ក្នុងរយៈពេល 8ឆ្នាំចុងក្រោយនេះ គ្រឹះស្ថានធនាគារ និងមីក្រូហិរញ្ញវត្ថុនៅតែបន្តរក្សាបានភាពគ្រប់គ្រាន់នៃដើមទុន និងសន្ទនីយភាពយ៉ាងរឹងមាំ។ នេះបើយោងតាមរបាយការណ៍ប្រចាំឆ្នាំរបស់ធនាគារជាតិនៃកម្ពុជា ដែលបានចេញផ្សាយកាលពីថ្ងៃសុក្រសប្តាហ៍កន្លងទៅនេះ។
របាយការណ៍បានឱ្យដឹងថា អនុបាតសោធនភាព និងអនុបាតសន្ទនីយភាព ជាមធ្យមសម្រាប់គ្រឹះស្ថានធនាគារមាន 25ភាគរយ និង168ភាគរយ(ធៀបនឹងកម្រិតកំណត់ 15ភាគរយ និង80ភាគរយតាមលំដាប់) និងសម្រាប់គ្រឹះស្ថានមីក្រូហិរញ្ញវត្ថុមាន 21ភាគរយ និង188ភាគរយ។
ដោយឡែក សន្ទនីយភាពក្នុងប្រព័ន្ធធនាគារបានបន្តស្ថិតក្នុងកម្រិតខ្ពស់ ដោយសន្ទនីយភាពលើសជាដុល្លារអាមេរិកមានចំនួន 1.9ប៊ីលានដុល្លារអាមេរិក (កើន 8ភាគរយ) ស្មើនឹង 61ភាគរយ នៃប្រាក់បម្រុង កាតព្វកិច្ចជាដុល្លារអាមេរិក។ សន្ទនីយ-ភាពលើសជាប្រាក់រៀលមានចំនួន 1.4ទ្រីលាន (ថយ 5ភាគរយ) ស្មើនឹង 2.5ដងនៃប្រាក់បម្រុងកាតព្វកិច្ចជារៀល។
របាយការណ៍ដដែលបានបញ្ជាក់ថា៖“ការរក្សាកម្រិតខ្ពស់នៃសន្ទនីយភាពលើសនេះ បានពង្រឹងភាពធន់នៃប្រព័ន្ធធនាគារទប់ទល់នឹងហានិភ័យសន្ទនីយភាពដែលអាចកើតឡើងជាយថាហេតុ ហើយក៏បានបង្ហាញពីសក្តានុពលនៃប្រភពទុនដែលនៅទំនេរសម្រាប់ផ្តល់ហិរញ្ញប្បទានដល់សេដ្ឋកិច្ចផងដែរ‟។ បន្ថែមលើនេះ គ្រឹះស្ថានបានគ្រប់គ្រងឥណទានយ៉ាងមានប្រសិទ្ធភាព ដោយអនុបាតឥណទានមិនដំណើរការមានប្រមាណ 2.8ភាគរយសម្រាប់គ្រឹះស្ថានធនាគារ និង1ភាគរយសម្រាប់គ្រឹះស្ថានមីក្រូហិរញ្ញវត្ថុ។ នេះបើយោងតាមរបាយការណ៍។
លោកស្រី ជា សិរី អគ្គនាយិកាបច្ចេកទេសនៃធនាគារជាតិនៃកម្ពុជា បានថ្លែងថា វិស័យហិរញ្ញវត្ថុកម្ពុជាបានបន្តអភិវឌ្ឍប្រកបដោយស្ថិរភាពរឹងមាំ ដោយគ្រឹះស្ថានធនាគារ និងហិរញ្ញវត្ថុមានសុខភាពល្អ ហើយ ហានិភ័យនានាត្រូវបានគ្រប់គ្រងប្រកបដោយប្រសិទ្ធភាព។
លោកស្រី សិរី បន្តថា បច្ចុប្បន្នប្រភពមូលនិធិរបស់គ្រឹះស្ថានធនាគារ និងហិរញ្ញវត្ថុមានសមាសធាតុជា ដើមទុន (21ភាគរយ) មូលនិធិកម្ចី(14ភាគរយ) និងប្រាក់បញ្ញើរបស់អតិថិជន(65ភាគរយ)។ ដើមទុនរបស់គ្រឹះស្ថានភាគច្រើនបានមកពីលំហូរទុនវិនិយោគផ្ទាល់ពីបរទេស ហើយមូលនិធិកម្ចីទទួលបានពីបរទេសប្រមាណ 2ភាគ3 មានឥណប្រតិទានរយៈពេលវែងលើសពី 1ឆ្នាំ និងភាគច្រើនទទួលបានពីធនាគារមេ ភាគទុនិក និងដៃគូអភិវឌ្ឍន៍។
លោកស្រី សិរី បានបញ្ជាក់ថា៖“ដើមទុនរបស់វិស័យធនាគារមានស្ថានភាពរឹងមាំ ដែលឆ្លុះបញ្ជាំងតាមរយៈអនុបាតសោធនភាពខ្ពស់នៃគ្រឹះស្ថានធនាគារ 21ភាគរយ និងគ្រឹះស្ថានមីក្រូហិរញ្ញវត្ថុ 25ភាគរយ ខ្ពស់ជាងកម្រិតអប្បបរមា 15ភាគរយ‟។
លោកស្រីបានបន្តថា៖“គ្រឹះស្ថានធនាគារ និងមីក្រូហិរញ្ញវត្ថុបានរក្សាអនុបាតសន្ទនីយភាពខ្ពស់ប្រមាណ 168ភាគរយ និង188ភាគរយ ធៀបនឹងកម្រិតអប្បបរមា 80ភាគរយ ហើយអនុបាតឥណទានមិនដំណើរការរបស់គ្រឹះស្ថានធនាគារបានកើនឡើងបន្តិចត្រឹម 2.8ភាគរយ និងមីក្រូហិរញ្ញវត្ថុបានថយចុះពី 2ភាគរយនៅឆ្នាំ2017 មកក្នុងកម្រិតទាបប្រមាណ 1ភាគរយ‟។
លោកស្រី ជា សិរី បានឱ្យដឹងទៀតថា ការអភិវឌ្ឍវិស័យធនាគារ និងមីក្រូហិរញ្ញវត្ថុកម្ពុជាបានបន្តជំរុញកំណើនសេដ្ឋកិច្ច។ លោកស្រីថា អត្រាការប្រាក់ឥណទានជារៀល និងជាដុល្លារអាមេរិកបានថយចុះមក 14.79ភាគរយ និង10.96ភាគរយតាមលំដាប់នៅគ្រឹះស្ថានធនាគារ ហើយអត្រាការប្រាក់ឥណទានចំពោះមីក្រូហិរញ្ញវត្ថុមាននិន្នាការថយចុះ ដោយការប្រាក់ជារៀលថយចុះមក 17.58ភាគរយ និងជាដុល្លារថយចុះមក 15.92ភាគរយ។
លោកស្រី សិរី ថា ចំនួនអ្នកដាក់ប្រាក់បញ្ញើបានកើនដល់ 6លាននាក់ កើន 13ភាគរយ (ឆ្នាំលើឆ្នាំ) និងចំនួនអ្នកខ្ចីប្រាក់បានកើនបន្តិចដល់ 2.85លាននាក់ (កើន 3ភាគរយ)។
បើយោងរបាយការណ៍របស់ធនាគារជាតិ ឥណ-ទានរបស់គ្រឹះស្ថានធនាគារនៅឆ្នាំ2018 បែងចែកទៅវិស័យសេដ្ឋកិច្ចចម្បងៗ មាន៖ ពាណិជ្ជកម្មលក់ដុំ និងរាយ 28ភាគរយ សំណង់ និងអចលនទ្រព្យ 16ភាគរយ អង្គភាពគ្រួសារ 17ភាគរយ និងកសិកម្ម 9.4ភាគរយ។ ដោយឡែកឥណទានរបស់គ្រឹះស្ថានមីក្រូហិរញ្ញវត្ថុបែងចែកទៅអង្គភាពគ្រួសារ 33ភាគរយកសិកម្ម 22ភាគរយ ពាណិជ្ជកម្ម 22ភាគរយ និងសេវាកម្ម 11ភាគរយ។
របាយការណ៍ដដែលរបស់ធនាគារជាតិក៏បានបញ្ជាក់ដែរថា ការរីកចម្រើនសកម្មភាពសេដ្ឋកិច្ចបានជំរុញកំណើនប្រាក់បញ្ញើដែលជាប្រភពទុនដ៏មានចីរភាព សម្រាប់អន្តរការីយកម្មហិរញ្ញវត្ថុ និងធានាបាននូវលទ្ធភាពសងត្រឡប់មកវិញរបស់អតិថិជន និងការទូទាត់នានា ជាពិសេសបានលើកទឹកចិត្តឱ្យគ្រឹះស្ថានធនាគារ និងមីក្រូហរិញ្ញវត្ថុលើកកម្ពស់គុណភាព និងផលិតផលហិរញ្ញវត្ថុជាបន្តបន្ទាប់។ ស្ថិរភាពនយោបាយ ការរីកចម្រើនគ្រប់ផ្នែកនៃវិស័យសេដ្ឋកិច្ច និងភាពរឹងមាំនៃប្រព័ន្ធធនាគារ គឺជាកម្លាំងចលករ យ៉ាងសំខាន់ក្នុងការពង្រឹងជំនឿទុកចិត្តរបស់សាធារណជនមកលើប្រព័ន្ធធនាគារនៅកម្ពុជា។
យ៉ាងណាក៏ដោយ លោកស្រី ជា សិរី បានថ្លែងបញ្ជាក់ថា ស្ថិរភាពហិរញ្ញវត្ថុកម្ពុជាបន្តមានភាពរឹងមាំ ដូច្នេះហានិភ័យម៉ាក្រូសេដ្ឋកិច្ច និងហានិភ័យវិស័យធនាគារស្ថិតក្នុងកម្រិតទាបអាចគ្រប់គ្រងបាន។ ការធ្វើស្ថិតិលើភាពគ្រប់គ្រាន់នៃដើមទុន និងសន្ទនីយភាពរបស់គ្រឹះស្ថានធនាគារ និងមីក្រូហិរញ្ញវត្ថុបង្ហាញថាគ្រឹះស្ថានមានភាពធន់ខ្ពស់ទៅនឹងហានិភ័យដែលអាចកើតឡើងជាយថាហេតុ។ ធនាគារជាតិនៃកម្ពុជាបានបន្តតាមដានវឌ្ឍនភាពវិស័យធនាគារយ៉ាងប្រុងប្រយ័ត្ន ជាពិសេសទៅលើកំណើននៃឥណទាន ឥណទានមិនដំណើរការ ឥណទានទៅកាន់វិស័យអចលនទ្រព្យ លំហូរទុនបរទេសមកក្នុងវិស័យធនាគារ។
បើយើងតាមទិន្នន័យរបស់ធនាគារជាតិនៃកម្ពុជាទ្រព្យសកម្មរបស់គ្រឹះស្ថានធនាគារ និងហិរញ្ញវត្ថុបានកើនឡើង 19.4ភាគរយ(ឆ្នាំលើឆ្នាំ) ដល់ 40ប៊ីលានដុល្លារអាមេរិកដែលគាំទ្រដោយកំណើនមូលនិធិកម្ចី ដើមទុនរបស់គ្រឹះស្ថាន និងប្រាក់បញ្ញើអតិថិជន។ មូលនិធិកម្ចីបានកើនឡើង 23ភាគរយ ដល់ 4.1ប៊ីលានដុល្លារអាមេរិក ដើមទុនមានកំណើន 23.8ភាគរយ ដល់ 4.8ប៊ីលានដុល្លារអាមេរិក។
ដោយឡែកប្រាក់បញ្ញើអតិថិជនបានកើនឡើង15.3ភាគរយ ដល់ 22.1ប៊ីលានដុល្លារអាមេរិក និងឥណទានបានកើនឡើងដល់ 18.8ភាគរយ ដល់ 24.5ប៊ីលានដុល្លារអាមេរិក ហើយចំនួនអ្នកដាក់ប្រាក់បញ្ញើកើនដល់ 6.2លានគណនី និងអ្នកខ្ចីប្រាក់កើនដល់ 2.6លានគណនី។
គួរបញ្ជាក់ថា រហូតមកទល់បច្ចុប្បន្ននេះ គ្រឹះស្ថានធនាគារ និងហិរញ្ញវត្ថុ រួមមាន ធនាគារពាណិជ្ជ43(ធនាគារក្នុងស្រុក15 បុត្រសម្ព័ន្ធធនាគារ15 និងសាខាធនាគារបរទេស13) ធនាគារឯកទេស14(ធនាគាររដ្ឋ1 និងធនាគារឯកជន13) គ្រឹះស្ថានមីក្រូហិរញ្ញវត្ថុទទួលប្រាក់បញ្ញើពីសាធារណជន7 គ្រឹះស្ថានមីក្រូហិរញ្ញវត្ថុ73 គ្រឹះស្ថានឥណទានជនបទ273 ក្រុមហ៊ុនភតិសន្យាហិរញ្ញវត្ថុ15 អ្នកដំណើរការតតិយភាគី5 គ្រឹះស្ថានផ្តល់សេវាទូទាត់14 ក្រុមហ៊ុនក្រេឌីតប៊ុយរ៉ូកម្ពុជា1 ការិយាល័យតំណាងធនាគារបរទេស5 និងអាជីវករប្តូរប្រាក់2,737៕