ្រោះយោបល់រវាងអ្នកផលិត និងផ្គត់ផ្គង់ផលិតផលខ្មែរជាមួយអ្នកប្រើប្រាស់ និងអ្នកចែកចាយបន្តដែលរៀបចំឡើងដោយក្រសួងពាក់ព័ន្ធចំនួន4កាលពីព្រឹកថ្ងៃទី17 ខែសីហា ឆ្នាំ2017 នេះឱ្យដឹងថា បច្ចប្បន្នផលិតផលក្រៅស្រុកបានសម្រុកចូលមកលក់យ៉ាងច្រើននៅលើទីផ្សារកម្ពុជា ដូចជាការនាំចូលសម្ភារប្រើប្រាស់ពីប្រទេសថៃមាន ពូក ខ្នើយ សម្លៀកបំពាក់ជាដើម បានចរាចរគ្រប់ទិសទីតាមរយៈការធ្វើពិព័រណ៍ពាណិជ្ជកម្មទៅតាមខេត្តឆ្ងាយ បានធ្វើឱ្យប្រជាពលរដ្ឋខ្មែរងាកទៅប្រើប្រាស់វត្ថុនាំចូលទាំងនោះ ហើយមិនសូវមានការគាំទ្រផលិតផលក្នុងស្រុកប៉ុន្មានឡើយដោយសារមានការប្រកួតប្រជែងផ្នែកតម្លៃ។ លោកឧកញ៉ាបន្តថា ចំពោះទីផ្សារនៅតាមទីប្រជុំជន ដូចជានៅតាមផ្សារទំនើប តាមស្តារ៍ម៉ាតតូចៗវិញផលិតផលក្នុងស្រុកក៏ពិបាកជ្រៀតចូលដូចគ្នាដែរ ដោយសារមានផលិតផលបរទេសច្រើន ហើយអតិថិជននៅក្នុងប្រទេសក៏និយមប្រើប្រាស់សម្ភារនាំចូលពីក្រៅប្រទេសទាំងនោះដែរ។
លោកឧកញ៉ា ហាក់ សុវណ្ណា ប្រធានក្រុមប្រឹក្សាភិបាលនៃសម្ព័ន្ធអ្នកនាំចេញកសិផលផ្លែឈើកម្ពុជាមានប្រសាសន៍ដោយសម្តែងក្តីបារម្ភថា ខណៈដែលកសិករផលិតបានហើយគ្មានទីផ្សារសម្រាប់លក់ចេញ ពិសេសផ្លែស្វាយមកទល់បច្ចុប្បន្នទាំងកំពុងប្រមូលផល និងមិនទាន់ប្រមូលមានសរុបប្រមាណជា1លានហិកតា ហើយកាលពីពេលថ្មីៗកន្លងមកនេះស្វាយបានធ្លាក់ថ្លៃយ៉ាងគំហុក ដោយសារតែមិនសូវមានឈ្មួញពីក្រៅប្រទេសមកទិញ។ លោកថា បច្ចុប្បន្នទោះជាមានក្រុមហ៊ុនកែច្នៃផ្លែស្វាយធ្វើជាដំណាប់ក៍ដោយ តែមិនអាចទិញទិន្នផលផ្លែស្វាយមកកែច្នៃទាំងអស់នោះបានទេ ដូច្នេះលោកចង់ស្នើដ្ឋាភិបាលឱ្យជួយស្វែងរកទីផ្សារក្រៅប្រទេសសម្រាប់លក់ផ្លែស្វាយនេះផង។
ឆ្លើយតបនឹងក្តីបារម្ភរបស់វិស័យឯកជន ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ក៏បានលើកឡើងពីកំណើនសេដ្ឋកិច្ចរបស់កម្ពុជាដែលសម្រេចបានជាមធ្យម 7% ក្នុងរយៈពេល 2ទសវត្សរ៍ចុងក្រោយ ហើយក្រសួងពាណិជ្ជកម្មបានប្តេជ្ញាចិត្តក្នុងការបន្តស្វែងរកទីផ្សារជូនសហគ្រាសធុនតូច និងធម្យមនៅកម្ពុជា។ លើសពីនេះឯកឧត្តមរដ្ឋមន្ត្រីក៏បានបង្ហាញជំហរគាំទ្រចំពោះការចាប់ដៃគូធុរកិច្ចរវាងម្ចាស់ផលិតផល និងអ្នកទទួលទិញនៅក្នុងសិក្ខាសាលា ដែលជាវឌ្ឍនភាពថ្មីមួយទៀតសម្រាប់លើកកម្ពស់កិត្យានុភាពផលិតផលកម្ពុជា។
សូមបញ្ជាក់ថា តាមរយៈសិក្ខាសាលាពិគ្រោះយោបល់លើកទី1ដែលបានរៀបចំដោយជោគជ័យកាលពីឆ្នាំមុន បញ្ហាប្រឈមជាច្រើនពាក់ព័ន្ធនឹងការជំរុញផលិតផលកម្ពុជាចូលទីផ្សារក្នុង និងក្រៅប្រទេសត្រូវបានដោះស្រាយបានមួយកម្រិតហើយ។ ដោយឡែកសិក្ខាសាលាឆ្នាំនេះក៏រំពឹងថា នឹងអាចស្វែងរកដំណោះស្រាយកាន់តែច្រើនថែមទៀតដើម្បីជួយសម្រួលដល់ការអភិវឌ្ឍវិស័យឯកជន និងការធ្វើពិពិធកម្មវិស័យនាំចេញរបស់កម្ពុជា៕
