ស្របពេលដែលសំណង់ផ្ទះល្វែងកំពុងរីកដុះដាល់កាន់តែច្រើនឡើងៗនៅក្នុងទីក្រុងភ្នំពេញ ក៏ដូចជានៅតាមបណ្តាខេត្តមួយចំនួន គេសង្កេតឃើញថា របរលក់កូនឈើ និងលក់ដើមផ្កាសម្រាប់ដាំតាំងលម្អតាមគេហដ្ឋាន ក៏ដូចជាលម្អតាមសួនច្បារសាធារណៈនានា កំពុងមានតម្រូវការកាន់តែច្រើនឡើងៗ នារយៈពេលប៉ុន្មានឆ្នាំចុងក្រោយនេះ។
អ្នកស្រី ឈួន សុផល ម្ចាស់ហាងលក់ដើមផ្កា និងកូនឈើឈ្មោះ “ចំរើនផល” ស្ថិតនៅតាមបណ្តោយផ្លូវជាតិលេខ1 ក្នុងភូមិជ្រោយអំពិល សង្កាត់ក្បាលកោះខណ្ឌច្បារអំពៅ រាជធានីភ្នំពេញបានមានប្រសាសន៍ថា កាលពីប្រមាណជា10ឆ្នាំមុន អ្នកស្រីគឺជាអាជីវករម្នាក់នៅក្នុងផ្សារបឹងកេងកងដែលរកចំណូលបានសមរម្យម្នាក់ដែរ ប៉ុន្តែដោយសារមានឈាមជ័រឪពុកម្តាយជាអ្នកលក់ដើមផ្កា និងលក់កូនឈើនៅផ្ទះដែលអាចរកចំណូលបានខ្ពស់ជាងជាងរបរលក់ដូរក្នុងផ្សារ អ្នកស្រី និងគ្រួសារបានពិភាក្សាគ្នាជួលដីទីតាំងខាងលើសម្រាប់លក់កូនឈើ និងកូនផ្កានៅក្បែរផ្ទះឪពុកម្តាយវិញកាលពីជិត 10ឆ្នាំមុន។
អ្នកស្រីអះអាងថា របរលក់ដើមផ្កា និងលក់កូនឈើនេះហាក់មានការនឿយហត់បន្តិច ព្រោះពេលខ្លះត្រូវដឹកនាំកម្មកររៀបចំសួនដាំផ្កា ដាំដើមឈើឱ្យម៉ូយទាំងកណ្តាលថ្ងៃ ឬកណ្តាលភ្លៀងក្តៅ-ត្រជាក់ ប៉ុន្តែនៅតែសប្បាយចិត្ត ដ្បិតរកចំណូលបានខ្ពស់គួរសម មិនចាញ់របរលក់ដូរនៅក្នុងផ្សារឡើយ។ អ្នកស្រី សុផល បានបន្តថា ទោះជាពេលខ្លះក្តៅរងារស្បែកមិនសភ្លឺថ្លាដូចរបរលក់ដូរក្នុងផ្សារក៏ពិតមែន ក៏ប៉ុន្តអ្នកស្រី និងគ្រួសារមានការសប្បាយចិត្តជាងមុន ដោយសារតែអាចរកចំណូលបានខ្ពស់គួរសម មានលទ្ធភាពបញ្ជូនកូនទៅរៀននៅសាលាល្អៗ មានលទ្ធភាពទិញផ្ទះក្នុងបុរី និងសល់លុយកាក់ខ្លះទិញដីទុកលក់យកចំណេញបានខ្លះៗទៀតផង។
របរខាងលើត្រូវបានគេចែកចេញជា 3ប្រភេទ រួមមាន1 របរលក់ដើមផ្កា ដូចជាផ្កាសារិកាកែវ ផ្កាអ័រគីដេ ផ្កាចំប៉ី ចំប៉ា និងផ្កាច្រើនប្រភេទទៀត ចំណែកប្រភេទទី2 គឺកូនឈើហូបផ្លែ ដូចជាស្វាយ ដូងតឿ ដូងក្រអូប ដើមជម្ពូ បំពេញរាជ្យ និងដើមឈើហូបផ្លែផ្សេងៗទៀតជាច្រើនមុខ និងទី3 ជាប្រភេទដើមឈើព្រៃភ្នំកម្រ ដូចជាដើមគគីរ កកោះ ផ្ចឹក សុក្រំនិងក្រញូងជាដើម ដែលប្រភេទដើមឈើទាំងនេះ អ្នកស្រីបានទិញពីកសិករបណ្តុះកូនឈើលក់នៅតាមបណ្តាខេត្ត និងនៅជាយក្រុងភ្នំពេញ ចំណែកដើមផ្កា និងដើមឈើហូបផ្លែភាគច្រើនត្រូវបានគេនាំចូលពីប្រទេសជិតខាង ដូចជាប្រទេសថៃ វៀតណាម ចិន និងម៉ាឡេស៊ីជាដើម។ អ្នកស្រីបានឱ្យដឹងទៀតថា របរនេះក៏អាចជួយដល់កំណើនសេដ្ឋកិច្ចរបស់កសិករបានមួយចំណែកផងដែរ តាមរយៈការបណ្តុះកូនឈើលក់រកចំណូលបន្ថែមពីការងារប្រចាំថ្ងៃរបស់ពួកគាត់ ហើយអាចផ្តល់ការងារដល់កូនខ្មែរយើងប្រមាណ 4-5នាក់ផងដែរ។ អ្នកស្រីបញ្ជាក់ថា បើសិនមនុស្សម្នាក់អាចមានលទ្ធភាពផ្តល់ការងារឱ្យកូនខ្មែរបានតែ 5នាក់ នោះប្រទេសយើងនឹងមិនខ្វះការងារធ្វើទេ។
ដោយសារមានតម្រូវការកូនឈើ និងកូនផ្កាសម្រាប់ដាំលម្អតាមគេហដ្ឋាន និងតាមសួនច្បារសាធារណៈកាន់តែច្រើនឡើងៗនោះ ទើបម្ចាស់ហាងដើមផ្កាខាងលើបានចំណាយប្រាក់ចំនួនជិត5ម៉ឺនដុល្លារបន្ថែមទៀត ដើម្បីបង្កើតសាខាទី2 របស់ខ្លួនឈ្មោះថា “ចំរើនផល2” នៅតាមបណ្តោយផ្លូវជាតិលេខ1 មានចម្ងាយប្រមាណជាង 13គីឡូម៉ែត្រពីស្ពានច្បារអំពៅបន្ថែមទៀត ដើម្បីធ្វើការផ្គត់ផ្គង់នៅលើទីផ្សារកាន់តែសម្បូរបែបឡើង។
ដូចគ្នានេះដែរ ម្ចាស់ហាងផ្កា “ម៉ីលីន”ដែលមានទីតាំងស្ថិតនៅភូមិទួលសាលា ឃុំព្រៃពួច ស្រុកអង្គស្នួល ខេត្តកណ្តាល ស្ថិតនៅតាមផ្លូវជាតិលេខ4 ត្រង់គីឡូលេខ29-30 ក៏បានមានប្រសាសន៍ដែរថាដោយសារតែស្រឡាញ់ធម្មជាតិ ស្រឡាញ់បរិស្ថាន អ្នកស្រី និងគ្រួសារបានជួលដីគេទំហំធំមួយកន្លែងជាប់ផ្លូវជាតិលេខ4 ត្រង់គីឡូម៉ែត្រលេខ29-30 ដើម្បីបើកទីតាំងលក់កូនផ្កា និងកូនឈើដាំលម្អអស់រយៈពេលជាង 3ឆ្នាំមកហើយ។ កាលលក់ដំបូងៗមិនសូវមានដើមទុនដាក់កូនផ្កា និងកូនឈើច្រើនប៉ុន្មានទេ តែដោយសារខំសន្សំបន្តិចម្តងៗទើបទីតាំងរបស់អ្នកស្រីរីកធំមកទល់សព្វថ្ងៃ ដែលមានភ្ងៀវមកទិញជាហូរហែមិនដែលដាច់ម៉ូយទេពី 1ថ្ងៃទៅ 1ថ្ងៃ។
កាលពីឆ្នាំកន្លងមុនៗ មិនសូវមានតម្រូវការដាំដើមផ្កា ឬកូនឈើតាំងលម្អតាមផ្ទះ ច្រើនប៉ុន្មានទេប៉ុន្តែទើបតែអាកាសធាតុប្រែប្រួលកាន់តែក្តៅឡើងៗពី 1ឆ្នាំទៅ 1ឆ្នាំចុងក្រោយនេះ ទើបធ្វើឱ្យតម្រូវការដាំដើមផ្កា និងកូនឈើតាមផ្ទះកើនច្រើនឡើងៗ ដោយសារតែមនុស្សមានការយល់ដឹងកាន់តែច្រើនឡើងអំពីអត្ថប្រយោជន៍នៃការដាំដើមឈើដើម្បីទាក់ទាញធាតុត្រជាក់នៅតាមផ្ទះរបស់ខ្លួន។ តែយ៉ាងណាក៏ដោយ ក៏ម្ចាស់ទីតាំងលក់កូនផ្កាខាងលើបានអះអាងដែរថា ការលក់កូនផ្កាមិនសូវបានចំណេញច្រើនទេ 1ដើមចំណេញប្រហែលតែ2 ទៅ3ពាន់រៀលប៉ុណ្ណោះ ប៉ុន្តែបើកូនឈើវិញ អាចរកបានប្រាក់ចំណេញច្រើនគួរសមជាង បើប៉ះចំគេយកទៅដាំតាមសួនច្បារ ឬដាំតាំងលម្អតាមបុរី ផ្ទះល្វែង ឬដីឡូត៍ផ្សេងៗនោះ គឺគេអាចកុម្ម៉ង់ទិញម្ដងច្រើនៗ ទទួលបានប្រាក់កម្រៃច្រើនគួរសម និងអាចផ្តល់ការងារបានកាន់តែច្រើនដល់កម្មករទៀតផង។
ម្ចាស់ទីតាំងលក់កូនផ្កាខាងលើបានអះអាងថា របរលក់កូនឈើ និងកូនផ្កានៅតាមជាយក្រុង មិនសូវបានថ្លៃខ្ពស់ដូចនៅក្នុងទីក្រុង នៅតាមផ្សារទំនើបឬបានថ្លៃដូចនៅក្រុងកំពង់សោមទេ ដោយសារទីនោះមានចិនសង់ខុនដូ និងផ្ទះច្រើន ធ្វើឱ្យមានតម្រូវការច្រើន ហើយលក់បានថ្លៃខ្ពស់ស្ទើរតែ 1គុណនឹង2 ទៀតផង ហើយអ្នកស្រីប្រាប់ថា ប្រជាពលរដ្ឋគួរដាំដើមឈើរនៅតាមផ្ទះឱ្យបានច្រើន ដើម្បីទាញអាកាសធាតុត្រជាក់នៅជុំវិញផ្ទះរបស់ខ្លួនដើម្បីឱ្យសុខភាពរបស់កូនចៅ និងសមាជិកក្នុងគ្រួសារបានល្អប្រសើរ មានខ្យល់បរិសុទ្ធ និងត្រជាក់ត្រជុំក្នុងក្រុមគ្រួសារ ទោះជាមានដីនៅសល់តិចតួច ឬធំទូលាយក្តី។
គួរបញ្ជាក់ថា របរលក់កូនផ្កា និងកូនឈើតាំងលម្អតាមផ្ទះបានរីកដុះដាលកាន់តែច្រើនឡើងៗនៅតាមគ្រប់បណ្ដោយផ្លូវជាតិ ដូចជាផ្លូវជាតិលេខ1 ស្ថិតក្នុងខណ្ឌច្បារអំពៅ និងស្រុកកៀនស្វាយ។ ផ្លូវជាតិលេខ2 នៅជិតគល់ស្ពានព្រែកហូរ។ ផ្លូវជាតិលេខ3 នៅជិតស្ពាន 7មករា។ ផ្លូវជាតិលេខ4 នៅម្តុំវត្តទួលសាលា។ ផ្លូវជាតិលេខ5 នៅជិតផ្សារព្រែក-ព្នៅ និងផ្លូវជាតិលេខ6 នៅជិតផ្សារព្រែកអញ្ចាញ ជាដើម។ល៕
