ក្បែរៗ 1,000ដុល្លារ…តម្លៃ SONY Xperia 1 អេក្រង់ 4K ដំបូងគេបង្អស់

March 14, 2019​ ម៉ោង 3:32 pm

ក្រុមហ៊ុន Sony បាន​ដាក់បង្ហាញ​ស្មាតហ្វូន​ម៉ូដែល​ថ្មីស៊េរី Xperia 1 ដែលបំពាក់​អេក្រង់ OLED 4K ដំបូង​គេ​បង្អស់​ក្នុងពិភព​លោក ទំហំ 6.5អ៊ិញ ​មាន​មាត្រដ្ឋាន 21:9 ​ជាមួយ​កាមេរ៉ា 3គ្រាប់​នៅខាងក្រោយជា​លើក​ដំបូង​របស់ខ្លួន​ និងបាន​ដាក់​ឱ្យ​កុម្ម៉ង់​ទិញបាន​ហើយ។

​អេក្រង់ Xperia 1 ជា​ប្រភេទ​អេក្រង់ CinemaWide ​ទំហំ 6.5អ៊ីញ ​បង្ហាញ​រូបភាព​ក្នុង​កម្រិត 3,840 x 1,644 ភិកសែល គាំទ្រ​ HDR (BT.2020) អមដោយ​ប្រព័ន្ធ​សំឡេង Dolby Atmos។

មាន​ថាមពល​ថ្ម 3,330mAh ដោយ​​ខាងមុខ និងខាង​ក្រោយ​ការពារ​ដោយ​ស្រទាប់​កញ្ចក់ Gorilla Glass 6 ​មានក្រោះ​ការពារ និងការពារ​ទឹក​ស្តង់ដា IP68 ខណៈ​ប្រព័ន្ធ​ស្គែន​ខ្ចៅ​ដៃ​លាក់​ទុក​នៅ​ចំហៀង ប៉ុន្តែ​ចែក​ដាច់​ចេញ​ពី​ប៊ូតុង Power។

មានកាមេរ៉ា​ 3គ្រាប់​នៅ​ខាង​ក្រោយ ដោយ​គ្រាប់​ទី​1 ​មាន Sensor ទំហំ 1/2.6” ជាមួយ​មុខងារ OIS+EIS និង Dual Pixel Autofocus ខណៈ​គ្រាប់​ទី​2 ​ជា​ប្រភេទ Telephoto Lens 2x និង​គ្រាប់​ទី​3 ​ជា Ultra-Wide Lens។ ប្រើប្រាស់​បន្ទះ​ឈីប​ជំនាន់​ចុង​ក្រោយ Qualcomm Snapdragon 855  មាន​ RAM ទំហំ 6GB អមដោយ​អង្គ​ផ្ទុក 64/128GB ជាមួយ​ការ​បន្ថែម microSD Card បានដល់ 512GB។

SONY Xperia 1 នឹងមាន​តម្លៃ​ចាប់​ពី 999ដុល្លារ(តម្លៃ​ក្រៅ​ប្រទេស) នៅ​លើ​វេបសាយ Amazon៕