ឧកញ៉ា លី ហួរ ប្រាប់​អ្នកជំនួញ​បរទេស​អំពី​សក្ដានុពល​អចលនទ្រព្យ​នៅ​កម្ពុជា

ទោះបី​វិស័យ​អចលនទ្រព្យ​នៅ​កម្ពុជា​មានការកើនឡើង​ខ្លាំង​ក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ​ក៏ពិតមែន ប៉ុន្តែ​វិស័យនេះ​ហាក់​នៅ​មិន​ទាន់ឆ្អែត​នៅឡើយ បើ​ធៀប​ជាមួយ​ប្រទេស​មួយចំនួនទៀត​នៅក្នុង​តំបន់​អាស៊ីអាគ្នេយ៍។

លោក​ឧកញ៉ា លី ហួរ ប្រធាន​សមាគម​អ្នកអភិវឌ្ឍន៍​លំនៅឋាន​កម្ពុជា បាន​មានប្រសាសន៍​ទៅកាន់​អ្នកវិនិយោគ​វិស័យ​អចលនទ្រព្យ​អាស៊ាន​ក្នុង​កម្មវិធី​សន្និបាត និង​ពិព័រណ៍​អចលនវត្ថុ សមាគម​ភ្នាក់ងារ​អចលនវត្ថុ​អាស៊ាន​ឆ្នាំ2018 ដែល​បាន​ធ្វើឡើង​នៅ​ក្រុងភ្នំពេញ កាលពី​សប្តាហ៍​មុន ដោយ​ជំរុញ​ដល់​អ្នកជំនួញ​ផ្នែក​អចលនវត្ថុ​ក្នុង និង​ក្រៅប្រទេស​ចូលមក​វិនិយោគ​ដីធ្លី​នៅ​កម្ពុជា​ដោយសារ​វិស័យ​មួយ​នេះ​នៅតែមាន​សក្តានុពល​ខ្លាំង​នៅឡើយ​នាពេល​បច្ចុប្បន្ន​ក៏ដូចជា​ពេលអនាគត​ខាងមុខ។

កម្ពុជា​បាន​ប្រកាន់យក​របប​ទីផ្សារសេរី​ដែល​ធ្វើឱ្យមាន​ការអភិវឌ្ឍ​ខ្លាំង​ក្នុង​វិស័យ​អចលនទ្រព្យដូចជា​អគារខ្ពស់ៗកប់​ពពក (Skyscraper Building) អគារ​ខុន​ដូ-អា​ផាត​មិន សំណង់​អគារ​លំនៅឋាន​ផ្ទះល្វែង-វីឡាទំនើបៗ អគារ​សាលារៀន​លំដាប់ថ្នាក់​អន្តរជាតិ ផ្សារទំនើបៗ និង​ហេដ្ឋារចនាសម្ព័ន្ធធំផ្សេងៗទៀត​ជាច្រើន។ អចលនទ្រព្យ គឺជា​វិស័យ​ដែលមាន​ការរីកចម្រើន​គួរឱ្យកត់សម្គាល់​ក្នុងនោះ​អ្នកវិនិយោគទុន​ក្នុងស្រុក និង​អន្តរជាតិ​កាន់តែ​ចាប់អារម្មណ៍។ បើ​ប្រៀបធៀប​ទៅនឹង​បណ្តា​ប្រទេស​អាស៊ាន​ដទៃទៀត​ប្រទេស​កម្ពុជា​នៅមាន​ឱកាស​ក្នុង​ការពង្រីក​ការវិនិយោគ​យ៉ាង​ទូលំទូលាយ ពិសេសវិនិយោគ​លើ​អចលនទ្រព្យ និង​វិស័យ​ហេដ្ឋារចនាសម្ព័ន្ធផ្សេង។

លោក​បានបញ្ជាក់ថា ហេតុផលសំខាន់ៗដើម្បី​បង្ហាញថា ប្រទេស​កម្ពុជា​គឺជា​កន្លែង​ដែល​ត្រូវ​វិនិយោគ​លើ​វិស័យនេះ គឺ​ដោយសារ​កម្ពុ​ជាមាន៖ 1.ម៉ាក្រូសេដ្ឋកិច្ច​មាន​កំណើន​ថេរ 7%ជា​រៀងរាល់ឆ្នាំ។ 2.រដ្ឋាភិបាល​មានការ​គាំទ្រ​ទៅលើ​វិស័យ​ពាណិជ្ជកម្ម​ឯកជន ក្នុង និង​ក្រៅប្រទេស។ 3.ការវិនិយោគ​មានការ​ប្រកួតប្រជែង។ 4.កម្ពុ​ជាមាន​ទីភ្នាក់ងារ​លើកកម្ពស់​ការវិនិយោគ​ដែល​ផ្តល់​សេវាកម្ម​ច្រកចេញ-ចូល​តែមួយ។ 5.រដ្ឋាភិបាល​មាន​គោលនយោបាយ​គាំពារ​អ្នកវិនិយោគ​បរទេស។ 6.មាន​ហេដ្ឋារចនាសម្ព័ន្ធ​គ្រប់គ្រាន់ និង​មាន​ទីតាំង​អំណោយផល​ល្អ និង7.មាន​ធនធាន​ពលកម្ម​គ្រប់គ្រាន់ និង​ទីតាំង​ភូមិសាស្រ្តល្អ​ងាយស្រួល​ដល់​ការដឹកជញ្ជូន។ ករណីនេះ​លោក​បាន​ជំរុញ និង​លើកទឹកចិត្ត​ដល់​វិនិយោគិន​ក្នុងស្រុក និង​បរទេស​ទាំងអស់​ឱ្យ​ពិនិត្យមើល និង​ធ្វើការ​ពិចារណា​ក្នុងការ​សម្រេចចិត្ត​វិនិយោគ​នៅក្នុង​ប្រទេស​កម្ពុជា​ដែលជា​ប្រទេស​មាន​យុទ្ធសាស្ត្រ​ពាណិជ​កម្ម​ត្រឹមត្រូវ មាន​ចក្ខុវិស័យ​សម្រាប់​ការវិនិយោគ ជាពិសេស​វិស័យ​អចលនទ្រព្យ និង​ហេដ្ឋារចនាសម្ព័ន្ធ​ដើម្បី​ឈានទៅដល់​ការអភិវឌ្ឍ និង​ទទួលបាន​អត្ថប្រយោជន៍​យូរអង្វែង​សម្រាប់​វិនិយោគិន​ទាំងអស់។

ជាមួយគ្នានេះ​លោក​បណ្ឌិត គីម ហ៊ាង ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា ដែលជា​ប្រធាន​វេទិកា ARENA ក្នុង​ឆ្នាំ2018 នេះ​បាន​លើកឡើងថា ព្រឹត្តិការណ៍​ថ្នាក់​ពិភពលោក​នេះ​បាន​នាំ​អ្នកជំនាញ​ផ្នែក​អចលនទ្រព្យ​ជុំវិញ​ពិភពលោក​មក​ចែករំលែក​បទពិសោធ និង​ស្វែងរក​ដៃគូ​សហការ​ជាមួយ​ក្រុមហ៊ុន​ជាតិ និង​អន្តរជាតិ​ដែល​ចូលរួម​ក្នុង​ព្រឹត្តិការណ៍​នេះ។ ព្រឹត្តិការណ៍​នេះ​ក៏បាន​នាំ​កម្ពុជា​ទៅកាន់​ពិភពលោក និង​នាំ​ពិភពលោក​មកកាន់​កម្ពុ​ជា​ដែរ។ អ្នក​អភិវឌ្ឍន៍ និង​អ្នកវិនិយោគ​ក្នុង​វិស័យ​អចលនទ្រព្យ និង​លំនៅឋាន​ជុំវិញ​ពិភពលោក​បានដឹង​អំពី​ទីផ្សារ​អចលនទ្រព្យ​នៅតាម​បណ្តា​ប្រទេស​ដទៃទៀត ហើយ​ពួកគេ​អាច​ស្វែងរក​ភាពជា​ដៃគូថ្មីៗដើម្បី​វិនិយោគ​នៅ​ទីផ្សារ​ក្រៅប្រទេស​របស់ខ្លួន។

លោក​មានប្រសាសន៍​បន្ថែ​ម​ថា បើ​អ្នកវិនិយោគ​បរទេស​ចង់​ទិញ​ដី​នៅ​កម្ពុជា គួរ​ទាក់ទង​អ្នកណា​ដែលមាន​ជំនាញ និង​មាន​ក្រមសីលធម៌​ច្បាស់លាស់ មានច្បាប់​អនុញ្ញាត​ពី​ក្រសួង​សេដ្ឋកិច្ច និង​ហិរញ្ញវត្ថុ និង​ក្រសួង​ពាក់ព័ន្ធផ្សេងៗទៀត និង​ជា​បុគ្គល​ដែល​ធ្លាប់​ផ្តល់​ទំនុកចិត្ត​ទៅដល់​ដៃគូ​វិនិយោគ ក៏ដូចជា​អតិថិជន​របស់ខ្លួន ចៀសវាង​ចាប់​ដៃគូ​ជាមួយ​បុគ្គល​ណា ដែល​មិនមាន​ប្រវត្តិ និង​ក្រុមហ៊ុន​ច្បាស់លាស់។

ថ្លែង​ក្នុង​វេទិកា​ខាងលើ​នោះដែរ លោក ឆាល​រ៍ វ៉ាន់ សមាជិក​ក្រុមប្រឹក្សាភិបាល​នៃ​សមាគម​អ្នកសាងសង់​កម្ពុជា​បាន​ថ្លែងថា កំណើនសេដ្ឋកិច្ច និង​កំណើនប្រជាជន​បានធ្វើឱ្យ​តម្រូវការ​កន្លែង​ស្នាក់នៅនិង​អគារធំៗនៅ​កម្ពុជា​កើន​ឡើងជា​បន្តបន្ទាប់ ពិសេសក្នុង​រយៈពេល​ជាង 5ឆ្នាំ​កន្លងមកនេះ។ លោក​បានឱ្យដឹងថា ការរីកចម្រើន​នេះ​បានធ្វើឱ្យ​មូលធនវិនិយោគ​ក្នុង​វិស័យ​សំណង់​ចាប់តាំងពី​ឆ្នាំ2013 រហូតមកដល់​ត្រឹម​ដំណាច់​ឆមាស​ទី1 ឆ្នាំ2018នេះ មានតម្លៃ​សរុប 23,146ពាន់​លាន​ដុល្លារ។

ការថតរូបជុំគ្នាក្នុងកម្មវិធី សន្និបាត និងពិព័រណ៍អចលនវត្ថុ សមាគមភ្នាក់ងារអចលនវត្ថុអាស៊ានឆ្នាំ2018

យោងតាម​របាយការណ៍​របស់​ក្រសួង​រៀបចំ​ដែនដី​នគរូបនីយកម្ម និង​សំណង់​បង្ហាញថា គិត​ត្រឹម​ខែធ្នូ ឆ្នាំ2017 ការវិនិយោគ​សរុប​លើ​វិស័យ​អចលនទ្រព្យ​មាន​ចំនួន 3,052គម្រោង ដែលមាន​ផ្ទៃដី​សរុប​ជិត 11លាន​ម៉ែត្រការ៉េ ដែលមាន​តម្លៃ​ប៉ាន់ស្មាន​ប្រមាណ​ជាជាង 6ពាន់​លាន​ដុល្លារ។ ការវិនិយោគ​សរុប​ស​ម្រា​ប់​ឆមាស​ទី1 ឆ្នាំ2018នេះមាន​ចំនួន 1,643គម្រោង​ច្រើនជាង 5លាន​ម៉ែត្រការ៉េ ដែលមាន​ទឹកប្រាក់​វិនិយោគ​ក្នុងតម្លៃ​ប៉ាន់ស្មាន​សរុប​ជាង 2ពាន់​លាន​ដុល្លារ។

គួរ​ជម្រាប​បន្ថែម​ដែរ​ថា នៅ​កម្ពុជា​អ្នកវិនិយោគ​មកពី​ប្រទេស​ចិន​ជាប់​ចំណាត់ថ្នាក់​លេខ1ក្នុង​វិស័យ​អចលនទ្រព្យ បន្ទាប់មក​គឺ​ប្រទេស​កូរ៉េ​ជាប់​លំដាប់ថ្នាក់​លេខ2 ប្រទេស​ជប៉ុន​ជាប់​ចំណាត់ថ្នាក់​លេខ3 ចំណែក​ប្រទេស​សិង្ហបូរី​ជាប់​ចំណាត់ថ្នាក់​លេខ4 ហើយ​ចុងក្រោយ​គេ គឺ​ប្រទេស​ថៃឡង់​ដ៍៕

Advertisement