ប្រមាណ7 ខែនៃឆ្នាំ2019កន្លងមកនេះការរីកលូតលាស់ និងវត្តមានសំណង់ថ្មីៗ មិនថមថយនោះទេនៅទូទាំងប្រទេស ជាពិសេសនៅរាជធានីភ្នំពេញ ក្រុងព្រះសីហនុ ប៉ោយប៉ែត និងខេត្តសក្តានុពលមួយចំនួនទៀត ដ្បិតតែការលក់ហាក់ថមថយ ជាងកាលពីឆ្នាំកន្លងទៅបន្តិចមែន។ ការថមថយនៃវិស័យលំនៅឋាននាពេលបច្ចុប្បន្ននេះ មិនមែនបណ្តាលមកពីការទទួលរងនូវឥទ្ធិពលវិបត្តិសេដ្ឋកិច្ចរបស់ប្រទេសចិន ឬប្រទេសណាមួយនោះទេ ប៉ុន្តែគឺបណ្តាលមកពីសកម្មភាពអភិវឌ្ឍន៍ផ្ទាល់នៅក្នុងប្រទេស។ នេះបើយោងតាមការលើកឡើងរបស់លោកអគ្គលេខាធិការសមាគមវាយតម្លៃ និងភ្នាក់ងារអចលនវត្ថុកម្ពុជា។
លោក សួស ចិន្តា អគ្គលេខាធិការសមាគមវាយតម្លៃ និងភ្នាក់ងារអចលនវត្ថុកម្ពុជា CVEA បានប្រាប់ឡារ៉ែននាពេលថ្មីៗនេះថា ភាពប្រឈមនៃវិស័យអចលនទ្រព្យ វាមានវដ្តរបស់វា តែចំពោះលំនៅឋាន ដែលមិនសូវមានសម្ទុះនៃការលក់ គឺប្រភេទផ្ទះតម្លៃមធ្យម ដោយសារតែភាគច្រើនត្រូវបានអ្នកមានធនធានទិញទុកវិនិយោគបន្តដើម្បីទទួលបានប្រាក់ចំណេញ ដែលវាមិនមែនជាតម្រូវ-ការពិតប្រាកដនោះទេ។
ចំណែកទីផ្សារ នៅតែមានតម្រូវការ ពិសេសលំនៅឋាន Low Class ពិបាករកអ្នកវិនិយោគព្រោះធ្វើលក់ពុំទាន់តម្រូវការទេ។បានន័យថាតម្រូវការខ្ពស់ជាងការផ្គត់ផ្គង់ គឺប្រភេទលំនៅឋានមានតម្លៃត្រឹម3ម៉ឺនដុល្លារ ទោះបីរដ្ឋាភិបាលមានគោលនយោបាយក្នុងការលើកទឹកចិត្តក៏ដោយ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ក៏បានលើកឡើងថា រាល់ថ្ងៃនេះវិស័យសំណង់គឺទទួលបានការគាំទ្រ ហើយតាមរយៈការសិក្សា ប្រជាជនមួយចំនួនគឺគាត់ខ្វះលំនៅឋាន ជាពិសេសនៅក្នុងរាជធានីភ្នំពេញ ដូចនេះហើយ ទើបមានអ្នកអភិវឌ្ឍផ្ទះតម្លៃមធ្យមជាច្រើន បានសម្រុកសាងសង់នៅក្បែរក្រុង ដើម្បីជាតម្រូវការរបស់អតិថិជន។ ក៏ប៉ុន្តែទាក់ទងទៅនឹងតម្លៃនៃអចលនទ្រព្យវិញ វាគឺជាការប្រកួតប្រជែងគ្នា ដែលក្នុងនោះគម្រោងដែលមានរចនាប័ទ្មល្អគឺស្រួលលក់ជាង បើធៀបទៅនឹងគម្រោងដែលពុំសូវមានរចនាប័ទ្មល្អ។
យោងតាមរបាយការណ៍របស់ការិយាល័យឥណទានកម្ពុជា។ វិស័យអចលនទ្រព្យនៅកម្ពុជា នៅតែមានភាពវិជ្ជមាន ដោយទំហំកម្ចីទិញអចលនទ្រព្យ (Mortgage) គិតមកដល់ត្រីមាសទី2ឆ្នាំ2019នេះ មានទំហំទឹកប្រាក់ជិត 3,5ពាន់លានដុល្លារ កើនឡើងប្រមាណ30% បើធៀបនឹងរយៈពេលដូចគ្នាកាលពីមុន។
របាយការណ៍ដដែលបានឱ្យដឹងថា កម្ចីអចលនទ្រព្យក្នុងត្រីមាស2 ឆ្នាំនេះ មាន 47.79% នៃសមតុល្យឥណទានជាលក្ខណៈបុគ្គលសរុប ដែលមានទំហំទឹកប្រាក់ 7.16ប៊ីលានដុលា្លរអាមេរិកដោយកើនឡើង6.80% ធៀបនឹងត្រីមាសទី 1 ឆ្នាំ2019នេះ។ ការស្នើសុំឥណទានលក្ខណៈបុគ្គល បង្ហាញអំពីបំណងរបស់អ្នកប្រើប្រាស់ក្នុងការទទួលបានឥណទានក្នុងលក្ខណៈជាហិរញ្ញវត្ថុផ្ទាល់ខ្លួន ប័ណ្ណឥណទាន និងកម្ចីអចលនទ្រព្យ។
លោក អឿ សុធារ័ត្ន នាយកប្រតិបត្តិនៃការិយាល័យឥណទានកម្ពុជា មានប្រសាសន៍ថា៖“នៅក្នុងត្រីមាសទី2នេះ ចំនួននៃការស្នើសុំឥណទានលក្ខណៈបុគ្គលមានការធ្លាក់ចុះ។ ទោះបីយ៉ាងណា បើប្រៀបធៀបនឹងរយៈពេលដូចគ្នា ក្នុងឆ្នាំ2018 ចំនួននៃការស្នើសុំឥណទានលក្ខណៈបុគ្គលសរុបបានកើនឡើង9.03%ខណៈដែលទំហំទឹកប្រាក់នៃការស្នើសុំឥណទាន កើនឡើងជិតទ្វេដង”។
លោកបន្តថា៖“ចំនួនគណនីឥណទានលក្ខណៈបុគ្គល បានកើនឡើងជាលំដាប់ ចាប់តាំងពីឆ្នាំ2018 ក្នុងចន្លោះពី5% ទៅ7%ក្នុងត្រីមាសនីមួយ។ ខណៈ សមតុល្យឥណទានលក្ខណៈបុគ្គលសរុបកើនឡើង ចន្លោះពី6% ទៅ8%។ ជារួមអនុបាតនៃឥណទាន មិនដំណើរការលើសពី30ថ្ងៃ របស់ផលិតផលឥណទានទាំង3 នៅតែមានលក្ខណៈល្អប្រសើរ និងនៅតែបន្តស្ថិតនៅក្នុងកម្រិត ទាប1.19%”។
លោក អឿ សុធារ័ត្ន បានបង្ហាញសុទិដ្ឋិនិយមក្នុងរបាយការណ៍ថា ស្ថានភាពនេះ កើតមានដោយសារតែតម្រូវការផ្ទះនៅកម្ពុជាមានការកើនឡើងតាមរយៈកំណើននៃជីវភាពប្រជាជន បូករួមនឹងភាពងាយស្រួលក្នុងការខ្ចីប្រាក់ ឬបង់រំលស់ពីគ្រឹះស្ថានហិរញ្ញវត្ថុនានា។ ជាពិសេស កំណើននៃការទិញផ្ទះ ក៏កើនឡើងស្របពេលដែលការសាងសង់ផ្ទះសម្រាប់លក់ ជាលក្ខណៈបុរី ឬផ្ទះល្វែងមានច្រើនផងដែរ។
ដោយឡែកនៅក្នុងរបាយការណ៍របស់ក្រសួងដែនដី នគរូបនីយកម្ម និងសំណង់នៅក្នុងរយៈពេល7ខែ ឆ្នាំ2019 នេះបានបង្ហាញថា វិស័យសំណង់នៅកម្ពុជាមានគម្រោងសរុបចំនួន 525 គម្រោងដែលគិតជាទឹកប្រាក់មានទុនវិនិយោគចំនួន 11,73703, 873ដុល្លារ។របាយការណ៍បូកសរុបការងារប្រចាំខែកក្កដាឆ្នាំ2019 និងទិសដៅបន្តបានបង្ហាញថា បើធៀបនឹងរយៈពេលដូចគ្នាកាលពីខែកក្កដាឆ្នាំ2018 វិស័យសំណង់មានគម្រោងត្រឹមតែ 330 គម្រោងប៉ុណ្ណោះ ដែលមានតម្លៃប៉ាន់ស្មានទុនវិនិយោគសរុបប្រមាណជាង 843លានដុល្លារមានការកើនឡើងជាង 39%។គម្រោងសំណង់ដែលស្ថិតក្រោមសមត្ថកិច្ចក្រសួង មានចំនួនសរុបចំនួន 44 គម្រោង ដែលមានតម្លៃប៉ាន់ស្មានទុនវិនិយោគប្រមាណជាង1,044 លានដុល្លារ ខណៈកាលពីឆ្នាំ2018 មានចំនួនតែ 41គម្រោង ដែលមានទុនវិនិយោគប្រមាណជាង 806 លានដុល្លារ គឺមានការកើនឡើងជាង29%។
ចំណែកគម្រោងសំណង់ស្ថិតក្រោមសមត្ថកិច្ចរដ្ឋបាលរាជធានី ខេត្តវិញ មានចំនួនសរុបចំនួន 481 គម្រោង ដែលមានតម្លៃទុនវិនិយោគប្រមាណជាង 129 លានដុល្លារ ខណៈកាលពីឆ្នាំ2018មានចំនួន 289គម្រោង មានទុនវិនិយោគប្រមាណជាង 36ដុល្លារ គឺមានការកើនឡើងជាង 251%។
របាយការណ៍ដដែលបានបង្ហាញទៀតថា សម្រាប់វិស័យសំណង់អគារ សំណង់លំនៅឋាននៅទូទាំងប្រទេសគិតត្រឹមខែកក្កដានេះមានចំនួនសរុប438គម្រោង ដែលមានទុនវិយោគ ជាង 473ដុល្លារ ស្មើនិង 801ខ្នង។
ដោយឡែក គម្រោងអគាខ្ពស់ៗចាប់ពីកម្ពស់5ជាន់ឡើង នៅទូទាំងប្រទេសក្នុងខែកក្កដា ឆ្នាំ2019មាននចំនួន 69 អគារ ក្នុងនោះកម្ពស់ចាប់ពី 5ជាន់ ទៅដល់កម្ពស់9ជាន់មាន 34អគារ ពីកម្ពស់10ជាន់ទៅកម្ពស់19ជាន់មានចំនួន24អគារ ពីកម្ពស់ 30ជាន់ទៅ 39ជាន់មានចំនួន 7អគារពីកម្ពស់ 40ជាន់ឡើងទៅ មានចំនួន1អគារ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានថ្លែងថា៖“សេដ្ឋកិច្ចកម្ពុជានៅតែរក្សាបានកំណើនល្អប្រសើរហើយនយោបាយនៅតែមានស្ថិរភាព ហេតុនេះការវិនិយោគនៅតែបន្តកើនឡើង ជាក់ស្តែងយើងឃើញកម្រិតឥណទានក្នុងវិស័យនេះនៅតែបន្តកើនឡើង។
ទោះជាមានការធ្លាក់ចុះសេដ្ឋកិច្ចរបស់ចិនបន្តិចបន្តួចក្តី ប៉ុន្តែកម្ពុជាមិនរងផលប៉ះពាល់នោះទេ ព្រោះមានអ្នកវិនិយោគជាច្រើន បានចូលមកដូចជាអ្នកវិនិយោគកូរ៉េ អ្នកវិនិយោគជប៉ុនកំពុងតែចូលមកកាន់កម្ពុជា ដើម្បីវិនិយោគលើវិស័យនេះ”៕
