ដោយមើលឃើញពីការរីកចម្រើនក្នុងវិស័យអចលនទ្រព្យកម្ពុជា ក្រុមហ៊ុន KELLER WILLIAM ដែលគេស្គាល់ថា ជាក្រុមហ៊ុនអចលនទ្រព្យធំជាងគេនៅលើពិភពលោកនោះបានឈានជើងចូលទីផ្សារកម្ពុជាជាបណ្តើរៗហើយ ហើយនឹងសម្ពោធដំណើរការជាផ្លូវការ នៅខែធ្នូ ចុងឆ្នាំ2018ខាងមុខនេះ។
លោកបណ្ឌិត គឹម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ក្នុងកម្មវីធីជួបជុំដ៏ធំមួយកាលពីម្សិលមិញថា ក្រុមហ៊ុន KELLER WILLIAM គឺជាក្រុមហ៊ុនអចលនទ្រព្យធំជាងគេ និងមានវ័យចំណាស់ជាងគេនៅលើពិភពលោក ដែលបានបង្កើតឡើងដំបូងគេនៅសហរដ្ឋអាមេរិក និងមានសមាជិកច្រើនជាងគេផងដែរ ហើយដើម្បីចែករំលែកបទពិសោធក៏ដូចជាផ្តល់ការងារដល់ពលរដ្ឋខ្មែរឱ្យបានកាន់តែច្រើនដែរនោះ លោកបានសម្រេចចិត្តនាំយកឈ្មោះ(Franchise) ក្រុមហ៊ុនដ៏ល្បីមួយនេះចូលមកទីផ្សារកម្ពុជាដើម្បីចូលរួមអភិវឌ្ឍវិស័យអចលនទ្រព្យឱ្យកាន់តែប្រសើរឡើង។
លោកបន្តថា សម្រាប់អ្នកដែលចូលរួមធ្វើជាភ្នាក់ងារអចលនទ្រព្យជាមួយក្រុមហ៊ុន KELLER WILLIAM ប្រចាំនៅកម្ពុជានឹងទទួលបានអត្ថប្រយោជន៍ជាច្រើន ដូចជាការចូលរួមវគ្គបណ្តុះបណ្តាលអចលនទ្រព្យដោយមិនគិតថ្លៃ ហើយនឹងក្លាយខ្លួនជាអ្នកជំនាញ និងមានចំណេះដឹងច្បាស់លាស់ផ្នែកវិស័យអចលនទ្រព្យដែលអាចរកប្រាក់ចំណូលបានច្រើនជាងវិស័យផ្សេងៗមួយចំនួនទៀត។
លោកថា បច្ចុប្បន្ន ភ្នាក់ងារអចលនទ្រព្យនៅប្រទេសជឿនលឿន ដូចជាសហរដ្ឋអាមេរិក និងប្រទេសមួយចំនួនទៀត ពួកគេធ្វើការមិនយកប្រាក់ខែនោះទេ ដោយសារតែអាចរកកម្រៃជើងសាបានច្រើនជាងប្រាក់ខែរាប់សិបដងឯណោះ ហើយថា សម្រាប់ប្រជាជនខ្មែរនៅមានទំនោរធ្វើការលើវិស័យអចលនទ្រព្យយកប្រាក់ខែ ជាជាងយកម្រៃជើងសា ព្រោះគិតថា ខ្លាចខ្លួនឯងមិនអាចមានសមត្ថភាពលក់ដីបាន។ ប៉ុន្តែបើធ្វើការគិតតែប្រាក់ខែ គឺមិនអាចធ្វើឱ្យខ្លួនក្លាយជាអ្នកមានបានឡើយ ព្រោះប្រាក់ខែដែលបានមកនោះគ្រាន់តែចំណាយចាយវាយប្រចាំខែទៅវិញប៉ុណ្ណោះ។ ដូច្នេះគួរតែពង្រឹងចំណេះដឹង និងជំនាញឱ្យបានច្បាស់ នោះអ្នកនឹងអាចរកប្រាក់ពីវិស័យនេះបានច្រើនមិនខាន។
គួរបញ្ជាក់ថា បច្ចុប្បន្នមានប្រទេសចំនួន 4ហើយនៅក្នុងតំបន់អាស៊ីដែលបាននាំយកFranchise ក្រុមហ៊ុន KELLER WILLIAM មកធ្វើការនៅក្នុងប្រទេសរបស់គេ ដោយមានអ្នកចូលធ្វើការជាមួយកាន់តែច្រើនឡើងៗដែរ៕
