ទឹកប្រាក់​មូលនិធិ​អន្តរជាតិ IFAD ផ្តោតទៅលើ​គម្រោង​ថ្មី ជំរុញ​អភិវឌ្ឍន៍​វិស័យ​កសិកម្ម

June 14, 2018​ ម៉ោង 4:09 pm

មូលនិធិ​អន្តរជាតិ​សម្រាប់​អភិវឌ្ឍន៍​កសិកម្ម (International Fund for Agricultural Development ហៅ​កាត់​ថា IFAD) បានសម្រេច​ផ្តល់​ថវិកា 64លាន​ដុល្លារ​ដល់​កម្ពុជា​បន្ថែម​លើ​គម្រោង​ដែល​កំពុង​អនុវត្ត​បច្ចុប្បន្ន និង​គម្រោង​ថ្មី ដែល​ក្នុងនោះ​ថវិកា​ចំនួន 12លាន​ដុល្លារ​អាមេរិក​សម្រាប់​បន្ថែ​ម​លើ​គម្រោង​ដែល​កំពុង​អនុវត្ត​បច្ចុប្បន្ន និង​ចំនួន 52លាន​ដុល្លារ​អាមេរិក​ សម្រាប់​គម្រោង​ថ្មី​ដែល​ផ្តោតលើ​ការជំរុញ “ទីផ្សារ​កសិកម្ម និង​កសាង​ហេដ្ឋារចនាសម្ព័ន្ធ​កសិកម្ម និង​ជនបទ” ដោយ​គ្រោង​នឹង​អនុវត្ត​ពី​ឆ្នាំ 2019-2021។ នេះ​បើតាម​ការ​ឱ្យដឹងពី​ក្រសួង​សេដ្ឋកិច្ច និង​ហិរញ្ញវត្ថុ។

ទឹកប្រាក់​ដ៏​ច្រើន​នេះ​ទទួលបាន​ក្រោយពេល លោក ណៃ​ជេ​ល ប្រេត​ត៍ (Nigel Brett) ប្រធាន​អង្គការ ​IFAD បាន​វាយតម្លៃ​ចំពោះ​រាជរដ្ឋាភិបាល​កម្ពុជា​ដែល​បាន​ដឹកនាំ និង​គ្រប់គ្រង​លើ​ការអនុវត្ត​គម្រោង​ក្រោម​ក្របខ័ណ្ឌ​ហិរញ្ញប្បទាន​របស់ ​IFAD ប្រកបដោយ​ជោគជ័យ និង​ប្រសិទ្ធភាព​ខ្ពស់។

សូមបញ្ជាក់ថា ចំពោះ​ទិសដៅ និង​យុទ្ធសាស្ត្រ​នៃ​ក្របខ័ណ្ឌ​កិច្ចសហប្រតិបត្តិការ​ IFAD សម្រាប់​ពេលខាងមុខ​នេះ ពោលគឺ​មិន​ត្រឹមតែ​ផ្តោតលើ​ផលិតកម្ម​ដើម្បី​សន្តិសុខ​ស្បៀង​ប៉ុណ្ណោះ​ទេ គឺ​ត្រូវផ្តោតលើ​ការអភិវឌ្ឍ​កសិកម្ម និង​កាត់បន្ថយ​ភាពក្រីក្រ​នៅ​ជនបទ​ដោយ​នឹង​ធ្វើឱ្យ​កាន់តែ​រឹងមាំ និង​មាន​និរន្តរភាព​ជាង​មុន​ដែល​រួមមាន “ការលើកកម្ពស់​ផលិតភាព​កសិកម្ម ពាណិជ្ជនីយកម្ម និង​ពិពិធ​កម្ម​កសិកម្ម ”ដើម្បី​លើកស្ទួយ​ជីវភាព និង​វិបុលភាព​របស់​ប្រជាកសិករ​កម្ពុជា។

បន្ថែម​លើ​នេះ IFAD នឹង​សហការ​ជិតស្និទ្ធ​ជាមួយ​រាជរដ្ឋាភិបាល​ដើម្បី​រៀបចំ​ក្របខ័ណ្ឌ​យុទ្ធសាស្ត្រ​កិច្ចសហប្រតិបត្តិការ​ផ្តល់​ហិរញ្ញប្បទាន​ថ្មី​សម្រាប់​ឆ្នាំ 2021-2026 ដែល​យុទ្ធសាស្ត្រ​នេះ​នឹងមាន​សង្គតិភាព​ទាំងស្រុង​ជាមួយ​ទិសដៅ​ជា​អាទិភាព និង​យុទ្ធសាស្ត្រ​របស់​រាជរដ្ឋាភិបាល និង​ក្នុង​ទំហំ​ហិរញ្ញប្បទាន​កាន់តែ​ធំ​ជាង​មុន។

លោក អូន ព័ន្ធមុនីរ័ត្ន រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ​បាន​មានប្រសាសន៍ថា កិច្ចសហប្រតិបត្តិការ​នាពេល​អនាគត​ជាមួយ​អង្គការ IFAD នឹង​ផ្តោតលើ​ការអភិវឌ្ឍ​វិស័យ​កសិកម្ម និង​ការកាត់បន្ថយ​ភាពក្រីក្រ​នៅក្នុង​តំបន់​ជនបទ។ វា​នឹង​ស្វែងរក​ការលើកកម្ពស់​និរន្តរភាព និង​ធានា​សន្តិសុខ​ស្បៀង ក៏ដូចជា​ការបង្កើន​ផលិតភាព និង​ការលើកកម្ពស់​ការធ្វើ​ពិពិធ​កម្ម​នៅក្នុង​វិស័យនេះ។

រដ្ឋាភិបាល​នឹង​ព្យាយាម​ទាក់ទាញ​ការវិនិយោគ​បន្ថែមទៀត​លើ​វិស័យ​ហេដ្ឋារចនាសម្ព័ន្ធ ជាពិសេស​ប្រព័ន្ធធារាសាស្ត្រ​ខ្នាតតូច និង​មធ្យម និង​ផ្លូវតូចៗសម្រាប់​ការដឹកជញ្ជូន​កាន់តែ​ប្រសើរ។ យើង​ក៏មាន​គោលបំណង​បញ្ចុះតម្លៃ​អគ្គិសនី​សម្រាប់​កសិករ​ផងដែរ។

លោក​បណ្ឌិត Nigel Brett ក្នុងឱកាស​ជួប​ជាមួយ​ឯកឧត្តម វេ​ង សាខុន រដ្ឋមន្ត្រី​ក្រសួងកសិកម្ម​រុក្ខា ប្រមាញ់ និង​នេសាទ​បាន​កោតសរសើរ​ចំពោះ​ការសហការ​រួមគ្នា​អនុវត្ត៖ 1-គម្រោង​សម្រាប់​ការអភិវឌ្ឍ​វិស័យ​កសិកម្ម និង​ការពង្រឹង​អំណាច​សេដ្ឋកិច្ច (PADEE=The Project for Agriculture Development and Economic Empowerment) 2-គម្រោង​បង្កើន​បច្ចេកវិទ្យា​ថាមពល​កកើតឡើង​វិញ​នៅ​កម្ពុជា (SRET=Scaling-up of Renewable Energy Technologies in Rural Cambodia)។

3-គម្រោង​កសិកម្ម​សម្រាប់​កម្មវិធី​ច្នៃប្រឌិត​ថ្មី ភាព​ធន់ និង​ពង្រីក (The Agriculture Services Program for Innovation, Resilience and Extension = ASPIRE) ជាពិសេស​កម្មវិធី ASPIRE នេះ ទទួលបាន​លទ្ធផល​យ៉ាង​ល្អប្រសើរ ទើប​ធ្វើឱ្យ​អង្គការ IFAD មាន​គម្រោង​បន្ថែម​ទុន​ឧបត្ថម្ភ​ជាង 12លាន​ដុល្លារ​ទៀត​ដើម្បី​ជំរុញ​កម្មវិធី​នេះ​ឱ្យ​គ្របដណ្តប់​ទូទាំងប្រទេស និង52លាន​ដុល្លារ​សម្រាប់​គម្រោង​ថ្មី។

លោក ហ៊ាន វណ្ណ​ហន អគ្គនាយក​នៃ​អគ្គនាយកដ្ឋាន​កសិកម្ម​បាន​ប្រាប់​ឡា​រ៉ែ​ន​តាម​ទូរស័ព្ទ​ថា​លោក​បាន​ឯកភាព​លើ​ការបន្ថែម​ទុន​ឧបត្ថម្ភ​លើ​គម្រោង​ចាស់ និង​ថ្មី​របស់​អង្គការ IFAD នេះ និងបាន​ណែនាំ​ថា ដើម្បី​បង្ហាញ​ពី​វឌ្ឍនភាព និង​លទ្ធផល​ដែល​ទទួលបាន​ពី​កម្មវិធី​នេះ យើង​នឹងមាន​ការរៀបចំ​កិច្ចប្រជុំ ឬ​ជា​សិក្ខាសាលា​ដើម្បី​ធ្វើជា​ស្នូល​តម្រង់ទិស​ក្នុងការ​អនុវត្ត​ឱ្យ​ទទួលបាន​ជោគជ័យ​បន្ថែមទៀត​គឺ​ត្រូវ​គិតគូរ​ដល់​បម្រែបម្រួល​អាកាសធាតុ ការគ្រប់គ្រង និង​ប្រើប្រាស់​ធារាសាស្ត្រ​កសិកម្ម​ប្រកបដោយ​ប្រសិទ្ធភាព និង​និរន្តរភាព​ការកំណត់​តំបន់​ដាំ​ដុះ​ស្របតាម​គុណភាព​ដី បរិមាណ​ទឹក​ដែលមាន ជំរុញ​ការធ្វើ​ទំនើបកម្ម​កសិកម្ម និង​លើកស្ទួយ​អាហារូបត្ថម្ភ​ដល់​ប្រជាជន។

លោក​បញ្ជាក់ថា៖ “នេះ​ជា​គម្រោង​ដែលមាន​ស្រាប់ និង​បានទទួល​ទុន​បន្ថែមចំនួន 12លាន​ដុល្លារ។ តែ​ចំពោះ​ទឹកប្រាក់​លើ​គម្រោង​ថ្មី​ចំនួន 52លាន​ដុល្លារ​នោះ សុំ​មិន​ឆ្លើយ​ទេ​ព្រោះ​វា​ជា​គម្រោង​ថ្មី មិនដឹងថា​វា​មាន​ទំហំ​ប៉ុនណា និង​មាន​ពាក់ព័ន្ធ​ទៅលើ​វិស័យ​អ្វីខ្លះ​នៅឡើយ​ទេ បើ​ឆ្លើយ​ទៅ ខ្លាច​វា​មិន​ចំ​ទិសដៅ​របស់​គម្រោង។

លោក ម៉េង សក្តិ​ភូ​សិត ជា​មន្ត្រី​កម្មវិធី​មូលនិធិ​អន្តរជាតិ​សម្រាប់​អភិវឌ្ឍន៍​វិស័យ​កសិកម្ម​ប្រចាំ​កម្ពុជា​ក៏បាន​មានប្រសាសន៍​ដែរ​ថា ប្រាក់12លាន​ដុល្លារ​នេះ​នឹងត្រូវ​អនុវត្ត​បន្ត​ទៅលើ​កម្មវិធី2 របស់​អង្គការ IFAD នៅ​កម្ពុជា។ កម្មវិធី​សេវាកម្ម​កសិកម្ម​សម្រាប់​ការច្នៃប្រឌិត​ថ្មី ភាព​ធន់ និង​ពង្រីក ដែល​ត្រូវបាន​គេ​ស្គាល់​ផងដែរ​ថា ASPIRE នោះ​នឹង​ប្រកបដោយ​និរន្តរភាព​សម្រាប់​ទីផ្សារ​កសិកម្ម​ដែលជា​កម្មវិធី​មួយ​កំពុង​បន្ត។

លោក ម៉េង សក្តិ​ភូ​សិត បានបញ្ជាក់​ទៀតថា ចំណែកឯ​គម្រោង​ថ្មី​នេះ​វា​គ្រាន់តែ​ជា concept note វា​នឹង​បង្ហាញ​រូបរាង​នៅ​ចុង​ឆ្នាំនេះ តែ​គម្រោង​នេះ​មាន​ចំណុច​ដែល​នឹង​ផ្តោតទៅលើ​ការកសាងភាពជា​សហគ្រិន និង​ការលើកកម្ពស់​ហេដ្ឋារចនាសម្ព័ន្ធ​នៅក្នុង​វិស័យ​កសិកម្ម។ កម្មវិធី​ដែល​ឥឡូវនេះ​កំពុង​ស្ថិតនៅលើ​ក្រដាស​គំនូរ​នឹង​ស្វែងរក​ការគាំទ្រ​ពី​សហគ្រាស​ធុន​តូច និង​មធ្យម​នៅតាម​តំបន់​ភូមិសាស្ត្រ​ដែលមាន​សក្តានុពល​ខ្ពស់​សម្រាប់​គាំទ្រ​ទីផ្សារ​កសិកម្ម។

លោក​បាន​បន្តថា៖ “គម្រោង​នេះ​មានន័យថា​ជា​ហេដ្ឋារចនាសម្ព័ន្ធ​ក្នុងការ​លើកទឹកចិត្ត​ឱ្យ​ពាណិជ្ជករ​អាជីវករ និង​សហគ្រិន​ចូលរួម​អភិវឌ្ឍ​វិស័យ​កសិកម្ម។ គម្រោង​មាន​ច្រើន​អាចជា​ទីផ្សារ​សម្រាប់​កសិក​ម្ម​អាចជា​ការកសាង​ផ្លូវ ថាមពល អគ្គិសនី ប្រព័ន្ធ​សូ​ឡា-ល- តែ​ជា​មូលដ្ឋាន​ធំ​យើង​លើកទឹកចិត្ត​ឱ្យ​វិស័យ​ឯកជន​ចូលរួម​ជាមួយ​យើង​ដោយ​យើង​នឹង​ពិភាក្សា​ជាមួយ​វិស័យ​ឯកជន​ជាមុនសិន ទើប​យើង​អាច​ទទួលបាន​អ្វីដែល​លេចចេញ​ជា​គម្រោង​ថ្មី​នេះ​ក្នុងការ​ជំរុញ​នូវ​ការលើកកម្ពស់​សហគ្រិន​ភាព​ក្នុងការ​អភិវឌ្ឍ​វិស័យ​កសិកម្ម​នេះ។ ចាប់តាំងពី​ឆ្នាំ 1996មក IFADបានផ្តល់​ប្រាក់កម្ចី​សម្បទាន​ជាង 200លាន​ដុល្លារ​ហើយ​ដល់​ប្រទេស​កម្ពុជា”៕