កសិករ​ខ្មែរ​នាំគ្នា​ងាក​មក​ដាំ​ក្រូចឆ្មារ ដើម្បី​ទប់ស្កាត់​ការនាំ​ចូល​ពី​ប្រទេសជិតខាង

ក្រូចឆ្មារ​ត្រូវបាន​គេ​ចាត់ទុកថា ជា​រុក្ខជាតិ​ងាយស្រួល​ដាំ និង​ងាយស្រួល​ទទួលផល តែ​ការដាំ​ដើម​-ក្រូចឆ្មារ​ទាំង​លក្ខណៈ​គ្រួសារ​សម្រាប់​ផ្គត់ផ្គង់​ការ-ហូបចុក​ផ្ទាល់ខ្លួន និង​ការដាំ​ជា​លក្ខណៈ​ធ្វើ​អាជីវកម្ម​នៅក្នុង​ស្រុក គឺ​នៅមាន​ចំនួន​តិចតួច​នៅឡើយ ថ្វីដ្បិតតែ​ប៉ុន្មាន​ឆ្នាំនេះ​គេ​បានឃើញ​សកម្មភាព​ដាំ​ក្រូចឆ្មារ​តាមបែប​វិទ្យាសាស្ត្រ​ដើម្បី​បំពេញ​តម្រូវ​លើ​ទីផ្សារ​មានការ​កើនឡើង​មែន តែ​ផ្លែក្រូច​ឆ្មារ​ដែល​គេ​ឃើ​ញដាក់លក់​នៅលើ​ទីផ្សារ​បច្ចុប្បន្ន ភាគច្រើន​លើសលប់​គឺ​នាំចូល​ពី​ប្រទេសជិតខាង ជាពិសេស​នាំចូល​ពី​ប្រទេស​វៀតណាម​តែម្ដង។

អាជីវករ​នៅ​ផ្សារ​នាគ​មាស ក្រុងភ្នំពេញ បានឱ្យដឹងថា បន្លែ​ក្រូចឆ្មារ​ដែល​ដាក់លក់​នៅក្នុង​ស្តង់​របស់​ពួកគេ គឺ​បាន​នាំចូល​ពី​ប្រទេស​វៀតណាម​ទាំងអស់។ កត្តា​ដែលនាំឱ្យ​ផ្លែក្រូច​ឆ្មារ​ត្រូវ​នាំចូល​ពី​ប្រទេស​វៀតណាម ដោយសារតែ​ក្រូចឆ្មារ​ដែល​ដាំ​នៅក្នុង​ស្រុក​មិនអាច​ផ្គត់ផ្គង់​តម្រូវការ​ទីផ្សារ​បាន​គ្រប់គ្រាន់ និង​លក់បាន​ថ្លៃ​ជាង​ទៀតផង។

តម្លៃ​ផ្លែ​ក្រូចឆ្មារ គឺ​អាស្រ័យ​លើ​រដូវ​ប្រមូល​ផល​របស់​ក្រូចឆ្មារ​ដែល​សម្បូរ ឬ​មិន​សម្បូរ។ សម្រាប់​រដូវ​ដែល​សម្បូរ​ក្រូចឆ្មារ គឺ​លក់​ចេញ​ក្នុងតម្លៃ​ពី3,000 – 4,000រៀល​ក្នុង​មួយ​គីឡូក្រាម និង​សម្រាប់​ខែ​ដែល​មិនសូវ​សម្បូរ គឺ​លក់​ចេញ​ក្នុងតម្លៃ​ចាប់ពី4,000 – 6,000រៀល​ក្នុង​មួយ​គីឡូក្រាម ដោយ​នេះ​ជា​តម្លៃ​បោះ​ដុំ តែ​អ្នក​ដែល​ទិញ​យកទៅ​លក់រាយ​វិញ អាច​លក់បាន​ថ្លៃ​ជាង​នេះ។

ក្នុង​មួយថ្ងៃ ស្តង់​មួយ​មាន​តម្រូវការ​ផ្លែក្រូច​ឆ្មារ​នាំចូល​ក្រូចឆ្មារ​ពី​ប្រទេស​វៀតណាម​ពី400 ទៅ500គីឡូក្រាម និង​ធ្វើ​ការលក់​បន្តទៅ​ឱ្យ​ប្រជាពលរដ្ឋ​ខ្មែរ​សម្រាប់​តម្រូវ​ការប្រើ​ប្រាស់​ហូបចុក​ប្រចាំថ្ងៃ។ នៅ​ផ្សារ​នាគ​មាស​តែមួយ មាន​ស្តង់​លក់​ផ្លែ​ក្រូចឆ្មារ​ប្រមាណ​ជិត 20ស្តង់។

តាមរយៈ​ការស្រាវជ្រាវ​របស់​អង្គការ​សេ​ដាក​បាន​រកឃើញថា ក្នុងមួយឆ្នាំៗ កម្ពុជា​បាន​នាំចូល​បន្លែ​ប្រមាណ 80%នៃ​ចំនួន​សរុប ខណៈ​កម្ពុជា​អាច​ផលិត​បាន​ប្រមាណ​តែ 20%ប៉ុណ្ណោះ។ ក្នុងនោះ​ក្នុង​មួយថ្ងៃ​កម្ពុជា​បាន​នាំចូល​ក្រូចឆ្មារ​យ៉ាងតិច 10តោន​ពី​ប្រទេស​វៀតណាម។

ហេតុ​ដូច្នេះហើយ​បានជា​កសិករ​ក្នុងស្រុក​មួយចំនួន​បាននាំគ្នា​ងាក​មក​ដាំ​ដំណាំ​ក្រូចឆ្មារ​យ៉ាងច្រើន​គួរឱ្យកត់សម្គាល់ ដូចជា​លោក ញឹម សំអាត កសិករ​នៅ​ភូមិ​ស្ពានដែក​ឃុំ​ធ្លក​វៀន ស្រុក​សាមគ្គី​មានជ័យខេត្តកំពង់ឆ្នាំង បាន​ដាំ​ដើម​ក្រូចឆ្មារ​លើដី​ចំនួន 34ហិកតា ដែល​បច្ចុប្បន្ន​ក្រូចឆ្មារ​របស់គាត់​បាន​ទទួលផល​ប្រមាណ​ជាង 10ហិកតា​ហើយ។

លោក ញឹម សំអាត បានឱ្យ​សារព័ត៌មាន ឡា​រ៉ែ​ន ពាណិជ្ជ ដឹងថា ក្នុងមួយថ្ងៃៗមាន​ផ្លែ​ក្រូចឆ្មារ 2ប្រភេទ​ដែល​លោក​បាន​ដាំ និង​កំពុង​ប្រមូល​ផលបណ្ដើរៗនោះ គឺ​ទី1-ផ្លែក្រូច​ឆ្មារ​ពណ៌​លឿង(ដែល​គេ​ច្រើន​យកទៅ​ធ្វើ​ម្ហូប​សម្រាប់​ហាងធំៗ និង​ធ្វើជា​តែ​ជ្រក់) និង​ទី2-ផ្លែក្រូច​ឆ្មារ​ប្រភេទ​ពណ៌​បៃតង​ធម្មតា ជា​ក្រូចឆ្មារ​ដែល​សម្រាប់​ធ្វើជា​ម្ជូរ​គ្រប់​ប្រភេទ។

លោក​បានឱ្យដឹងថា ការដាំ​ក្រូចឆ្មារ​តាមបែប​បុរាណ គឺ​ពិបាក​ថែទាំ មាន​អាយុ​ខ្លី ក្រ​ឱ្យ​ផល និង​ទទួលបាន​ផល​តិច​ទៀតផង តែ​បច្ចុប្បន្ន​គេ​ដាំ​ក្រូចឆ្មា​តាមបែប​វិទ្យាសាស្ត្រ គឺ​ប្ដូរ​ពី​ដាំ​បែប​បណ្ដុះ​កូនមកជា​ដាំ​ដោយ​បំបៅ(ផ្សាំ)មែក​វិញ ដែល​ធ្វើឱ្យ​ងាយស្រួល​ដាំ និង​ថែទាំ និង​ឆាប់​ឱ្យ​ផល គឺ​រយៈពេល​តែ 8ខែ ទៅ 1ឆ្នាំ​ប៉ុណ្ណោះ វា​នឹង​ចេញ​ផ្កា-ផ្លែ​ហើយ និង​ថែមទាំង​ឱ្យ​ផល​ច្រើន​ទៀតផង តែ​វា​ត្រូវការ​ទឹក​ឱ្យ​គ្រប់គ្រាន់។

លោក សំអាត បញ្ជាក់ថា ចំពោះ​ក្រូចឆ្មារ​ប្រភេទ​ពណ៌​បៃតង​ក្នុង​រយៈពេល 2ឆ្នាំ​វា​នឹង​ផ្តល់​ផល​ឱ្យ​ហើយ តែ​ក្រូចឆ្មារ​ប្រភេទ​ពណ៌​លឿង​វិញ ត្រឹម1ឆ្នាំ​ជាង យើង​អាច​ប្រមូល​ផល​បានជាបណ្តើរៗហើយដូច​ក្រូចឆ្មារ​ដែល​លោក​ដាំ​នេះ កំពុង​ឱ្យផល​ជាង 10ហិកតា​ហើយ​ដែល​ក្នុងនោះ​មាន​ក្រូចឆ្មារ​ពណ៌​បៃតង​ចំនួន 2,500ដើម និង​ក្រូចឆ្មារ​ពណ៌​លឿង 500ដើម ដែល​ក្នុង1ដើមៗ យើង​ទទួលបាន​ផល​ប្រមាណ​ជា 50 ទៅ 60ផ្លែ។ លោក​បាន​អះអាង​ទៀតថា បច្ចុប្បន្ន​ក្រូចឆ្មារ​លក់​មិនសូវ​បាន​ថ្លៃ​ទេ ក្នុង​ចម្ការ​រ​របស់លោក​ក្នុង 1ថ្ងៃ​អាច​ប្រមូល​ផល និង​លក់បាន​ប្រហែលជា 1,500ដុល្លារ(1គីឡូក្រាម​តម្លៃ4,000រៀល ឬ1ដុល្លារ)។ ចំពោះ​រដូវ​ដែល​ក្រូចឆ្មារ​ហុច​ផល​ល្អ និង​លក់បាន​ថ្លៃ​នោះ គឺ​ចាប់ពី​ខែ11 ដល់​ខែ4 ដែល​លក់​នៅពេល​លោក​អាច​លក់​បា​ន​ក្នុង1គីឡូក្រាម​តម្លៃ 7,000-8,000រៀល។

ការដែល​គាត់​បានចាប់ផ្តើម​ដាំ​ក្រូចឆ្មារ​នេះ ដោយសារតែ​ដំណាំ​ក្រូចឆ្មារ ត្រូវ​នាំចូល​ពី​ប្រទេស​វៀតណាម ព្រោះ​ក្រូចឆ្មារ​ដែល​ដាំ​នៅក្នុង​ស្រុក​ពុំ​អាច​ផ្គត់ផ្គង់​បាន ទើប​គាត​ចង់​ជំរុញដំណាំ​នេះ​ឱ្យជួយ​កាត់​បន្ថយ​ការនាំ​ចូល​ពី​ប្រទេសជិតខាង​ផង ក៏ដូចជា​កាត់បន្ថយ​ដំណាំ​​ដែល​ប្រើ​គីមី​ផងដែរ។

បច្ចុប្បន្ន លោក សំអាត កំពុង​ទាក់ទង​ជាមួយ​កសិករ​តាម​បណ្តា​ខេត្ត​មួយចំនួន​ដើម្បី​ជំរុញ​ឱ្យ​ពួកគេ​ដាំ​ដើម​ក្រូចឆ្មារ​ដើម្បី​បំពេញតម្រូវការ​ក្នុងស្រុក និង​ដើម្បី​កាត់បន្ថយ​ការនាំ​ចូល​ផ្លែក្រូច​ឆ្មារ​ពី​ប្រទេសក្រៅ ដែល​មិនសូវមាន​សុវត្ថិភាព ដោយ​កសិករ​ដែល​លោក សំអាត​បាន​ទំនាក់ទំនង​នោះ​រួមមាន កសិដ្ឋានធំៗខេត្ត​ព្រះសីហនុ(ព្រៃនប់) ក​សិ​ករ​នៅ​ខេត្តកំពង់ធំ បាត់ដំបង និង​មាន​ចម្ការតូចៗជាច្រើន​ខេត្តសៀមរាប និង​កំពង់ចាម៕

Advertisement