ការផ្សព្វផ្សាយពាណិជ្ជកម្មលើ WhatsApp នឹងចាប់ផ្ដើមក្នុងពេលឆាប់ៗនេះ

October 4, 2018​ ម៉ោង 10:00 am

ថ្មីៗនេះ មានព័ត៌មានជាច្រើនបានធ្លាយចេញមកឱ្យដឹងថា លោក Mark Zuckerberg បានបញ្ជាឱ្យក្រុមការងាររបស់លោក ធ្វើការសាកល្បង​ការផ្សព្វផ្សាយពាណិជ្ជកម្មនៅលើកម្មវិធី WhatsApp ប៉ុន្តែការសាកល្បងនេះ គឺត្រូវធ្វើ​ឡើងតែនៅលើ iOS ប៉ុណ្ណោះ។

ដោយឡែកនៅពេលនេះ សារព័ត៌មាន Bloomberg បានចុះផ្សាយថា ការផ្សព្វផ្សាយពាណិជ្ជកម្មនៅលើ WhatsApp ត្រូវបានសាកល្បងដោយជោគជ័យ ជាពិសេសគឺគ្រោងនឹងដាក់ឱ្យដំណើរការ​នៅក្នុងពេល​ឆាប់ៗនេះ ប៉ុន្តែមិនបានបញ្ជាក់ថា ដាក់ដំណើរការតែនៅលើ iOS មួយ ឬយ៉ាងណានោះទេ។

វាអាចជាការពិតព្រោះថា ប៉ុន្មានថ្ងៃមុននេះ លោក Brian Acton ដែលជាសហស្ថាបនិក​ WhatsApp បានថ្លែងនៅក្នុងវេទិកាមួយថា លោក Mark Zuckerberg មានគោលបំណងយកលុយពីការផ្សព្វផ្សាយ​ពាណិជ្ជកម្មនៅលើ WhatsApp ចាប់តាំងពីលោកបានទិញភ្លាមៗមកម្លេ៉ះ ប៉ុន្តែដោយសារពេលនោះ ចំនួនអ្នកប្រើនៅតិច ទើបសម្រេចពន្យារពេល។

គួរបញ្ជាក់ផងដែរថា ត្រូវបានបង្កើតឡើងនៅឆ្នាំ2009 ដោយអតីតបុគ្គលិក Yahoo! 2រូប គឺលោក Brian Acton និងJan Koum ហើយនៅខែកុម្ភៈ ឆ្នាំ2014 ត្រូវបានក្រុមហ៊ុន Facebook ទិញយកក្នុងតម្លៃ 19ពាន់លានដុល្លារអាមេរិក៕