នៅក្នុងសម័យបច្ចេកវិទ្យានេះ គ្មានផ្នែកណាមួយដែលអវត្តមានមិនប្រើប្រាស់បច្ចេកវិទ្យានោះទេ មិនថាអាជីវកម្មការងារទូទៅ និងការសិក្សាជាដើម។ បច្ចេកវិទ្យាត្រូវបានគេប្រើប្រាស់ដើម្បីសម្រួលលើការងារជាច្រើន ជាពិសេសលើការអប់រំ ដើម្បីឱ្យវាក្លាយជាប្រភពចែករំលែកចំណេះដឹង កាត់បន្ថយចំណាយ និងចំណេញពេលវេលាក្នុងការសិក្សា។ តែទោះបីជាយ៉ាងនេះក្តី ក៏មានយុវជនមិនតិចទេបានលើកឡើងពីបញ្ហាប្រឈមស្រដៀងគ្នា ពីផលលំបាកនៃការគ្រប់គ្រងខ្លួនឯងឱ្យប្រើប្រាស់បច្ចេកវិទ្យាក្នុងផ្លូវដែលត្រឹមត្រូវ និងមិនប៉ះពាល់ដល់ការសិក្សា។
រដ្ឋមន្ត្រីក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ ជួនណារ៉ុនបានលើកឡើងថា យុវវ័យបច្ចុប្បន្ន រស់នៅក្នុងយុគសម័យបច្ចេកវិទ្យាដែលគ្រប់គ្នាមានប្រើប្រាស់ Smart Phone ដែលសុទ្ធតែប្រើប្រាស់បច្ចេកវិទ្យាទំនើបទាំងអស់ តែនៅក្នុងឧបករណ៍អេឡិចត្រូនិកទាំងអស់នោះមានកម្មវិធីជាច្រើនដែលអូសទាញយុវវ័យឱ្យចេញឆ្ងាយពីការសិក្សា។ យុវវ័យជាច្រើនបានជក់ចិត្តជាមួយបណ្តាញសង្គម ហើយលេងបណ្តាញសង្គមរហូតភ្លេចការរៀនសូត្រ ខណៈខ្លះទៀតជក់ជាមួយការកម្សាន្តច្រើនជាងការអប់រំជាដើម។ ហេតុនេះដើម្បីធ្វើឱ្យយើងចំណេញពេលវេលា និងទទួលបានការអប់រំកាន់តែប្រសើរ យុវវ័យគួរដឹងខ្លួនឱ្យច្បាស់ថា យើងត្រូវប្រើប្រាស់បច្ចេកវិទ្យាដើម្បីការរៀនសូត្រ ហើយងាកមកស្វែងរកប្រភពព័ត៌មានចំណេះដឹងឱ្យបានច្រើនជាងការគ្រាន់តែកម្សាន្តដើម្បីទទួលបានឱកាសក្នុងការអភិវឌ្ឍសមត្ថភាពឱ្យបានល្អ។
បច្ចុប្បន្ននេះ ក្រសួងអប់រំ យុវជន និងកីឡា ក៏បានបង្កើតកម្មវីធីចែករំលែកចំណេះដឹងជាច្រើនតាមបែបបច្ចេកវិទ្យាដើម្បីឱ្យសិស្សបានសិក្សាកាន់តែងាយស្រួល មានភាពច្បាស់លាស់ជាងមុន និងចំណាយតិចជាងមុន។ កម្មវីធីអប់រំ និងបង្រៀនជាច្រើនត្រូវបានចែករំលែកក្នុងបណ្តាញសង្គម Facebook, YouTube និងដាក់បញ្ចូលទៅក្នុងបណ្តាញបច្ចេកវិទ្យាជាច្រើនទៀតដើម្បីជំនួយស្មារតីដល់សិស្សក្នុងការសិក្សា ទាំងទីក្រុង និងជនបទ។
ឯកឧត្តម ហង់ ជួនណារ៉ុន បានមានប្រសាសន៍ថា៖ “ជាក់ស្តែងថ្មីៗនេះ យើងបានបង្កើតកម្មវិធីសមមូលអប់រំកម្រិតមូលដ្ឋាន តាមប្រព័ន្ធអុីនធើណិតដែលហៅកាត់ថា BEEP ដើម្បីឱ្យសិស្សងាកពីការប្រើប្រាស់បច្ចេកវិទ្យាមិនត្រឹមត្រូវ មករៀនសូត្រដើម្បីអភិវឌ្ឍសមត្ថភាពវិជ្ជាជីវៈ និងចំណេះដឹងតាមរយៈបច្ចេកវិទ្យាវិញម្តង”។
រដ្ឋមន្ត្រីអប់រំក៏បានជំរុញលើកទឹកចិត្តដល់យុវវ័យផងដែរឱ្យឆ្លៀតពេលវេលាមួយចំនួនពីការប្រើប្រាស់បច្ចេកវិទ្យាមកលើកកម្ពស់វប្បធម៌អំណាន ហើយប្រើប្រាស់ពេលវេលាដើម្បីអានឱ្យបានច្រើនដើម្បីចូលរួមអភិវឌ្ឍចំណេះដឹងសម្រាប់ប្រកួតប្រជែងជាមួយយុវជននៃបណ្តាប្រទេសនានាក្នុងតំបន់ផងដែរ។
យុវជន ហម សុខនី ជានិស្សិត និងជាសហស្ថាបនិកបណ្ណាគារ SN Book store បានឱ្យដឹងថា ការប្រើប្រាស់បច្ចេកវិទ្យាពិតជាមានផលចំណេញច្រើនជាងមុនមែន ព្រោះបច្ចុប្បន្ននេះ យើងគ្រប់គ្នាស្ទើរតែលែងមានរឿងឆ្ងល់ទៀតហើយ ព្រោះបច្ចេកវិទ្យាបានផ្តល់ចម្លើយស្ទើរគ្រប់យ៉ាងដល់មនុស្សជុំវិញពិភពលោក។ តាមរយៈបច្ចេកវិទ្យា សៀវភៅ និងប្រភពចំណេះដឹងគ្រប់យ៉ាងក៏ចាប់ផ្តើមត្រូវបានគេចែកចាយយ៉ាងទូលំទូលាយ ដែលធ្វើឱ្យអ្នកមិនសូវមានលទ្ធភាពច្រើនក៏អាចមានឱកាសក្នុងការអានបានដែរ។ លើសពីនេះទៅទៀត មនុស្សម្នាក់ៗអាចភ្ជាប់ទំនាក់ទំនងជាមួយអ្នកជំនាញយ៉ាងងាយ តាមបច្ចេកវិទ្យាតែវាទាមទារការគ្រប់គ្រងឱ្យបានល្អ ព្រោះប្រសិនបើយើងគ្រប់គ្រងបច្ចេកវិទ្យាមិនបានល្អ យើងនឹងបាត់បង់ឱកាសអភិវឌ្ឍ ហើយថែមទាំងធ្លាក់ដល់ដំណាក់កាលអាក្រក់ថែមទៀតផង។
យុវជន ហម សុខនី បាននិយាយថា៖ «នៅក្នុងទូរស័ព្ទ Smart phone មួយមានកម្មវិធីច្រើនណាស់ ហើយពេលខ្លះយើងមានកម្មវិធីអប់រំច្រើន តែយើងមិនដែលបើកវា ព្រោះពេលវេលានៅជាមួយឧបករណ៍ទំនើបទាំងអស់នោះលឿនខ្លាំងណាស់ គ្រាន់តែចាប់ផ្តើមបើកកម្មវិធីកម្សាន្តតែបន្តិចយើងបាត់បង់ពេលវេលារាប់ម៉ោងដោយមិនដឹងខ្លួន”។
យុវជនខាងលើបានលើកឡើងផងដែរថា ក្រៅពីនេះ អារម្មណ៍របស់យើងងាយទទួលយកការកម្សាន្តជាងការអប់រំ ហេតុនេះហើយទើបពេលកាន់ទូរស័ព្ទម្តងៗ អារម្មណ៍របស់យើងជក់ចិត្តតែរឿងកម្សាន្តច្រើនជាង ហើយប្រសិនបើយើងរៀនវិញក៏អាចមានអារម្មណ៍មិនស្ងប់ដែរ ព្រោះពេលខ្លះអារម្មណ៍របស់យើងចេះតែចង់ប្រើប្រាស់វា។ ក្រៅពីនេះ ប្រសិនបើយើងមិនចេះគ្រប់គ្រងខ្លួនឯងឱ្យបានល្អទេនោះ យើងនឹងក្លាយជាមនុស្សពឹងពាក់ជ្រុលលើឧបករណ៍ទំនើបជាងសមត្ថភាពខ្លួនឯង។ ជាឧទាហរណ៍ នៅសាលារៀនបច្ចុប្បន្ននេះមួយចំនួន តែងតែទុកទូរស័ព្ទឱ្យស្តាប់គ្រូជំនួសតាមរយៈការថតសំឡេង ហើយចាំទៅស្តាប់នៅផ្ទះ តែស្ថានភាពជាក់ស្តែង នៅផ្ទះមិនសូវមានអ្នកណាស្តាប់ឡើងវិញនោះទេ ព្រោះរវល់ខ្លាំងពេកជាមួយការកម្សាន្តដ៏សម្បូរបែប។ ទាំងអស់នេះជាបញ្ហាប្រឈមមួយដែលយុវវ័យត្រូវប្រុងប្រយ័ត្ន ព្រោះពេលវេលាមិនរង់ចាំមនុស្សទេ ប្រសិនបើយើងធ្វេសប្រហែសតែបន្តិច យើងនឹងស្តាយក្រោយ ព្រោះមិនទទួលបានចំណេះដឹងពេញលេញ ក្រោយចេញពីសាលាដោយសារពឹងជ្រុលទៅលើឧបករណ៍ទំនើបជាងសមត្ថភាពខ្លួនឯងផ្ទាល់៕
