និន្នាការ​នៃ​ការទូទាត់​សាច់ប្រាក់​តាម​ប្រព័ន្ធ QR Code កំពុង​កើនឡើង

ស្រប​ពេលដែល​វិស័យ​បច្ចេកវិទ្យា​កំពុង​រីកចម្រើន​ខ្លាំង បានធ្វើឱ្យ​ការទូទាត់​សាច់ប្រាក់​តាម​ប្រព័ន្ធ QR Code ក៏​កំពុងមាន​ការរីកចម្រើន​ខ្លាំង​នៅលើ​ទីផ្សារ​ក្នុងប្រទេស​កម្ពុជា​ដែរ​នា​រយៈពេល​ប៉ុន្មាន​ឆ្នាំ​ចុង​ក្រោយនេះ។

លោកស្រី សូ ផន​ណា​រី នាយិកា​រង​ប្រតិបត្តិ​នៃ​ធនាគារ​អេស៊ីលីដា មានប្រសាសន៍ថា ចាប់តាំងពី​ធនាគារ​អេស៊ីលីដា​បានដាក់​ឱ្យប្រើ​ប្រព័ន្ធ QR Code រយៈពេល​ប្រមាណ​ជា 1ឆ្នាំ​រហូតមកទល់​បច្ចុប្បន្ន មាន​អតិថិជន​ប្រមាណ​ជាង 60ម៉ឺន​នាក់​បាន និង​កំពុង​ប្រើប្រាស់​ប្រព័ន្ធ​បច្ចេកវិទ្យា​ខាងលើ​ក្នុងការ​ទូទាត់​សាច់ប្រាក់​ទិញ​ទំនិញ ឬ​ផ្ញើ​ប្រាក់​ទៅកាន់​ដៃគូ​ពាណិជ្ជកម្ម​ផ្សេង។ លោកស្រី​អះអាងថា កត្តា​ដែល​ធ្វើឱ្យ​អតិថិជន​ងាក​មកប្រើប្រាស់​ប្រព័ន្ធ​ខាងលើ​មាន​ចំនួន​កាន់តែច្រើន​នេះ គឺ​ដោយសារ​ក្រុម​អ្នក​បច្ចេកវិទ្យា​របស់​ធ​នាគារ​បានរៀបចំ​ឱ្យមាន​ភាពងាយស្រួល​សម្រាប់​ដាក់ឱ្យ​អតិថិជន​ប្រើប្រាស់​ប្រព័ន្ធ​ខាងលើ​ប្រកបដោយ​សុវត្ថិភាព។ “Application នៃ​ប្រព័ន្ធ QR Code ដែលមាន​ឈ្មោះថា “អេស៊ីលីដា​ទាន់​ចិត្ត‟ ត្រូវបាន​ផលិត​ដោយ​ក្រុម IT ក្នុង​ធនាគារ​ដែល​បានរៀបចំ Function ឱ្យ​អតិថិជន​មាន​ភាពងាយស្រួល​ក្នុងការ​ចាត់ចែង​សាច់ប្រាក់​បាន​គ្រប់ពេល​គ្រប់​វេលា និង​ទូទាត់​បាន​លឿន”។

លោកស្រី​បន្តថា អតិថិជន​ដែល​ប្រើ​ប្រព័ន្ធ​នេះ​មាន​ភាពងាយស្រួល​ក្នុង​ការតភ្ជាប់​ប្រព័ន្ធ QR Code ទៅ​លេខ​គណនី​ដែលមាន​នៅក្នុង​ធនាគារ ងាយស្រួល​ក្នុងការ​ផ្ទេរប្រាក់​ទៅក្នុង​គណនី​ធនាគារ ឬ​គណនី​របស់​ដៃគូ​អាជីវកម្មផ្សេងៗទៀត។ លើសពីនេះ​វា​ផ្តល់​ភាពងាយស្រួល​ក្នុងការ​ទូទាត់​ទំនិញ ការទិញ​កាត​ទូរស័ព្ទ សម្រួល​ដល់​ការបង់ថ្លៃ​ទឹកភ្លើង ឬ​អាច​ផ្ញើ​ប្រាក់​ទៅកាន់​គណនី​អេស៊ីលីដា​ទាន់​ចិត្ត​របស់​មិត្ត​ភ័ក្តិ​សម្រាប់​ចងដៃ​ការ ឬ​ចូល​បុណ្យផ្សេងៗក៏បាន។

តែ​យ៉ាងណាក៏ដោយ លោកស្រី​អំពាវនាវ​ដល់​អតិថិជន​ឱ្យមាន​ការប្រុងប្រយ័ត្ន​ចំពោះ​ការផ្ទេរ​ប្រាក់ ដោយ​មុននឹង​ផ្ទេរ​ត្រូវ​ពិនិត្យមើល​លេខ​កូដ និង​ពិនិត្យ​ឈ្មោះ​អ្នក​ដែល​ត្រូវផ្ញើឱ្យៗបាន​ច្បាស់ ព្រោះថាជូន​កាល​អាច​ច្រឡំ​លេខ​កូដ និង​អាច​ចូលទៅ​កាន់​គណនី​អ្នកផ្សេង ដែលនាំឱ្យ​មានការ​លំបាក​ក្នុងការ-​អន្តរាគមន៍​ឱ្យ​ភាគី​ដែល​យើង​ផ្ញើ​ច្រឡំ​ឱ្យគេ​នោះ​ផ្ញើ​ត្រឡប់មកវិញ។ តែ​លោកស្រី​បាន​បញ្ជាក់ថា បើ​ជួប​ករណីនេះ​សូម​ទំនាក់ទំនង​មក​ការិយាល័យ​អេស៊ីលីដា​ជាបន្ទាន់ ដើម្បី​បង្កក​ប្រាក់​នោះ​កុំ​ឱ្យគេ​ដកយក​ទៅប្រើ​ប្រាស់​បាន ហើយ​សឹម​អន្តរាគមន៍​ទាក់ទង​តាម​ក្រោយ។ ជាមួយនឹង​កំណើន​អតិថិជន​កើនឡើង​យ៉ាង​ឆាប់រហ័ស​នេះ ធនាគារ​អេស៊ីលីដា​បានដាក់​ផែនការ​នៅ​ដំណាច់ឆ្នាំ2018 នឹងមាន​អតិថិជន​កើនឡើង​ដល់ 80ម៉ឺន​នាក់​ដែល​នឹង​បន្ត​ការប្រើប្រាស់​ប្រព័ន្ធ QR Code របស់​ធនាគារ​អេស៊ីលីដា ដោយសារ​មានការ​បញ្ចុះតម្លៃ​នៅតាម​ហាង​លក់ទំនិញផ្សេងៗជាច្រើន។

លោក​បណ្ឌិត ឡាយ សុខ​ហេង សាស្ត្រាចារ្យ​សេដ្ឋកិច្ច​នៃ​សាកលវិទ្យាល័យ​ភូមិន្ទ​ភ្នំពេញ ដែល​បាន​ស្រាវជ្រាវ​លើ​បច្ចេកវិទ្យា​ហិរញ្ញវត្ថុ (Fintech) មានប្រសាសន៍ថា កត្តា​ដែលនាំឱ្យ​ប្រជាជន​កម្ពុជា​ងាក​ទៅប្រើ​ប្រាស់​ប្រព័ន្ធ QR Code នេះ ដោយសារ​កត្តា​តម្រូវការ​ស្រប​ពេលដែល​ជីវភាព​របស់​ពលរដ្ឋ​ខ្មែរ​​កាន់តែ​មាន​ភាពប្រសើរឡើង។ លោក​ថា ប្រព័ន្ធ​នេះ​ផ្តល់​ភាពងាយស្រួល មិនចាំបាច់​ឱ្យ​ពួកគាត់​ដាក់​ប្រាក់សុទ្ធ​តាម​ខ្លួន​នាំឱ្យមាន​ហានិភ័យ​លើ​ការបាត់បង់ ឬ​អំពើចោរកម្មផ្សេងៗ ពោល​គ្រាន់តែ​គាត់​មាន​ទូរស័ព្ទ​ស្មា​ត​ហ្វូ​ន ហើយ​បង្កើត​គណនី​ជាមួយ​ក្រុមហ៊ុន​ណាមួយ នោះ​គាត់​អាច​ទូទាត់​សាច់ប្រាក់​បាន​គ្រប់ពេលវេលា​រាល់ពេល​ទិញ​ទំនិញ​តាម​ផ្សារ​ដោយមាន​ការបញ្ចុះ​តម្លៃ​ជា​ភាគរយ​ជាការ-​លើកទឹកចិត្ត​ទៀតផង។

លោក​ថា ម្យ៉ាងទៀត គឺ​កត្តា​ផ្គត់ផ្គង់ និយតករ​ដែលជា​ធនា​គារ​កណ្តាល​បាន​លើកទឹកចិត្ត​ដល់​ក្រុមហ៊ុន​វិនិយោគផ្សេងៗអាច​ប្រើប្រាស់​ប្រព័ន្ធ​បច្ចេកវិទ្យា​ថ្មី​បាន​គ្រប់​ប្រភេទ ប៉ុន្តែ​ស្ថិតក្រោម​ការគ្រប់គ្រង​ដោយNBC។ លោក​បញ្ជាក់ថា “អ៊ីចឹង​ហើយ​បានជា​ក្រុមហ៊ុន​វិនិយោគថ្មីៗបាន​នាំយក​បច្ចេកវិទ្យា​នេះ​មក​ប្រើ ដើម្បី​ឱ្យមាន​ភាពងាយស្រួល និង​មាន​លក្ខណៈ​ទាន់សម័យ ហើយ​បច្ចុប្បន្ន​ប្រជាពលរដ្ឋ​ខ្មែរ​មិន​ថា​នៅ​ទីក្រុង ឬ​ជនបទ​នោះទេ ភាគច្រើន​មាន​ទូរស័ព្ទ​ស្មា​ត​ហ្វូ​ន​ប្រើគ្រប់ៗគ្នា ដែល​ងាយស្រួល​ក្នុង​ការប្រើ​ប្រព័ន្ធ​ទូទាត់​សាច់ប្រាក់​តាម QR Codeនេះ‟។

ដោយសារតែ​ប្រព័ន្ធ​នេះ​ទើប​ចូលមក​ដល់ទី​ផ្សារ​ប្រទេស​កម្ពុ​ជានា​អំឡុងពេលថ្មីៗនេះ ទើប​តម្រូវឱ្យ​មានការ​ចំណាយ​ពេលវេលា​សិក្សា​ឱ្យបាន​ច្រើន​ក្នុងការ​ប្រើប្រាស់​ប្រព័ន្ធ​នេះ​ដោយ​សុវត្ថិភាព។ ប៉ុន្តែ​យ៉ាងណា​នោះ មកទល់​បច្ចុប្បន្ននេះ​មិនទាន់មាន​ព័ត៌មាន​អំពី​ការលួចបន្លំ​សាច់ប្រាក់​តាម​ទូរស័ព្ទដៃ​នៅឡើយ​ទេ តែ​ទោះយ៉ាងណា​វា​ទាមទារ​ឱ្យមាន​ការប្រុងប្រយ័ត្ន​លើ​លេខ​កូដ​សម្ងាត់​នៅលើ​ទូរស័ព្ទដៃ​របស់ខ្លួន ហើយ​ចៀសវាង​កុំ​ទុក​ទូរស័ព្ទ​ចោល នាំឱ្យ​មានការ​លួច​ប្រើ ឬ​វេរ​លុយ​ក្រៅផ្លូវការ​ដោយ​មិនដឹង​ខ្លួន។

ធនាគារជាតិ​នៃ​កម្ពុជា​បាននិងកំពុង​ពិនិត្យមើល និង​វាយតម្លៃ​ប្រព័ន្ធ​ផាត់ទាត់​ជាតិ និង​ប្រព័ន្ធ​សេវា​ទូទាត់​រហ័ស​ធៀប​ជាមួយ​គោលការណ៍​របស់​ហេដ្ឋារចនាសម្ព័ន្ធ​ទីផ្សារ​ហិរញ្ញវត្ថុ(PFMI) ដើម្បី​ពង្រឹង និង​កែលម្អ​ប្រព័ន្ធ​ផាត់ទាត់​ឱ្យ​កាន់​តែមាន​ប្រសិទ្ធភាព​ថែមទៀត។ ស្ថិតក្នុង​ដំណាក់កាល​ដំបូង ធនាគារជាតិ​នៃ​កម្ពុជា​បាន​បង្កើត​ក្រុមការងារ​វាយតម្លៃ​ដែលមាន​សមាជិក​មកពី​នាយកដ្ឋាន​ប្រព័ន្ធ​ទូទាត់​សង​ប្រាក់ នាយកដ្ឋាន​ពត៌មាន​វិទ្យា និង​នាយកដ្ឋាន​ប្រតិបត្តិការ។

គួរ​បញ្ជាក់ថា បច្ចុប្បន្ននេះ​កម្ពុជា​បាននិងកំពុង​ប្រើប្រាស់​នូវ​សេវាកម្ម​ទូទាត់​សាច់ប្រាក់​តាម​ប្រព័ន្ធ​ប្រតិបត្តិ​សាច់ប្រាក់​ថ្មី​នេះ​មានដូចជា WingPay, Pi Pay, AEON Wallet និង​អេស៊ីលីដា​ទាន់​ចិត្ត៕

Advertisement