វិស័យការងារជាវិស័យដ៏សំខាន់មួយក្នុងសង្គមនៅគ្រប់ប្រទេសទាំងអស់លើពិភពលោក ព្រោះវិស័យនេះជាប់ពាក់ព័ន្ធដោយផ្ទាល់ទៅនឹងសេដ្ឋកិច្ច ការអភិវឌ្ឍ និងការរស់នៅរបស់ប្រជាជន ហេតុនេះហើយទើបគ្រប់ប្រទេសទាំងអស់បានយកចិត្តទុកដាក់លើវិស័យនេះ ដោយការរៀបចំច្បាប់ និងលិខិតគតិយុត្តទៅតាមស្ថានភាពនៃប្រទេសរៀងៗខ្លួន ដើម្បីគ្រប់គ្រងដោះស្រាយវិវាទ និងជំរុញឱ្យវិស័យការងារទាំងមូលមានភាពប្រសើរឡើងជាលំដាប់។
នៅកម្ពុជា ការអប់រំពីច្បាប់ការងារក៏ជាចំណុចអាទិភាពមួយដើម្បីជំរុញឱ្យវិស័យដ៏មានសារៈសំខាន់នេះកាន់តែមានលក្ខណៈប្រសើរឡើង ហើយធ្វើឱ្យជម្លោះក្នុងក្រុមហ៊ុន សហគ្រាស មានការថយចុះ។ ដោយមើលឃើញពីសារៈសំខាន់នៃការអប់រំច្បាប់ការងារ ក្រុមប្រឹក្សាអាជ្ញាកណ្តាល ដែលជាស្ថាប័នដោះស្រាយវិវាទការងារតាមរយៈការផ្សះផ្សា និងមជ្ឈត្តកម្មបានចេញផ្សាយសៀវភៅកម្រងឯកសារច្បាប់ស្តីពីការងារ ដើម្បីបង្កភាពងាយស្រួលដល់ប្រជាជនកម្ពុជាគ្រប់ភាគី ទាំងនិយោជិត និយោជក និងស្ថាប័នសាធារណៈជាដើម ក្នុងការស្រាវជ្រាវ ឬស្វែងយល់ឱ្យបានកាន់តែច្បាស់ពីច្បាប់ និងឯកសារគតិយុត្តថ្មីៗពាក់ព័ន្ធនឹងការងារ។
នៅសប្តាហ៍នេះកាសែតឡារ៉ែនពាណិជ្ជ បានធ្វើបទសម្ភាសដោយផ្ទាល់ជាមួយលោកស្រី អាន វីរៈប្រធានផ្នែកបណ្តុះបណ្តាល និងទំនាក់ទំនងសាធារណៈនៃមូលនិធិក្រុមប្រឹក្សាអាជ្ញាកណ្តាល ដើម្បីបង្ហាញចំណុចសំខាន់ៗពាក់ព័ន្ធនឹងការចងក្រងសៀវភៅកម្រងឯកសារច្បាប់ស្តីពីការងារ។
1. តើលោកស្រីអាចបញ្ជាក់បានទេថា ភាគីណាខ្លះជាអ្នកចូលរួមចំណែកក្នុងការចងក្រងសៀវភៅកម្រងឯកសារច្បាប់ស្តីពីការងារនេះឡើង?
ភាគីសំខាន់ៗក្នុងការចងក្រងសៀវភៅកម្រងឯកសារច្បាប់ស្តីពីការងារនេះ គឺមូលនិធិក្រុមប្រឹក្សាអាជ្ញាកណ្តាល ដែលជាអង្គការក្រៅរដ្ឋាភិបាលមានតួនាទីក្នុងការផ្តល់ជំនួយផ្នែកបច្ចេកទេសដល់ក្រុមប្រឹក្សាអាជ្ញាកណ្តាល និងលេខាធិការដ្ឋានរបស់ក្រុមប្រឹក្សាអាជ្ញាកណ្តាល។ ស្ថាប័នទាំង2 នេះ រួមគ្នាចងក្រងក្នុងគោលបំណងសម្រួលដល់ភាគីពាក់ព័ន្ធទាំងអស់មានក្រសួងស្ថាប័ន កម្មករនិយោជិត និយោជក និងភាគីសំខាន់ៗមួយចំនួនទៀតក្នុងការស្វែងរកប្រភពឯកសារផ្លូវការពាក់ព័ន្ធនឹងច្បាប់ការងារ ដូចជាព្រះរាជក្រឹត្យ អនុក្រឹត្យ សេចក្ដីប្រកាស សារាចរ និងសេចក្តីជូនដំណឹងជាដើម។
2. តើមូលហេតុសំខាន់ៗអ្វីខ្លះដែលធ្វើឱ្យក្រុមការងារសម្រេចចិត្តចងក្រងសៀវភៅនេះឡើង?
តាមពិតទៅដូចបានបញ្ជាក់ខាងលើហើយថាយើងចងក្រងសៀវភៅនេះ គឺដើម្បីសម្រួលដល់ការស្វែងរកឯកសារ និងធ្វើឱ្យកាន់តែងាយស្រួលសម្រាប់ភាគីទាំងអស់ ព្រោះគាត់កាន់តែសៀវភៅមួយក្បាលអាចក្តោបនូវឯកសារផ្លូវការជាច្រើនពាក់ព័ន្ធនឹងការងារ។ មែនទែនទៅ យើងក៏អាចស្វែងរកកម្រងឯកសារទាំងអស់នោះបានពីក្រសួង ឬពីគេហទំព័របានដែរ តែពេលខ្លះការស្វែងរកពីក្រសួងគឺឯកសារទាំងអស់នោះត្រូវការពេលវេលាក្នុងការស្វែងរកពីនាយកដ្ឋានជំនាញម្តងមួយៗ ព្រោះឯកសារមាននៅរាយៗដោយឡែកមិនទាន់ផ្គុំបញ្ចូលគ្នាតែមួយនៅឡើយ។
នៅក្នុងសៀវភៅកម្រងឯកសារច្បាប់ស្តីពីការងារយើងមានប្រមូលឯកសារចាស់ៗមួយចំនួនផងដែរដែលឯកសារខ្លះចេញតាំងពីឆ្នាំ1994 ហើយនៅតែអនុវត្តជាធរមានរហូតដល់ពេលបច្ចុប្បន្ន។ ក្នុងនោះឯកសារខ្លះមានការខូចខាត ឬលំបាកមើលក៏យើងយកមកសម្រួលដើម្បីឱ្យមានភាពងាយស្រួលអានឡើងវិញ។
ម្យ៉ាងវិញទៀតឯកសារនេះក៏បានសម្រួលច្រើនផងដែរដល់សមាជិកក្រុមប្រឹក្សាអាជ្ញាកណ្តាល ព្រោះសមាជិកម្នាក់ៗត្រូវការឯកសារច្បាប់ទាំងអស់នោះដើម្បីជាគោលក្នុងការដោះស្រាយវិវាទ។ ចំពោះកម្មករឬបុគ្គលិកទូទៅវិញ ថ្វីដ្បិតតែកម្រងឯកសារទាំងអស់នេះជាច្បាប់មិនមែនជាប្រភេទឯកសារសម្រាយ ឬបកស្រាយពីច្បាប់ តែគាត់នៅតែអាចយល់បានពីចំណុចសំខាន់ៗ ដូចជាការបើកប្រាក់ឈ្នួល និងលក្ខខណ្ឌមួយចំនួនទៀត។ នៅពេលគ្រប់ភាគីមានការយល់ពីច្បាប់ការងារ ពេលនោះជម្លោះការងារក៏នឹងកាត់បន្ថយ ហើយស្ថាប័ននីមួយៗនឹងអាចមានភាពងាយស្រួលអភិវឌ្ឍផងដែរ ព្រោះប្រសិនបើមិនយល់ពីច្បាប់ការងារ មានរឿងអ្វីកើតឡើង និយោជិតអាចនឹងសម្រេចចិត្តឈប់ដែលបង្កជាបញ្ហា តែប្រសិនបើពួកគាត់យល់ គាត់នឹងអាចព្យាយាមដោះស្រាយតាមផ្លូវច្បាប់ឱ្យអស់ពីលទ្ធភាព។ ក្រៅពីនេះ វាក៏ជាទុនមួយសម្រាប់កម្មករ-កម្មការិនី ឬបុគ្គលិកក្នុងការស្វែងយល់ពីច្បាប់ការងារ ប្រសិនបើគាត់មើលហើយមិនយល់ គាត់អាចប្រឹក្សាជាមួយអ្នកដែលមានការយល់ដឹងជាងគាត់បានលើវិស័យនេះ។
3.តើការចងក្រងសៀវភៅកម្រងឯកសារច្បាប់ស្តីពីការងារ នេះមានផលលំបាក និងកត្តាប្រឈមអ្វីខ្លះ?
បញ្ហាប្រឈមរបស់យើង គឺបញ្ហាបច្ចេកទេសហើយពេលលំបាកខ្លាំងជាងគេ គឺការបោះពុម្ពលើកទី1 និងសូមបញ្ជាក់ផងដែរថា នេះគឺជាការបោះពុម្ពលើកទី5 ហើយសម្រាប់ឆ្នាំនេះ។ សម្រាប់ការបោះពុម្ពលើកទី1 យើងត្រូវការចងក្រងឯកសារចាស់ៗមួយចំនួន ដូចជាឯកសារច្បាប់ខ្លះមានតាំងពីឆ្នាំ 1994 ដែលឯកសារទាំងអស់នោះ ខ្លះមានភាពរលុបៗ ហើយក្រុមការងារត្រូវធ្វើការវាយអក្សរឡើងវិញទាំងស្រុង និងចំណាយពេលវេលាយ៉ាងយូរដើម្បីផ្ទៀងផ្ទាត់ដោយប្រុងប្រយ័ត្នដើម្បីធានាថា វាមិនខុសពីច្បាប់ដើម។ ហើយចំពោះឯកសារមួយចំនួនទៀតដែលមានត្រាក្រសួង ឬជាឯកសារថ្មីៗយើងត្រូវស្គែនវាដើម្បី Design និងកាត់តឱ្យមើលទៅឃើញច្បាស់។
ចំណុចសំខាន់មួយផ្សេងទៀតគឺ ការរៀបចំទំព័រព្រោះឯកសារជាច្រើនជារូបភាព ហើយយើងត្រូវរៀបចំឯកសារទាំងអស់នោះតាមប្រភេទនៃលិខិតគតិយុត្តពីធំមកតូច ហេតុនេះពេលចូលក្នុងរោងពុម្ពវាអាចលោតខុសទំព័រ ឬខុសពីការកំណត់ក្នុងមាតិកាដែលទាមទារឱ្យមានក្រុមតាមដានសាចុះសាឡើង។ ដូចយើងបានបញ្ជាក់ហើយថា គោលបំណងរបស់យើងគឺចង់សម្រួលដល់អ្នកប្រើប្រាស់ឯកសារ ប្រសិនបើមានបញ្ហាទំព័រ គាត់អាចលំបាកក្នុងការស្វែងរក ហេតុនេះយើងត្រូវធ្វើការដោយប្រុងប្រយ័ត្នបំផុត។
បញ្ហាលំបាកមួយផ្សេងទៀត គឺការផ្ទៀងផ្ទាត់ និងការសម្របសម្រួលជាមួយក្រសួង។ តាមពិតទៅក្រសួងគាត់ផ្តល់ការសហការល្អ ព្រោះឯកសារខ្លះក្រសួងបានដាក់ក្នុងគេហទំព័ររបស់គាត់ជាសាធារណៈតែក្នុងករណីខ្លះគុណភាពល្អ មើលទៅមិនច្បាស់ យើងត្រូវទាក់ទងទៅក្រសួងភ្លាមដើម្បីស្វែងរកប្រភពឯកសារដែលមានគុណភាពល្អភ្លាម។
4. តើរាល់ការបោះពុម្ពថ្មីម្តងៗមានការប្រែប្រួលអ្វីខ្លះពីឆ្នាំចាស់?
រាល់ការបោះពុម្ពថ្មី គឺយើងតែងតែធ្វើបច្ចុប្បន្នភាព ដោយលុបឯកសារទាំងឡាយណាដែលនិរាករណ៍ ហើយបន្ថែមឯកសារដែលក្រសួងទើបចេញថ្មីៗបន្ថែមទៀត។ ក្នុងនោះដែរ យើងក៏មានការប្រុងប្រយ័ត្នផងដែរ ដោយយើងត្រូវតែធ្វើការផ្ទៀងផ្ទាត់ឱ្យបានច្បាស់លាស់ ព្រោះមានឯកសារមួយចំនួនមិនត្រូវបាននិរាករណ៍ទាំងអស់នោះទេ ស្របពេលដែលមានឯកសារថ្មីប្រកាសថា និរាករណ៍ផ្នែកខ្លះតែប៉ុណ្ណោះហេតុនេះយើងត្រូវតែដាក់ទាំង2។
5. ប្រសិនបើសាធារណជនចង់បានសៀវភៅកម្រងឯកសារច្បាប់ស្តីពីការងារ នេះ តើគាត់អាចស្វែងរកនៅកន្លែងណាបាន?
សាធារណជនអាចស្វែងរកសៀវភៅ កម្រងឯកសារច្បាប់ស្តីពីការងារ បាននៅការិយាល័យរបស់ក្រុមប្រឹក្សាអាជ្ញាកណ្តាល ដែលយើងតែងតែជូនដំណឹងទៅគាត់មុនពេលបោះពុម្ពផ្សាយសម្រាប់ការទទួលកក់។ ចំពោះឯកសារនេះយើងមិនបានបោះពុម្ពច្រើនពាន់ក្បាលទេ យើងបោះពុម្ពម្តងតែ 500ក្បាលប៉ុណ្ណោះហើយក្នុងនោះ មួយចំនួនយើងចែកជូនដល់ក្រុមប្រឹក្សាអាជ្ញាកណ្តាល បុគ្គលិករបស់យើងទាំងអស់ និងផ្ញើទៅក្រសួង។ ប្រសិនបើគាត់មិនចង់ចំណាយ សាធារណជនក៏អាចប្រមូលឯកសារដោយខ្លួនឯងតាមរយៈគេហទំព័រ ឬអាចចូលមើលបាននៅក្នុងបណ្ណាល័យរបស់យើង។
6. តើលោកស្រីមានមតិអ្វីខ្លះជុំវិញការបោះពុម្ពផ្សាយសៀវភៅកម្រងឯកសារច្បាប់ស្តីពីការងារនេះ?
ចំពោះសៀវភៅកម្រងឯកសារច្បាប់ស្តីពីការងារដែលយើងចងក្រងនេះ ក្រុមការងារខ្ញុំសង្ឃឹមថា ឯកសារនេះនឹងក្លាយជាទុន ក៏ដូចជាធនធានសំខាន់មួយដល់អ្នកប្រើប្រាស់ឱ្យកាន់តែមានភាពងាយស្រួលក្នុងការអនុវត្តច្បាប់ការងារ។ យើងសង្ឃឹមថា យើងនឹងធ្វើបច្ចុប្បន្នភាពនៃការងារនេះដើម្បីឱ្យកាន់តែទៀងទាត់ និងប្រសើរឡើងសម្រាប់អ្នកប្រើប្រាស់ទាំងអស់គ្នា។ ប្រសិនបើសាធារណជនមានយោបល់ដើម្បីកែសម្រួលឯកសារនេះ យើងស្វាគមន៍ចំពោះមតិក្នុងការស្ថាបនាឱ្យកាន់តែប្រសើរឡើង។ ហើយយើងចង់ជម្រាបផងដែរថា ឯកសារប្រកាសផ្សេងៗក្នុងសៀវភៅនេះ សាធារណជនក៏អាចស្វែងរកបានតាមគេហទំព័ររបស់ក្រសួង និងគេហទំព័ររបស់មូលនិធិក្រុមប្រឹក្សាអាជ្ញាកណ្តាលបានផងដែរ៕
