ការទិញ​-លក់​អចលនទ្រព្យ​ហាក់​រអាក់រអួល​តិចតួច​ តែ​ទុន​វិនិយោគ​លើ​វិស័យ​សំណង់​នៅ​បន្ត​កំណើន​

October 3, 2019​ ម៉ោង 4:40 pm

អ្នកជំនាញ​ផ្នែក​អចលនទ្រព្យ​មួយចំនួន​បាន​សម្ដែង​ការ​ព្រួយបារម្ភ​អំពី​ការប្រែប្រួល​នូវ​គោលនយោបាយ​មួយចំនួន​ដូចជា​ ការ​រឹត​បន្តឹង​ច្បាប់​សំណង់​ និង​ការ​បិទ​ល្បែង​អន​ឡាញ​ ជាមួយនឹង​ផល​ប៉ះពាល់​ដែល​ជា​ការសម្រេច​ចិត្ត​របស់​ប្រទេស​ចិន​ក្នុង​ការ​រឹតត្បិត​លំហូរ​ចេញ​មូលធន​ខ្នាត​ធំ​ដែល​កំពុង​មាននៅ​លើ​ទីផ្សារ​ប្រទេស​កម្ពុជា​ ត្រូវ​បាន​គេ​មើលឃើញ​ថា​ អាច​ក្លាយជា​ផល​ប៉ះពាល់​របស់​វិនិយោគិន​ចិន​នៅក្នុង​វិស័យ​អចលនទ្រព្យ​។

យោង​តាម​ប្រភព​ព័ត៌មាន​ក្នុង​ស្រុក​បានឱ្យ​ដឹង​ថា​ ដោយមាន​លំហូរ​វិនិយោគ​ផ្ទាល់​ពី​បរទេស​សរុប​ប្រហែល​ 40​%នៅក្នុង​ព្រះរាជាណាចក្រ​កម្ពុជា​បាន​មក​ពី​ប្រទេស​ចិន​ ដែល​ធ្វើ​ឱ្យ​កំណើន​វិស័យ​អចលនទ្រព្យ​ក្នុង​ស្រុក​ត្រូវ​បាន​ប៉ះពាល់​ដោយ​គោលនយោបាយ​ថ្មី​របស់​ប្រទេស​ចិន​។

កាលពី​ 2ឆ្នាំមុន​ ប្រទេស​ចិន​បាន​អនុវត្ត​គោលនយោបាយ​មួយចំនួន​ដែល​បាន​ដាក់កម្រិត​បន្ថែម​លើ​ការ​វិនិយោគ​នៅ​ក្រៅប្រទេស​។ គោលបំណង​ គឺ​ដើម្បី​ដោះស្រាយ​ការ​ព្រួយបារម្ភ​អំពី​លំហូរ​មូលធន​ទ្រង់ទ្រាយ​ធំ​ និង​កាត់បន្ថយ​ហានិភ័យ​ដែល​បាន​មើលឃើញ​ចំពោះ​លំហូរ​ដ៏​លឿន​នៃ​ប្រព័ន្ធ​ហិរញ្ញវត្ថុ​របស់​ប្រទេស​ចិន​លើ​ការ​វិនិយោគ​ក្រៅប្រទេស​។លោក​ គីម​ ហ៊ា​ង នាយក​ប្រតិ​បតិ្តប្រចាំ​តំបន់​នៃ​ក្រុមហ៊ុន​ Keller​ Williams​ Cambodia​ បាន​ថ្លែង​ថា​៖“តម្លៃ​ដីធ្លី​កំពុង​កើនឡើង​មួយ​ផ្នែក​ដោយសារ​លំហូរ​ចូល​នៃ​វិនិយោគិន​ចិន​ចូល​មក​ក្នុង​ប្រទេស​។

ការ​លក់​ខុន​ដូ​មានការ​ធ្លាក់ចុះ​ អាច​ជា​លទ្ធផល​នៃ​គោលនយោបាយ​វិនិយោគ​នៅ​ក្រៅប្រទេស​របស់​ប្រទេស​ចិន​ផង​ដែរ​”។ តែ​ទោះ​យ៉ាងណា​លោក​អះអាង​ថា​ ការ​រឹត​បន្តឹង​លំហូរ​ចេញ​មូលធន​របស់​ប្រទេស​ចិន​អាច​ជា​រឿង​ល្អ​ ព្រោះ​ពួកគេ​អាច​ដើរតួ​នាទី​ក្នុង​ស្ថិរភាព​ទីផ្សារ​អចលនទ្រព្យ​ក្នុង​ស្រុក​ ដោយធ្វើ​ឱ្យ​វា​មិន​ពឹងផ្អែក​លើ​វិនិយោគិន​ពី​ប្រទេស​មួយ​។

លោក​ ច្រឹក​ សុ​ខនីម​ ប្រធាន​សមាគម​អ្នក​វាយតម្លៃ​ និង​ភ្នាក់ងារ​អចលនវត្ថុ​កម្ពុជា​ (CVEA​) បាន​មាន​ប្រសាសន៍​ថា​៖“ខ្ញុំ​គិតថា​ យើង​ត្រូវ​បើក​ចិត្ត​ឱ្យ​ទូលាយ​បន្តិច​ យើង​ជួប​ឧបសគ្គ​នេះ​ មិនមែន​ជា​រឿង​ដុំកំភួន​ដែល​មិន​អាច​ដោះស្រាយ​បាន​នោះ​ឡើយ​ ផល​ប៉ះពាល់​មួយចំនួន​គ្រាន់តែ​រយៈពេល​ខ្លី​មួយ​ ហើយ​វិស័យ​អចលនទ្រព្យ​យើង​មិនមែន​មានតែ​រឿង​ពាក់ព័ន្ធ​ប៉ុណ្ណឹង​ទេ​ វា​មានការ​អភិវឌ្ឍ​ ការសាងសង់​អគារ​ខុន​ដូ​ និង​ការសាងសង់​លំនៅឋាន​ រោងចក្រ​ជាច្រើន​ទៀត​។ មិនមែន​ពឹងផ្អែក​តែ​លើ​កាស៊ីណូ​ទេ​។ កាស៊ីណូ​គ្រាន់តែ​ជា​មធ្យោបាយ​ចំណុច​មួយ​នៃ​ការជួល​ក្នុង​មួយរយៈពេល​ប៉ុណ្ណោះ​”។

លោក​ប្រធាន​សមាគម​បាន​បញ្ជាក់​ថា​៖“ដូច្នេះ​ការ​ប៉ះពាល់​មាន​ខ្លះ​ តែ​ក្នុងរយៈពេល​យូរ​ វា​ធ្វើ​ឱ្យ​វិស័យ​អចលនទ្រព្យ​យើង​ប្រកបដោយ​ស្ថិរភាព​។ ដោយឡែក​មួយវិញទៀត​ យើង​មើលឃើញ​ប្រទេស​កម្ពុជា​ទាក់ទង​ការ​វិនិយោគ​ដែល​មាន​វិនិយោគិន​ចិន​ចំនួន​តិច​នៅឡើយ​ទេ​ យើង​គួរណាស់តែ​ខិតខំ​ប្រឹងប្រែង​ ទាំង​វិស័យ​រដ្ឋ​ និង​ឯកជន​ត្រូវ​ទាក់ទង​វិនិយោគិន​បរទេស​បន្ថែម​ទៀត​ឱ្យមក​ចូលរួម​វិនិយោគ​ប្រទេស​យើង​ ព្រោះ​បើ​យើង​មើលទៅ​ប្រទេស​ថៃ​ អូស្ត្រាលី​ អាមេរិក​ជាដើម​ អ្នក​វិនិយោគ​ដែល​ចូល​ទៅ​វិនិយោគ​នៅ​បណ្តា​ប្រទេស​ជឿនលឿន​ទាំងនោះ​មាន​ចំនួន​ច្រើនជាង​យើង​ឆ្ងាយណាស់​។ ដូច្នេះ​គេ​អាច​មានការ​ងារ​ធ្វើ​ច្រើនជាង​យើង​”។

លោក​ ច្រឹក​ សុ​ខនីម​ បាន​បញ្ជាក់​បន្ថែម​ថា​៖“បើ​តាម​ទស្សនៈ​របស់ខ្ញុំ​ គឺ​យើង​ស្ថិតនៅ​ឆ្ងាយណាស់​ចំណែក​ Game​ online​ Casino​ យើង​មាន​បទ​ពិសោធ​កាលពី​ឆ្នាំ2013​ គឺ​រដ្ឋ​ធ្លាប់​បិទ​ម្តង​ហើយ​ គឺ​ដើម្បី​ឱ្យ​មាន​សណ្តាប់​ធ្នាប់​ នោះ​វា​នឹង​មិន​បង្ក​គ្រោះថ្នាក់​ដល់​ប្រជាជន​ និង​សង្គម​ទូទៅ​។ រី​ឯវិនិយោគិន​ជាតិចិន​ប៉ុណ្ណឹង​ ជា​ចំនួន​តិច​នៅឡើយ​ ដែល​យើង​គួរតែ​កុំ​បារម្ភ​ពេក​ ហើយ​ចេះតែ​រំកិល​ទៅលើ​អ្វី​ដែល​ព្យាករ​ថា​ អចលនទ្រព្យ​ធ្លាក់ចុះ​ តែ​ការ​ធ្លាក់​នេះ​អាច​ជា​ការជួល​តិចតួច​ទេ​ យើង​ត្រូវ​ចូលរួម​ទៅ​ក្នុង​ការ​អភិវឌ្ឍ​សេដ្ឋកិច្ច​ពិត​ទៅ​ នោះ​បាន​វា​រឹងមាំ​ ហើយ​ការ​វិនិយោគ​នឹង​បន្ត​ទៅមុខ​ទៀត​”។

យោង​តាម​តួលេខ​ការ​វិនិយោគ​ដោយ​ផ្ទាល់​នៅ​ក្រៅប្រទេស​របស់​ប្រទេស​ចិន​ អូ​ឌី​អាយ​(ODI​) បាន​ធ្លាក់ចុះ​ 9.6​% ស្មើនឹង​ 143,04​ ពាន់​លាន​ដុល្លារ​នៅ​ឆ្នាំ2018​។ ទោះបីជា​មានការ​ធ្លាក់ចុះ​ក៏ដោយ​ តែ​ឥទ្ធិពល​របស់​ប្រទេស​ចិន​នៅក្នុង​ទុន​វិនិយោគ​ក្រៅប្រទេស​ FDI​ នៅតែ​បន្ត​ពង្រីក​។ ប្រទេស​ចិន​នៅតែ​ជា​វិនិយោគិន​បរទេស​ធំ​លំដាប់​ទី2​ លើ​ពិភពលោក​ (លំដាប់​ទី2​ បន្ទាប់ពី​ជប៉ុន​) ខណៈ​ដែល​ FDI​ សកល​ធ្លាក់ចុះ​ 29​%។ ភាគហ៊ុន​របស់​អូ​ឌី​អាយ​ឈាន​ដល់​ 1.98សែន​កោដិ​ដុល្លារ​ក្នុង​ឆ្នាំ2018​ ដែល​ឈរ​នៅ​លំដាប់​ទី3​ បន្ទាប់ពី​សហរដ្ឋអាមេរិក​ និង​ហូ​ឡង់​។

ទោះ​យ៉ាងណា​អ្នកទិញ​ជនជាតិ​ចិន​នៅតែ​មាន​ចេតនា​ខ្លាំងក្លា​ក្នុង​ការ​វិនិយោគ​នៅក្នុង​តំបន់​អាស៊ី​មួយ​ផ្នែក​ដោយសារតែ​ឱកាស​ក្នុង​ការទិញ​ទ្រព្យសម្បត្តិ​នៅក្នុង​វិស័យ​ដែល​រំពឹង​ថា​ នឹង​ទទួល​បាន​អត្ថ​ប្រយោជន៍​ពី​គំនិត​ផ្តួចផ្តើម​ខ្សែក្រវាត់​ និង​ផ្លូវ​ជាមួយ​បណ្តា​ប្រទេស​អាស៊ី​ដែល​កំពុងតែ​រីកចម្រើន​ដូចជា​ប្រទេស​ថៃ​ កម្ពុជា​ និង​វៀតណាម​ជាដើម​។

យោង​តាម​របាយការណ៍​ត្រួតពិនិត្យ​ស្ថិរភាព​ហិរញ្ញវត្ថុ​លើកដំបូង​របស់​ខ្លួន​ ធនាគារជាតិនៃកម្ពុជា​(NBC​)បង្ហាញថា​ វិស័យ​អចលនទ្រព្យ​មានការ​បន្ត​ការ​ផ្គត់ផ្គង់​ដែល​គាំទ្រ​ដោយ​មូលនិធិ​ខាងក្រៅ​ និង​ឥណទាន​ក្នុង​ស្រុក​។

ទោះ​យ៉ាងណា​ បើ​តម្រូវការ​ពី​ខាងក្រៅ​ និង​សេដ្ឋកិច្ច​ក្នុង​ស្រុក​ចុះ​ខ្សោយ​នោះ​ វា​អាច​បណ្តាល​ឱ្យ​មានការ​ផ្គត់ផ្គង់​លើស​តម្រូវការ​។ នេះ​ជា​ករណី​ពិសេស​ប្រសិនបើ​តម្រូវការ​ពី​ខាងក្រៅ​ និង​ក្នុង​ស្រុក​ចុះ​ខ្សោយ​នោះ​ ជា​លទ្ធផល​ ការ​លក់​ ការជួល​ និង​អត្រា​ការជួល​ នៅ​ទូទាំង​ទីផ្សារ​អាច​រង​ផល​ប៉ះពាល់​យ៉ាងធ្ងន់ធ្ងរ​នៅ​ឆ្នាំ2019នេះ​។

ប៉ុន្តែ​នៅក្នុង​របាយការណ៍​ដដែល​បាន​បញ្ជាក់​ថា​៖“នៅ​ចុងឆ្នាំ2019​ ការ​ផ្គត់ផ្គង់​យូនី​តខុន​ដូ​នៅ​គ្រប់​ផ្នែក​ទាំងអស់​ កន្លែង​លក់រាយ​ និង​ការិយាល័យ​ត្រូវ​បាន​គេ​រំពឹង​ថា​នឹង​កើនឡើង​”។

ប៉ុន្តែ​បើ​គេ​ក្រឡេក​មើល​ការ​វិនិយោគ​លើ​វិស័យ​សំណង់​នៅ​ទូទាំង​ប្រទេស​វិញ​ បាន​កើនឡើង​ដល់​ទឹកប្រាក់​សរុប​ចំនួន​ប្រមាណ​ 6ពាន់​លាន​ដុល្លារ​អាមេរិក​នៅ​លើ​គម្រោង​វិនិយោគ​ថ្មី​ប្រមាណ​ជាង​ 3ពាន់​គម្រោង​ ដែល​មានផ្ទៃ​ក្រឡា​ប្រមាណ​ជាង​ 12.2លាន​ម៉ែត្រការ៉េ​។តាម​របាយការណ៍​បង្ហាញ​ដោយ​នាយកដ្ឋាន​ស្ថិតិ​ និង​វិភាគ​សេដ្ឋកិច្ច​នៃ​ក្រសួងសេដ្ឋកិច្ច​ និង​ហិរញ្ញវត្ថុ​បង្ហាញ​ឱ្យ​ដឹង​ថា​ គម្រោង​វិនិយោគ​លើ​វិស័យ​សំណង់​ គិត​មកដល់​ត្រឹម​ខែសីហា​ ឆ្នាំ2019នេះ​ ក្រសួង​រៀបចំ​ដែនដី​ នគរូបនីយកម្ម​ និង​សំណង់​បាន​អនុញ្ញាត​លើ​ការ​ស្នើសុំ​សាងសង់​សរុប​ទូទាំង​ប្រទេស​មាន​ចំនួន​ប្រមាណ​ 3,175គម្រោង​ ក្នុង​នោះ​មានតម្លៃ​នៃ​ទំហំ​វិនិយោគ​នៅ​លើ​វិស័យ​នេះ​ សរុប​ 5,986លាន​ដុល្លារ​អាមេរិក​ ដោយ​វិនិយោគ​នៅ​លើ​ផ្ទៃក្រឡា​ប្រមាណ​ជាង12.2លាន​ម៉ែត្រការ៉េ​។

គម្រោង​វិនិយោគ​ទាំងនេះ​ត្រូវ​បាន​បែងចែក​តាម​សំណើសុំ​សាងសង់​តាម​ប្រភេទ​នី​មួយ​ៗ រួមមាន​សំណង់​សាធារណៈ​មាន​ប្រមាណ​ 56គម្រោង​ ការប្រើ​ប្រាស់​ថវិកា​រដ្ឋាភិបាល​មាន​ 18គម្រោង​ សំណង់​ឧស្សាហកម្ម​ 138គម្រោង​ សំណង់​ពាណិជ្ជកម្ម​ 176​គម្រោង​ សំណង់​ទេសចរណ៍​ 82គម្រោងថវិកា​វិស័យ​ឯកជន​ 36គម្រោង​ ការសាងសង់​លំនៅឋាន​ និង​ភូមិគ្រឹះ​ជាង​ 2ពាន់​គម្រោង​ និង​សំ​ណង់​ផ្សេង​ៗទៀត​មាន​ចំនួន​ 18គម្រោង​ផង​ដែរ​។ ចំណែក​ផ្ទៃក្រឡា​ពាក់ព័ន្ធ​នឹង​សំណង់​ទាំងអស់​ដែល​ផ្តល់​ការ​អនុម័ត​ដោយ​មន្ទីរ​ មាន​ចំនួន​ជាង​ 1លាន​ 7សែន​ម៉ែត្រការ៉េ​ និង​ការ​ផ្តល់​ដោយ​ក្រសួង​មាន​ចំនួន​ជាង​ 10លាន​ម៉ែត្រការ៉េ​។

តាម​សេចក្តី​ព្រាងច្បាប់​ស្តី​ពី​ហិរញ្ញវត្ថុ​សម្រាប់​ការគ្រប់គ្រង​ឆ្នាំ2020​ វិស័យ​សំណង់​ត្រូវ​បាន​ព្យាករ​ថា​ នឹង​បន្ត​កំណើន​រឹងមាំ​ក្នុង​អត្រា​រង្វង់​ 17.5​%នៅក្នុង​ឆ្នាំ2019​ និង16.1​% នៅក្នុង​ឆ្នាំ2020​ ក្នុង​នោះ​មាន​ការ​រំពឹង​ទុក​នៃ​ការ​កើនឡើង​អគារ​លំនៅឋាន​ដែល​មានតម្លៃ​ទាប​ និង​មធ្យម​ ព្រមទាំង​សំណង់​អគារ​ពាណិជ្ជកម្ម​ជំនួស​ឱ្យ​កំណើន​យឺត​នៃ​សំណង់​អគារ​លំនៅឋាន​ដែល​មានតម្លៃ​ខ្ពស់​៕