កសិករ​អំបិល​ផ្តើម​ផលិត​អំបិល​ដោយ​ក្តី​សង្ឃឹមថា​ ប្រមូល​ផល​បាន​ល្អ​ឡើងវិញ​ក្នុង​ឆ្នាំនេះ​

អ្នក​ផលិត​អំបិល​នៅក្នុង​ខេត្តកំពត​ និង​កែប​សង្ឃឹមថា​ នឹង​ប្រមូល​ផល​បាន​យ៉ាងហោចណាស់100,000តោន​នៅ​ឆ្នាំនេះ​ ដោយសារតែ​លក្ខខណ្ឌ​អាកាសធាតុ​អំណោយផល​ នឹង​ធ្វើ​ឱ្យ​ការផលិត​អំបិល​អាច​ប្រព្រឹត្តទៅ​បាន​ល្អ​។

លោក​ ប៊ុ​ន បារាំង​ អនុប្រធាន​សមាគម​អំបិល​ខេត្តកំពត​-កែប​បាន​ថ្លែង​ឱ្យ​ដឹង​ថា​ កសិករ​អំបិល​បាន​នាំគ្នា​ត្រឡប់​មក​ផលិត​អំបិល​វិញ​ហើយ​ បន្ទាប់ពី​មាន​អាកាសធាតុ​អំណោយផល​ មាន​ពន្លឺ​ព្រះអាទិត្យ​គ្រប់គ្រាន់​។ ប្រសិនបើ​អាកាសធាតុ​ល្អ​(មាន​កំ​ដៅ​ថ្ងៃ​ខ្លាំង​)សមាគម​នឹង​ផលិត​អំបិល​បាន​ប្រហែលជា​ 100,000តោន​ក្នុង​ឆ្នាំនេះ​។ លោក​បន្ត​ថា​៖ “បើ​អាកាសធាតុ​ដូចនេះ​ រហូតដល់​ខែឧសភា​ ឬខែមិថុនា​ យើង​រំពឹង​ថា​ នឹង​ផលិត​អំបិល​បាន​ប្រមាណ​ 100,000តោន​”។

លោក ប៊ុន បារាំង អនុប្រធាន​សមាគម​អំ​បិ​ល​ ខេត្តកំពត-កែប​

លោក​ បារាំង​ មានប្រសាសន៍​ថា​ នេះ​បង្ហាញ​ឱ្យ​ឃើញ​ពី​ភាព​ផ្ទុយគ្នា​យ៉ាង​ខ្លាំង​កាលពី​ឆ្នាំមុន​នៅពេល​មាន​ភ្លៀង​ធ្លាក់​យ៉ាង​ខ្លាំង​ដែល​ធ្វើ​ឱ្យ​កសិករ​ចាកចេញ​ពី​ការងារ​ និង​ជំរុញ​ឱ្យ​សមាគម​អំបិល​យើង​ទៅចុះ​ហត្ថលេខា​លើ​កិច្ច​ព្រមព្រៀង​ជាមួយ​ចិន​ដើម្បី​នាំចូល​អំបិល​ 30,000តោន​ដើម្បី​បំពេញ​តម្រូវការ​ក្នុង​ស្រុក​ ហើយ​អំបិលដែល​ទទួល​បាន​ពី​ប្រទេស​ចិន​ត្រូវ​បាន​ចែកចាយ​ទៅ​ឱ្យ​អ្នកផ្គត់ផ្គង់​នៅក្នុង​ទីផ្សារ​ក្នុង​ស្រុក​រួចរាល់​អស់ហើយ​។

លោក​អនុប្រធាន​សមាគម​ បាន​សម្តែង​ការ​សោក​ស្តាយ​ថា​ អំបិល​ចិន​ 1តោន​មានតម្លៃ​ 135​ ដុល្លារ​ ប៉ុន្តែ​យើង​លក់​ឱ្យ​អតិថិជន​ក្នុង​ស្រុក​បាន​ត្រឹមតែ​ 100ដុល្លារ​ប៉ុណ្ណោះ​ក្នុង​ 1តោន​ ដូច្នេះ​ទើប​យើង​នាំចូល​អំបិល​ចិន​មក​ត្រឹមតែ​ 1ម៉ឺន​តោន​សិន​ នៅសល់​ 2ម៉ឺន​តោន​ទៀត​ យើង​បាន​ពន្យារពេល​ ដោយសារ​កសិករ​ផលិត​អំបិល​យើង​ចាប់ផ្ដើម​បន្តដំណើរ​ការផលិត​កម្ម​វិញ​ហើយ​។លោក​បាន​ថ្លែង​ថា​៖ “យើង​កំពុង​ព្យួរ​ការនាំចូល​ពី​ប្រទេស​ចិន​មួយរយៈពេល​សិន​ ព្រោះ​ឥឡូវនេះ​យើង​អាច​ផលិត​អំបិល​ឡើងវិញ​ហើយ​។ យើង​នឹង​នាំចូល​អំបិល​ចិន​ 20.000តោន​ដែល​នៅសល់​នោះ​ ប្រសិនបើ​ផលិតកម្ម​ក្នុង​ស្រុក​មិន​គ្រប់គ្រាន់​តាម​តម្រូវការ​”។

លោក​បាន​ថ្លែង​បន្ត​ថា​ វិស័យ​នេះ​កំពុង​ដោះស្រាយ​កង្វះខាត​កម្លាំង​ពលកម្ម​ ដោយ​កម្លាំង​ពលកម្ម​តាម​បែប​ប្រពៃណី​បាន​ផ្លាស់​ប្តូរ​ពី​តំបន់ជនបទ​ ទៅ​ធ្វើការ​នៅក្នុង​រោងចក្រ​ ឬធ្វើ​ចំណាកស្រុក​ទៅ​ប្រទេស​ថៃ​ដើម្បី​បង្កើន​ប្រាក់ចំណូល​របស់​ពួកគេ​។

លោក​ បារាំង​ បាន​មានប្រសាសន៍​ថា​៖“សមាគម​កំពុង​ជំរុញ​ឱ្យ​រដ្ឋាភិបាល​គាំទ្រ​ការ​អភិវឌ្ឍ​វិធីសាស្ត្រ​ផលិត​អំបិល​ថ្មី​ ដូចជា​ការរុករក​រ៉ែ​ដែល​ពាក់ព័ន្ធ​នឹង​អំបិល​ ដោយ​អំពាវនាវ​ឱ្យ​ក្រសួង​បញ្ជូន​អ្នកជំនាញ​ខាង​រ៉ែ​ និង​អំបិល​មក​ដើម្បី​ធ្វើការ​រួមគ្នា​ជាមួយ​សមាគម​។ ខ្ញុំ​បាន​ផ្ញើ​សំណើ​ទៅ​ក្រសួង​ឧស្សាហកម្ម​ និង​សិប្បកម្ម​រួចហើយ​លើ​បញ្ហា​នេះ​ តែ​យើង​មិនទាន់​ទទួល​បានការ​ឆ្លើយតប​នៅ​ឡើយ​ទ”។

ឯកឧត្តម​ អ៊ុំ​ សុ​ថា​ អ្នកនាំពាក្យ​ក្រសួង​ឧស្សាហកម្ម​ និង​សិប្បកម្ម​ បាន​ប្រាប់​ឡា​រ៉ែ​នពា​ណិ​ជ្ជ​ថា​ កម្ពុជា​គ្មាន​ផែនការ​អនុវត្ត​វិធីសាស្ត្រ​ផ្សេង​ណា​សម្រាប់​ការផលិត​អំបិល​ទេ​។ លោក​បាន​បន្ត​ថា​ វិធីសាស្ត្រ​បច្ចុប្បន្ន​ដែល​មាន​មូលដ្ឋាន​លើ​ការ​បូមទឹក​ប្រៃ​ទៅ​ដាក់​ក្នុង​វាលស្រែ​ និង​ធ្វើ​ឱ្យ​ទឹក​ហួត​ទៅតាម​លក្ខណៈ​ធម្មជាតិ​ គឺ​វា​មានប្រសិទ្ធភាព​គ្រប់គ្រាន់​ក្នុង​ការផលិត​អំបិល​របស់​យើង​ហើយ​។

ឯកឧត្តម​ សុ​ថា​ បាន​មានប្រសាសន៍​ថា​៖ “យើង​បាន​ប្រាប់​ពួកគេ​ថា​ វា​សំខាន់ណាស់​ក្នុង​ការ​ពង្រឹង​សមាគម​របស់​ពួកគេ​ដើម្បី​ទទួល​បានការ​គាំទ្រ​ពី​រដ្ឋាភិបាល​ ដោយ​ក្រសួង​កំពុង​រៀបចំ​សំណើសុំ​បន្ត​ការលើកលែង​ពន្ធ​លើ​ផលិតកម្ម​អំបិល​។ បច្ចុប្បន្ន​ទីផ្សារ​ក្នុង​ស្រុក​ ទាមទារ​ការផលិត​អំបិល​ឱ្យ​បាន​ពី​ 80.000​ ទៅ​ 100.000​ តោន​ក្នុង​មួយឆ្នាំ​”។

យោង​តាម​សមាគម​អំបិល​បានឱ្យ​ដឹង​ថា​ អំបិល​ចំនួន​ 50គីឡូក្រាម​ឥឡូវនេះ​មានតម្លៃ18,000រៀល​(4,5ដុល្លារ​)ក្នុង​ទីផ្សារ​ក្នុង​ស្រុក​។ បច្ចុប្បន្ន​មាន​ដី​ទំហំ​ 4,657ហិ​កតា​សម្រាប់​ការ​ប្រមូល​ផល​អំបិល​ក្នុង​ប្រទេស​កម្ពុជា​ និង​មាន​កសិករ​ចំនួន​ 200នាក់​កំពុងធ្វើការ​ងារ​នេះ​។ អំបិល​ត្រូវ​បាន​ផលិត​ភាគច្រើន​នៅ​ខេត្ត​កែប​ និង​កំពត​។

រដ្ឋាភិបាល​បាន​ចេញ​សេចក្តី​បង្គាប់​មួយ​កាលពី​ចុងឆ្នាំ2018​ ដោយ​ជំរុញ​ឱ្យ​កសិករ​ដាំ​ និង​ប្រមូល​ផល​ស្រូវ​បានតែ​ម្ដង​ក្នុង​រដូវប្រាំង​នៅ​ឆ្នាំនេះ​ ដោយសារតែ​បញ្ហា​កង្វះ​ទឹក​។

នៅក្នុង​បទបញ្ជា​នេះ​ សម្ដេច​នាយក​រដ្ឋមន្ត្រី​ ហ៊ុន​ សែន​ បាន​មានប្រសាសន៍​ថា​ បាតុភូត​អាកាសធាតុ​អែ​លនី​ណូ​ នឹង​ធ្វើ​ឱ្យ​មាន​អាកាសធាតុ​មិន​ប្រក្រតី​នៅ​កម្ពុជា​ ដោយ​សីតុណ្ហភាព​នឹង​ឡើង​ខ្ពស់​រហូតដល់​ 42អង្សា​សេ​ និង​មាន​ភ្លៀង​តិចតួច​ក្នុង​ខែមេសា​ និង​ខែឧសភា​។

តាមរយៈ​អាកាសធាតុ​ដែល​មាន​សីតុណ្ហភាព​ខ្ពស់​នេះ​ ជាអំណោយ​ផល​សម្រាប់​កសិករ​ផលិត​អំបិល​កម្ពុជា​។ ក្នុង​ខែមីនា​នេះ​ជារ​ដូវ​ប្រាំង​ រាំងភ្លៀង​ កម្មករ​ស្រែអំបិល​យើង​អាច​ចាប់ផ្ដើម​ធ្វើ​អំបិល​បាន​។ ជា​ឱកាស​ និង​ប្រយោជន៍​ក្នុង​ការផលិត​អំបិល​របស់​យើង​។

សម្ដេច​តេជោ​ ហ៊ុន​ សែន​ នាយក​រដ្ឋ​មន្ដ្រី​ បាន​មានប្រសាសន៍​ថា​៖ “សង្ឃឹមថា​ នៅ​ឆ្នាំ2019នេះ​ការផលិត​អំបិល​ខេត្តកំពត​នឹង​ផ្គត់ផ្គង់​ប្រជាពលរដ្ឋ​នៅ​ទូទាំង​ប្រទេស​ប្រើប្រាស់​គ្រប់គ្រាន់​ ដោយសារតែ​ការ​ព្យាករ​អាកាសធាតុ​ឆ្នាំនេះ​ មាន​ភ្ញៀវ​ធ្លាក់​តិច​។ ខណៈ​ដែល​កាលពី​ឆ្នាំ2018​ កម្ពុជា​ជួប​បញ្ហា​ខ្វះ​អំបិល​ ដោយសារ​ការប្រែប្រួល​អាកាសធាតុ​ ដូច្នេះ​ឆ្នាំនេះ​ អំបិល​របស់​យើង​ប្រហែលជា​មិន​មាន​បញ្ហា​នោះ​ទេ​ ដោយសារ​ធាតុអាកាស​ក្ដៅ​ខ្លាំង​ និង​រដូវភ្លៀង​មកដល់​យឺត​ ដូច្នេះ​ការផលិត​អំបិល​របស់​យើង​ដើម្បី​ផ្គត់ផ្គង់​ទូទាំង​ប្រទេស​ គឺ​មិន​មាន​បញ្ហា​នោះ​ទេ​”៕

Advertisement