មនុស្សគ្រប់គ្នាសុទ្ធតែត្រូវឆ្លងកាត់ដំណើរជីវិតក្នុងពេលវេលាដែលចេះតែរំកិលទៅមុខឥតឈប់ឈរ ហេតុនេះពី 1ថ្ងៃទៅ 1ថ្ងៃប្រសិនបើយើងមិនអាចគ្រប់គ្រងខ្លួនឯងបានល្អទេនោះ យើងនឹងធ្វើឱ្យពេលវេលាក្នុងដំណើរជីវិតរបស់យើងខ្ជះខ្ជាយដែលកត្តាទាំងអស់នេះក៏អាចកំណត់បានពីវាសនាល្អ ឬអាក្រក់របស់យើងសម្រាប់ថ្ងៃអនាគតផងដែរ។
លោក នឹម ឈុន្នី សហស្ថាបនិក ក្រុមហ៊ុនអនាគតអាស៊ី បានលើកឡើងថា ការគ្រប់គ្រងពេលវេលាមានសារៈសំខាន់ខ្លាំងណាស់សម្រាប់មនុស្សម្នាក់ៗ ព្រោះពេលវេលាមិនអាចត្រឡប់ថយក្រោយបាននោះទេ ហេតុនេះប្រសិនបើយើងមិនអាចគ្រប់គ្រងពេលវេលាបាន យើងនឹងខ្ជះខ្ជាយពេលវេលា ហើយធ្វើឱ្យជីវិតរបស់យើងជួបការលំបាក។ មនុស្សម្នាក់ៗត្រូវតែគ្រប់គ្រងពេលវេលាឱ្យបានល្អ ព្រោះភាពជាមនុស្សគឺអាចធ្វើរឿងរ៉ាវដ៏អស្ចារ្យជាច្រើន តែកន្លងមកមនុស្សខ្លះចេះតែបណ្តែតបណ្តោយឱ្យពេលវេលាខាតបង់ទៅដោយមិនបានបង្កើតស្នាដៃ ឬធ្វើការងារឱ្យមានប្រសិទ្ធភាព។
លោក នឹម ឈុន្នី បាននិយាយថា៖ “បើមិនចង់ឱ្យយើងខាតបង់ពេលវេលាច្រើន មនុស្សម្នាក់ៗគួរឧស្សាហ៍រំឭកខ្លួនឯង ដោយតាមដានឱ្យដឹងពីអ្វីដែលត្រូវធ្វើ និងមិនទាន់ធ្វើក្នុងថ្ងៃនីមួយ។ យើងគួរចំណាយពេលធ្វើសមាធិនៅមុនពេលគេង ហើយគិតពិចារណាពីការងារដែលយើងបានធ្វើនៅក្នុងថ្ងៃនេះ ដើម្បីឱ្យដឹងថា តើយើងបានធ្វើអ្វីខ្លះ? និងមិនទាន់បានធ្វើអ្វីខ្លះ?”។
អ្នកជំនាញផ្នែកអភិវឌ្ឍន៍សមត្ថភាពផ្លូវចិត្តខាងលើកឡើងផងដែរថា ក្រៅពីការតាមដានស្មារតី និងសកម្មភាពការងារមុនពេលគេងហើយ យើងក៏គួរតែចេះគ្រប់គ្រងខ្លួនឯងពេលភ្ជាក់ពីគេងផងដែរ ដើម្បីឱ្យយើងមានស្មារតីល្អដើម្បីបំពេញការងារដែលមានន័យសម្រាប់ជីវិតរបស់យើងពេញ 1ថ្ងៃ។ ការងារដែលយើងត្រូវធ្វើដំបូងមុនពេលគេង គឺស្ទាបខ្លួនឯង ហើយអរគុណសម្រាប់ខ្លួនឯងដែលនៅមានជីវិត មានស្មារតី មានសុខភាពល្អ និងបានធ្វើការងារដ៏មានន័យជាច្រើនសម្រាប់ខ្លួនឯង បន្ទាប់មកយើងគួរពិចារណាពីការងារដែលយើងកំណត់អាទិភាពសម្រាប់ធ្វើនៅក្នុងថ្ងៃនេះ ដើម្បីធានាថាយើងអាចធ្វើការងារដោយតុល្យភាព មិនលោភហួសមាឌពេក និងមិនខ្ជះខ្ជាយពេលវេលាច្រើនពេក។ ប្រសិនបើយើងអាចរៀបចំបែបនេះបានហើយ យើងនឹងមើលឃើញថា តាមពិតទៅ យើងអាចធ្វើរឿងជាច្រើនបានដោយល្អ ដោយរីករាយ និងមិនស្មុគស្មាញនោះទេ។
ព្រះតេជគុណ គូ សុភាព សាស្ត្រាចារ្យនៃសាកលវិទ្យាល័យបញ្ញាសាស្ត្រកម្ពុជា បានលើកឡើងថា ពេលវេលាទំពាស៊ីជីវិតមនុស្សរាល់ថ្ងៃ ហើយគ្មានអ្នកណាម្នាក់អាចឃាត់ឃាំងពេលវេលាមិនឱ្យទៅមុខបានទេ។ ចំណុចនេះមានន័យថា មនុស្សត្រូវចាស់ឡើងៗរាល់ថ្ងៃ ទោះយើងធ្វើការងារ ឬរស់នៅបានល្អ ឬមិនល្អ ក៏ពេលវេលាវាចេះតែដើរទៅមុខទៅជារៀងរហូត។ហេតុនេះប្រសិនបើយើងមិនចង់ឱ្យជីវិតយើងរស់នៅនិងចាស់ទៅដោយឥតន័យ យើងគួរចេះធ្វើល្អឱ្យច្រើននិងគ្រប់គ្រងពេលវេលាឱ្យបានល្អ។ មនុស្សដែលខ្ជះខ្ជាយពេលវេលាច្រើនដោយឥតន័យ ភាគច្រើនជាមនុស្សឡេះឡោះ គិតនេះគិតនោះមិនច្បាស់លាស់។ការគិតបែបនេះនឹងធ្វើឱ្យមនុស្សបាត់បង់ថាមពលនៃការផ្តោត ហើយធ្វើឱ្យយើងបានត្រឹមតែគិតយ៉ាងគ្មានសណ្តាប់ធ្នាប់ បន្ទាប់មកមិនដឹងចាប់ចំណុចមួយណាធ្វើមុន ក៏បណ្តោយឱ្យវាកន្លងផុតទៅទាំងអស់ដោយមិនបានធ្វើ។ បួនដប់ឆ្នាំក្រោយមក យើងនឹងមើលឃើញថា គំនិតដែលយើងគិតទាំងអស់នោះក៏រលាយទៅតាមពេលវេលាដែលយើងគ្មានភាពច្បាស់លាស់នោះដែរ។
ព្រះតេជគុណ គូ សុភាព បានមានសង្ឃដីកាថា៖“មនុស្សយើងម្នាក់ៗត្រូវដឹងខ្លួនឱ្យច្បាស់ថា យើងកំពុងធ្វើអ្វី ហើយត្រូវរៀបចំទាំងគំនិត និងសកម្មភាពឱ្យមានរបៀបរៀបរយ ឱ្យមានសមាធិ ដើម្បីផ្តោតលើការងារមួយឱ្យបានល្អ”។
ព្រះតេជគុណបានបន្ថែមទៀតថា មនុស្សពូកែ តែប្រសិនបើឡេះឡោះ មិនព្រមធ្វើសកម្មភាព ពេលខ្លះមិនអាចសម្រេចកិច្ចការងារបានច្រើន និងល្អបានទេ តែពេលខ្លះមនុស្សធម្មតាម្នាក់ ធ្វើម្តងបានបន្តិចៗ តែរក្សាសកម្មភាពជាប់ជាប្រចាំដោយការព្យាយាម យូរទៅក៏អាចបង្កើតបានស្នាដៃជាច្រើន។ ហេតុនេះការគ្រប់គ្រងខ្លួនឯងមានសារៈសំខាន់ខ្លាំងណាស់ទាំងការរស់នៅ ការរកស៊ី ឬការធ្វើការងារជាដើម។ ប្រសិនបើយើងមានរបៀប ការងារទាំងអស់ដែលធ្លាប់គិតថាលំបាកវានឹងទៅជាការងារងាយស្រួល ព្រោះយើងបានតាមដានដឹងពីចំណុចល្អិតៗនៃការងារនោះ បន្ទាប់មកក៏ចាប់ផ្តើមធ្វើវាតាមលំដាប់លំដោយ៕
