កម្ពុជា​ក្នុង​ជំហាន​រួម​ឆ្ពោះទៅរក​សេដ្ឋកិច្ច​ឌីជីថល

មន្ត្រីជាន់ខ្ពស់​ក្រសួង​សេដ្ឋកិច្ច និង​ហិរញ្ញវត្ថុ​បាន​ថ្លែងថា ដើម្បី​ធ្វើឱ្យ​សេដ្ឋកិច្ចកម្ពុជា​កាន់តែ​ប្រសើរឡើង និង​មាន​កំណើន​ល្អ​ជាង​មុន រាជរដ្ឋាភិបាល​កំពុង​ស្វែងរក​គន្លឹះ និង​ការបញ្ចូល​ធាតុ​ផ្សំផ្សេងៗតាមរយៈ​សេដ្ឋកិច្ច​បែប​ឌីជីថល ខណៈ​ជំរុញ​ឱ្យ​វិស័យ​ឧស្សាហកម្ម​ចាប់ផ្ដើម​ចាប់យក​បច្ចេកវិទ្យា​នេះ ដើម្បី​បង្កើន​នូវ​ចង្វាក់​ផលិតកម្ម។

រដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ លោក​វ​ង្សី វិស្សុត បាន​លើកឡើងថា កម្ពុជា​គម្រោង​បង្កើត​សេដ្ឋកិច្ច​ឌីជីថល​ដែលជា​គម្រោង​ផែនការ​ថ្មី​ក្នុងការ​ស្វែងរក​ធាតុ​ចូលនៅ​គ្រប់​ស្ថាប័ន​ពាក់ព័ន្ធ​ទាំង​វិស័យ​រដ្ឋ និង​ឯកជន​ដែលជា​តម្រូវ​ការស្វែងរក​ការ​ទ្រទ្រង់​កំណើនសេដ្ឋកិច្ច​ក្នុងទិសដៅ​ជំរុញ​កំណើន​ឱ្យមាន​ការផ្លាស់ប្តូរ និង​វិ​វ​ឌ្ឍ​ទៅមុខ​ជានិច្ច។

លោក​បន្តថា “ដើម្បី​រក្សា​កំណើនសេដ្ឋកិច្ច​នេះ ការចាប់​ផ្តើមធ្វើ​ទំនើបកម្ម​ឱ្យ​ប្រសើរឡើង​នៅលើ​អ្វី​ដែលមាន​ស្រាប់ រួមមាន​ឧស្សាហកម្ម កសិកម្ម កម្មន្តសាល និង​វិស័យ​សេវា ជាដើម ជាពិសេស​ការស្វែងរក​ប្រភេទ​ឧស្សាហកម្ម​ផ្សេងទៀត​ពិតជា​មាន​សារៈសំខាន់​ណាស់​ដើម្បី​ជំរុញ​កំណើនសេដ្ឋកិច្ច​ឱ្យ​កើនឡើង​ជាមុន ក្នុងនោះ​យើង​ត្រូវតែ​ធ្វើ​ប្រតិភូកម្ម​សេដ្ឋកិច្ច​ម្ខាង និង​ការបង្កើត​ភាព​ប្រកួតប្រជែង​ម្ខាង​ទៀត។

បើតាម​អ្នកជំនាញ​សេដ្ឋកិច្ច​បាន​ពន្យល់ថា សេដ្ឋកិច្ច​ឌីជីថល គឺជា​ទីផ្សារ​អន​ឡាញ (Online)ដូចជា​ការបង់​ទឹក-ភ្លើង​តាម​អុ​ី​ន​ធើ​ណិ​ត នោះ​គឺជា​ប្រព័ន្ធ​នៃ​សេដ្ឋកិច្ច​ឌីជីថល​ហើយ។ សព្វថ្ងៃ​ប្រជាជន​យើង ថ្វីដ្បិតតែ​ពុំទាន់​ប្រឡូក​ក្នុង​សេដ្ឋកិច្ច​ឌីជីថល​នេះ​ខ្លាំង​ក៏ដោយ តែ​ក៏​យើង​ឃើញ​មាន​សកម្មភាព​របស់​ស​ហ​គ្រាសធំៗ និង​ពលរដ្ឋ​ទូទៅ​មួយ​ភាគ​ធំ​ពួកគេ​បាន​ដើរ​ក្នុង​គន្លង​សេដ្ឋកិច្ច​ឌីជីថល​នេះ​ស្រាប់​ទៅហើយ ព្រោះ​យើង​ជា​ផ្នែក​មួយ​នៃ​សកលលោក កាលណា​គេ​វិ​វ​ឌ្ឍ​ទៅ យើង​ត្រូវតែដើរ​តាម​គេ​ហើយ។ លោក​បន្ត​ដូច្នេះ​ថា “ប្រទេស​កម្ពុជា​បាននិងកំពុង​ធ្វើ​សេដ្ឋកិច្ច​ឌីជីថល​មួយចំនួន​រួចហើយ ប៉ុន្តែ​វា​នៅតែ​ត្រូវការ​ហេដ្ឋារចនាសម្ព័ន្ធ ជំនាញ និង​បទ​ប្បញ្ញត្តិ​ក្នុង​ការពង្រីក​បន្ថែមទៀត​សម្រាប់​ពេលអនាគត ព្រោះ​នឹងត្រូវ​ធ្វើឱ្យមាន​លក្ខណៈ​ឌីជីថល​កាន់តែ​ច្រើនឡើង។

ម្យ៉ាងទៀត​កម្ពុជា​មិនទាន់​បានរៀបចំ ហេដ្ឋារចនាសម្ព័ន្ធ​សមស្រប​រួច​នៅឡើយ ពិសេស​សមត្ថភាព​ធន​ធាន​មនុស្ស​ដែល​នៅមានកម្រិត​របស់​កម្ពុ​ជា​នឹង​ធ្វើឱ្យ​កម្ពុជា​ទាញយក​ផលប្រយោជន៍​ពី​និន្នាការ​ថ្មី​នេះ​បាន​ក្នុង​កម្រិត​តិចតួច​នៅឡើយ​ទេ ពី​សេដ្ឋកិច្ច​ឌីជីថល​នេះ។

អគ្គនាយក​ក្រុមហ៊ុន ហ្វ័​រ​តេ លោក​យក់ ចំរើន​ឫទ្ធិ​បាន​ថ្លែងថា សេដ្ឋកិច្ច​ឌីជីថល (Digital)ជាការ​រកស៊ី​តាម​ប្រព័ន្ធ​ឡាញ (Line)ប្រព័ន្ធ​ព័ត៌មាន​បច្ចេកវិទ្យា។ អាជីវករ​កម្ពុជា​បាន​ផ្តើម​រកស៊ី​ហើយ គ្រាន់តែ​នៅ​ជា​ទ្រង់ទ្រាយតូចៗនៅឡើយ ពិសេស​យុវជន​ជំនាន់ក្រោយៗបាន និង​កំពុងតែ​ផ្តើម​ប្រឡូក​សេដ្ឋកិច្ច​ឌីជីថល​នេះហើយ។

លោក​បាន​បញ្ជាក់ថា “ជា​គោល​គំនិត​រដ្ឋាភិបាល​គឺ​គេ​ចង់ឱ្យ​យើង​ប្រឡូក​ក្នុង​សេដ្ឋកិច្ច​ឌីជីថល​ឱ្យ​កាន់តែ​ធំ​ឡើង​ដើម្បី​រក្សា​កំណើនសេដ្ឋកិច្ច។ ពោលគឺ​នៅ​ថ្ងៃ​អនាគត មានតែ​ប្រព័ន្ធ​បច្ចេកវិទ្យា​ទេ​ដែល​ជំរុញ​សេដ្ឋកិច្ច​ឌីជីថល​ឱ្យ​ដើរ​ទៅមុខ និង​រីកចម្រើន​លូតលាស់​បាន។ ការ​ប្រឡូក​ក្នុង​សេដ្ឋកិច្ច​ឌីជីថល​នេះ​គឺ​យើង​អាច​នឹង​ទៅមុខ​បែប​លោត​ផ្លោះ​បាន នេះ​បើតាម​ប្រព័ន្ធ​សេដ្ឋកិច្ច​របស់​យើង។

លោក​យក់ ចំរើន​ឫទ្ធិ ក៏បាន​ឱ្យដឹង​ដែរ​ថា ដោយសារតែ​ទិសដៅ​របស់​រដ្ឋាភិបាល​ដែល​កំណត់​ដល់​ឆ្នាំ2020អាចជា​យុទ្ធសាស្ត្រ​ថ្មី​មែន តែ​វិស័យ​ឯកជន​គេ​ចាប់ផ្តើម​ធ្វើ​ហើយ ដូចជា​ធនាគារ​អេស៊ីលីដា​ក៏​គេ​បាន​ងាក​ទៅរក​ការប្រើ​ប្រព័ន្ធ​បច្ចេកវិទ្យា​ឌីជីថល ហើយ​ដែរ ដោយ​ប្រកា​សលែង​ជ្រើសរើស​បុគ្គលិក​បន្ថែម។ លោក​បាន​បញ្ជាក់ទៀតថា ខាង​ក្រុមហ៊ុន​របស់លោក​ក៏បាន​បណ្តាក់ទុន​ទៅលើ​សេដ្ឋកិច្ច​ឌីជីថល​នេះដែរ ដោយ​វិនិយោគ​លើ​ប្រព័ន្ធ​បច្ចេកវិទ្យា​ស្មា​ត (Smart) ដែលមាន​ទំហំ​ទឹកប្រាក់ 5លាន​ដុល្លារ​ដើម្បី​ផ្តោតទៅលើ​ប្រព័ន្ធ​សេដ្ឋកិច្ច​ឌីជីថល​នេះ។

លោកស្រី កែវ មុំ អគ្គនាយិកា​ក្រុមហ៊ុន លី​លី ផលិត​នំ​ស្រួយ បាន​ថ្លែងថា បញ្ហា​សេដ្ឋកិច្ច​ឌីជីថល​នេះ ទោះបីជា​វា​មានការ​ពិបាក​បន្តិច​នៅពេល​ចាប់ផ្ដើម​ក៏ដោយ ក៏​យើង​ត្រូវតែ​បង្ខំចិត្ត​ប្រឡូក​ក្នុង​កិច្ចការ​នេះ​ដើម្បី​រត់តាម​ឱ្យទាន់​ប្រទេសជិតខាង​យើង​ដែរ។ ព្រោះនេះ​គឺជា​ពេលវេលា​ដំបូង​សម្រាប់​ការធ្វើ​បដិវត្តន៍​បច្ចេក​វិទ្យា សហគ្រិន​ត្រូវតែ​ផ្លាស់ប្តូរ​ដើម្បី​ប្រកួតប្រជែង​ក្នុង​ទីផ្សារ។ លោកស្រី​ថ្លែងថា៖ “អ្វីៗគ្រប់យ៉ាង​លើ​ទីផ្សារ​ពិភពលោក​កំពុង​ងាក​ទៅរក​ការពឹង​លើ​បច្ចេកវិទ្យា ដូច្នេះ​អាជីវកម្ម​របស់​យើង​ប្រសិនបើ​យើង​ចង់​សម្រេច​ជោគជ័យ​ឆ្ពោះទៅមុខ យើង​ត្រូវតែ​ខំប្រឹង យើង​ត្រូវតែ​ធ្វើការ​ផ្លាស់ប្តូរ​ខ្លួន​យើង​ទៅជា​ប្រព័ន្ធ​បច្ចេកវិទ្យា។

លោកស្រី​បន្តថា៖ “ពិត​ហើយ វា​ត្រូវការ​ពេលវេលា​ក្នុងការ​បណ្ដុះបណ្ដាល ប៉ុន្តែ​យើង​នឹង​ទទួលបាន​ប្រយោជន៍​ច្រើន​ពី​ប្រព័ន្ធ​ឌីជីថល ដោយសារ​វា​ជួយ​ព​ន្លឿ​ន​ការងារ​ក្នុង​អាជីវកម្ម។ លោកស្រី​សង្ឃឹមថា សហគ្រាស​ធុន​តូច និង​មធ្យម​នឹង​ខិតខំ​ប្រឹងប្រែង​ជំរុញ​ការអភិវឌ្ឍ​អាជីវកម្ម​របស់ខ្លួន​ក្នុង​សេដ្ឋកិច្ច​ឌីជីថល​នេះ​ឱ្យ​ទៅតាម​សម័យកាល ពីព្រោះ​បច្ចុប្បន្ន​យុវវ័យ​ស្រករ​ក្រោយ​ជាច្រើន​ក៏បាន​ចាប់យក​អាជីវកម្ម​តាម​ប្រព័ន្ធ​តិច​ណូ​ឡូ​ជី​នេះដែរ។

លោក វ​ង្សី វិស្សុត បាន​បន្តថា សេដ្ឋកិច្ច​ឌីជីថល​គឺជា​សេដ្ឋកិច្ច​មួយ​ដែល​ពឹង​ផ្អែកទៅលើ​បច្ចេកវិទ្យា​ឌីជីថល​ដែល​បច្ចេកវិទ្យា​ឌីជីថល​នេះ​នឹង​ជះឥទ្ធិពល​ដល់​ការផលិត​ទំនិញ និង​សេវា​ការចែក​ចាយនិង​ការផ្គត់ផ្គង់ រួមទាំង​ការប្រើប្រាស់​ប្រចាំថ្ងៃ​ផងដែរ។

វា​នឹង​ក្លាយជា​កត្តា​គន្លឹះ និង​កត្តា​កំណត់​ចាញ់-ឈ្នះ​នៅក្នុង​ការអភិវឌ្ឍ​សេដ្ឋកិច្ច​ហើយ​ប្រទេស​ណា​ដែលមាន​សមត្ថភាព​ចាប់យក​បច្ចេកវិទ្យា​នេះ​បានល្អ​ប្រសើរ​ជាងគេ ប្រទេស​នោះ​នឹង​ក្លាយជា​អ្នកឈ្នះ​នៅក្នុង​ល្បែង​នេះ។ ក្នុងន័យនេះ​កម្ពុជា​យើង​ត្រូវ​រួមដៃគ្នា​ទាំង​ស្ថាប័ន ទាំង​បុគ្គល​ដើម្បី​ព​ន្លឿ​ន​ការអភិវឌ្ឍ​ឌីជីថល​នៅ​កម្ពុជា​ឱ្យ​អាច​រត់​ទាន់​គេ​នៅក្នុង​តំបន់។

លោក​ថ្លែងថា៖ “ការចូល​មក​នៃ​សេដ្ឋកិច្ច​ឌីជីថល​នឹង​នាំមក​នូវ​ឱកាស​ដ៏​ល្អ​ក្នុងសង្គម ប៉ុន្តែ​វា​ក៏​ទទួលរង​ផលប៉ះពាល់​ផងដែរ ដូច្នេះ​វា​តម្រូវឱ្យ​ពួកយើង​ប្រមូល​រាល់​ធាតុ​ចូល​ទាំងអស់​ដើម្បី​ចាត់វិធានការ​លើ​ផែនការ​របស់​យើង ហើយ​នេះ​គឺជា​ការចាប់ផ្ដើម​និន្នាការ​រួម​អំពី​សេដ្ឋកិច្ច​ឌីជីថល។

ទាំងអស់នេះ​បង្ហាញឱ្យឃើញថា មូលដ្ឋាន​នៃ​ហេដ្ឋារចនាសម្ព័ន្ធ​សម្រាប់​គាំទ្រ​ដល់​ការអនុវត្ត​សេដ្ឋកិច្ច​ឌីជីថល​នៅ​កម្ពុជា​កំពុង​វិ​វ​ឌ្ឍ​ទៅ​មុខជាបណ្តើរៗ ដោយ​ក្នុងនោះ​កម្ពុ​ជាមាន​ហេ​ដ្ឋា​រចនាសម្ព័ន្ធ​ទូរស័ព្ទ​ចល័ត និង​មាន​សេវា​អុ​ី​ន​ធើ​ណិ​ត​សមល្មម​សម្រាប់​គាំទ្រ​ដល់​សេដ្ឋកិច្ច​ឌីជីថល។ ក៏ប៉ុន្តែ​សមត្ថភាព​ចាប់យក និង​សកម្មភាព​នៃ​ការប្រើប្រាស់​បច្ចេកវិទ្យា​ឌីជីថល​នេះ​នៅមានកម្រិត​ទាប​នៅឡើយ​មិន​ថា​នៅក្នុង​វិស័យ​សាធារណៈ ឬ​នៅក្នុង​វិស័យ​ឯកជន​ទេ ទន្ទឹមនឹងនេះ​ការទទួលយក​បច្ចេកវិទ្យា​របស់​ទូរស័ព្ទ​ចល័ត​ជំនាន់​ថ្មី​មាន​ភាពយឺតយ៉ាវ​ជាង​ប្រទេសជិតខាង ហើយ​ការទទួលយក​សេវា 4G វិញ​កាន់​តែមាន​អត្រា​ទាប​ទៅទៀត។

លោក ចំរើន​ឫទ្ធិ បាន​បញ្ជាក់ថា៖ “បញ្ហា​ប្រឈម​តែងតែមាន ដែល​បញ្ហា​ប្រឈម​ធំ​ទីមួយ គឺ​ធនធានមនុស្ស​របស់​យើង​នៅមាន​ការខ្វះខាត​ច្រើន ដូចជា​អ្នកជំនាញ​បទពិសោធខ្ពស់ៗខាង IT ជាដើម។ ទី​ពីរ​យើង​នៅ​ខ្វះខាត​ដើមទុន ព្រោះ​ដើមទុន​ក៏​ជា​រឿង​សំខាន់​មួយ​ដែរ។ បើ​យើង​មាន​ធនធានមនុស្ស​តែ​យើង​អត់​ធនធាន​ទ្រព្យ​ក៏​ពិបាក​នឹង​ទៅរួច​ដែរ ព្រោះ​ការរកស៊ី​តាម​ប្រព័ន្ធ​ឌីជីថល ឬ​ប្រព័ន្ធ​អន​ឡាញ​នេះ​ត្រូវការ​ដើមទុន​ច្រើន និង​ដើម្បីឱ្យ​ការអភិវឌ្ឍ​កាន់តែ​ប្រសើរ​នោះ គេ​ត្រូវ​ការបំពេញ​សំណុំបែបបទ​នៃ​បច្ចេកវិទ្យា​ឱ្យបាន​ត្រឹមត្រូវ”៕

Advertisement