កសិករ​បង្កើន​ការ​ដាំដំណាំ​បន្លែ​សរីរាង្គ​ បន្លែ​សុវត្ថិភាព​ ដើម្បី​តម្រូវការ​ទីផ្សារ​ក្នុង​ស្រុក​

ប្រជាពលរដ្ឋ​កម្ពុជា​បច្ចុប្បន្ន​ភាគច្រើន​ជ្រើសរើស​បន្លែ​សរីរាង្គ​ច្រើនជាង​បន្លែ​នាំចូល​ ដូច្នេះហើយ​ទើប​អាជ្ញាធរ​មូលដ្ឋាន​បាន​ជំរុញ​ឱ្យ​កសិករ​ពង្រីក​ផ្ទៃដី​បន្ថែម​ និង​បង្កើន​ការ​ដាំដុះ​តាម​បច្ចេកទេស​ ដើម្បី​ទទួល​បាន​ទិន្នផល​ខ្ពស់​។ បន្លែ​ទាំងនេះ​ ជា​បន្លែ​សរីរាង្គ​ និង​បន្លែ​សុវត្ថិភាព​ដែល​បងប្អូន​ប្រជាកសិករ​នៅ​មូលដ្ឋាន​ចូលចិត្ត​ដាំ​ សម្រាប់​ផ្គត់ផ្គង់​ជា​លក្ខណៈ​គ្រួសារ​ និង​បេះ​យក​មក​លក់​លើ​ទីផ្សារ​តាម​បណ្តា​ខេត្ត​ក្នុង​ព្រះរាជាណាចក្រ​កម្ពុជា​ ដើម្បី​ដោះស្រាយ​ជីវភាព​ប្រចាំថ្ងៃ​ផង​ និង​ទប់ស្កាត់​ការនាំចូល​បន្លែ​មិនល្អ​ពី​ប្រទេសជិតខាង​ផង​ដែរ​។

តប​តាម​តម្រូវការ​លើ​ទីផ្សារ​ក្នុង​មូលដ្ឋាន​ កសិករ​នៅ​ឃុំ​សាមឃួយ​ ស្រុក​សេសាន​ ខេត្ត​ស្ទឹងត្រែង​ ជិត​700គ្រួសារ​បាន​នាំគ្នា​ដាំ​បន្លែ​សរីរាង្គ​ដោយ​ផ្ទាល់ដៃ​ដើម្បី​ទ្រទ្រង់នូវ​សុខភាព​ដល់​អ្នកទទួល​ទាន​ និង​ទប់ស្កាត់​ការ​ហូរ​ចូល​បន្លែ​ពីក្រៅ​ប្រទេស​ផង​ដែរ​។ បន្លែ​ដែល​ប្រជាកសិករ​ដាំដុះ​ទាំងនោះ​ រួមមាន​ដូចជា​សាលាដ​ ត្រសក់​ ននោង​ ស្ពៃ​ ត្រប់​ ប៉េង​បោះ​ ត្រកួន​ ត្រឡាច​ និង​ខាត់ណា​ជាដើម​។

មេឃុំ​សាមឃួយ​ លោក​ ខាវ​ ខាំ​អន​ បានដឹង​ថា​៖“កសិ​កនៅក្នុង​ឃុំ​ទាំងមូល​ ភាគច្រើន​បាន​ចូលរួម​ក្នុង​វគ្គ​បណ្តុះបណ្តាល​លើ​បច្ចេកទេស​ដាំដុះ​ដំណាំ​សុវត្ថិភាព​ និង​បន្លែ​សរីរាង្គ​ ព្រោះ​ពួកគេ​ចាប់ផ្តើម​មាន​ការ​កត់សម្គាល់​នៅ​លើ​ទីផ្សារ​បច្ចុប្បន្ន​ដែល​អាច​ឱ្យ​ពលរដ្ឋ​បង្កើន​ចំណូល​ ផ្គត់ផ្គង់​ទីផ្សារ​ក្នុង​ស្រុក​ និង​ចូលរួម​ទប់ស្កាត់​ការនាំចូល​បន្លែ​ដែល​មាន​ជាតិគីមី​”។

ដោយឡែក​លោក​ អ៊ុ​ក សំណាង​ ប្រធានមន្ទីរ​កសិកម្ម​ រុក្ខាប្រមាញ់​ និង​នេសាទ​ ខេត្តព្រៃវែង​បាន​មានប្រសាសន៍​ឱ្យ​ដឹងពី​ចំនួន​ប្រជាកសិករ​បច្ចុប្បន្ន​ដែល​ប្រកបមុខរបរ​ដាំ​បន្លែ​សុវត្ថិភាព​នៅក្នុង​ ស្រុក​កញ្ច្រៀច​ ខេត្តព្រៃវែង​ បាន​កើនឡើង​ច្រើន​ ហើយ​ផ្ទៃដី​ដាំដុះ​ក៏បាន​កើនឡើង​រហូតដល់​ទៅ50​%ដែរ​ បើ​ប្រៀបធៀប​ទៅ​នឹង​ឆ្នាំមុន​ ដោយសារតែ​បន្លែ​ដែល​ពួកគាត់​ដាំ​បាន​មាន​តម្រូវការ​ទីផ្សារ​ល្អ​ ព្រមទាំង​មានការ​ជួយ​គាំទ្រ​ពី​មន្ទីរ​កសិកម្ម​ខេត្ត​ ទាំង​បច្ចេកទេស​ដាំដុះ​ និង​រក​ទីផ្សារ​បន្លែ​ឱ្យ​ផង​ដែរ​។

លោក​ បាន​បន្ត​ទៀត​ថា​ ប្រជាកសិករ​ដែល​ប្រកបមុខរបរ​ដាំ​បន្លែ​សុវត្ថិភាព​នេះ​មាន​ចំនួន​ 3ភូមិ​ គឺ​ភូមិ​អ្នកតា​ជ័យ​ ភូមិ​ត្រ​ពាំង​ប្រស្រែ​លិច​ និង​ភូមិ​ត្រពាំង​ប្រស្រែកើ​ត ក្នុង​ឃុំ​គោកគង់លិច​ ស្រុក​កញ្ច្រៀច​ ខេត្ត​ព្រៃវែង​ នៅ​លើ​ផ្ទៃដី​សរុប​ប្រមាណ​ជា​ 30ហិ​កតា​ ខណៈ​ឆ្នាំមុន​មានត្រឹមតែ​ 15ហិ​កតា​ប៉ុណ្ណោះ​។ បន្លែ​សុវត្ថិភាព​ដែល​ពួកគាត់​ដាំ​មាន​ដូចជា​ ស្ពៃចង្កឹះ​ ស្ពៃ​តឿ​ខាត់ណា​ ស្ពៃក្រញាញ់​ ស្ពៃស​ ឆៃថាវ​ ម្រះ​ ត្រសក់​-ល- ដែល​បន្លែ​ទាំងនេះ​ ពុំ​ប្រើប្រាស់​ថ្នាំ​គីមី​ដែល​ធ្វើ​ឱ្យ​ប៉ះពាល់​ដល់​សុខភាព​អ្នក​បរិភោគ​នោះ​ទេ​។

ឯប្រជាកសិករ​នៅ​កោះ​ពាមរាំង​វិញ​ បាន​បញ្ជាក់​ថា​ ក្រៅពី​មន្ទីរ​កសិកម្ម​ខេត្ត​ចុះ​មក​បង្រៀន​បច្ចេកទេស​កសិកម្ម​ និង​ផ្តល់​ពាងទឹក​ហើយ​ ក៏​មាន​អង្គការ​ក្រៅ​រដ្ឋាភិបាល​មួយចំនួន​ បាន​ចុះ​មក​ជួយ​ជា​សម្ភារ​ និង​បច្ចេកទេស​ផង​ដែរ​ ជាហេតុ​ធ្វើ​ឱ្យ​ពួកគាត់​មាន​លទ្ធភាព​អាច​ពង្រីក​ផ្ទៃដី​ដាំដុះ​ និង​ផលិត​បន្លែ​នាំចេញទៅ​លក់​លើ​ទីផ្សារ​បាន​ក្នុង​ 1ថ្ងៃ​ប្រមាណ​ពី​ 1តោន​ ទៅ​ 2តោន​ឯណោះ​ ហើយ​ឆ្នាំ​ក្រោយ​ៗទៀត​ ពួកគាត់​រំពឹង​ថា​ នឹងអាច​ផលិត​បាន​លើស​នេះ​ទ្វេដង​ទៀតផង​។ កោះ​ពាមរាំង​ មាន​ពលរដ្ឋ​ជាង​ 300គ្រួសារ​មានផ្ទៃ​ដី​ដាំដុះ​រាប់ពាន់​ហិ​កតា​។

ប្រជាកសិករ​ទាំងនេះ​បាន​បញ្ជាក់​ថា​ បន្លែ​ដែល​ពួកគាត់​ដាំ​បាន​ គឺ​មិន​ភ័យ​បារម្ភ​រឿង​ទីផ្សារ​នោះ​ទេ​ មាន​ប៉ុន្មាន​ក៏​លក់​អស់​ដែរ​ ហើយ​មាន​គេ​មក​ប្រមូល​ទិញ​ដល់​រង​បន្លែ​តែម្តង​ ដោយ​ពួកគាត់​គ្រាន់តែ​កាត់​រួច​ច្រក​ថង់​ទុក​ តាម​ការ​កុម្ម៉ង់​ទិញ​របស់​ម៉ូយ​ជា​ការ​-ស្រេច​ ចំណែក​តម្លៃ​ក៏​ល្អ​គួរសម​អាច​ទទួលយក​បាន​ផង​ដែរ​។

មុខរបរ​ដាំ​បន្លែ​សុវត្ថិភាព​នេះ​ បាន​ជួយ​ឱ្យ​ជីវភាព​គ្រួសារ​ពួកគាត់​ បាន​ធូរធារ​ច្រើនណាស់​ គឹ​ដោះស្រាយ​រួច​ទាំង​ជីវភាព​ប្រចាំថ្ងៃ​ ផ្គត់ផ្គង់​ការសិក្សា​របស់​កូន​ៗនិង​សល់​ប្រាក់​សម្រាប់​សន្សំ​នៅក្នុង​គ្រួសារ​ថែមទៀត​ផង​ និយាយរួម​ គឹ​ពួកគាត់​អាច​រស់​យ៉ាង​ស្រួល​ដោយ​មិន​ចាំបាច់​ធ្វើ​ចំណាកស្រុក​ ទៅ​រក​ការងារ​ធ្វើ​នៅកន្លែង​ឆ្ងាយ​ដូចមុន​នោះ​ទេ​។

លោក​ឧកញ៉ា​ សុង​ សា​រ៉ន​ អគ្គនាយក​ក្រុមហ៊ុន​អេម​រុ​ រា​យស៍​ក៏បាន​ឱ្យ​ដឹង​ដែរ​ថា​ ការ​ធ្វើ​កសិកម្ម​មិន​ប្រើប្រាស់​ជាតិគីមី​ អេម​រុ​ រ៉ា​យស៍​គាំទ្រ​ ហើយ​កម្ពុជា​ត្រូវ​ដើរ​លើ​ទិសដៅ​នេះ​។ ជាក់ស្តែង​ស្ថាប័ន​របស់​លោក​បាន​ធ្វើ​លើ​កិច្ចការ​នេះ​អស់​រយៈពេល​ 4ឆ្នាំ​មក​ហើយ​ ដោយ​បាន​គាំំ​ទ្រ​កសិកម្ម​បែប​បៃតង​ ឬបែប​ចីរភាព​ តាមរយៈ​ការ​ធ្វើការ​ជាមួយ​សហគមន៍​កសិករ​ចំនួន60​ និង​មាន​កសិករ​កើនឡើង​ដល់​ 1ម៉ឺន​នាក់​មកដល់​ឆ្នាំ2019​ នេះ​។

លោក​ឧកញ៉ា​បាន​បញ្ជាក់​ថា​៖“សហគមន៍​ទាំង​នេះ​មាននៅ​ខេត្តព្រះវិហារ​ បាត់ដំបង​ កំពង់ឆ្នាំង​ កំពង់ស្ពឺ​ តាកែវ​ កំពង់ចាម​ និង​ព្រៃវែង​ ដែល​មានផ្ទៃ​ដី​ធ្វើ​កសិកម្ម​តាម​បែប​កិច្ចសន្យា​នេះ​ជាង​ 2ម៉ឺន​ហិ​កតា​ដែល​ប្រមូល​ផល​បាន​ប្រមាណ​ 10ម៉ឺន​តោន​ក្នុង​ 1ឆ្នាំ​។ ក្នុង​ទិសដៅ​នេះ​ បើសិន​យើង​ធ្វើ​កសិកម្ម​បែប​បៃតង​នេះ​បាន​ យើង​នឹង​ក្លាយជា​ប្រទេស​មួយ​ដែល​ផ្គត់ផ្គង់​នូវ​ចំណីអាហារ​មាន​សុវត្ថិភាព​ហើយ​ប្រទេស​ណា​ដែលគេ​ចង់​ហូប​អាហារ​បែបនេះ​ គេ​នឹង​មក​ទិញ​របស់​យើង​”។

លោក​ឧកញ៉ា​ សុង​ សា​រ៉ន​ លើកឡើង​ថា​ “ដើម្បី​ធ្វើ​កសិកម្ម​បែប​បៃតង​នេះ​ឱ្យ​បាន​ដល់​គោលដៅ​ វា​ទាមទារ​ឱ្យ​ប្រជាពលរដ្ឋ​ និង​រដ្ឋ​ត្រូវ​ដើរ​ឱ្យ​ស្របគ្នា​គ្រប់ជ្រុងជ្រោយ​ ទើប​ទៅដល់​ទិសដៅ​។ បើ​មិន​ធ្វើ​បែបនេះ​ទេ​ យើង​ដើរ​មិន​ងាយ​ទៅដល់​គោលដៅ​ឡើយ​។ កិច្ច​សា​ហការ​គ្នា​នេះ​ អាច​ឱ្យ​យើង​មើល​ឃើញ​លទ្ធផល​ក្នុងរយៈពេល​ខ្លី​បាន​ថា​ អាច​ដើរទៅ​មុខ​រួច​។ ការជំរុញ​ ការ​លើកទឹកចិត្ត​ធ្វើ​កសិកម្ម​តាម​បែប​ធម្មជាតិ​នេះ​ វា​ជា​រឿង​មួយ​ដ៏​ល្អ​ ប៉ុន្តែ​វា​នៅ​មានកម្រិត​នៅឡើយ​”។

ឯកឧត្តម​ ប៉ាន​ សូរ​ស័ក្តិ​ រដ្ឋមន្ត្រី​ក្រសួង​ពាណិជ្ជកម្ម​ បាន​ដាក់បញ្ចូល​ផលិតផល​បន្លែ​សរីរាង្គ​ ជាផ្នែក​មួយ​នៃ​គម្រោង​ជំរុញ​ទីផ្សារ​សម្រាប់​កសិកម្ម​ខ្នាត​តូច​(AIMS​)គឺ​ដើម្បី​ថែរក្សា​ស្នាមញញឹម​ និង​ បង្កើន​ប្រាក់ចំណូល​ជូន​ប្រជាកសិករ​នៅ​តាម​សហគមន៍​ជនបទ​ សំដៅ​កាត់បន្ថយ​ភាព​ក្រីក្រ​ ស្របតាម​យុទ្ធសាស្ត្រ​ចតុកោណ​ដំណាក់កាល​ទី4​ និង​ផែនការ​យុទ្ធសាស្ត្រ​អភិវឌ្ឍន៍​ជាតិ​ឆ្នាំ2019​-2023​។

ឯកឧត្តម​រដ្ឋមន្ត្រី​ បានឱ្យ​ដឹង​ក្នុង​ឱកាស​ដឹកនាំ​មន្ត្រី​ចុះ​ពិនិត្យ​ផលិតផល​បន្លែ​សរីរាង្គ​ ដែល​ដាំដុះ​ដោយ​ប្រជាកសិករ​មក​ពី​ស្រុក​ចំនួន5​ គឺ​ស្រុក​ពួក​ បាគង​ សូត្រ​និគម​ បន្ទាយស្រី​ និង​អង្គរជុំ​ នៅក្នុង​បរិវេណ​ពិព័រណ៍​ពាណិជ្ជកម្ម​មិត្តភាព​កម្ពុជា​-ឥណ្ឌូ​នេ​ស៊ី​ ឆ្នាំ2019​។

នៅក្នុង​ឱកាស​នោះ​ ឯកឧត្តម​ ប៉ាន​ សូរ​ស័ក្តិ​ បាន​ជម្រាប​ជូន​ប្រជាកសិករ​ថា​“ការផលិត​បន្លែ​សរីរាង្គ​នេះ​ ក្រៅពី​ផ្តល់​ប្រាក់ចំណូល​ជូន​បងប្អូន​ហើយ​ ក៏​ជួយ​ធ្វើ​ឱ្យ​មាន​សុខភាព​ល្អ​ផង​ដែរ​ ព្រោះ​យើង​ដាំដុះ​ដោយខ្លួនឯង​ ចំណែក​ឯប្រជាពលរដ្ឋ​ដែល​ទិញ​យក​ទៅ​បរិភោគ​ ក៏​ទទួល​បាន​សុខភាព​ល្អ​ដូចគ្នា​។យើង​(ក្រសួង​ពាណិជ្ជកម្ម​) ចង់​ឃើញ​បងប្អូន​ទាំងអស់​ ប្រែក្លាយ​ពី​កសិករ​ឆ្នើម​ទៅជា​ពាណិជ្ជករ​ជោគជ័យ​ រកស៊ី​កាន់តែ​ចំណេញ​ មាន​ប្រាក់​កាន់តែ​ច្រើន​! នោះ​ហើយ​គឺជា​គោលបំណង​ធំ​ នៃ​គម្រោង​ អែម​ស៍​ (AIMS​) របស់​យើង​”៕

Advertisement