ឫស្សីទំពាំងផ្អែមជារុក្ខជាតិដំណាំបន្លែប្រភេទថ្មីមួយទៀតដែលទើបតែនាំចូលមកដាំដុះនៅក្នុងប្រទេសកម្ពុជាយើងក្នុងរយៈពេលប៉ុន្មានឆ្នាំចុងក្រោយនេះ។ ដោយសារតែរសជាតិឆ្ងាញ់របស់វា បានធ្វើឱ្យទំពាំងផ្អែមក្លាយជាអាហារដ៏ពេញនិយម និងមានការគាំទ្រខ្លាំងនៅលើទីផ្សារទាំងក្នុង និងក្រៅប្រទេសទៀតផង។
លោក សុខ វិជ្ជា អ្នកបច្ចេកទេស និងជាម្ចាស់កសិដ្ឋាន “សួនកសិកម្មបន្ទាយស្រី” មានទីតាំងនៅភូមិឃុនរាប ឃុំឃុនរាប ស្រុកបន្ទាយស្រី ខេត្តសៀមរាបបានមានប្រសាសន៍ថា លោកបាននាំចូលពូជឫស្សីទំពាំងផ្អែមនេះមកពីប្រទេសថៃ យកមកដាំនៅក្នុងកសិដ្ឋានរបស់លោក អស់រយៈពេល 3ឆ្នាំមកហើយ ហើយដោយសារតែរសជាតិរបស់វាឆ្ងាញ់ មិនហាងខ្លាំងដូចទំពាំងឫស្សីក្នុងស្រុកយើង បានធ្វើឱ្យទំពាំងផ្អែមនេះមានការគាំទ្រខ្លាំងនៅលើទីផ្សារ ពិសេសលក់សម្រាប់តែម៉ូយដុំនៅភ្នំពេញ និងក្នុងខេត្តសៀមរាបតែប៉ុណ្ណោះ មិនមានសល់សម្រាប់
លក់រាយនោះទេ ហើយបច្ចុប្បន្នក៏មានឈ្មួញជនជាតិថៃមកចរចារកទិញដើម្បីនាំចេញទៅលក់នៅប្រទេសក្រៅផងដែរប៉ុន្តែមិនទាន់មានលទ្ធភាពផ្គត់ផ្គង់ឱ្យនៅឡើយ។
ឫស្សីទំពាំងផ្អែមនេះវាផ្តល់ផលអាចឱ្យយើងកាត់ទំពាំងលក់បានជាប្រចាំ ដោយ 3ថ្ងៃអាចជីកកាត់លក់ឱ្យម៉ូយបានម្តង ហើយនៅលើផ្ទៃដី 3ហិកតាគេអាចប្រមូលផលបានចន្លោះពី 200គីឡូក្រាម ទៅ300គីឡូក្រាមក្នុងមួយលើកៗ ហើយតម្លៃបោះដុំនៅរដូវប្រាំង អាចបានថ្លៃចន្លោះពី 6,000ទៅ8,000រៀលក្នុងមួយគីឡូក្រាម ចំណែករដូវវស្សាវិញលក់បានថ្លៃទាបជាងខែប្រាំង បានប្រហែលតែពី 2,000ទៅ3,000រៀលប៉ុណ្ណោះក្នុងមួយគីឡូក្រាម ដោយសាររដូវវស្សាមានភ្លៀងធ្លាក់ច្រើន ដីធូរទំពាំងដុះច្រើន កសិករមិនសូវជួបការលំបាក និងមិនចំណាយកម្លាំងពលកម្មក្នុងការស្រោចទឹកច្រើន ដូចនៅរដូវប្រាំងឡើយ។
លោកក៏បានប្រាប់ពីបច្ចេកទេសដាំដុះដែរថា ឫស្សីនេះមិនរើសដីដូចដំណាំផ្សេងនោះទេ ពោលគឺអាចដាំបានគ្រប់សណ្ឋានដី ប៉ុន្តែអាចដាំបានតែនៅក្នុងទីតាំងណាដែលមានប្រភពទឹក ដែលងាយស្រួលក្នុងការស្រោចស្រព និងចៀសវាងដាំនៅលើដីណាដែលលិចទឹកយូរ ព្រោះទោះជាការលិចទឹកមិនធ្វើឱ្យដើមឫស្សីងាប់មែន ប៉ុន្តែអាចធ្វើឱ្យទំពាំងរលួយ។ ពេលរកដីសម្រាប់ដាំបានហើយ គេត្រូវភ្ជួរដី និងជីករណ្តៅទំហំ4តឹក4ជ្រុង ជម្រៅ4តឹក និងមានគម្លាតពីគ្នាប្រវែង 3ម៉ែត្រមួយក្នុងមួយរណ្ដៅ។
ពេលជីករួច គេត្រូវហាលដីចោលមួយសប្តាហ៍ ទៅពីរសប្តាហ៍ដើម្បីសម្លាប់មេរោគ និងកុំឱ្យស្មៅដុះច្រើនក្នុងដំណាក់កាលដាក់ដាំដំបូង។ បន្ទាប់មកត្រូវយកកូនឫស្សីដែលគេបង្កាត់ពូជនៅក្នុងថង់មកដាក់ដាំ ដោយគ្រាន់តែកាត់ថង់ចេញ និងកប់កូនឬស្សីត្រឹមដីក្នុងថង់នោះ រួចស្រោចទឹកវារៀងរាល់ថ្ងៃ ឬ2ថ្ងៃម្តងទៅតាមសំណើមរបស់ដី កូនឫស្សីនឹងលូតលាស់បានល្អឡើងមិនខាន។
ក្រោយពីដាក់ដាំបានមួយខែ កូនឫស្សីចាប់ផ្តើមលូតលាស់ ពេលនោះគេត្រូវយកជីអាចម៍មាន់ ឬជីអាចម៍គោច្រកមួយ 1ការ៉ុង ទម្ងន់ប្រមាណជា 10គីឡូក្រាមទៅដាក់ក្បែរគល់ឫស្សីនីមួយៗ ហើយយកកូនកាំបិតឆូតទម្លាយការ៉ុងក្នុងប្រវែងតូចល្មមដើម្បីឱ្យជីលាមកសត្វក្នុងនោះហូរចេញបន្តិចម្តងៗនៅពេលយើងបាញ់ទឹកស្រោច។ លោកថា គេអាចដាក់ជីនៅលើដីជាប់នឹងគុម្ពឬស្សីដោយផ្ទាល់ក៏បានដែរ ប៉ុន្តែវិធីសាស្ត្រដាក់ក្នុងការ៉ុងនេះគឺដើម្បីប្រើប្រាស់ជីឱ្យបានយូរចៀសវាងកុំឱ្យអស់ជីច្រើនពេក។
លោកបន្តទៀតថា នៅរដូវវស្សាគេពុំបាច់ស្រោចទឹកទេ តែបើរដូវប្រាំងគេត្រូវស្រោចទឹក 2ថ្ងៃម្តង ឬ3ថ្ងៃម្តង អាស្រ័យលើសំណើមដី។ ឫស្សីមិនមានសត្វល្អិតមកយាយីបំផ្លាញឡើយ គេគ្រាន់តែជ្រំដី ដាក់ជី ថែស្មៅ(កុំប្រើជីបាញ់សម្លាប់ស្មៅនាំឱ្យដើមឫស្សីរួញ) និងស្រោចទឹកជាប្រចាំ វានឹងលូតលាស់បានល្អ។ ដាំត្រឹមរយៈពេល3ខែ វានឹងចាប់ផ្តើមចេញទំពាំងលើកដំបូង។
ដំណាក់កាលចេញទំពាំងលើកដំបូងនេះ គេមិនកាត់វាទេ គេទុកឱ្យវាលូតលាស់ទៅជាដើមឫស្សីបានចំនួន 5 ទៅ6ដើមសិន និងទុកឱ្យមានអាយុប្រហែលមួយឆ្នាំពីរខែសិន ទើបគេជីកកាត់យកទំពាំងមកលក់បាន ហើយនៅពេលឫស្សីធំពេញរូបពេញរាង គេអាចប្រមូលទំពាំងបានម្តងៗ ពី 1ទៅ2ទំពាំង ដែលមានទម្ងន់ពី4 ទៅ6គីឡូក្រាម ហើយមួយហិកតាបានប្រហែល 100គីឡូក្រាមក្នុងមួយលើក ដោយ3ថ្ងៃត្រូវប្រមូលផលម្តង ហើយរហូតដល់ 20 ទើបដើមឫស្សីចាស់លែងផ្តល់ផល ពេលនោះគេអាចកាប់យកដើមឫស្សីទៅធ្វើឈើចាក់ធ្មេញ ឬចង្កឹះ និងប្រើប្រាស់ធ្វើជារបស់មានប្រយោជន៍ផ្សេងៗបាន។
ទំពាំងផ្អែមនេះមានលក្ខណៈពិសេសម្យ៉ាង គឺមិនសូវហាង ឬមិនមានជាតិអាស៊ីត ដូចទំពាំងធម្មតាឬទំពាំងក្នុងស្រុកយើងនោះទេ។ បងៗស្រី្តមេផ្ទះអាចយកទំពាំងផ្អែមនេះទៅស្រុសបន្តិច ឬមិនបាច់ស្រុសក៏បាន មុននឹងយកធ្វើជាម្ហូបផ្សេងៗ ជាពិសេសស្ងោរជាមួយមាន់ស្រែ មានរសជាតិឆ្ងាញ់ រហូតញ៉ាំភ្លេចឆ្អែតមិនខាន និងលើសពីនេះទៀតគេអាចច្នៃធ្វើជាទំពាំងក្រៀម ទំពាំងជ្រក់ ឬទំពាំងកំប៉ុងទុកពិសាបានយូរទៀតផង៕
