ស្របពេលដែលអំបិលខ្មែរ ត្រូវបានគេមើលឃើញថានឹងត្រូវអស់ពីឃ្លាំងស្តុកនៅត្រឹមចុងឆ្នាំ2018នេះ កម្ពុជាបានត្រៀមនាំចូលអំបិលពីបរទេសប្រមាណជាង 3ម៉ឺនតោន ដើម្បីបំពេញតម្រូវការប្រើប្រាស់ប្រចាំថ្ងៃ ពិសេសតម្រូវការធ្វើប្រហុកផ្អក ដែលនឹងចូលមកដល់នៅរដូវទឹកសម្រកខាងមុខនេះ។
លោក ប៊ុន បារាំង សហប្រធានសហគមន៍អ្នកផលិតអំបិលខេត្តកំពត-កែប មានប្រសាសន៍ថា ដោយសារកត្តាអាកាសធាតុភ្លៀងធ្លាក់ខ្លាំងនៅរយៈពេល 2ឆ្នាំចុងក្រោយនេះ បានធ្វើឱ្យការផលិតអំបិលមានការធ្លាក់ចុះខ្លាំង និងមិនអាចផលិតបានក្នុងរយៈពេល2ឆ្នាំជាប់គ្នាចុងក្រោយនេះ ដែលជាហេតុធ្វើឱ្យអំបិលក្នុងស្រុកនឹងត្រូវអស់ពីឃ្លាំងស្តុកនៅត្រឹមខែតុលា ឆ្នាំ2018ខាងមុខនេះ។ នេះគឺជាលើកទី2 ហើយ ខណៈដែលកាលពីឆ្នាំ2008កន្លងទៅ កសិករជួបបញ្ហាអាកាសធាតុ មិនអាចផលិតបានម្តងរួចមកហើយ។
ដោយសារអំបិលក្នុងស្រុកជិតអស់ពីស្តុកនេះហើយ ទើបធ្វើឱ្យសហគមន៍ស្នើសុំជាផ្លូវការ មកក្រសួងដើម្បីនាំចូលអំបិលពីក្រៅប្រទេស ដោយក្នុងនោះកម្ពុជានឹងបញ្ជាទិញពីប្រទេសថៃចំនួន 1ម៉ឺនតោនសម្រាប់ប្រើប្រាស់ជាលក្ខណៈឧស្សាហកម្ម និងប្រមាណជា2ម៉ឺនតោនផ្សេងទៀតនឹងត្រូវបញ្ជាទិញពីប្រទេសចិន សម្រាប់ប្រើប្រាស់លក្ខណៈគ្រួសារ ដែលអំបិលទាំង 3ម៉ឺនតោននេះ មានលទ្ធភាពផ្គត់ផ្គង់ការប្រើប្រាស់រហូតដល់ខែមករា ឆ្នាំ2019 ដែលគេរំពឹងថាកសិករខ្មែរនឹងអាចផលិតអំបិលរបស់ខ្លួនបានឡើងវិញបន្ទាប់ពីអស់ទឹកភ្លៀង។ លោកបន្តថាយ៉ាងណាក៏ដោយ ប្រសិនបើអាកាសធាតុកម្ពុជាមិនអំណោយផលល្អ ភ្លៀងនៅតែបន្តធ្លាក់ទៀត កសិករនឹងនៅតែមិនអាចផលិតបានទៀតនោះ កម្ពុជាក៏នឹងនៅតែបន្តនាំចូលអំបិលពីបរទេសបន្ថែមទៀត។
លោកថា តម្រូវការនៃការប្រើប្រាស់អំបិលច្រើនជាងគេនឹងចូលមកដល់នៅរដូវទឹកសម្រកខាងមុខខណៈដែលប្រជាពលរដ្ឋមានតម្រូវការខ្លាំងសម្រាប់ធ្វើប្រហុក-ផ្អកទុកទទួលទានលក្ខណៈគ្រួសារ និងអាជីវករខ្លះធ្វើប្រហុកជាលក្ខណៈទ្រង់ទ្រាយធំ ដើម្បីស្តុកទុកលក់វិញនៅពេលក្រោយៗទៀត ដែលនេះជាកត្តាធ្វើឱ្យកម្ពុជាមានតម្រូវការបញ្ជាទិញពីបរទេសដោយចៀសមិនរួចឡើយ។
លោក ប៊ុន បារាំង បានបញ្ជាក់បន្ថែមថា ដោយសារតែមិនអាចប្រកបអាជីវកម្មអំបិលនេះបាន បច្ចុប្បន្នជីវភាពរបស់ប្រជាកសិករផលិតអំបិលជួបការ-លំបាកខ្វះខាតក្នុងការរស់នៅជាខ្លាំងទៅលើការ-ចំណាយប្រចាំថ្ងៃ ការសិក្សារបស់កូន ការចំណាយទៅលើពិធីរៀបមង្គលការ ពិធីបុណ្យទានផ្សេងៗជាហេតុធ្វើឱ្យគាត់រត់មកខ្ចីប្រាក់ពីសហគមន៍ជាបន្តបន្ទាប់ ហើយសហគមន៍ក៏បានផ្តល់កម្ចីទៅតាមលទ្ធភាព ដោយមិនគិតការប្រាក់នោះទេ និងរង់ចាំដល់ពួកគាត់ផលិតអំបិលបាន ទើបអាចសងត្រឡប់មកវិញបន្តិចម្តងៗនៅពេលក្រោយ។
បច្ចុប្បន្នអំបិលក្នុង1ការ៉ុងមានទម្ងន់ 50គីឡូក្រាមមានតម្លៃ 17,600រៀល ជាអំបិលដែលសហគមន៍លក់ចេញបន្តទៅឱ្យអាជីវករសម្រាប់លក់បន្តនៅលើទីផ្សារ ហើយគ្រួសារដែលជាសមាជិកសហគមន៍ប្រហែល 200ក្រុម ដែលមួយក្រុមៗមានគ្នាប្រមាណពី5 ទៅ7គ្រួសារ។ តាមទិន្នន័យរបស់សហគមន៍អ្នកផលិតអំបិលខេត្តកំពត-កែបបានឱ្យដឹងថា កាលពីឆ្នាំ2017សហគមន៍ផលិតអំបិលបានចំនួន 3.3ម៉ឺនតោន និងឆ្នាំ2016 បានជាង 10ម៉ឺនតោន ដែលរហូតមកដល់ពេលនេះអំបិលក្នុងឃ្លាំងស្តុកនៅសល់ប្រមាណជា 2ម៉ឺនតោន។
ករណីនេះអ្នកនាំពាក្យក្រសួងឧស្សាហកម្ម និងសិប្បកម្ម លោក អ៊ុំ សុថា បញ្ជាក់បន្ថែមថា តម្រូវការនៃការប្រើប្រាស់អំបិលក្នុងស្រុកសម្រាប់ចុងឆ្នាំនេះពិតជាមានការខ្វះខាតខ្លាំងមែន ដោយសារតែភ្លៀងធ្លាក់ច្រើន ធ្វើឱ្យកសិករផលិតអំបិលមិនទទួលបានផលព្រោះការផលិតអំបិលត្រូវការកម្ដៅថ្ងៃខ្លាំងដើម្បីសម្ងួតទឹកសមុទ្រ។ ហើយអំបិលដែលប្រើប្រាស់លើទីផ្សារ បច្ចុប្បន្ន ជាអំបិលដែលនៅសេសសល់ខ្លះៗនៅក្នុងស្តុកប៉ុណ្ណោះ។ ដើម្បីបំពេញបន្ថែមតម្រូវការប្រើប្រាស់នេះ កម្ពុជាចាំបាច់ត្រូវបញ្ជាទិញពីបរទេសជាង 3ម៉ឺនតោន ពិសេសអំបិលដែលមានជាតិអុីយ៉ូត។
តាមទិន្នន័យផ្លូវការរបស់ក្រសួងខាងលើបានឱ្យដឹងថា ប្រទេសកម្ពុជាទទួលបានចំណូលប្រមាណជា 22លានដុល្លារអាមេរិក ពីការផលិតអំបិលកាលពីឆ្នាំមុន៕
