​បើក​សម្ពោធ​ជា​ផ្លូវការ​ប្រព័ន្ធ​គ្រប់គ្រង​ចរាចរណ៍​ទំនើប​ក្រោម​ជំនួយ​ជប៉ុន​ ​

August 15, 2019​ ម៉ោង 11:41 am

​រដ្ឋបាល​រាជធានី​ភ្នំពេញ​បាន​ទទួល​ជំនួយឥតសំណង​ពី​ប្រទេស​ជប៉ុន​ ​ដែល​មាន​ទឹកប្រាក់​សរុប​ចំនួន​ ​1,591,058,000យ៉េន​ជប៉ុន​ ​ឬ​ស្មើនឹង​ ​14,500,000ដុល្លា​អាមេរិក​ ​សម្រាប់​អនុវត្ត​គម្រោង​អភិវឌ្ឍន៍​ប្រព័ន្ធ​គ្រប់គ្រង​ចរាចរណ៍​ ​សំដៅ​ធ្វើ​ឱ្យ​ប្រសើរ​ឡើង​នូវ​ស្ថានភាព​ចរាចរណ៍​ ​និង​កាត់បន្ថយ​ការ​កកស្ទះ​ក្នុង​រាជធានី​ភ្នំពេញ​ ​ជាពិសេស​ក្នុង​ភូមិសាស្ត្រ​ខណ្ឌ​ទាំង5​ ​នៅ​កណ្តាល​រាជធានី​ភ្នំពេញ​។​

​គម្រោង​អភិវឌ្ឍន៍​ប្រព័ន្ធ​គ្រប់គ្រង​ចរាចរណ៍​ទំនើប​ក្នុង​រាជធានី​ភ្នំពេញ​នេះ​ ​បាន​សម្ពោធ​ដាក់​ឱ្យ​ប្រើប្រាស់​ដើម្បី​បង្ក​លក្ខណៈ​ងាយស្រួល​ដល់​ប្រជាពលរដ្ឋ​បាន​ធ្វើដំណើរ​ប្រកបដោយ​សុវត្ថិភាព​ ​និង​គ្មាន​ការ​រំខាន​ដោយ​បញ្ហា​កកស្ទះ​ចរាចរណ៍​។​ ​
​ឯកឧត្តម​ ​ឃួង​ ​ស្រេង​ ​អភិបាល​រាជធានី​ភ្នំពេញ​ ​បាន​មានប្រសាសន៍​ថា​ ​គម្រោង​អភិវឌ្ឍន៍​ប្រព័ន្ធ​គ្រប់គ្រង​ចរាចរណ៍​ក្នុង​រាជធានី​ភ្នំពេញ​ដែល​កំពុង​ដាក់​ឱ្យ​ដំណើរការ​នា​ពេល​កន្លងមក​នេះ​ ​បាន​ជួយ​ដោះស្រាយ​បញ្ហា​កកស្ទះ​ចរាចរណ៍​ក្នុង​រាជធានី​ភ្នំពេញ​បាន​មួយចំនួន​ធំ​។​ ​ដោយសារតែ​ប្រព័ន្ធ​បច្ចេកវិទ្យា​ទំនើប​នេះ​ ​អាច​បញ្ជា​ចរាចរណ៍​ពី​ចម្ងាយ​ ​មិន​ឱ្យ​កកស្ទះ​យូរ​ ​ហើយ​អាច​បញ្ជា​ទិសចរាចរណ៍​ទៅ​កន្លែង​ដែល​ពុំសូវ​កកស្ទះ​បាន​។​

​ឯកឧត្តម​ ​បាន​មានប្រសាសន៍​បញ្ជាក់​ថា​ ​គម្រោង​នេះ​ ​គឺ​មាន​ភាព​វៃឆ្លាត​តាមរយៈ​ការដំឡើង​ការ​បំពាក់​ស្តុ​បថ្មី​នៅ​ចំណុចប្រសព្វ​ចំនួន​ ​115ទី​តំាង​ ​ការ​បំពាក់​កាមេរ៉ា​ចាប់​យក​រូបភាព​ចរាចរណ៍​ហើយ​វិភាគ​ទិន្នន័យ​ ​និង​ការ​កសាង​មជ្ឈមណ្ឌល​គ្រប់គ្រង​ចរាចរណ៍​ ​ដើម្បី​ងាយស្រួល​ក្នុង​ការ​បញ្ជា​ចរាចរណ៍​ពី​ចម្ងាយ​។​ ​ការបង្កើត​គម្រោង​គ្រប់គ្រង​ប្រព័ន្ធ​ចរាចរណ៍​នេះ​ឡើង​ ​គឺជា​វិធានការ​ដោះស្រាយ​ចំពោះមុខ​ ​ខណៈ​ដែល​ក្នុង​រាជធានី​ភ្នំពេញ​មាន​មធ្យោបាយ​ធ្វើដំណើរ​កើន​ឡើង​ខ្លំា​ង​ ​រហូតដល់​ជាង​ ​2លាន​គ្រឿង​ដែល​បង្ក​ការ​កកស្ទះ​ជា​រៀងរាល់ថ្ងៃ​។​

​ ​តាម​ស្ថិតិ​ ​បច្ចុប្បន្ន​មាន​រថយន្ត​គ្រប់​ប្រភេទ​ចំនួន​ ​2.15លាន​គ្រឿង​ ​ក្នុង​នោះ​រថយន្ត​មាន​ចំនួន50ម៉ឺន​គ្រឿង​ ​ទោចក្រយាន​យន្ត​មាន​ចំនួន​ ​1.6លាន​គ្រឿង​។​ ​ជាមួយ​និង​កំណើន​នេះ​ ​រដ្ឋបាល​រាជធានី​ ​ក្រោម​ការ​ជួយ​ឧប​ត្ថ​ម​គាំទ្រ​ពីទី​ភ្នាក់ងារ​សហប្រតិបត្តិ​ការអន្តរជាតិ​ជប៉ុន​ ​JICA​ ​បាន​ធ្វើ​ឱ្យ​ដំណើរការ​ជា​ផ្លូវការ​លើ​ការសាងសង់​គម្រោង​អភិវឌ្ឍន៍​ប្រព័ន្ធ​គ្រប់គ្រង​ចរាចរណ៍​ក្នុង​រាជធានី​ភ្នំពេញ​ដែល​បាន​ផ្តើម​ដំណើរការ​អនុវត្ត​កាលពី​ខែមីនា​ ​ឆ្នាំ2016​ ​និង​បាន​បញ្ចប់​រួចរាល់​ជាស្ថាពរ​នៅក្នុង​ខែធ្នូ​ ​ឆ្នាំ2018​ ​ដែល​មាន​រយៈពេល​សរុប​ ​35ខែ​។​

​លោក​ ​សាំ​ ​ពិសិដ្ឋ​ ​ប្រធានមន្ទីរ​សាធារណការ​ ​និង​ដឹកជញ្ជូន​រាជធានី​ភ្នំពេញ​បាន​បង្ហាញ​ឱ្យ​ដឹងផង​ដែរ​ថា​ ​គម្រោង​អភិវឌ្ឍន៍​ប្រព័ន្ធ​គ្រប់គ្រង​ចរាចរណ៍​ដែល​សម្ពោធ​ដាក់​ឱ្យ​ដំណើរការ​នេះ​ ​រួមមាន​៖​ ​1​-​ការងារ​ដំឡើង​ ​និង​បំពាក់​ភ្លើងស្តុប​ថ្មី​នៅ​តាម​ចំណុចប្រសព្វ​សរុប​ចំនួន​ ​115ទីតាំង​។​ ​2​-​ការងារ​បំពាក់​កាមេរ៉ា​ចាប់​រូបភាព​ ​និង​វិភាគ​ទិន្នន័យ​យានយន្ត​ឆ្លងកាត់​ចំនួន​ ​194គ្រឿង​។​ ​3​-​ការងារ​បំពាក់​កាមេរ៉ា​សុវត្ថិភាព​ ​CCTV​ ​ចំនួន​ ​26គ្រឿង​ ​សម្រាប់​ត្រត​ពិនិត្យ​តាមដាន​ស្ថានភាព​ចរាចរណ៍​នៅ​តាម​បណ្តា​ចំណុច​ផ្លូវ​ប្រសព្វ​សំ​ខាន់​ៗ​។​ ​4​-​ការងារ​សាងសង់​មជ្ឈមណ្ឌល​គ្រប់គ្រង​ប្រព័ន្ធ​ចរាចរណ៍​។​ ​5​-​ផ្តល់​នូវ​វគ្គ​បណ្តុះបណ្តាល​សំ​ខាន់​ៗ​ដល់​មន្ត្រី​បច្ចេកទេស​របស់​មន្ទីរ​សាធារណការ​ ​និង​ដឹកជញ្ជូន​រាជធានី​ភ្នំពេញ​ ​ក៏​ដូច​មន្ត្រី​បច្ចេកទេស​នៃ​រដ្ឋបាល​រាជធានី​ ​ដើម្បី​ផ្ទេរ​ចំណេះដឹង​ ​និង​លើកកម្ពស់​សមត្ថភាព​គ្រប់គ្រង​ ​និង​ប្រតិបត្តិ​ការ​ប្រព័ន្ធ​បញ្ជា​ភ្លើង​សញ្ញា​ចរាចរណ៍​ផង​ដែរ​។​

​លោក​ ​HORINOUCHI​ ​Hidehisa​ ​ឯកអគ្គ​រាជទូត​ប្រទេស​ជប៉ុន​ប្រចាំ​ព្រះរាជាណាចក្រ​កម្ពុជា​បាន​មានប្រសាសន៍​ថា​ ​ប្រព័ន្ធ​គ្រប់គ្រង​ចរាចរណ៍​បែប​ទំនើប​កំពុង​ដើរតួ​នាទី​យ៉ាង​សំខាន់​ក្នុង​ការ​ដោះស្រាយ​បញ្ហា​កកស្ទះ​ចរាចរណ៍​នៅក្នុង​រាជធានី​ភ្នំពេញ​យ៉ាង​មានប្រសិទ្ធភាព​។​

​គម្រោង​ដែល​រដ្ឋាភិបាល​ជប៉ុន​ផ្តល់​ដោយ​ឥត​សំណង​មក​កម្ពុជា​នេះ​ ​បាន​ដាក់​ឱ្យ​ដំណើរការ​ជា​បណ្តោះអាសន្ន​រួចមក​ហើយ​ ​ឃើញថា​ ​គុណភាព​ ​និង​ប្រសិទ្ធភាព​នៃ​សមិទ្ធផល​គម្រោង​នេះ​ ​ទទួល​បាន​លទ្ធផល​ល្អ​ប្រសើរ​គួរ​ជា​ទី​មោទ​នៈ​ ​ដោយ​បាន​ចូលរួម​ចំណែក​លើកកម្ពស់​ប្រសិទ្ធភាព​ ​ក្នុង​ការគ្រប់គ្រង​ប្រព័ន្ធ​ចរាចរណ៍​ក្នុង​រាជធានី​ភ្នំពេញ​បាន​យ៉ាង​ល្អ​ប្រសើរ​៕