ប្រទេស​ហូ​ឡង់​ ចូលរួម​ជំរុញ​កម្មវិធី​ផលិត​កម្ម​ស្រូវ​សរីរាង្គ​ RiceTechCambodia​

October 10, 2019​ ម៉ោង 3:56 pm

គម្រោង​ឈ្មោះថា​“រ៉ៃ​ស៍​ថេ​កខេម​បូ​ឌា​” (RiceTechCambodia​) ជា​គម្រោង​ដែល​មាន​រយៈពេល​5ឆ្នាំ​ ដែល​ផ្ដួចផ្ដើម​ឡើង​ក្នុង​គោលបំណង​លើក​កម្ពស់​ការ​ចិញ្ចឹមជីវិត​របស់​កសិករ​ខ្នាត​តូច​ ដោយ​ជួយ​ពួកគេ​ឱ្យ​ទទួល​បាន​វិញ្ញាបនបត្រ​ស្រូវ​សរីរាង្គ​បង្កើន​ផលិតភាព​ ពង្រឹង​ទិន្នផល​ស្រូវ​ និង​ធានា​ឱ្យ​បាន​តម្លៃ​ស្រូវ​ខ្ពស់​លក់​ក្នុង​ទីផ្សារ​អឺរ៉ុប​។

លោក​ កាន់​ គន្ធី​ អគ្គនាយករង​ក្រុមហ៊ុន​ AmruRice​ បានឱ្យ​ដឹង​ថា​ គម្រោង​នេះ​ត្រូវ​បាន​រដ្ឋាភិបាល​ប្រទេស​ហូ​ឡង់​ផ្ដល់​មូលនិធិ​ប្រមាណ​ 5លាន​ដុល្លារ​និង​ត្រូវ​វិនិយោគ​ទឹកប្រាក់​មួយចំនួន​ទៀត​ពី​ AmruRice​ តាម​ភាព​ជាក់ស្ដែង​។ គម្រោង​នេះ​នឹង​ផ្ដោត​ទៅ​លើ​ការ​បណ្ដុះបណ្ដាល​ពង្រឹង​បច្ចេកទេស​ដល់​កសិករ​និង​កសាង​ហេដ្ឋារចនាសម្ព័ន្ធ​ ឃ្លាំង​ស្តុក​ឡសម្ងួត​ ម៉ាស៊ីន​កិនស្រូវ​នៅ​ស្រុក​កោះញែក​ ខេត្តមណ្ឌលគិរី​ ជា​គោលដៅ​សម្រាប់​អនុវត្ត​គម្រោង​។ ក្រៅពី​សហគមន៍​កសិករ​ ដៃគូ​គម្រោង​ផ្សេងទៀត​រួមមាន​ ក្រុមហ៊ុន​បញ្ជា​ទិញ​ Sanorice​ ក្រុមហ៊ុននាំចេញ​អង្ករ​ AmruRice​ អង្គការ​ Oxfam​ អង្គការ​ Larive​ International​ អង្គការ​អភិវឌ្ឍន៍​ និង​ភាពជា​ដៃគូ​ក្នុង​សង្គហភាព​។

លោក​ កាន់​ គន្ធី​ បាន​បញ្ជាក់​ថា​៖“គម្រោង​នេះ​មាន​គោលដៅ​គ្របដណ្ដប់​កសិករ​ខ្នាត​តូច​ ដោយ​ក្នុង​នោះ​ រំពឹង​ថា​ស្រូវ​សរីរាង្គ​ប្រមាណ​ 2ម៉ឺន​តោន​ នឹង​ត្រូវ​បាន​ផលិត​ក្នុង​ 1ឆ្នាំ​ចេញពី​តំបន់​នៃ​គម្រោង​នេះ​។

ទាក់ទិន​នឹង​ស្រូវ​សរីរាង្គ​នេះ​ លោក​បញ្ជាក់​ថា​ កន្លងមក​ក្រុមហ៊ុន​ AmruRice​ អាច​ប្រមូល​បាន​ស្រូវ​សរីរាង្គ​ប្រមាណ​ 2ម៉ឺន​តោន​ពី​ខេត្តព្រះវិហារ​ ដោយ​ក្នុង​ 1ឆ្នាំ​ក្រុមហ៊ុននាំចេញ​បាន​ជិត​ 1ម៉ឺន​តោន​អង្ករ​ ដែល​ស្មើនឹង​ជាង80​%នៃ​ការនាំចេញ​អង្ករ​សរីរាង្គ​សរុប​របស់​កម្ពុជា​ ហើយ​ការផលិត​ស្រូវ​ទាំងនេះ​ គឺ​ធ្វើជា​ម៉ូដែល​កសិកម្ម​តាម​កិច្ចសន្យា​”។ ​

ឯកឧត្តម​ វេង​ សា​ខុន​ រដ្ឋមន្ត្រី​ក្រសួង​កសិកម្ម​ រុក្ខាប្រមាញ់​ និង​នេសាទ​ ដែល​ចូលរួម​ជា​អធិបតី​ក្នុង​ពិធីសម្ពោធ​គម្រោង​ រ៉ៃ​ស៍​ថេ​ក នេះ​ បាន​ថ្លែង​ថា​ នេះ​ជា​ការ​បោះជំហាន​មួយ​កម្រិត​ទៀត​ក្នុង​ការជំរុញ​ផលិតកម្ម​ស្រូវ​សរីរាង្គ​ និង​ការកែច្នៃ​ផលិតផល​ស្រូវ​សរីរាង្គ​ ជា​ផលិតផល​សម្រេច​សម្រាប់​នាំចេញ​ទៅ​ទីផ្សារ​អន្តរជាតិ​។

ឯកឧត្តម​ វេង​ សា​ខុន​ រដ្ឋមន្ត្រី​ក្រសួង​កសិកម្ម​ក៏បាន​ឱ្យ​ដឹង​ថា​៖“គម្រោង​ដែល​នឹង​ត្រូវ​អនុវត្ត​នៅ​ស្រុក​កោះញែក​ គោលបំណង​គឺ​ដើម្បី​ឈាន​ដល់​កសិករ​ធ្វើ​ស្រូវ​ខ្នាត​តូច​ចំនួន​ 2,400គ្រួសារ​។ កសិករ​ចំនួន​ 1,300នាក់​នឹង​ទទួល​បានការ​បណ្តុះបណ្តាល​យ៉ាង​ទូលំទូលាយ​លើ​កសិកម្ម​សរីរាង្គ​ និង​ការអនុវត្ត​កសិកម្ម​ល្អ​ ខណៈ​ពេល​ដែល​ទទួល​បាន​កន្លែង​សម្ងួត​ស្តុក​ និង​រោងម៉ាស៊ីន​កិន​ដើម្បី​បង្កើន​គុណភាព​ផលិតផល​ស្រូវ​។ គម្រោង​ RiceTechCambodia​ នឹង​ជំរុញ​ផលិតកម្ម​ស្រូវ​សរីរាង្គ​ និង​ធ្វើ​ឱ្យ​ព្រះរាជាណាចក្រ​កម្ពុជា​មាន​កេរ្តិ៍ឈ្មោះ​នៅ​បរទេស​ក្នុងនាម​ជា​អ្នក​ផលិត​អង្ករ​សរីរាង្គ​”។

ជាមួយគ្នា​នេះ​ដែរ​ ឯកឧត្តម​ វេង​ សា​ខុន​ បាន​បញ្ជាក់​អំពី​ស្ថានភាព​នៃ​ការប្រកួត​ប្រជែង​ក្នុង​វិស័យ​ស្រូវ​អង្ករ​យ៉ាង​ដូច្នេះ​ថា​៖“បច្ចុប្បន្ន​ ការប្រកួត​ប្រជែង​អង្ក​រស​ធម្មតា​នៅ​លើ​ទីផ្សារ​អន្តរជាតិ​មាន​ភាព​តឹងតែង​ ពោល​គឺ​កម្ពុជា​ពិបាក​ដណ្ដើម​ទីផ្សារ​ជាមួយ​វៀតណាម​ ព្រោះ​ថ្លៃដើម​ផលិត​ និង​នាំចេញ​របស់​យើង​ថ្លៃជាង​គេ​ ដូច្នេះ​មានតែ​ការផលិត​ស្រូវ​អង្ករ​ក្រអូប​ និង​អង្ករ​គុណភាព​ខ្ពស់​ដូចជា​ អង្ករ​សរីរាង្គ​ និង​អង្ក​រស្ដង់​ដា​ Standard​ Rice​ Product​ SRP​ ប៉ុណ្ណោះ​ដែល​ជួយ​ឱ្យ​អង្ករ​កម្ពុជា​ល្បីឈ្មោះ​លើ​ទីផ្សារ​អន្តរជាតិ​”។

លោក​ Robert​ Vreeman​ ប្រធាន​ក្រុមហ៊ុន​ SanoRice​ មានប្រសាសន៍​ដូច្នេះ​ថា​៖“យើង​ជំរុញ​ខ្សែ​ចង្វាក់​ផ្គត់ផ្គង់​ឱ្យ​កាន់តែ​ប្រសើរ​ឡើង​ ដោយ​អនុវត្ត​វិញ្ញាបនបត្រ​ស្រូវ​សរីរាង្គ​ និង​វិធីសាស្ត្រ​តាមដាន​ត្រួតពិនិត្យ​តាម​បែប​ទំនើប​ដោយ​ប្រើប្រាស់​បច្ចេកវិទ្យា​ថ្មី​ដូចជា​ ប្លុក​ឆេន​ជាដើម​។ ការចូលរួម​ពី​SanoRice​ ក្នុង​គម្រោង​នេះ​ គឺ​ការធានា​ទំហំ​ស្រូវ​នាំចេញ​ និង​តម្លៃ​ខ្ពស់​ដល់​កសិករ​”។

លោកស្រី​ លឹម​ សូ​លីន​ នាយិកា​អង្គការ​អុក​ស្វា​ម ដែល​ជា​ដៃគូ​ក្នុង​គម្រោង​នេះ​ដែរ​នោះ​ បាន​ជឿជាក់​ថា​ គម្រោង​នេះ​នឹង​ផ្ដល់​ផលប្រយោជន៍​ដល់​កសិករ​។ លោកស្រី​ថ្លែង​បែបនេះ​ថា​៖“អង្គការ​អុក​ស្វា​មជឿជាក់​ថា​ កសិករ​ខ្នាត​តូច​សមនឹង​ទទួល​បានផល​ចំណេញ​សមរម្យ​ទៅ​នឹង​តម្លៃបន្ថែម​ក្នុង​ខ្សែ​ចង្វាក់​ផលិតកម្ម​ស្រូវ​ ហើយ​ទាំងនេះ​អាច​សម្រេច​បាន​តាមរយៈ​ខ្សែ​សង្វាក់​ផលិតកម្ម​ប្រកបដោយ​បរិ​យា​ប័ន្នដែល​ជំរុញ​ដោយដៃ​គូ​ទាំងអស់​”។

សូម​បញ្ជាក់​ថា​ RiceTechCambodia​ ដែល​ជា​គំនិត​ផ្តួចផ្តើម​ និង​ទុន​ 5លាន​ដុល្លារ​ដែល​ឧបត្ថម្ភ​ថវិកា​ដោយ​ប្រទេស​ហូ​ឡង់​នេះ​ត្រូវ​បាន​អនុម័ត​តាំងពី​ខែមិថុនា​ដោយ​ភាពជា​ដៃគូ​គោលដៅ​អភិវឌ្ឍន៍​ប្រកបដោយ​ចីរភាព​ Sustainable​ Development​ Goals​ (SDG​) ដែល​ចាត់ចែង​ដោយ​ក្រសួង​ការ​បរ​ទេ​សហូ​ឡង់​។

លោក​ Thomas​ van​ Leeuwen​ ឯកអគ្គ​រដ្ឋទូត​រង​នៃ​ប្រទេស​ហូ​ឡង់​ប្រចាំ​នៅ​កម្ពុជា​បាន​អំពាវនាវ​ដល់​ស្ថាប័ន​ទាំងអស់​ដែល​ចូលរួម​ក្នុង​គម្រោង​នេះ​ឱ្យ​បញ្ចូល​គ្នា​នូវ​បច្ចេកវិទ្យា​ និង​ការ​ខិតខំ​ដើម្បី​បន្ថែម​តម្លៃ​ដល់​អង្ករ​សរីរាង្គ​របស់​ប្រទេស​។ “តាមរយៈ​ការ​ធ្វើ​ដូច្នេះ​វា​នឹង​ធ្វើ​ឱ្យ​ប្រទេស​កម្ពុជា​អាច​ធានា​បាន​នូវ​ទីផ្សារ​អង្ករ​អន្តរជាតិ​។ យើង​រំពឹង​ថា​ គំនិត​ផ្តួចផ្តើម​នេះ​នឹង​ធ្វើ​ឱ្យ​ប្រសើរ​ឡើង​នូវ​ជីវភាពរស់នៅ​របស់​កសិករ​ខ្នាត​តូច​”។

ប្រទេស​កម្ពុជា​ធ្លាប់​ជា​ប្រទេស​នាំចេញ​អង្ករ​សរីរាង្គ​ធំជាង​គេ​ទី​ 5 ទៅកាន់​សហភាព​អឺរ៉ុប​កាលពី​ឆ្នាំមុន​។ យោង​តាម​តួលេខ​ពី​សហគមន៍​អឺរ៉ុប​ដែល​បាន​ចែករំលែក​ជាមួយ​សហព័ន្ធ​ស្រូវ​អង្ករ​កម្ពុជា​បាន​នាំចេញ​អង្ករ​សរីរាង្គ​ចំនួន​ 8,467តោន​ទៅ​ប្លុក​មួយ​នេះ​កាលពី​ឆ្នាំមុន​ដែល​តំណាង​ឱ្យ​ 3.9​%នៃ​ការ​នាំចូល​អង្ករ​សរីរាង្គ​របស់​សហភាព​អឺរ៉ុប​។

លោក​ឧកញ៉ា​ សុង​ សា​រ៉ន​ នាយក​ប្រតិបត្តិ​ និង​ជា​ប្រធាន​ក្រុមហ៊ុន​ AmruRice​ បាន​លើកឡើង​ថា​៖“តួនាទី​របស់​កម្មវិធី​ក្នុង​ការ​លើកកម្ពស់​អង្ករ​កម្ពុជា​នៅ​បរទេស​ និង​ក្នុង​ការ​ជួយ​សហគមន៍​កសិកម្ម​ក្នុង​ស្រុក​។ វា​ក៏​នឹង​ជះ​ឥទិ្ធ​ពល​ខ្លាំង​ដល់​ជីវិត​កសិករ​ដែល​នេះ​គឺជា​ជំហាន​ដ៏​សំខាន់​មួយ​ឆ្ពោះទៅ​ការ​ប្រែក្លាយ​កសិករ​ទៅជា​អ្នក​ដាំដុះ​ដ៏​មាន​បទ​ពិសោធ​ក្នុង​ដំណាំ​អង្ករ​សរីរាង្គ​។ គោលបំណង​គឺ​អនុវត្ត​ខ្សែ​ចង្វាក់​តម្លៃ​ស្រូវ​ប្រកបដោយ​ការទទួលខុសត្រូវ​ប្រកបដោយ​ចីរភាព​ និង​ភ្ជាប់​ទំនាក់ទំនង​ជាមួយ​តម្រូវការ​ផ្គត់ផ្គង់​ជាមួយ​កសិករ​តូចតាច​ដែល​ជា​អ្នក​ពាក់ព័ន្ធ​ស្នូល​”៕