ភ្នំពេញ៖ មិនធម្មតាទេ បើយើងក្រឡេកមើលជ្រុងមួយនៃវិស័យទេសចរណ៍នៅកម្ពុជា ដែលគេឱ្យឈ្មោះថាជាឧស្សាហកម្មគ្មានផ្សែង ឬមានផ្សែងតិចតួចសោះ តែអាចរកចំណូលចូលជាតិបានរាប់ពាន់លានដុល្លារក្នុងមួយឆ្នាំៗនោះ។
ក្រសួងទេសចរណ៍បានបង្ហាញរបាយការណ៍ចុងក្រោយមួយឱ្យដឹងថា ប្រាំមួយខែដើមឆ្នាំ2017 នេះកម្ពុជាទទួលបានទេសចរអន្តរជាតិប្រមាណ2,6លាននាក់ កើនឡើងប្រមាណ12.8% ធៀបនឹងឆ្នាំ2016ក្នុងរយៈពេលដូចគ្នា។ ដោយឈរលើគោលការណ៍នៃការអភិវឌ្ឍទេសចរណ៍ប្រកបដោយនិរន្តរភាព និងការទទួលខុសត្រូវ ទេសចរណ៍កម្ពុជាមានការកើនឡើងជាលំដាប់ពីមួយឆ្នាំទៅមួយឆ្នាំជាក់ស្តែងកាលពីឆ្នាំ2016 កម្ពុជាទទួលបានទេសចរអន្តរជាតិជាង 5លាននាក់ក្នុងកំណើន5% និងនាំចំណូលចូលជាតិបានប្រមាណ3400លានដុល្លារអាមេរិកស្មើនឹង13.5% នៃផលិតផលក្នុងស្រុកសរុប (GDP) និងបានបង្កើតការងារដោយផ្ទាល់ដល់ប្រជាពលរដ្ឋខ្មែរប្រមាណ62ម៉ឺននាក់ ស្មើនឹង13% នៃការងារសរុបនៅក្នុងវិស័យផ្សេងៗទៀត។
ជាចក្ខុវិស័យឆ្នាំ2020 កម្ពុជារំពឹងទទួលបានទេសចរអន្តរជាតិប្រមាណ 7លាននាក់ដែលអាចនឹងនាំចំណូលចូលជាតិបានប្រមាណ5ពាន់លានដុល្លារ និងបង្កើតការងារដោយផ្ទាល់ជិត1លាននាក់ ដូច្នេះយុវជនកម្ពុជានឹងមានឱកាសការងារកាន់តែច្រើនឡើងៗថែមទៀតនៅក្នុងវិស័យទេសចរណ៍នេះ៕
