កំណើន​ទុន​វិនិយោគ​ ឆ្លុះបញ្ចាំង​សញ្ញា​វិជ្ជមាន​ក្នុង​វិស័យ​អចលនទ្រព្យ​

June 12, 2019​ ម៉ោង 10:31 am

គម្រោង​ ដែល​មានតម្លៃ​ជាង​ 2.7​ ពាន់​លាន​ដុល្លារ​ត្រូវ​បាន​អនុម័ត​ក្នុងអំឡុងពេល​ 4 ខែ​ដំបូង​ នៃ​ឆ្នាំនេះ​ដោយមាន​ការ​កើនឡើង​ 67.3​% ធៀប​នឹង​ឆ្នាំ2018​ដែល​ជា​សញ្ញា​វិជ្ជមាន​មួយ​នៅក្នុង​វិស័យ​អចលនទ្រព្យ​។ នេះ​បើ​យោង​តាម​ទិន្នន័យ​របស់ក្រ​សួង​រៀបចំ​ដែនដី​នគរូបនីយកម្ម​ និង​សំណង់​។

ឯកឧត្តម​ ឡៅ​ ទិព្វ​សីហា​ រដ្ឋលេខាធិការ​ក្រសួង​រៀបចំ​ដែនដី​ នគរូបនីយកម្ម​ និង​សំណង់​បាន​មាន​ប្រសាសន៍​ថា​ កំណើន​នៅក្នុង​វិស័យ​នេះ​ចាប់ពី​ខែ​មករា​ ដល់​ខែមេសា​ ពិតជា​គួរ​ឱ្យ​កត់សម្គាល់​ខ្លាំង​ ដោយសារ​ស្ថិរភាព​នយោបាយ​ និង​សង្គម​កំណើន​សេដ្ឋកិច្ច​ជាតិ​ ក៏ដូចជា​កំណើន​ប្រាក់ចំណូល​ និង​វិស័យ​ការ​វិនិយោគ​ពី​បរទេស​។

ឯកឧត្តម​រដ្ឋលេខាធិការ​បានឱ្យ​ដឹង​ថា​ ក្នុងអំឡុងពេល​ 4ខែ​នេះ​ គម្រោង​វិនិយោគ​សរុប​ចំនួន​ 1.420​ ត្រូវ​បាន​អនុម័ត​ និង​មានការ​កើនឡើង​ខ្លាំង​ បើ​ប្រៀបធៀប​ទៅ​នឹង​គម្រោង​ចំនួន​ 1.171​ ដែល​បាន​អនុម័ត​(កាលពី​ខែមករា​ ដល់​ខែមេសា​)ក្នុងអំឡុងពេល​ដូចគ្នា​ក្នុង​ឆ្នាំ2018​។

ឯកឧត្តម​បាន​បន្ត​ថា​៖“ស្ថិរភាព​សង្គម​ និង​នយោបាយ​ និង​កំណើន​សេដ្ឋកិច្ច​រឹងមាំ​ជាច្រើន​ឆ្នាំ​មកនេះ​បាន​ធ្វើ​ឱ្យ​ជួយ​ប្រសើរ​ឡើង​នូវ​ជីវភាពរស់នៅ​របស់​ប្រជាពលរដ្ឋ​ និង​ធ្វើ​ឱ្យ​វិស័យ​សំណង់​ និង​អចលនទ្រព្យ​មាន​ភាព​ទាក់ទាញ​។ បច្ចុប្បន្ន​នេះ​វិស័យ​សំណង់​មាន​តួនាទី​សំខាន់​ក្នុង​ការជំរុញ​កំណើន​សេដ្ឋកិច្ច​ ការ​កើនឡើង​នៃ​ប្រាក់ចំណូល​របស់​ប្រជាជន​ និង​ការបង្កើត​ការងារ​”។

ឯកឧត្តម​បាន​បញ្ជាក់​ថា​៖“តួនាទី​កាន់តែ​កើន​ឡើង​នៃ​វិស័យ​សំណង់​ និង​អចលនទ្រព្យ​នៅក្នុង​ការ​អភិវឌ្ឍ​សេដ្ឋកិច្ច​របស់​ប្រទេស​ដែល​លំហូរ​ចូល​វិនិយោគ​ផ្ទាល់​ពី​បរទេស​ (FDI​) បន្ត​កើនឡើង​ជា​រៀងរាល់​ឆ្នាំ​”។

លោក​ Arnaud​ Darc​ ប្រធាន​ Eurocham​ ប្រចាំ​កម្ពុជា​បាន​មានប្រសាសន៍​ថា​៖“ស្ថិរភាព​នយោបាយ​ កំណើន​សេដ្ឋកិច្ច​ និង​ការ​កើនឡើង​នៃ​ការ​វិនិយោគ​ផ្ទាល់​ពី​បរទេស​ ក៏ដូចជា​ការ​គាំទ្រ​ពី​វិស័យ​ធនាគារ​បាន​ជំរុញ​វិស័យ​អចលនទ្រព្យ​នៅ​កម្ពុជា​ជា​រៀងរាល់​ឆ្នាំ​ក្នុង​ទសវត្សរ៍​ចុងក្រោយ​នេះ​”។

លោក​ Darc​ បាន​ថ្លែង​ថា​៖“ទោះជាយ៉ាងណា​ក៏​ដោយ​ភាព​រំភើប​នៃ​ការអនុវត្ត​ និង​សំឡេង​នៃ​វិស័យ​នេះ​ដែល​យើង​កំពុង​រីកចម្រើន​ យើង​បានឮ​ពី​ 1ឆ្នាំទៅ​1ឆ្នាំ​ នៅក្នុង​វេទិកា​របស់​យើង​ដែល​ថា​ភាពរឹងមាំ​នេះ​ទាមទារ​ឱ្យ​មានការ​យកចិត្ត​ទុកដាក់​កាន់តែ​ច្រើន​ និង​សូម្បីតែ​ការពិនិត្យ​ពិច័យ​ទៀតផង​”។លោក​ Darc​ បាន​បន្ថែម​ថា​ ការពិត​នៃ​ការប្រកួត​ប្រជែង​ ភាព​ចាំបាច់​ដើម្បី​លេចធ្លោ​ និង​វិធី​ដើម្បី​ធ្វើ​ដូច្នេះ​ គឺជា​គំនិត​សំខាន់​កាន់តែ​ខ្លាំង​ឡើង​ ក៏ដូចជា​តួនាទី​របស់​និយតករ​ក្នុង​ការ​លើកកម្ពស់​ស្តង់​ដា​ខ្ពស់​នៅក្នុង​អ្វី​ដែល​កំពុង​ក្លាយជា​ទីផ្សារ​ទំនើប​”។

កាលពី​ 2ឆ្នាំមុន​ ប្រធានបទ​ចម្បង​នៃ​វេទិកា​អចលនទ្រព្យ​ និង​សំណង់​គឺ​ “គ្រប់គ្រង​កំណើន​”ខណៈ​ដែល​មនុស្ស​គ្រប់គ្នា​កំពុង​ឆ្ងល់​ថា​ តើ​កំណើន​ដ៏​ប្រសើរ​នេះ​អាច​បន្ត​នៅក្នុង​កម្រិត​ដូចគ្នា​ដែរ​ឬយ៉ាងណា​? ជា​ការពិត​ណាស់​ខណៈ​ដែល​វិស័យ​នេះ​ កាន់តែ​មាន​មនុស្ស​កាន់តែ​ច្រើន​ឡើង​ៗចូលរួម​ប្រឡូក​ តែ​ពួកគេ​ត្រូវតែ​រិះរក​វិធី​ដើម្បី​ឈរ​លើ​គេ​ ដើម្បី​ឈ្នះ​ការប្រកួត​។

យោង​តាម​សមាគម​អ្នក​វាយតម្លៃ​ និង​ភ្នាក់ងារ​អចលនវត្ថុ​កម្ពុជា​បានឱ្យ​ដឹង​ថា​ តម្លៃ​អចលនទ្រព្យ​នៅ​ប្រទេស​កម្ពុជា​បាន​កើនឡើង​ប្រមាណ​ជា​ 15​% ជាមធ្យម​រៀងរាល់​ឆ្នាំ​សម្រាប់​រយៈពេល​ពី​ 4 ទៅ​ 5ឆ្នាំ​ចុងក្រោយ​នេះ​។ តម្លៃ​កាលពី​ឆ្នាំមុន​បាន​កើនឡើង​ច្រើនជាង10​%បើ​ប្រៀបធៀប​នឹង​ឆ្នាំ​ 2017​។ តម្លៃ​ដីធ្លី​បាន​កើនឡើង​ប្រហែល​ 20​% ខណៈ​ពេល​ដែល​តម្លៃ​ផ្ទះ​ និង​អគារ​ពាណិជ្ជកម្ម​កើនឡើង​ប្រហែល​ 10​%។

លោក​ ច្រឹក​ សុ​ខនីម​ ប្រធាន​សមាគម​ អ្នក​វាយតម្លៃ​ និង​ភ្នាក់ងារ​អចលនវត្ថុ​កម្ពុជា​ បាន​មានប្រសាសន៍​ថា​៖“ការ​អនុម័ត​ពី​ក្រសួង​គឺជា​ជំហាន​ដំបូង​ ដែល​គ្រាន់តែ​អនុម័ត​ នៅ​មិន​គ្រប់គ្រាន់​ទេ​ យើង​ត្រូវតែ​ពិនិត្យមើល​ថា​តើ​គម្រោង​ទាំងនេះ​ កំពុង​ត្រូវ​បាន​អភិវឌ្ឍ​យ៉ាង​ពេញលេញ​ឬយ៉ាងណា​? កត្តា​ផ្សេង​ទៀត​អាច​មាន​ឥទ្ធិពល​លើ​ការ​អនុម័ត​របស់​រដ្ឋាភិបាល​។ អ្នក​ចូល​រួម​ថ្មី​ៗជាច្រើន​ដែល​ព្យាយាម​ចូលរួម​ក្នុង​វិស័យ​នេះ​ ប្រហែលជា​មិន​មាន​បទ​ពិសោធ​ចាំបាច់​ដើម្បី​បំពេញ​តាម​តម្រូវការ​នៃ​ការ​អនុម័ត​ទេ​”។

យោង​តាម​របាយការណ៍​ដែល​ចេញ​ដោយ​ក្រសួង​រៀបចំ​ដែនដី​ នគរូបនីយកម្ម​ និង​សំណង់​ បាន​បង្ហាញ​ថា​ 4ខែ​ដើមឆ្នាំ2019នេះ​ គម្រោង​វិនិយោគ​នៅក្នុង​វិស័យ​សំណង់​នានា​ ដូចជា​អគារ​មជ្ឈមណ្ឌល​ពាណិជ្ជកម្ម​ ខុន​ដូ​ អគារ​ការិយាល័យ​ សណ្ឋាគារ​ បុរី​លំនៅឋាន​ និង​សំណង់​រោងចក្រ​ជាដើម​ ត្រូវ​បាន​អនុម័ត​ដោយមាន​ទំហំ​ទឹកប្រាក់​វិនិយោគ​ សរុប​រហូតដល់​ 2,742ដុល្លារ​សហ​អាមេរិក​ក្នុង​នោះ​ទុន​វិនិយោគ​ផ្ទាល់​ពី​បរទេស​មាន​ចំនួន​ទឹកប្រាក់​ 367​លាន​ដុល្លារ​សហរដ្ឋអាមេរិក​។

របាយការណ៍​ដដែល​បាន​បង្ហាញ​ឱ្យ​ដឹងផង​ដែរ​ថា​ សម្រាប់​ក្រុមហ៊ុន​សំណង់​កំពុងតែ​ដំណើរ​ ការ​នៅ​កម្ពុជា​ ត្រូវ​បាន​ចុះបញ្ជី​នៅ​ក្រសួង​មាន​ដូចជា​ ក្រុមហ៊ុន​សំណង់​ចិន​មាន​ចំនួន​ 226ក្រុមហ៊ុន​ វៀតណាម​មាន​ចំនួន​ 26ក្រុមហ៊ុន​ ថៃ​មាន​ចំនួន​ 14ក្រុមហ៊ុន​ ម៉ាឡេស៊ី​មាន​ចំនួន​ 12ក្រុមហ៊ុន​ សិង្ហបុរី​មាន​ចំនួន​ 6ក្រុមហ៊ុន​ ឥណ្ឌូ​នេ​ស៊ី​មាន​ចំនួន2​ និង​ក្រុមហ៊ុន​ហ្វីលីពីន​មាន​ចំនួន1​។

នៅក្នុងចំណោម​នៃ​ការ​វិនិយោគ​ពី​បណ្តា​ក្រុមហ៊ុន​បរទេស​នៅក្នុង​ទំហំ​ទឹកប្រាក់​ខាងលើ​នេះ​ វិនិយោគិន​ចិន​ បាន​ឈានមុខ​គេ​ជាមួយ​ការ​បោះទុន​សរុប​ ប្រមាណ​ 315លាន​ដុល្លារ​ ខណៈ​ដែល​បណ្តា​អ្នក​វិនិយោគ​នានា​នៅក្នុង​តំបន់​អាស៊ាន​ដែល​ចូល​មក​វិនិយោគ​នៅ​កម្ពុជា​ មាន​ទំហំ​ទឹកប្រាក់​ត្រឹម​ជាង​ 4លាន​ដុល្លារ​សហរដ្ឋអាមេរិក​តែប៉ុណ្ណោះ​៕