គោលដៅអភិវឌ្ឍន៍ប្រកបដោយចីរភាព (SDG) 2030 ជាចំណុចដ៏សំខាន់ដែលពិភពលោកកំពុងចាប់អារម្មណ៍ ព្រោះគោលដៅនេះអាចនឹងធ្វើឱ្យពិភពលោកកាន់តែប្រសើរឡើងទាំងការរស់នៅរបស់ប្រជាជន ការកាត់បន្ថយផលប៉ះពាល់បរិស្ថាន និងការបង្កើតជីវភាពរស់នៅសមរម្យរបស់មនុស្សក្នុងសង្គម។
ក្នុងចំណោមផ្នែកទាំងអស់នៃគោលដៅ (SDG) បណ្ណាល័យជាគោលដៅស្នូលយ៉ាងសំខាន់មួយដែលគ្រប់ប្រទេសទាំងអស់កំពុងយកចិត្តទុកដាក់ ជាពិសេសប្រទេសកំពុងអភិវឌ្ឍន៍។ នៅកម្ពុជា យុវជនខ្មែរមួយក្រុមដែលស្រឡាញ់ និងមើលឃើញពីវិស័យបណ្ណាល័យនេះបានបង្កើតគម្រោងមួយឈ្មោះថា “បណ្ណាល័យសម្រាប់ការអភិវឌ្ឍ” ដើម្បីចូលរួមចំណែកជំរុញកម្ពុជាឱ្យដើរស្របទៅនឹងអ្វីដែលជាការរំពឹងទុកជាវិជ្ជមានជាសកលនៃគោលដៅអភិវឌ្ឍន៍ ប្រកបដោយចីរភាពឆ្នាំ 2030។ នៅថ្ងៃនេះ អ្នកសារព័ត៌មាននៃកាសែតឡារ៉ែនពាណិជ្ជ បានជួបសម្ភាសជាមួយកញ្ញា សាន សុខហ៊ីវ សហស្ថាបនិកនៃគម្រោងបណ្ណាល័យសម្រាប់ការអភិវឌ្ឍ ដើម្បីបង្ហាញពីសកម្មភាព និងហេតុផលសំខាន់ៗសម្រាប់សាធារណជនអាចយល់ដឹង និងទាញយកប្រយោជន៍ពីការងារបណ្ណាល័យនេះ។
1. ហេតុអ្វីបានជាក្រុមការងាររបស់កញ្ញាបង្កើតគម្រោងបណ្ណាល័យសម្រាប់ការអភិវឌ្ឍនេះឡើង?
មូលហេតុដំបូងដែលខ្ញុំ និងក្រុមការងារបង្កើតគម្រោងបណ្ណាល័យសម្រាប់ការអភិវឌ្ឍនេះ ព្រោះពួកយើងចង់លើកស្ទូយវិស័យបណ្ណាល័យនៅកម្ពុជា ព្រោះវិស័យនេះមានមនុស្សតិចតួចណាស់ដែលចាប់អារម្មណ៍ តែវាមានគុណប្រយោជន៍ខ្លាំងសម្រាប់កម្ពុជា។ កម្ពុជាជាប្រទេសដែលកំពុងអភិវឌ្ឍន៍ និងត្រូវការធនធានមនុស្សជាច្រើនសម្រាប់បម្រើការងារលើគ្រប់វិស័យ ហេតុនេះការស្រាវជ្រាវ និងការបង្កើតប្រភពឯកសារជាចំណុចចាំបាច់បំផុតសម្រាប់យុវជនខ្មែរ ដែលកំពុងត្រូវការចំណេះដឹងសំខាន់ៗសម្រាប់ធ្វើការងារតាមវិស័យរៀងៗខ្លួន។ ក្រៅពីនេះ បណ្ណាល័យមិនមែនមានត្រឹមតែឯកសារសម្រាប់អាននោះទេ វាជាមជ្ឈមណ្ឌលជំនួយសម្រាប់ការស្រាវជ្រាវ និងដោះស្រាយបញ្ហារបស់អ្នកជំនាញ។ នៅពេលអ្នកជំនាញត្រូវការឯកសារ បណ្ណាល័យអាចផ្តល់សេវាកម្មសង្ខេប ឬផ្តល់នូវប្រភពឯកសារដែលមានលើពិភពលោកសម្រាប់ពួកគេថែមទៀតផង។
លើសពីនេះទៅទៀត យើងឃើញថាវិស័យនៃការអាននៅកម្ពុជានៅមានកម្រិត ហេតុនេះគម្រោងរបស់យើងក៏មានកម្មវិធីជំរុញការអានដល់យុវជនឱ្យកាន់តែមានចំនួនច្រើនឡើងផងដែរ។
2. តើគម្រោងនេះមានកម្មវិធីសំខាន់ៗអ្វីខ្លះនៅក្នុងនោះ? ហើយកម្មវិធីនីមួយៗផ្តល់សារៈសំខាន់អ្វីខ្លះដល់ប្រជាជនខ្មែរ?
ដើម្បីឱ្យគម្រោងបណ្ណាល័យសម្រាប់ការអភិវឌ្ឍនេះជោគជ័យ និងផ្តល់ផលប្រយោជន៍សំខាន់សម្រាប់ប្រជាជនកម្ពុជាគ្រប់រូបកាន់តែច្រើន យើងមានបង្កើតកម្មវិធីសំខាន់ៗចំនួន 5 ដូចជា កម្មវិធីអភិវឌ្ឍន៍យុវជន កម្មវិធីផ្លាស់ប្តូរសៀវភៅ កម្មវិធីប្រកួតតែងកំណាព្យ ការធ្វើទស្សនកិច្ចនៅបណ្ណាល័យ និងការពង្រឹងសេវាបណ្ណាល័យ។
កម្មវិធីអភិវឌ្ឍន៍យុវជន ត្រូវធ្វើឡើងដើម្បីផ្តល់ឱកាសឱ្យយុវជនដែលស្រឡាញ់ការអាន និងមិនទាន់យល់ពីការអាន រួមគ្នាជួយការងារសង្គម និងបង្កើតកម្មវិធីបណ្តុះបណ្តាលដ៏ទាក់ទាញសំដៅធ្វើឱ្យពួកគេមានភាពសកម្មកាន់តែខ្លាំងដែលឈានទៅក្លាយជាអ្នកអាន និងប្រើប្រាស់សេវាបណ្ណាល័យយ៉ាងសកម្មនៅថ្ងៃអនាគត។
ចំណែកឯកម្មវិធីផ្លាស់ប្តូរសៀវភៅពួកយើងមានគោលបំណងចង់ឱ្យមហាជនឱ្យតម្លៃកាន់តែខ្លាំងលើការអាន និងការបណ្តុះវប្បធម៌ការអាន។ នៅពេលមនុស្សចាប់ផ្តើមចេះជូនសៀវភៅគ្នា មានន័យថា ការចែករំលែកចំណេះដឹងបានក្លាយជារឿងពេញនិយម ដែលរុញសង្គមឱ្យកាន់តែមានភាពវិជ្ជមាន។ ងាកមកការប្រកួតកំណាព្យវិញ ក៏ជាផ្នែកមួយយ៉ាងសំខាន់ផងដែរដែលគម្រោងរបស់យើងយកចិត្តទុកដាក់។ យើងគ្រប់គ្នាឃើញហើយថា បញ្ហានៃការអាននៅកម្ពុជាមិនទាន់ស្ថិតក្នុងស្ថានភាពប្រសើរខ្លាំងនៅឡើយទេ ក្នុងដំណាក់កាលនេះកំណាព្យស្ទើរតែត្រូវបានគេបំភ្លេចហេតុនេះការគាស់រំឭក និងបង្កើតឱ្យមានកម្មវិធីប្រកួតកំណាព្យ អាចជួយឱ្យសាធារណជនមើលឃើញពីភាពល្អឯក និងច្នៃប្រឌិតរបស់កំណាព្យខ្មែរ ដែលអាចផ្តល់ទាំងការកម្សាន្ត និងចំណេះដឹង។
ក្រៅពីនេះយើងក៏មានរៀបចំកម្មវិធីឱ្យយុវជននិងសាធារណជនស្គាល់បណ្ណាល័យឱ្យបានកាន់តែច្រើននៅក្នុងរាជធានីភ្នំពេញ។ តាមពិតយើងមានបណ្ណាល័យច្រើនណាស់ តែអ្វីដែលយើងជាកត្តាប្រឈមនាពេលបច្ចុប្បន្នគឺមនុស្សមិនសូវស្គាល់បណ្ណាល័យទាំងអស់នោះ។ បន្ទាប់ពីយើងនាំប្រជាជនឱ្យស្គាល់បណ្ណាល័យ យើងនឹងឈានមួយជំហានទៀតទៅលើកពង្រឹងគុណភាពបណ្ណាល័យតាមរយៈការផ្តល់ឱកាសឱ្យសាធារណជន ក្រុមហ៊ុន និងភាគីពាក់ព័ន្ធនានាចូលរួមចំណែកបរិច្ចាគធនធានសៀវភៅ សម្ភារ បច្ចេកវិទ្យា និងសកម្មភាពផ្សេងៗទៀតដល់បណ្ណាល័យដែលនៅខ្វះខាត។
3. តើគម្រោងនីមួយៗជួយអ្វីខ្លះដល់កម្ពុជាដើម្បីសម្រេចគោលដៅអភិវឌ្ឍន៍ដោយចីរភាព (SDG) 2030?
តាមពិតទៅគម្រោងទាំងអស់សុទ្ធតែអាចជួយកម្ពុជាឱ្យសម្រេចគោលដៅអភិវឌ្ឍន៍ប្រកបដោយចីរភាពឆ្នាំ 2030ទាំងអស់។ ជាក់ស្តែងដូចយើងបានមើលឃើញហើយថា ការអភិវឌ្ឍប្រកបដោយចីរភាពត្រូវការជាចាំបាច់នូវធនធានមនុស្សដែលមានសក្តានុពល ហេតុនេះកម្មវិធីរបស់យើងបានចូលរួមចំណែកយ៉ាងច្រើនដល់ការអភិវឌ្ឍធនធានមនុស្ស។ ម្យ៉ាងវិញទៀត វិស័យបណ្ណាល័យនេះ គឺមានចែងយ៉ាងច្បាស់នៅក្នុងគោលដៅអភិវឌ្ឍន៍ប្រកបដោយចីរភាពនេះ។ បណ្ណាល័យជាច្រកយ៉ាងសំខាន់ ក្នុងការជំរុញឱ្យមានការចែករំលែកចំណេះដឹងបានយ៉ាងទូលំទូលាយ និងកាត់បន្ថយវិសមភាពសង្គម ព្រោះអ្នកណាក៏អាចចេះដឹងបានដែរប្រសិនបើគាត់ទៅបណ្ណាល័យនៅក្នុងតំបន់របស់គាត់។
4. តើការរៀបចំគម្រោងនេះមានកត្តាប្រឈម នឺងផលលំបាកអ្វីខ្លះ? ហើយក្រុមការងារដោះស្រាយបែបណាខ្លះ?
កត្តាប្រឈមសម្រាប់គម្រោងគឺ បញ្ហាការចូលរួមរបស់យុវជននៅមានកម្រិតនៅឡើយ ហើយការផ្សព្វផ្សាយក៏មិនទាន់ត្រូវបានធ្វើឱ្យបានទូលំទូលាយ។ ជាធម្មតា កម្មវិធី ឬគម្រោងដែលពាក់ព័ន្ធនឹងការអប់រំ ចាំបាច់ត្រូវមានការផ្សព្វផ្សាយ និងពន្យល់យូរអង្វែងទើបទទួលបានជោគជ័យ។ ទោះជាយ៉ាងនេះក្តី ការវិនិយោគជាមួយវិស័យអប់រំ ត្រូវការពេលវេលាយូរ តែក៏បានផ្លែផ្កាយូរអង្វែងផងដែរសម្រាប់សង្គម៕
