បញ្ហាបម្រែបម្រួលអាកាសធាតុ បានក្លាយជាប្រធានបទក្តៅសម្រាប់កិច្ចប្រជុំសំខាន់ៗរបស់មេដឹកនាំលើពិភពលោក និងសម្រាប់ប្រទេសធំៗដែលសម្បូរទៅដោយឧស្សាហកម្មធំៗអាចប៉ះពាល់ដល់បរិស្ថាន។ ទន្ទឹមនឹងនេះ ប្រទេសនានាក៏បានចំណាយកញ្ចប់ថវិកាយ៉ាងច្រើនដើម្បីទប់ស្កាត់បញ្ហាពាក់ព័ន្ធនឹងផលប៉ះពាល់អវិជ្ជមានចំពោះការឡើងកម្តៅផែនដី និងការបំពុលបរិយាកាសជាដើមដែរ។
ក្នុងចំណោមបញ្ហាធំៗដែលនាំឱ្យមានកត្តាប្រឈមលើពិភពលោក ការប្រើប្រាស់យានយន្ត និងការរីកចម្រើននៃទីក្រុងជាផ្នែកសំខាន់មួយនៃផលប៉ះពាល់ចំពោះជីវិត។ ជារៀងរាល់ឆ្នាំ អ្នកស្រាវជ្រាវបានរកឃើញថា ការពុលខ្យល់អាកាសអាចធ្វើឱ្យមនុស្សស្លាប់ជាច្រើននាក់ ទន្ទឹមនឹងនេះវាក៏បានប៉ះពាល់ដល់ជនរងគ្រោះជាច្រើនផ្សេងទៀត ដូចជាកុមារ និងស្ត្រីមានផ្ទៃពោះជាដើម។ ហេតុនេះហើយទើបប្រទេសខ្លះព្យាយាមកាត់បន្ថយការប្រើប្រាស់យានយន្តផ្ទាល់ខ្លួនមកផ្តល់សេវាដឹកជញ្ជូនសារធារណៈរួមគ្នាវិញ ដើម្បីកាត់បន្ថយផ្សែងក្នុងទីក្រុង។ រថភ្លើង និងរថយន្តក្រុងក្នុងតម្លៃរាប់ម៉ឺនរាប់លានដុល្លារត្រូវបានគេដាក់ឱ្យដំណើរការកាន់តែច្រើនឡើងៗ ទាំងនៅក្នុងប្រទេសអភិវឌ្ឍន៍ធំៗ និងប្រទេសកំពុងអភិវឌ្ឍន៍ ក្នុងគោលបំណងប្រមូលប្រជាជនឱ្យកាត់បន្ថយការប្រើប្រាស់រថយន្ត។
ទន្ទឹមនឹងនេះ ពិភពលោកបានឈានមួយជំហានទៀតគឺ ជំរុញឱ្យប្រជាជនប្រើប្រាស់យានយន្តគ្មានផ្សែងនោះគឺរថយន្តអគ្គិសនី។ រថយន្តប្រភេទនេះថ្វីដ្បិតតែមិនអាចកាត់បន្ថយផលប៉ះពាល់អវិជ្ជមានទាំងស្រុងលើពិភពលោកបានក៏ដោយ តែក៏អាចកាត់បន្ថយបានច្រើនដែរ ព្រោះវាគ្មានផ្សែង ហើយត្រូវការថាមពលអគ្គិសនីមិនច្រើនពេកនោះទេដើម្បីដំណើរការវា។
នៅប្រទេសន័រវែស បច្ចុប្បន្ននេះ អ្នកដែលប្រើរថយន្តអគ្គិសនីមិនចាំបាច់បង់ពន្ធផ្លូវទេ ហើយពន្ធនាំចូលក៏មិនបាច់បង់ដែរ រួមទាំងការអនុគ្រោះដទៃផ្សេងទៀត ដូចជាទទួលបានចំណតដោយឥតគិតថ្លៃ និងបញ្ចុះតម្លៃ 50% សម្រាប់រាល់ការឆ្លងស្រឡាងជាដើម។ការធ្វើបែបនេះត្រូវបានគេរំពឹងថា ការផលិត និងការនាំចូលរថយន្តថ្មីៗដែលជាប្រភេទរថយន្តអេឡិចត្រូនិក នឹងមានការកើនឡើង ហើយប្រជាជនអាចនឹងផ្លាស់ប្តូររថយន្តដែលប្រើប្រាស់ឥន្ធនៈមកប្រើប្រាស់រថយន្តអេឡិចត្រូនិកដើម្បីទទួលបានផលចំណេញទាំងសម្រាប់ខ្លួនឯង និងបរិស្ថានវិញម្ដងមិនខាន។
ងាកទៅអូស្ត្រាលីវិញ ក៏កំពុងមានក្តីបារម្ភផងដែរចំពោះបញ្ហាគុណភាពខ្យល់នៅក្នុងទីក្រុងដែលកើតចេញពីយានយន្ត។ ពួកគេក៏កំពុងព្យាយាមក្នុងការកាត់បន្ថយការប្រើប្រាស់ប្រេងឥន្ធនៈដើម្បីជួយសម្អាតខ្យល់យល់ និងប្រើប្រាស់វិធីជាច្រើនផ្សេងទៀតដើម្បីធ្វើឱ្យបរិយាកាសល្អប្រសើរឡើង។ ពួកគេកំណត់ឱ្យរថយន្តដែលប្រើប្រាស់ប្រេងសាំងបើកត្រឹមតែ 100kmចុះក្រោមប៉ុណ្ណោះក្នុង 1ម៉ោងនៅលើផ្លូវមួយចំនួន តែអនុញ្ញាតឱ្យរថយន្តប្រើប្រាស់អគ្គិសនីអាចបើកបរបានរហូតដល់ទៅ 130km/h។
ចំណែកឯប្រទេសបារាំងវិញ បានផ្តល់លុយចំនួន 6,000អឺរ៉ូចំពោះអ្នកទិញរថយន្តអគ្គិសនីថ្មី ហើយផ្តល់លុយ 4,000អឺរ៉ូបន្ថែមទៀតប្រសិនបើប្រជាជនចង់ផ្លាស់ប្តូររថយន្តដែលប្រើសាំងទៅប្រើរថយន្តអគ្គិសនីវិញ។ ការធ្វើបែបនេះអាចជួយឱ្យប្រជាជនចំណាយកាន់តែតិចដើម្បីទិញរថយន្តអេឡិចត្រូនិក ដែលនាំឱ្យពិភពលោកមានចំនួនរថយន្តដែលអាចជួយដល់បរិស្ថាននេះកើនឡើងយ៉ាងឆាប់រហ័ស៕
