ធនាគារ​កា​ណា​ឌី​យ៉ា​ផ្តល់​ហិរញ្ញប្បទាន​ ​20លាន​ដុល្លារ​ ​សម្រាប់​គម្រោង​ ​«​កម្ចី​ហិរញ្ញប្បទាន​សហគ្រិន​ស្ត្រីវៃឆ្លាត​»​ ​

ធនាគារ​កា​ណា​ឌី​យ៉ា​ ​បានសម្រេច​ផ្ដល់​កម្ចី​ក្នុងទឹក​ប្រាក់​ ​20លាន​ដុល្លារ​ដល់​សមាគម​សហគ្រិន​ស្រ្ដី​កម្ពុជា​ក្នុង​គម្រោង​ ​«​កម្ចី​ហិរញ្ញប្បទាន​សហគ្រិនស្ត្រីវៃឆ្លាត​»​ ​ដោយ​តំណាង​ភាគី​ទាំង2​ ​បាន​ចុះ​អនុស្សរណៈ​យោគយល់​គ្នា​លើ​គម្រោង​ហិរញ្ញប្បទាន​នេះ​ ​កាលពី​រសៀល​ថ្ងៃទី16​ ​ខែកក្កដា​ ​ឆ្នាំ2019​ ​នៅ​សូ​រិយា​ ​សេន​ធើរ​ ​ភ័ន​ធ៍​។​

​ ​«​កម្ចី​ហិរញ្ញប្បទាន​សហគ្រិន​វៃឆ្លាត​»​ ​នេះ​ ​ជា​ការ​បោះជំហាន​ទៅមុខ​យ៉ាង​ល្អ​ក្នុង​ការ​ផ្ដល់​នូវ​អត្រា​ការប្រាក់​ទាប​សម្រាប់​កម្ចី​មុខ​ជំនួញ​របស់​សហគ្រិន​ស្ត្រី​ ​ដោយ​គិត​អត្រា​ការប្រាក់​ទាប​ត្រឹមតែ7.8​%​ ​ក្នុង​ឆ្នាំ​ ​ការប្រើ​កា​ត​ក្រេ​ឌីត​ក្នុង​កម្រិត​ ​5ពាន់​ដុល្លារ​ ​ការប្រើ​ប្រាស់​វី​សា​កាត​រហូតដល់​រយៈពេល36ខែ​ ​ការ​ផ្ដល់​ឱ្យ​ដោយ​មិន​គិតថ្លៃ​នូវ​សៀវភៅ​ធនាគារ​ប្រចាំខែ​ ​ការផ្ទេរ​ប្រាក់​ក្នុង​តំបន់​ដោយ​មិន​គិតថ្លៃ​ប្រចាំខែ​ ​ការ​គិត​កម្រៃ​សេវា​ផ្ញើ​ប្រាក់​ទៅក្រៅ​ប្រទេស​ទាប​ ​(​0.05​%​ក្នុង​ ​1ប្រតិបត្តិ​ការ​)​ ​ការ​មិន​គិតថ្លៃ​សេវា​លើ​ការ​បើកប្រាក់​បៀវត្សរ៍​បុគ្គលិក​ ​និង​ផ្សេង​ៗ​ជាច្រើន​ទៀត​។​

លោកជំទាវ​ ​អេង​ ​លី​គង់​ ​ប្រធាន​សមាគម​សហគ្រិនស្ត្រីកម្ពុជា​ ​បានឱ្យ​ដឹង​ថា​ ​ក្នុងនាម​សហគ្រិនស្ត្រី ​យើង​ពិតជា​មាន​ក្ដី​រីករាយ​យ៉ាង​ខ្លាំង​ ​ចំពោះ​ការ​ផ្ដល់​ការ​គាំទ្រ​ពី​ធនាគារ​កា​ណា​ឌី​យ៉ា​ ​ក្នុង​ការ​ផ្ដល់​ហិរញ្ញប្បទាន​លើ​គម្រោង​ ​«​កម្ចី​ហិរញ្ញប្បទាន​ស្ត្រី​វៃឆ្លាត​ ​ក្នុង​កញ្ចប់​ ​20លាន​ដុល្លារ​»​ ​នេះ​។​ ​

​លោកជំទាវ​ ​បាន​បញ្ជាក់​ថា​ ​«​ខ្ញុំ​សូម​អរគុណ​ដល់​ធនាគារ​កា​ណា​ឌី​យ៉ា​ ​ក.អ​ ​ដែល​បាន​រៀបចំ​គម្រោង​ដ៏​ល្អ​នេះ​ឱ្យ​លេចចេញ​ជារូបរាង​ឡើង​។​ ​ការ​ផ្ដល់​ប្រាក់កម្ចី​ក្នុង​អត្រា​ការប្រាក់​មាន​ត្រឹម​ ​7.8​%​ក្នុង​ ​1ឆ្នាំ​ដោយ​អត្រា​ការប្រាក់​ទាប​បែបនេះ​ ​កន្លងមក​យើង​ទទួល​បាន​ក្នុងករណី​ដែល​មាន​អាជីវកម្ម​ធំ​ ​ឬ​ជា​សាជីវកម្ម​»​ធំៗ​តែប៉ុណ្ណោះ​ ​ហើយ​ការស្វែងរក​កម្ចី​ក្នុង​អត្រា​ការប្រាក់​ទាប​មានការ​លំបាក​ដល់​ស្ត្រី ​ដែល​ទាំងនេះ​ជា​បញ្ហា​ធ្វើ​ឱ្យ​ស្ត្រីពិបាក​ក្នុង​ការ​រក្សា​ ​និង​ពង្រីក​អាជីវកម្ម​របស់​ខ្លួន​។​

លោកជំទាវ​ ​អ៊ឹ​ង​ ​កន្ថា​ផា​វី​ ​រដ្ឋមន្ត្រី​ក្រសួងកិច្ចការនារី​បាន​សម្ដែង​ការ​អបអរសាទរ​ចំពោះ​សមាគម​សហគ្រិនស្ត្រីកម្ពុជា​សម្រាប់​ការ​ខិតខំ​ប្រឹងប្រែង​ក្នុង​ការ​អភិវឌ្ឍ​សហគ្រិនភាព​ស្ត្រី ​និង​ការចូលរួម​ដើម្បី​កំណើន​សេដ្ឋកិច្ច​របស់​ប្រទេសជាតិ​ ​ប្រក​បដោយ​ចីរភាព​ ​និង​បាន​ថ្លែងអំណរគុណ​ចំពោះ​ធនាគារ​កា​ណា​ឌី​យ៉ា​ ​ក្នុង​ការចូលរួម​ចំណែក​លើកកម្ពស់​ ​ពង្រឹង​ភាព​អង់អាច​ ​ដល់​សេដ្ឋកិច្ច​របស់ស្ត្រី ​ពិសេស​ការ​ផ្តល់​ហិរញ្ញប្បទាន​ក្នុង​កញ្ចប់​ ​20លាន​ដុល្លារ​លើ​គម្រោង​ ​«​កម្ចី​ហិរញ្ញប្បទាន​ស្ត្រី​វៃឆ្លាត​ ​»​ដែល​ជា​ការ​យកចិត្ត​ទុកដាក់​ ​ផ្ដោត​លើ​កិច្ចសហការ​ក្នុង​ការទទួលខុសត្រូវ​ផ្នែក​សង្គម​។​
​ ​
អ្នកឧកញ៉ា​ ​ពុង​ ​ឃា​វ​សែ​ ​ប្រធាន​ក្រុមប្រឹក្សា​ភិបាល​ធនាគារ​កា​ណា​ឌី​យ៉ា​ ​បានឱ្យ​ដឹង​ថា​ ​ធនាគារ​កា​ណា​ឌី​យ៉ា​មាន​ក្ដី​រីករាយ​យ៉ាង​ខ្លាំង​ ​ដោយ​បាន​ផ្ដល់​ការឧបត្ថម្ភ​គាំទ្រ​ដល់​សមាគម​ស្ត្រីសហគ្រិន​កម្ពុជា​ ​ជា​រៀងរាល់​ឆ្នាំ​ ​ចាប់តាំងពី​ឆ្នាំ2013​ ​រហូតមកដល់​ពេល​បច្ចុប្បន្ន​នេះ​ ​និង​ជា​សក្ខីភាព​ស្ថាប័ន​ទាំង2​ ​បាន​ធ្វើ​សហប្រតិបត្តិ​ការ​ឈាន​ដល់​ការ​ចុះ​ ​MoU​ ​លើ​គម្រោង​កញ្ចប់​ហិរញ្ញប្បទាន​ ​20លាន​ដុល្លារ​។​

​​អ្នកឧកញ៉ា​បន្ដ​ថា​ ​ដោយ​សម្លឹងឃើញ​ពី​ការចូលរួម​សំ​ខាន់​ៗ​របស់​សហគ្រាស​ធុន​តូច​ ​និង​មធ្យម​ ​(​SME​)​ ​នៅក្នុង​ដំណើរការ​អភិវឌ្ឍន៍​សេដ្ឋកិច្ច​ជាតិ​ ​ធនាគារ​កា​ណា​ឌី​យ៉ា​បាន​ចាត់​យក​ផ្នែក​ ​SME​ ​ជាផ្នែក​យុទ្ធ​សា​ស្រ្ត​គន្លឹះ​ ​និង​បាន​យកចិត្ត​ទុកដាក់​ខ្ពស់​ក្នុង​ការ​អភិវឌ្ឍ​ផលិតផល​ ​និង​សេវាកម្ម​របស់​ខ្លួន​តាម​តម្រូវការ​ផ្នែក​ហិរញ្ញវត្ថុ​ ​ដល់​សហគ្រាស​ធុន​តូច​ ​និង​មធ្យម​ ​ពិសេស​គឺ​ ​ទុន​ប្រើប្រាស់​ក្នុង​អាជីវកម្ម​ ​និង​ការពង្រីក​អាជីវកម្ម​របស់​ ​SME​៕​

Advertisement