ដោយមើលឃើញថា មើមដំឡូងបារាំងត្រូវបានគេនាំចូលពីក្រៅប្រទេសមកលក់លើទីផ្សារកម្ពុជាជារៀងរាល់ថ្ងៃនោះ កសិករខ្មែរម្នាក់បានសាកល្បងដាំដើមដំឡូងបារាំងយកមើមនៅក្នុងកសិដ្ឋានរបស់ខ្លួនជាលើកដំបូង និងទទួលបានជោគជ័យខ្លាំងលើសពីការរំពឹងទុកទៀតផង។
កសិករម្នាក់នោះឈ្មោះ គ្រី ម៉េងឈាង បានដាំដើមដំឡូងបារាំងនៅក្នុងភូមិចំការតែ សង្កាត់មានជ័យ ស្រុកពេជ្រចិន្តា ខេត្តមណ្ឌលគិរី បានមានប្រសាសន៍ឱ្យដឹងថា ដោយមានការគាំទ្រពីមន្ទីរកសិកម្មខេត្ត លោកបានសម្រេចដាំដើមដំឡូងបារាំងនោះនៅលើផ្ទៃដីដែលមានទំហំទទឹង 15ម៉ែត្រនិងបណ្តោយ 15ម៉ែត្រ ដើម្បីធ្វើការសាកល្បងជាលើកដំបូង លុះក្រោយពេលដាំហើយ ឃើញថា បានទទួលផលយ៉ាងល្អប្រសើរ។
កសិករខាងលើបន្តថា កាលពីពេលកន្លងមក មន្ទីរកសិកម្មបានផ្តល់ជូនពូជដំឡូងបារាំងមកឱ្យដាំនៅលើដីក្បែរផ្ទះប្រមាណជា 10រង ហើយគ្រាន់តែអនុវត្តតាមបច្ចេកទេសដាំដុះរបស់មន្ត្រីជំនាញកសិកម្មខេត្តដែលបានផ្តល់ឱ្យត្រឹមតែរយៈពេល 3ខែប៉ុណ្ណោះ ដំឡូងបារាំងក៏ផ្ដល់ផលឱ្យអាចដកយកមើមទៅលក់បាន ដោយមានការគាំទ្រខ្លាំងនៅលើទីផ្សារទៀតផង។
សម្រាប់បច្ចេកទេសដាំដុះ មិនលំបាកនោះទេ ដំបូងឡើយគេគ្រាន់តែភ្ជួរដីហាលចោលឱ្យស្ងួត ចំនួនពីរលើក ដើម្បីសម្លាប់ស្មៅ និងសម្លាប់មេរោគចង្រៃដែលមាននៅក្នុងដី រួចហើយគេចាប់ផ្តើមលើកជារងដែលមានកម្ពស់ចន្លោះពី 2ទៅ 3តឹក និងទទឹង 1ម៉ែត្រ រួចហើយគេយកជីធម្មជាតិដូចជាលាមកសត្វ ឬជីកំប៉ុសទៅរោយពីលើ បន្ទាប់មកទើបយកមើមដំបូងបារាំងដែលទុកធ្វើពូជនោះទៅដាក់ដាំនៅលើថ្នាលដែលមានគម្លាតពីគុម្ពមួយទៅគុម្ពមួយចន្លោះពី3 ឬ4តឹក។ លុះពេលដាំរួច គេគ្រាន់តែស្រោចទឹកក្នុងមួយថ្ងៃពី1ដង ទៅ2ដងតាមអាកាសធាតុក្តៅ ឬត្រជាក់ និងថែទាំស្មៅកុំឱ្យដុះខ្លាំង តែប៉ុណ្ណឹងដំឡូងបារាំងនឹងលូតលាស់បានល្អ រហូតដល់ដើមដំឡូងមានកម្ពស់បានប្រហែលជា 3តឹក គេត្រូវជ្រំដី ពូនគុម្ពបង្ការក្រែងខ្យល់បក់ខ្លាំងនាំឱ្យរលើងដើមជាការស្រេច។
លោកថា គ្រាន់តែថែទាំ ស្រោចទឹក បោចស្មៅប្រមាណជា 3ខែប៉ុណ្ណោះ ដំឡូងបារាំងនឹងហុចផលឱ្យអាចដកយកមើមលក់បានទៅហើយ។ គ្រាន់តែក្នុងទំហំដីប្រវែង1ម៉ែត្រ 4ជ្រុង ដំឡូងបារាំងអាចផ្តល់មើមបានដល់7 ទៅ10គីឡូក្រាម និងលក់បានក្នុងតម្លៃបោះដុំមួយគីឡូក្រាមថ្លៃ6,000រៀលដែរ។
លោក អុីង ឱរ៉ុម ម្ចាស់ហាងស្រុកស្រែដែលលក់បន្លែធម្មជាតិនៅខាងលិចផ្សារចំការដូងមានប្រសាសន៍ថា ដើម្បីលើកទឹកចិត្តកសិករ និងចូលរួមលើកស្ទួយវិស័យកសិកម្មនៅកម្ពុជា លោកបានទទួលទិញដំឡូងបារាំងខាងលើដើម្បីយកមកលក់បន្តនៅក្នុងផ្សារខាងលើ និងទទួលបានការគាំទ្រខ្លាំងពីអតិថិជនទៀតផង។ លោកថា អ្វីដែលធ្វើឱ្យលោកសម្រេចចិត្តបើកហាងលក់បន្លែធម្មជាតិ ឬបន្លែសុវត្ថិភាពនេះ គឺដោយសារកន្លងមកលោក គឺជានិស្សិតផ្នែកកសិកម្មនៅសាកលវិទ្យាល័យកសិកម្មចំការដូង ពេលចុះធ្វើកម្មសិក្សាទៅដល់មូលដ្ឋាន ឮតែកសិកររអ៊ូរទាំថា កង្វះទីផ្សារ បន្លែដាំបានហើយគ្មានឈ្មួញចុះទៅទិញ ពេលខ្លះទុកស្អុយចោលក៏មាន។
ងាកមកប្រជាជននៅក្រុងភ្នំពេញវិញ បែរជារអ៊ូរទាំថា រកបន្លែធម្មជាតិទទួលទានមិនបាន ដូច្នេះហើយទើបលោកសម្រេចចិត្តបើកហាងលក់បន្លែនេះឡើងដើម្បីផ្សារភ្ជាប់ទីផ្សារកសិកម្មជនបទ ជាមួយប្រជាជនដែលរស់ក្នុងទីក្រុងភ្នំពេញ៕
