គ្រឹះស្ថានធនាគារបានបន្តរីកចម្រើនគួរឱ្យកត់សម្គាល់ ក្នុងនោះទ្រព្យសកម្មរបស់គ្រឹះស្ថានធនាគារមានកំណើនប្រមាណជា12.2% ដែលមានទឹកប្រាក់សរុបចំនួន 125.2ទ្រីលានរៀល ឬប្រហែលនឹង 31ប៊ីលានដុល្លារអាមេរិក នៅត្រឹមឆមាសទី1 ឆ្នាំ2018នេះ។
របាយការណ៍របស់ធនាគារជាតិបានឱ្យដឹងថា ស្របពេលដែលទ្រព្យសកម្មកើនឡើងនេះ បានធ្វើឱ្យឥណទានកើនឡើងជាបន្តបន្ទាប់ដែលមានចំនួនប្រមាណជា16.8% ស្មើនឹង70.6ទ្រីលានរៀល។ ក្នុងនោះដើមទុនមានកំណើនប្រមាណជា 22.7% ដល់14.8 ទ្រីលានរៀល និងកំណើនមូលនិធិកម្ចីប្រមាណជា33% ស្មើនឹង6.6ទ្រីលានរៀល និងកំណើនប្រាក់បញ្ញើប្រមាណ 21.5% ស្មើនឹង 77.4ទ្រីលានរៀល។
គ្រឹះស្ថានធនាគារបានពង្រីកការផ្តល់សេវាឱ្យកាន់តែទូលំទូលាយ និងមានភាពងាយស្រួលជាងមុន តាមរយៈការពង្រីកសាខារហូតដល់ 862សាខា ម៉ាស៊ីនដកប្រាក់ស្វ័យប្រវត្តិ(ATM) ដល់ទៅ 1,593គ្រឿង។ ការប្រើប្រាស់ប័ណ្ណឥណទាន និងប័ណ្ណឥណពន្ធមានការកើនឡើងគួរឱ្យកត់សម្គាល់ជាមួយនឹងកំណើន 36.6% ស្មើនឹង 88,533ប័ណ្ណ និង16.4% ដល់ 1,9 លានប័ណ្ណតាមលំដាប់។
របាយការណ៍បង្ហាញថា ឥណទានជាប្រភពទុនយ៉ាងសំខាន់ ក្នុងការគាំទ្រដល់ការបង្កើត និងពង្រីកអាជីវកម្ម និងតម្រូវការប្រើប្រាស់ ដែលជាកត្តារួមចំណែកយ៉ាងសំខាន់ក្នុងដំណើរការអភិវឌ្ឍន៍សេដ្ឋកិច្ចកម្ពុជា និងការកាត់បន្ថយភាពក្រីក្រ។ ឥណទានរបស់គ្រឹះស្ថានធនាគារបានចូលរួមចំណែកទៅលើវិស័យសេដ្ឋកិច្ច រួមមានការជួញដូររាយ17.4% ការជួញដូរដុំ11.7% កសិកម្ម រុក្ខា ប្រមាញ់ និងនេសាទ9.8% សំណង់9.9% ការផ្ដល់កម្ចីទិញផ្ទះជាកម្មសិទ្ធិផ្ទាល់ 9.4% សេវាកម្មមិនមែនហិរញ្ញវត្ថុផ្សេងៗទៀត7.1% កម្មន្តសាលកម្ម5.9% ការជួញដូរអចលនទ្រព្យ 6.3% សណ្ឋាគារ និងភោជនីយដ្ឋាន4.5% និងវិស័យផ្សេងៗទៀត18%៕
