ធនាគារអភិវឌ្ឍន៍អាស៊ី ឬAsian Development Bank ហៅកាត់ថា ADB បានអនុម័តយុទ្ធសាស្ត្រភាពជាដៃគូប្រចាំប្រទេស ឬCountry Partnership Strategy ឬCPS ថ្មីមួយមានរយៈពេល 5ឆ្នាំ ដែលមានកំណត់ចែងអំពីកិច្ចគាំទ្ររបស់ស្ថាប័ននេះចំពោះគោលដៅរបស់កម្ពុជា ក្នុងការក្លាយខ្លួនជាប្រទេសមានប្រាក់ចំណូលមធ្យមកម្រិតខ្ពស់ត្រឹមឆ្នាំ2030។ នេះបើយោងតាមសេចក្ដីប្រកាសព័ត៌មានរបស់ធនាគារអភិវឌ្ឍន៍អាស៊ី ចេញផ្សាយកាលពីថ្ងៃទី25 ខែតុលា ឆ្នាំ2019 នេះ។
ក្នុងសេចក្ដីប្រកាស បានបញ្ជាក់ថា ស្ថិតក្រោមយុទ្ធសាស្ត្រឆ្នាំ2019-2023 ធនាគារអភិវឌ្ឍន៍ អាស៊ីនឹងផ្តល់ថវិកាចំនួន 1.45ពាន់លានដុល្លារក្នុងទម្រង់ជាឥណទានសម្បទាន ហិរញ្ញប្បទានឥត សំណង និងជំនួយបច្ចេកទេសសម្រាប់វិស័យកសិកម្ម និងការគ្រប់គ្រងធនធានធម្មជាតិ កែលម្អលក្ខខណ្ឌជីវភាពរស់នៅក្នុងតំបន់ទីក្រុង និងតំបន់ជនបទ ហេដ្ឋារចនាសម្ព័ន្ធ ថាមពលកកើតឡើងវិញ និងការអភិវឌ្ឍវិស័យអប់រំ និងជំនាញ។
គំនិតផ្តួចផ្តើមទាំងនេះមានគោលបំណងកែលម្អ និងធ្វើឱ្យប្រសើរឡើងនូវលទ្ធភាពទទួលបាន និងគុណភាពនៃសេវាកម្មសម្រាប់ប្រជាជនកម្ពុជា ក៏ដូចជាបរិយាកាសអាជីវកម្ម និងធុរកិច្ចផងដែរ ដែលការគាំទ្រដល់កំណែទម្រង់វិស័យសាធារណៈ និងការកែលម្អសមត្ថភាពស្ថាប័ននឹងនៅតែមានការផ្តោតការយកចិត្តទុកដាក់ជាចម្បង និងនៅតែជាកត្តាស្នូលនៃកម្មវិធីរបស់ធនាគារអភិវឌ្ឍន៍អាស៊ី។
លោកស្រី Sunniya Durrani-Jamal នាយិកាធនាគារអភិវឌ្ឍន៍អាស៊ីប្រចាំប្រទេសកម្ពុជា បានមានប្រសាសន៍ថា៖ “យុទ្ធសាស្ត្រភាពជាដៃគូប្រចាំប្រទេសថ្មីរបស់យើងនឹងគាំទ្រដល់គោលដៅរបស់រាជរដ្ឋាភិបាលកម្ពុជាក្នុងការបង្កើតភាពប្រកួតប្រជែង និងពិពិធកម្មប្រភពដែលជំរុញឱ្យមានកំណើនសេដ្ឋកិច្ច ការជំរុញឱ្យមានការអភិវឌ្ឍប្រកបដោយចីរភាព និងបរិយាប័ន្ន ការកសាងឱ្យមានភាពធន់ទៅនឹងអាកាសធាតុ និងការពន្លឿនកំណែទម្រង់អភិបាលកិច្ច”។
លោកស្រីបានបន្ថែមទៀតថា យុទ្ធសាស្ត្រភាពជាដៃគូប្រចាំប្រទេសកម្ពុជានេះនឹងជួយបង្កើតឱ្យមានកាលានុវត្តភាពការងារកាន់តែប្រសើរសម្រាប់ពលរដ្ឋកម្ពុជា តាមរយៈការវិនិយោគទៅលើការអប់រំជំនាញ និងការរៀនសូត្រពេញមួយជីវិតរបស់ពួកគេ។ ដោយសារប្រទេសកម្ពុជាមានចំនួនប្រជាពលរដ្ឋវ័យក្មេងច្រើន ដូច្នេះការពង្រីកការប្រើប្រាស់បច្ចេកវិទ្យាឌីជីថល និងការទាញយកប្រយោជន៍ពីនវានុវត្តន៍នានា គឺជាចំណុចស្នូលនៃយុទ្ធសាស្ត្រភាពជាដៃគូប្រចាំប្រទេសរបស់យើង។
លោកស្រីបានលើកឡើងថា ជាមធ្យមសេដ្ឋកិច្ចរបស់កម្ពុជាបានកើនឡើង 8.0% ពីឆ្នាំ1999-2018 ដែលធ្វើឱ្យកម្ពុជាក្លាយជាប្រទេសមួយក្នុងចំណោមបណ្តាប្រទេសនានាដែលមានការរីក ចម្រើនរហ័សបំផុតនៅក្នុងពិភពលោក។ ប្រាក់ចំណូលដុលជាតិក្នុង 1នាក់បានកើនឡើងពី 290 ដុល្លារក្នុងឆ្នាំ1998 រហូតដល់ 1.380ដុល្លារក្នុងឆ្នាំ2018។
ទោះជាដូច្នេះក្តី ក៏នៅតែមានបញ្ហាប្រឈមមួយចំនួន ដោយរាប់បញ្ចូលទាំងភាពក្រីក្រក្នុង ចំណោមស្ត្រីជាមេគ្រួសារដែលធ្វើឱ្យពួកគេងាយរងគ្រោះជាពិសេសជាមួយនឹងការងារគ្មានសុវត្ថិភាព។ លទ្ធភាពទទួលបានបរិក្ខារអនាម័យនៅស្ថិតក្រោមកម្រិតមធ្យមភាគនៅឡើយសម្រាប់បណ្តាប្រទេសដែលមានប្រាក់ចំណូលមធ្យមកម្រិតទាប។ កិច្ចគាំពារសង្គមនៅមានកម្រិត ហើយភាពរីកចម្រើនខាងផ្នែកសុខភាព អប់រំ និងទិដ្ឋភាពដទៃទៀតនៃការអភិវឌ្ឍមនុស្សនៅតែបន្តមានភាពផុយស្រួយនៅឡើយ។
ជាមួយគ្នានេះ កម្ពុជាក៏ជួបប្រទះបរិយាកាសពាណិជ្ជកម្មសកលដែលគ្មានភាពប្រាកដប្រជា ព្រមទាំងកំណើននៃការប្រកួតប្រជែងក្នុងតំបន់ផងដែរ។ ក្រៅពីនេះកិច្ចខិតខំក្នុងការធ្វើពិពិធកម្មសេដ្ឋកិច្ចទៅក្នុងវិស័យសេវាកម្ម និងកម្មន្តសាល បាននិងកំពុងរងការរាំងស្ទះដោយសារកង្វះកម្មករជំនាញ ភាពចន្លោះប្រហោងនៅក្នុងហេដ្ឋារចនាសម្ព័ន្ធថាមពល និងឡូជីស្ទិក ព្រមទាំងដំណើរការធុរកិច្ចខ្វះតម្លាភាព។
លោកស្រី Sunniya Durrani-Jamal បានបញ្ជាក់បន្ថែមថា៖ “ការលើកកម្ពស់សក្តានុពល និងភាពជាអ្នកដឹកនាំរបស់ស្ត្រី ជាពិសេសនៅក្នុងវិស័យសាធារណៈ និងការការពារធនធានធម្មជាតិដ៏ច្រើនសន្ធឹកសន្ធាប់របស់កម្ពុជាមានសារៈសំខាន់ខ្លាំងណាស់សម្រាប់ដំណាក់កាលបន្ទាប់នៃការអភិវឌ្ឍប្រទេស”។
លោកស្រីបានអះអាងថា ធនាគារអភិវឌ្ឍន៍អាស៊ីប្តេជ្ញានាំមកនូវវិបុលភាព បរិយាប័ន្ន ភាពធន់ និងនិរន្តរភាពសម្រាប់តំបន់អាស៊ី និងប៉ាស៊ីហ្វិក ហើយស្របពេលជាមួយគ្នានេះ ក៏នឹងបន្តរក្សាចីរភាពនៃកិច្ចខិតខំរបស់ខ្លួនក្នុងការលុបបំបាត់ភាពទីទ័លក្រផងដែរ។
សូមបញ្ជាក់ថា ក្នុងឆ្នាំ2018 ធនាគារអភិវឌ្ឍន៍អាស៊ីបានសន្យាផ្តល់ឥណទានសម្បទាន និងហិរញ្ញប្បទានឥតសំណងថ្មីដែលមានចំនួនទឹកប្រាក់ 21.6ពាន់លានដុល្លារ៕
