ពេញមួយឆ្នាំ ពេលវេលាសំខាន់ដែលមនុស្សម្នាក់ៗតែងតែយកចិត្តទុកដាក់សម្រាប់រៀបចំគម្រោងអភិវឌ្ឍន៍ជីវិតរស់នៅ ស្ថាប័ន ឬការងារជាដើម គឺពេលចុងឆ្នាំ និងដើមឆ្នាំ។ ពេលវេលានេះជាពេលល្អមួយដើម្បីពិចារណាលើការរៀបចំផ្នត់គំនិត និងសកម្មភាពដើម្បីពង្រឹងសមត្ថភាពទាំងផ្លូវកាយ និងផ្លូវចិត្តសម្រាប់បង្កើតទំនុកចិត្តលើការសម្រេចចិត្តធ្វើការងារសំខាន់ៗឆ្ពោះទៅកាន់ភាពរីកចម្រើន។
អ្នកដោះស្រាយវិបត្តិ និងធ្វើការងារច្រើនជាមួយយុវជន កញ្ញានាង សុវាតនា ដែលអ្នកគ្រប់គ្នាស្គាល់ថាជា DJ Nana បានលើកឡើងថា មនុស្សគ្រប់គ្នា ជាពិសេសស្ត្រីត្រូវចាប់ផ្តើមហ៊ានបង្កើតការសម្រេចចិត្តជាវិជ្ជមានសម្រាប់ដំណើរជីវិតខ្លួនឯង ហើយលុបបំបាត់ឱ្យអស់នូវគំនិតអវិជ្ជមានដែលបង្អាក់ដល់ភាពថ្កុំថ្កើងរបស់យើង។ មនុស្សមិនតិចទេដែលបណ្តោយឱ្យភាពភ័យខ្លាចរារាំងមិនឱ្យធ្វើសកម្មភាពធំៗ និងសំខាន់ៗ បើទោះបីជាគាត់មានសមត្ថភាពគ្រប់គ្រាន់ដើម្បីធ្វើវាហើយក៏ដោយ។ មានមនុស្សខ្លះចង់ធ្វើដូចអ្នកដទៃ ចង់ក្លាយជាមនុស្សមានឈ្មោះល្អ ចង់ក្លាយជាអ្នកនិយាយសាធារណៈជាដើម តែពួកគេមិនព្រមចាប់ផ្តើមសកម្មភាពនោះសោះ ព្រោះតែងតែខ្លាចនេះខ្លាចនោះជានិច្ច។
កញ្ញា នាង សុវាតនា បាននិយាយថា៖“មានអ្នកខ្លះចង់ឡើងនិយាយលើឆាកហើយគិតថា រីករាយខ្លាំងណាស់ប្រសិនបើបាននិយាយឱ្យគេស្តាប់នៅពីមុខមនុស្សច្រើនៗ តែចិត្តខ្លួនឯងចេះតែឃាត់មិនព្រមឱ្យខ្លួនឯងសាកល្បងសោះ ព្រោះពេលខ្លះខ្លាចនិយាយមិនល្អ ពេលខ្លះនិយាយទៅអ្នកដទៃស្តាប់មិនយល់ ខ្លាចសំឡេងមិនពីរោះ ខ្លាចញ័រដៃញ័រជើងជាដើម។ ស្ថានភាពបែបនេះលំបាកខ្លាំងណាស់សម្រាប់យើងម្នាក់ៗនៅពេលបេះដូងប្រាប់ថា យើងចង់ឡើងទៅលើឆាក តែរាងកាយវាមិនព្រមទៅ”។
អ្នកលើកទឹកចិត្តខាងលើបានលើកឡើងផងដែរថា ល្មមដល់ពេលហើយដែលយើងគ្រប់គ្នាត្រូវបញ្ឈប់ភាពភ័យខ្លាចដែលនៅក្នុងខ្លួនរបស់យើង ព្រោះតាមពិតទៅប្រសិនបើយើងមានទំនុកចិត្តលើខ្លួនឯង ហើយហ៊ានធ្វើសកម្មភាពដែលយើងចង់ធ្វើ ឬធ្លាប់ស្រមៃចង់ធ្វើ ប្រហែលជាយើងអាចធ្វើបានលើសពីការស្មានទុករបស់យើងទៅទៀតផង។ កញ្ញាបន្ថែមថា តាមការកត់-សម្គាល់របស់ខ្លួន គឺមនុស្សម្នាក់ៗមានសមត្ថភាពលើសពីការគិតរបស់យើង 10ដង មានន័យថា យើងអាចធ្វើរឿងជាច្រើនបានដែលយើងនឹកស្មានមិនដល់ ហេតុ-នេះចូរកុំខ្លាច ហើយកុំបារម្ភ នៅពេលជាក់ស្តែងអ្វីៗអាចល្អខ្លាំងជាងការព្រួយបារម្ភរបស់យើងទៅទៀត។
កញ្ញា នាង សុវាតនា បាននិយាយថា៖ “ពីមុនខ្ញុំគ្រាន់តែដឹងខ្លួនឯងថា ធ្វើកម្មវិធីវិទ្យុ ឱ្យតែនិយាយទៅ គេស្តាប់បាន មិនភ័យរឿងគេដេញចេញទេ តែពេលចេញមកខាងក្រៅមានមិត្តភក្តិ និងមនុស្សជាច្រើនផ្សេងទៀតគាត់សរសើរ ហើយមើលឃើញលើសពីអ្វីដែលខ្ញុំគិតទៅទៀត។ ក្រោយៗមកទៀតខ្ញុំបន្តធ្វើវីដេអូ ហើយពេលនោះក៏មិនខុសពីលើកមុនៗដែរ។ ដំបូងខ្ញុំគិតថាត្រឹមតែគេទទួលយកបានគឺគ្រប់គ្រាន់ហើយ តែអ្វីៗវាហួសពីការស្មានទៅទៀត នៅពេលដែលប្រិយមិត្តជាច្រើន និងអ្នកគ្រប់គ្នាមើលឃើញថា វាមានសារៈសំខាន់។ ចាប់ផ្តើមពីចំណុចនោះខ្ញុំបន្តពិសោធ និងសង្កេតឃើញថា ខ្លួនយើងម្នាក់ៗមានសមត្ថភាពខ្លាំងជាងអ្វីដែលយើងគិតទៅទៀតនៅក្នុងក្រសែភ្នែកអ្នកដទៃ ហើយវាពិតជាបែបហ្នឹងមែន។ ហេតុនេះសូមបង្វែរការភ័យខ្លាច មកចាប់ផ្តើមគិតថា យើងអាចធ្វើបានល្អ ដើម្បីផ្តល់ទំនុកចិត្តដល់ខ្លួនឯងដើម្បីបន្តសកម្មភាពសំខាន់ៗជាច្រើនទៀត”។
នាយករងផ្នែកបណ្តុះបណ្តាលនៃក្រុមហ៊ុនធានារ៉ាប់រង AIA លោក សោម សុធា បានលើកឡើងថា ក្នុងខ្លួនមនុស្សយើងម្នាក់ៗមានសមត្ថភាពច្រើនណាស់ដែលយើងប្រើវាមិនទាន់អស់ ហេតុនេះត្រូវប្រឹងប្រែងឱ្យបានខ្លាំងដើម្បីប្រើប្រាស់សមត្ថភាពដែលយើងមានសម្រាប់ជាប្រយោជន៍។ ប្រសិនបើយើងហ៊ានស្រមើស្រមៃ ហ៊ានរីករាយជាមួយនឹងចំណង់វិជ្ជមាននានានោះយើងនឹងអាចមានកម្លាំងជំរុញជាច្រើនដើម្បីធ្វើឱ្យយើងកាន់តែក្លាហានឡើងៗដើម្បីសម្រេចវាឱ្យបាន។ លោកសុធាបានបញ្ជាក់ផងដែរថា ទោះបីជាក្នុងខ្លួនមនុស្សយើងម្នាក់ៗមានសមត្ថភាពវិជ្ជមានច្រើនក៏ដោយ តែយើងក៏មានសមត្ថភាពអវិជ្ជមានមិនតិចដែរ។ ហេតុនេះដើម្បីភាពរីកចម្រើន យើងត្រូវចេះបង្កើនសមត្ថភាពវិជ្ជមាន ហើយកាត់បន្ថយសមត្ថភាពអវិជ្ជមាន។
លោក សោម សុធា និយាយថា៖ “យើងម្នាក់ៗមានសមត្ថភាពច្រើនណាស់ តែពេលខ្លះយើងម្នាក់ៗក៏ច្បាស់ផងដែររឿងសុំលុយម្តាយឪពុកចាយ រឿងកុហកខ្លួនឯង និងរឿងជាច្រើនផ្សេងទៀត ទន្ទឹមនឹងយើងមានសមត្ថភាពធ្វើការងារសំខាន់ៗដើម្បីភាពរុងរឿង”។
លោក សុធា បញ្ជាក់ថា ប្រការល្អ គឺយើងគួរតែចាប់ផ្តើមស្វែងរកចំណុចខ្វះខាតរបស់ខ្លួនឱ្យឃើញបន្ទាប់មកព្យាយាមកែសម្រួលវាដោយបង្កើនចំណុចខ្លាំងដើម្បីរក្សាបាននូវភាពវិជ្ជមានសម្រាប់ការរស់នៅ។ ប្រសិនបើយុវជនយើងម្នាក់ៗ ចេះកែប្រែចំណុចអវិជ្ជមាន និងជំនួសវិញដោយចំណុចវិជ្ជមាននោះ យើងនឹងអាចកាត់បន្ថយបញ្ហាក្នុងការសិក្សា និងការរស់នៅបន្តិចម្តងៗ ហើយកែប្រែខ្លួនយើងពីមនុស្សមិនល្អ មកក្លាយជាអ្នកមានសមត្ថភាពយ៉ាងលឿនបានយ៉ាងងាយស្រួល៕
