សទ្ទានុក្រម​បច្ចេក​ស័ព្ទ​កិច្ចការរដ្ឋបាល ជា​ដំណោះស្រាយ​បញ្ហា​ប្រើពាក្យ​ក្នុង​វិស័យ​រដ្ឋបាល

December 12, 2018​ ម៉ោង 4:16 pm

ការងាររដ្ឋបាល ជា​ការងារ​សំខាន់​មួយ​សម្រាប់​ក្រសួង​ស្ថាប័ន និង​ក្រុមហ៊ុន​ឯកជន​ជាដើម។ នៅ​កម្ពុជាយើង​មានបែបបទ​រដ្ឋបាល​ជាច្រើន​ទម្រង់ និងសម្បូរបែប តែ​ពេលខ្លះ​ការប្រើប្រាស់​ពាក្យ​មិនទាន់​ត្រូវបាន​គេ​យកចិត្តទុកដាក់​ខ្លាំង​នៅឡើយ។

ដោយ​មើលឃើញ​ពី​បញ្ហា​នេះ​ក្រុម​អ្នកជំនាញ​មួយក្រុម​បាននាំគ្នា​បង្កើត​គំនិត​ចងក្រង​ជា​សទ្ទានុក្រម​បច្ចេក​ស័ព្ទ​កិច្ចការរដ្ឋបាល​ឡើង ដើម្បី​ធ្វើការ​ដោះស្រាយ​បញ្ហា​ប្រឈម​មួយចំនួន​ក្នុងការ​ប្រើប្រាស់​ពាក្យ​លើ​វិស័យ​ដ៏​សំខាន់​នេះ។

នៅថ្ងៃនេះ កាសែតឡា​រ៉ែ​ន ពាណិជ្ជ បាន​សម្ភាស​ជាមួយ​លោក ឈិន សីហា អ្នក​រៀបរៀង​សទ្ទានុក្រមបច្ចេក​ស័ព្ទ​កិច្ចការរដ្ឋបាល ដើម្បី​បង្ហាញ​លម្អិត​ពី​សារៈសំខាន់ និងកត្តា​ប្រឈម​នានា​នៃ​ការងារ​នេះ។

1. មូលហេតុ​អ្វីខ្លះ​ដែលនាំឱ្យ​លោក​ចងក្រង និង​រៀបរៀង​សទ្ទានុក្រម​បច្ចេក​ស័ព្ទ​កិច្ចការរដ្ឋបាល​នេះ​ឡើង?
មូលហេតុ​ដែលនាំឱ្យ​ក្រុមការងារ រួមទាំង​ខ្លួន​ខ្ញុំសម្រេចចិត្ត​ក្នុងការ​តាក់តែង​សទ្ទានុក្រម​នេះ​ឡើងពីព្រោះ​យើងខ្ញុំ​ចង់​ដោះស្រាយ​បញ្ហា​នានា​ដែលកន្លងមក​ធ្លាប់​កើតមាន​នៅក្នុង​ប្រទេសរ​បស់​យើង។

បញ្ហា​ប្រឈម​សំខាន់​ទី1 គឺ​ប្រទេស​យើង​មាន​កង្វះខាត​សទ្ទានុក្រម​បច្ចេកទេស ហេតុនេះ​ការបង្កើតសទ្ទានុក្រម​កិច្ចការរដ្ឋបាល​នេះ​ឡើង គឺជា​ការចូលរួមចំណែក​មួយ​ដើម្បីឱ្យ​ការប្រើប្រាស់​វាក្យ​ស័ព្ទ​បច្ចេកទេស​នៅប្រទេស​យើង​កាន់​តែមាន​លក្ខណៈសម្បូរ​បែប​ឡើង។

ចំណុច​សំខាន់​មួយទៀត គឺ​ខ្ញុំ​ចង់​ចូលរួម​វិភាគទានដើម្បី​លើកស្ទួយ​តម្លៃ​នៃ​អក្សរសាស្ត្រ​ខ្មែរលើ​លិខិត​រដ្ឋបាល ព្រោះ​ប្រសិនបើ​មាន​សទ្ទានុក្រម​ត្រឹមត្រូវ ការប្រើប្រាស់​ភាសា​ក៏​នឹងមាន​លក្ខណៈ​ប្រសើរឡើង​ដែរ។

លើស​នេះ​ទៅទៀត យើង​ចង់ឱ្យមាន​ឯកសារ​រួមមួយ​ដើម្បី​ងាយស្រួល​ក្នុងការ​ប្រើប្រាស់​ភាសា​ឱ្យមាន​ការឯកភាព​គ្នា ងាយស្រួល​ពន្យល់​ពាក្យ និង​ប្រើប្រាស់​ពាក្យ​ក្នុង​ភាសា​រដ្ឋបាល។ ចំណែកឯ​ចំណុចចុងក្រោយ​គឺ​ចង់​បង្កើត​ស្នាដៃ​ថ្មី​ជូន​សង្គម​តាមរយៈ ការប្រមូលផ្តុំ​បញ្ញវន្ត​ខ្មែរ​ដែលមាន​ចំណេះដឹងល្អៗមក​ធ្វើ​ការងារ​រួមគ្នា។​

2. តើ​លោក​អាច​បញ្ជាក់​បានទេ ពី​គុណ​តម្លៃ​នៃ​សទ្ទានុក្រម​បច្ចេក​ស័ព្ទ​កិច្ចការរដ្ឋបាល?
តម្លៃ​នៃ​សទ្ទានុក្រម​កិច្ចការរដ្ឋបាល​នេះ គឺ​វា​មាន​បច្ចេក​ស័ព្ទ​ច្រើន​ក្នុងការ​ប្រើប្រាស់ ដោយមាន​ការពន្យល់​ច្បាស់លាស់ ដូច​អ្វីដែល​ខ្ញុំ​បាន​ជម្រាប​ខាងដើម។ ហេតុនេះ​នៅពេល​យើង​មាន​ឯកសារ​ច្បាស់លាស់​យើង​អាចមាន​ចំណុច​ពឹងផ្អែក ដើម្បី​កំណត់ថាតើ​ការប្រើប្រាស់​ពាក្យ​ណា​ខុស ហើយ​ការប្រើប្រាស់​ពាក្យ​ណា​មិនទាន់​ស្រប​នឹង​ស្ថានភាព ឬ​គោលបំណង​នៃ​ឯកសារ​ដែល​យើង​រៀបចំឡើង។ តាមរយៈ​សទ្ទានុក្រម​នេះ ក៏​អាចជួយ​ដល់​វិស័យ​នគរបាល វិស័យ​បរិស្ថាន វិស័យ​ច្បាប់ និង​អក្សរសាស្ត្រ​ជាដើមព្រោះ​យើង​បាន​ពន្យល់​ពាក្យ​លើ​ផ្នែក​រដ្ឋបាល​ទាក់ទង​នឹង​វិស័យ​ទាំងនេះ​ផងដែរ។ ចំណុច​ដែល​សទ្ទានុក្រម​នេះ​ផ្តល់ជូន​ក៏​អាចជួយ​ឱ្យ​ប្រជាជន​ខ្មែរ​ងាយ​យល់​ពី​ភាសាជាតិ និង​ភាសាបរទេស ព្រោះ​សទ្ទានុក្រម​នេះធ្វើ​ឡើងជា​ភាសា​ខ្មែរ អង់គ្លេស និង​បារាំង។ អាស្រ័យហេតុនេះ ប្រជាជន​ខ្មែរ​អាច​នឹង​ចាប់ផ្តើម​ប្រើប្រាស់​ពាក្យ​បច្ចេក​ស័ព្ទ​បាន​យ៉ាង​ត្រឹមត្រូវ និង​ស៊ីជម្រៅ នៅថ្ងៃ​អនាគត​ប្រសិនបើ​យើង​បង្កើត​ឯកសារ​សម្រាប់គាត់​ប្រើប្រាស់។

3. មូលហេតុ​អ្វីខ្លះ​ទើប​លោក​រៀបរៀង​ជា 3ភាសាខ្មែរ-អង់គ្លេស និង​បារាំង?
មូលហេតុ​ដែល​ខ្ញុំ​សរសេរ​ជា 3ភាសា ព្រោះ​ខ្ញុំ​ផ្ទាល់​ក៏​ជា​មន្ត្រីរដ្ឋបាល​ដែរ ពេលខ្លះ​លិខិត​រដ្ឋបាល​មិនមែន​មានតែ​ភាសា​ខ្មែរ​ទេ ហេតុនេះ​ខ្ញុំ​ជា​អ្នកធ្វើការងារ​ផ្ទាល់​ផ្នែក​នេះ ខ្ញុំ​គិតថា ប្រសិនបើ​យើង​ពន្យល់​ជា​ផ្លូវការ​ឱ្យ-បាន​ច្បាស់លាស់​លើ​ភាសា​អង់គ្លេស និង​បារាំង​បន្ថែមទៀត កាន់តែ​ធ្វើឱ្យ​អ្នកធ្វើ​ការងាររដ្ឋបាល​ងាយ​យល់និង​ប្រើប្រាស់​ពាក្យ​បាន​ចំ​ចំណុច​ល្អ។ ក្រៅពីនេះ ដូច​យើង​ឃើញ​ហើយ​ថា​យុវវ័យ​ជំនាន់​ថ្មី​នេះ មាន​អ្នកខ្លះ​អាច​ប្រើប្រាស់​ពាក្យ​អង់គ្លេស​បាន តែ​មិនដឹងថា​និយាយ​ជា​ខ្មែរ​យ៉ាងម៉េច​ឱ្យ​ត្រូវ ហេតុនេះ​ការរៀប​រៀង​ជា 3ភាសា​បែបនេះ អាចធ្វើឱ្យ​គាត់​ដឹងថា​ពាក្យ​នោះ​តាមពិត​ខ្មែរ​យើង​ក៏មានដែរ ហើយ​មាន​លក្ខណៈ​ច្បាស់លាស់​ទៀតផង។

ជា​ចំណុច​ចម្បង​មួយទៀត​នៃ​ការរៀបចំ​សទ្ទានុក្រម​បច្ចេក​ស័ព្ទ​នេះ ក៏​ដើម្បី​ជាការ​អភិរក្សពាក្យចាស់ៗកុំឱ្យ​បាត់បង់ ហើយ​នាំគ្នា​យកមកប្រើ​ប្រាស់​ឱ្យបាន​ត្រឹមត្រូវ ដែល​វា​ក៏​អាចជា​ប្រយោជន៍​សំខាន់​ផងដែរ​សម្រាប់​អ្នកសិក្សា ឬ​អ្នកធ្វើការងារ​ផ្នែក​រដ្ឋបាល​ជាដើម។

4. តើ​ការរៀបចំ​សទ្ទានុក្រម​នេះ​មាន​បញ្ហា​ប្រឈម​អ្វីខ្លះ?
តាមពិត​ធ្វើ​អ្វី​ក៏មាន​កត្តា​ប្រឈម​ដែរ តែ​ចំណុច​សំខាន់​យើង​ត្រូវ​មានចិត្ត​វិជ្ជមាន​ដើម្បី​ដោះស្រាយ​បញ្ហា​ទាំងអស់នោះ។ ប្រសិនបើ​គ្មាន​បញ្ហា គ្មាន​កត្តា​ប្រឈម ក៏​មិនមាន​អ្វី​ត្រូវ​ដោះស្រាយ​ដែរ ហើយ​នៅក្នុង​ដំណោះស្រាយ​នោះ ក៏ត្រូវ​ឆ្លងកាត់​ឧបសគ្គ​ជាច្រើន​ទើប​អាច​ទៅដល់​គោលដៅ។ សម្រាប់​សទ្ទានុក្រម​បច្ចេក​ស័ព្ទ​រដ្ឋបាល​នេះ​វិញ ក៏មាន​ឧបសគ្គ​ច្រើន​គួរសម​ដែរ​ក្នុងការ​ចងក្រង។

បញ្ហាសំខាន់​ទី1 គឺ​ថវិកា​សម្រាប់​ការស្រាវជ្រាវ និង​ប្រមូល​ទិន្នន័យ​បន្ថែម ព្រោះ​ឯកសារ​យើង​មិនទាន់​ចងក្រង ឬ​ប្រមូលផ្តុំ​ឱ្យបាន​មួយកន្លែង​នៅឡើយហេតុនេះ​យើង​ត្រូវ​ចំណាយពេល និង​ធនធាន​ច្រើន​ដើម្បី​ប្រមូល​មកវិញ។ បញ្ហា​មួយ​ផ្សេងទៀត គឺ​ពេលវេលា​ជាក់ស្តែង​ក្នុង​ការធ្វើការងារ​នេះ ព្រោះ​ក្រុមការងារ​ភាគច្រើន​សុទ្ធតែ​រវល់​ក្នុង​ការងាររៀងៗខ្លួន តែ​អ្វីដែល​សំខាន់​គឺ​ប្រមូល​ឆន្ទៈ​រួម​ដើម្បី​សម្រេច​ការងារ​នេះ។ ក្រៅពីនេះ អ្នកជំនាញ​បច្ចេកទេស​ដែល​ជួយ​ក្នុង​ការងារ​នេះ​ក៏​នៅមានកម្រិត​ដែរ ដែលជា​ហេតុ​ធ្វើឱ្យមាន​បញ្ហា​ប្រឈម និង​ទាមទារ​ឱ្យមាន​ការជជែក​គ្នាច្រើន។ ចំពោះ​ការគាំទ្រ​វិញ ស្ថាប័នរដ្ឋ​យើង​នៅ​មិនទាន់មាន​ការគាំទ្រ​ខ្លាំង​នៅឡើយ​ទាំង​ផ្នែក​ថវិកា សម្ភារ និង​ស្មារតី​ជាដើម ដែល​ធ្វើឱ្យ​ក្រុមការងារ​មានការ​លំបាក​ក្នុងការ​បោះពុម្ពផ្សាយ។

5. តើ​លោក​មានមតិ​យោបល់​អ្វីខ្លះ​សម្រាប់​ប្រជាជន​ខ្មែរ?
ជា​យោបល់​របស់ខ្ញុំ​គឺ​សូមឱ្យ​ស្ថាប័ន​ពាក់ព័ន្ធ​នានា មាន​រាជរដ្ឋាភិបាល ស្ថាប័ន​ជំនាញ​នានា និង​ភាគី​ពាក់ព័ន្ធ​លើ​វិស័យ​អក្សរសាស្ត្រ​ចូលរួម​គាំទ្រ​គ្រប់​ស្នាដៃ​ទាំងអស់​ដែល​នាំមក​នូវ​ភាព​រីកចម្រើន​សម្រាប់​ស​ង្គ​ម។ ម្យ៉ាងវិញទៀត សម្រាប់​ប្រជាពលរដ្ឋ​វិញ ក៏​សូម​ងាក​មក​គាំទ្រ ហើយ​ប្រើប្រាស់​ពាក្យ​ខ្មែរ​ឱ្យបាន​ច្រើន ដើម្បី​បង្ហាញ​ពី​ភាព​សម្បូរបែប និង​លក្ខណៈពិសេស​របស់​ភាសា​ជាតិ​របស់​យើង។ ហើយ​ចំពោះ​បញ្ហា​ថវិកា​វិញ រាជរដ្ឋាភិបាល​គួរ​បង្កើត​ស្ថាប័ន ឬ​មូលនិធិ​ដើម្បី​ជួយ​ជ្រោមជ្រែង​អ្នកស្រាវជ្រាវ ជាពិសេស​អ្នកតាក់តែង​សទ្ទានុក្រម ដើម្បី​លើកទឹកចិត្ត​ឱ្យមាន​ការបង្កើត​ស្នាដៃល្អៗឱ្យបាន​កាន់តែ​ច្រើនឡើង៕