ធនាគារពិភពលោក​ផ្តល់​ប្រាក់​ 60លាន​ដុល្លារ​ ដើម្បី​ជួយ​កសិករ​ក្រីក្រ​

ធនាគារពិភពលោក​ World​ Bank​ (WB​)នឹង​ផ្តល់​ថវិកា​ប្រមាណ​ 60លាន​ដុល្លារ​នៅក្នុង​ការ​បន្ត​ផ្តល់​មូលនិធិ​នៃ​គម្រោង​សម្រាប់​ដំណាក់កាល​ទី3​ ដល់​ក្រសួង​កសិកម្ម​ដើម្បី​កែ​លម្អ​ជីវភាព​ការរស់នៅ​របស់​កសិករ​ក្រីក្រ​។ នេះ​បើ​យោង​តាម​អ្នកតំណាង​ WB​ ដែល​បាន​ធ្វើ​សេចក្តី​ប្រកាស​នៅក្នុង​ជំនួប​ជាមួយ​ឯកឧត្តម​ រដ្ឋមន្ត្រី​ក្រសួង​កសិកម្ម​ រុក្ខាប្រមាញ់​ និង​នេសាទ​។

លោក​ Nathan​ M. Belete​ នាយក​ផ្នែក​អនុវត្តន៍​កសិកម្ម​នៃ​ធនាគារពិភពលោក​ប្រចាំ​នៅ​តំបន់​អាស៊ី​បូព៌ា​ និង​ប៉ាស៊ីហ្វិក​បាន​ធ្វើ​សេចក្តី​រាយការណ៍​ អំពី​ វឌ្ឍនភាព​ ការបែងចែក​ដី​សង្គមកិច្ច​ និង​ការ​អភិវឌ្ឍ​សេដ្ឋកិច្ច​ជំហាន2​ Land​ Allocation​ for​ Social​ and​ Economic​ Development​ (LASED​ II​)និង​ស្នើសុំ​អនុសាសន៍​ដើម្បី​ធ្វើការ​កែ​លម្អ​លើ​ចំណុច​ខ្វះខាត​នៃ​ការអនុវត្ត​គម្រោង​នេះ​។

លោក​ Belete​ បាន​មានប្រសាសន៍​ថា​៖ “បច្ចុប្បន្ន​ធនាគារពិភពលោក​កំពុង​សហការ​ជាមួយ​ក្រសួង​កសិកម្ម​ ក្នុង​ការអនុវត្ត​ដំណាក់កាល​ទី2​ នៃ​គម្រោង​ការ​អភិវឌ្ឍ​ដី​សង្គមកិច្ច​ និង​អភិវឌ្ឍន៍​សេដ្ឋកិច្ច​ (LASED​ II​) របស់​ធនាគារ​ចាប់ពី​ឆ្នាំ2017​-2022​”។

គម្រោង​នេះ​កំពុង​ត្រូវ​បាន​អនុវត្ត​នៅ​ខេត្ត​ចំនួន​5 ក្នុង​ព្រះរាជាណាចក្រ​កម្ពុជា​ រួមមាន​៖ខេត្ត​ត្បូងឃ្មុំ​ ខេត្តក្រចេះ​ ខេត្ត​កំពង់ឆ្នាំង​ ខេត្ត​កំពង់ស្ពឺ​ និង​ខេត្ត​កំពង់ធំ​ ហើយ​កំពុង​ផ្តល់​អត្ថ​ប្រយោជន៍​ ដល់​គ្រួសារ​ចំនួន4,441​ តាមរយៈ​ការបង្កើត​ប្រព័ន្ធ​ធារាសាស្ត្រ​ខ្នាត​តូច​ និង​សេវាកម្ម​គាំទ្រ​បច្ចេកទេស​កសិកម្ម​ជា​មូលដ្ឋាន​ ដើម្បី​កែ​លម្អ​ ជីវភាពរស់នៅ​ដល់​កសិករ​ក្រីក្រ​។ នេះ​បើ​តាម​លោក​ Belete​ បាន​បញ្ជាក់​។

ឯកឧត្តម​ វេង​ សា​ខុន​ រដ្ឋមន្ត្រី​ក្រសួង​កសិកម្ម​ រុក្ខាប្រមាញ់​ និង​នេសាទ​បាន​សង្ឃឹម​ និង​ជឿជាក់​ថា​ ធនាគារពិភពលោក​ និង​ដៃគូ​អភិវឌ្ឍន៍​ទាំងអស់​នឹង​បន្ត​ផ្តល់​ការ​គាំទ្រ​ ជាពិសេស​លើ​ការ​ធ្វើ​ប្រពល​វប្បកម្ម​ដំណាំ​បន្លែ​ វារីវប្បកម្ម​ និង​ការ​ចិញ្ចឹមសត្វ​ ដើម្បី​បង្កើន​តម្លៃបន្ថែម​ដល់​កសិផល​ ពង្រីក​ និង​ពង្រឹង​ការកែច្នៃ​ វេច​ខ្ចប់​ ឃ្លាំង​ស្តុក​ ឡសម្ងួត​ ការ​រក្សាទុក​ដាក់​ឱ្យ​បាន​ត្រឹមត្រូវ​តាម​បច្ចេកទេស​ ធានា​គុណភាព​ សុវត្ថិភាព​ទាំង​អនាម័យ​ និង​ភូតគាម​អនាម័យ​ ក្នុង​គោលបំណង​បំពេញ​ខ្សែ​ចង្វាក់​ផលិតកម្ម​ និង​កាត់បន្ថយ​ការនាំចេញ​វត្ថុធាតុដើម​។

នៅក្នុង​ឱកាស​នេះ​ លោក​ Nathan​ M. Belete​ក៏បាន​ឯកភាព​ចំពោះ​ការ​លើកឡើង​របស់​ឯកឧត្តម​រដ្ឋមន្ត្រី​ ហើយក៏​បាន​បញ្ជាក់​ថា​ គម្រោង​ថ្មី​ដោយឡែក​រវាង​ធនាគារពិភពលោក​ និង​ក្រសួង​កសិកម្ម​ រុក្ខាប្រមាញ់​ និង​នេសាទ​ គឺ​ពិតជា​បាន​ឆ្លើយតប​ និង​ស្របតាម​ការ​លើកឡើង​ខាងលើ​។ ពាក់ព័ន្ធ​នឹង​គម្រោង​ LASED​ II​ នេះ​វិញ​ លោក​បាន​រាយការណ៍​ជូន​ឯកឧត្តម​រដ្ឋមន្ត្រី​ថា​ គោលបំណង​ចម្បង​របស់​គម្រោង​នេះ​ គឺ​ជួយ​លើកកម្ពស់​ជីវភាព​របស់​គ្រួសារ​ក្រីក្រ​ និង​ងាយ​រងគ្រោះ​ ដែល​គម្រោង​នេះ​បាន​ជួយ​គាំទ្រ​ដល់​គម្រោង​សម្បទាន​ដី​សង្គមកិច្ច​របស់​រាជរដ្ឋាភិបាល​ក្នុង​ការចែក​ដី​ឱ្យ​កសិករ​គ្មាន​ដី​ និង​មាន​ដី​តិចតួច​ដើម្បី​ប្រកបរបរ​កសិកម្ម​ចិញ្ចឹម​គ្រួសារ​តាមរយៈ​ការ​បង្កើន​ប្រាក់ចំណូល​។

លោក​ Belete​ បាន​កត់សម្គាល់​ថា​ គម្រោង​ LASED​ II​ រយៈពេល​ 5ឆ្នាំ​ មានតម្លៃ​ 25លាន​ដុល្លារ​។លោក​ Belete​ ក៏បាន​និយាយ​បញ្ជាក់​ដែរ​ថា​ ធនាគារ​ពិភពលោក​បាន​ផ្តល់​ថវិកា​ចំនួន​ 60លាន​ដុល្លារ​ ហើយនឹង​ស្វែងរក​ប្រាក់​ចំនួន​ 30លាន​ដុល្លារ​បន្ថែម​ពី​ដៃគូ​ដទៃទៀត​ដើម្បី​អនុវត្ត​គម្រោង​ LASED​ III​ បន្ទាប់ពី​ឆ្នាំ2022​។

លោក​បាន​មានប្រសាសន៍​ថា​៖“ ខ្ញុំ​សង្ឃឹមថា​ឯកឧត្តម​រដ្ឋមន្ត្រី​ នឹង​បន្ត​សហការ​ជាមួយ​ធនាគារ​ពិភពលោក​ដើម្បី​អនុវត្ត​គម្រោង​ នា​ពេល​បច្ចុប្បន្ន​ និង​អនាគត​ដើម្បី​ផលប្រយោជន៍​របស់​កសិករ​ជាពិសេស​កសិករ​ក្រីក្រ​។ វា​នឹង​ជួយ​បង្កើន​កំណើន​សេដ្ឋកិច្ច​របស់​ប្រទេស​ផង​ដែរ​”។

ឯកឧត្តម​ វេង​ សា​ខុន​ បាន​សម្តែង​ការ​ដឹងគុណ​ របស់​រដ្ឋាភិបាល​ចំពោះ​ធនាគារពិភពលោក​ ដើរ​តួនាទី​យ៉ាង​សំខាន់​ក្នុង​ការ​ជួយឧបត្ថម្ភ​គាំទ្រ​ លើ​ការ​អភិវឌ្ឍ​ប្រទេស​កម្ពុជា​ និង​សេដ្ឋកិច្ច​ជាតិ​ឱ្យ​មានការ​រីកចម្រើន​ប្រកបដោយ​ចីរភាព​ ក្នុង​នោះ​ក៏​មាន​វិស័យ​កសិកម្ម​ ដែល​កំពុង​ស្ថិត​ក្នុង​ដំណាក់កាល​ធ្វើការ​ផ្លាស់​ប្តូរ​ពី​កសិកម្ម​យថាកម្ម​ ទៅ​ជា​កសិ​-ឧស្សាហកម្ម​ កសិ​-ពាណិជ​កម្ម​ និង​កសិ​-ទេសចរណ៍​ ដោយ​ផ្តោត​ជា​សំខាន់​លើ​ការ​ធ្វើ​ពិពិធ​កម្ម​កសិកម្ម​ ទំនើបកម្ម​កសិកម្ម​ និង​ការផលិត​តាម​លក្ខណៈ​បច្ចេកទេស​សមស្រប​ និង​មាន​ស្តង់ដារ​ក្នុង​ការកែច្នៃ​ ដើម្បី​នាំចេញ​ប្រកបដោយ​គុណភាព​ អនាម័យ​ និង​ភូតគាម​អនាម័យ​ ឆ្លើយតប​តាម​តម្រូវការ​ទីផ្សារ​។

ឯកឧត្តម​បាន​មានប្រសាសន៍​ថា​៖“គម្រោង​នេះ​នឹង​ជួយ​កែ​លម្អ​ ជីវភាពរស់នៅ​របស់​កសិករ​ ហើយ​ដើរតួ​នាទី​មួយ​ក្នុង​កិច្ចប្រឹងប្រែង​របស់​ប្រទេស​កម្ពុជា​ ដើម្បី​ក្លាយជា​ប្រទេស​មាន​ប្រាក់ចំណូល​ខ្ពស់​នៅ​ឆ្នាំ2030​ ហើយ​វា​ក៏​ជួយ​កសិករ​ក្រីក្រ​ឱ្យ​ទទួល​បាន​សម្បទាន​ដី​ និង​បង្រៀន​ពី​បច្ចេកទេស​កសិកម្ម​ទំនើប​”។

ការ​ធ្វើ​យ៉ាងនេះ​ គឺ​ដើម្បី​ឆ្លើយតបទៅនឹង​បរិបទ​នៃ​កំណើន​សេដ្ឋកិច្ច​ កំណើនប្រជាជន​ ការ​ខ្វះខាត​កម្លាំង​ពលកម្ម​ក្នុង​ស្រុក​ ការប្រែប្រួល​អាកាសធាតុ​ និង​ជាពិសេស​ខិតខំ​សម្រេច​ឱ្យ​បាន​នូវ​ចក្ខុវិស័យ​របស់​រាជរដ្ឋាភិបាល​ ដើម្បី​កាត់បន្ថយ​ភាព​ក្រីក្រ​ក្នុងចំណោម​កសិករ​។

បច្ចុប្បន្ន​ដោយមាន​កិច្ចសហការ​យ៉ាង​ល្អ​ប្រសើរ​គ្រប់​ភាគី​ពាក់ព័ន្ធ​ ជាពិសេស​ក្រសួង​កសិកម្ម​ គម្រោង​នេះ​បាន​និង​កំពុង​អនុវត្ត​ទៅតាម​កម្មវិធី​ដូច​បាន​គ្រោងទុក​ និង​ទទួល​បាន​លទ្ធផល​គួរ​ជា​ទី​មោទន​ ដោយ​កម្រិតជីវភាព​គ្រួសារ​របស់​សម្បទានិក​មានការ​រីកចម្រើន​គួរ​ឱ្យ​កត់សម្គាល់​។ ដូចនេះ​លោក​ Nathan​ M. Belete​ សង្ឃឹមថា​ ឯកឧត្តម​រដ្ឋមន្ត្រី​ និង​សហការី​នឹង​បន្ត​កិច្ចសហការ​យ៉ាង​ល្អ​នេះ​ជា​ប្រយោជន៍​ដល់​អ្នកទទួល​ផល​ពី​គម្រោង​នេះ​ គឺ​ប្រជាកសិករ​ក្រីក្រ​ និង​ងាយ​រងគ្រោះ​។ ធនាគារពិភពលោក​ក៏បាន​សរសើរ​ពី​ការ​អភិវឌ្ឍ​សង្គម​ និង​សេដ្ឋកិច្ច​របស់​ប្រទេស​កម្ពុជា​ ហើយ​បាន​បញ្ជាក់​ថា​ ខ្លួន​បាន​ត្រៀមខ្លួន​ដើម្បី​បន្ត​គាំទ្រ​គម្រោង​នេះ​តទៅទៀត​៕

Advertisement